بين ظلماتهم وعتمت عالمي
اجدني واقفه بصبر
كل لحظه يرادوني قلق
خوف من طغيانهم
...
سديم...
كلمة تميم رغم كالها بسهولة بس هدت حيلي
ليش مو مثل بيبي دافع عن فكره الزواج
معقولة لهل درجه يريد يخلص مني
كمت بضجر واردفت
_ماكو داعي لهذا كلامك واصلا غلطي من البداية المن احجي الك عود اعتبرتني مثل شمس وتكلي تزوجي لو معتبرني بنت صلاح شتسوي
كال بهدوء وابتسامه استهزاء مرسومه على تقاسيم وجهه
_يحلوة على شنو الاعصاب هسه انا شكلت ماغير ابوج ويعرف وين مصلحتج
رجف كلبي من كلامه صوجي احجي اله
يعرف بابوي وسوالفه هسه جاي يبيع مثاليات براسي
باوعتله باشمئزاز وتحركت من مكاني اريد اطلع
_اوكفي هسه ماكلتيلي شنو قرارج تزوجين لا
على كد ماجنت مقهورة على كد ماقهرني اضعاف
_مادخلك انت
_لاه لاه ليش شنو بالج احد؟
فتحت عيوني بصدمه من كلامه
يفكر عكس البشر
كعدت على السرير اهز برجلي
_بالي احد مووو تميم وصلت حدها وياك
خزرني وهوا يكول
_جاوبي
_لا مابالي احد لان مافارغه لهذا تفكيرك السخيف
دنك راسه مسح وجهه وهوا يوجه نظره الي
_كلبي السحر على الساحر
عقدت حواجبي باستفهام
_مافهمت شنو يعني
_يعني بدل مامحتاره بشيماء خلي شيماء تحتار بيج
بدل ماخايفه من ابوج زرعي الخوف بيهم خصوصا شيماء مدري منين جابها ابوج واجه يركض بيها ب المختصر مو راحه وعندها سوابق هواي من غير المصايب الهسه صيري ذكيه وبطريقتج بعد تعرفين شتسوين
صفنت بوجهه افكر بكلامه ذ
شيماء اكدرلها بس ابوي لا ماكدرله
_اممم هم مافهمت
_فكري بكلامي وانتي تفهمين وانوب لاتصعدين هنا
_يعني شلون تريدني اعرف شيماء شتسوي وماصعد
_مادري بس ماريد اشوفج هنا
كالها وكام يطلع
سطرني بكلامه ضليت صافنه بمكاني
صارت كل سالفتي شيماء
عيني على اولادها مايتقربون النه ابد
مر كم يوم الناس بلشت تختفي نوعا ما محد يجي وعزايم وطبخ ويعزون
جان يوم خميس
مسوين ثواب وعازمين كرايبهم
نتظرت شيماء تنزل من الغرفه علمود اصعد
للعصر كاعده وعيني على الدرج
نزلت تتمخطر بلبسها المشلتح وعلجها الي لو الزمه افركه بحلكها
ضليت احوس مكاني شلون اكوم
ردت اصعد واجتي بنيه من كرايبهم تحجي وياي وتشاقه
كوة كدرت اسحب نفسي منها
صعدت حابسه انفاسي كانو اريد اسرق شي بس جانت نتيتي اشوف شنو بغرفتها
لكيت بشائر تخابر باوعتلي بتوتر ماهمني
دخلت الغرفتها وجان القفل ب الباب قفلت الباب
وجريت نفس براحه
الملابس الجانت لابستهن مشمورات ع السرير وملابس جهالها ب الكاع شكد قذره هاي
فتحت الكنتور جان بدون قفل
احتاريت بشنو ادور وشنو اريد ب الضبط
الملابس كلهن هوسه ب الكنتور بدون ترتيب
ضليت اكلب ب الملابس فصخت الكنتور مالكيت شي
جان ميز التواليت يم الكنتور
صعدت عليه ادور فوك الكنتور لكيت فراشات
سحبت اول واحد رفعته ليفوك
لكيت صندوك صغير
عيني ع الباب وعيني ع الصندوك
فتحته وجانت صدمتي هنا
لكيت كومه ذهب
ضليت فاتحه عيوني من دهشتي رفعت الذهب بيدي
كل جسمي قشعر حسيت لازمه شي حرام او كانو اني سارقته
متاكده ابوي ماعنده فلوس يشتريلها هلكد ذهب ولا مره شفتها لابسته رجعته المكانه
نزلت للكاع وكانو احد ضربني على راسي من الشفته
باكيت جكاير جوا المخده ع السرير
معقوله هيه تشرب لان ابوي ياخذه وياه من يطلع
اجت بالي فكره
طلعت اركض البشائر ادورها نزلت جوا ركض الهث واسأل الموجودين عليها الي كاعدات يسولفن والي منطلقات يضحكن والي ماليهن الحزن على اخوهن
امشي واسب بشائر لان اختفت فجأه
صعدت فوك ادورها ب الغرف استوقفني صوت عباس وهوا يطلب ومادلي دشداشته السوده
_سديم كويلي هاي الدشداشه اريد انزل يم الشباب
كلت بدون مباله
_عباس مافارغه روح لجمانه
_شبيجن كلجن خبيثات وحده تشمرها براس الثانيه هسه انا شطالب
_اهووو عباس انطيني بسرعه اكويها
اخذتها منه وهوا يضحك ويتشكر ورا ماعفس وجهه من رفضت
نزلت اريد اكويها بغرفه بيبي
لكيت نسوان كاعدات حطيت المكولية واكويها سريع بس اريد اشوف بشائر وين راحت
بيبي كاعده ويمها نسوان ثنين من عمرها تقريبا ويمهن بنت عمه حنان
دخلت حنين وراها تميم بالي مو وياهم ولا عيني عليهم نبهني صوت حنين وهيه تكول
_حبوبه سديم اجيبلج قميص تكوينه وياج
بلعت ريكي شلون سالفه هاي
_ها حنون انتي اكوي عفيه بشائر تصيحني رفعت الدشداشه الها
_وياج اخذيها العباس يريدها
_هذا عباس يفتر على البنات يكوله ولا وحده قبلت خطيه والله
من كالت هيج رفع راسه تميم الكاعد يم بيبي كال من بين سنونه
_انطيني انا اخذها اله ثاني مره ماشوفكم فوك
جريت نفس بصبر الكلمه هاي لازم يوميه اسمعها
عفتهم وادور على بشائر وكفت ع الدرج اباوع للموجودين حنين عينها عليه وتهز راسها بلا بمعنى اخذي كلام تميم ولا تصعدين ماهتميت الها
ركضت لفوك السطح المكان الوحيد الي مادورت بشائر بي
شكد جنت امشي سريع
استوقفني صوت شهكات بجي
كانو اليبجي يصارع الم جبير بداخله
جريت نفس بصبر هاي بشائر
تقدمت نحوها بخطوات ثقيله
ايديها الي بارزات شراينها منهن على وجهه
رفعت عيونها لجهتي
رموشها الي ممليات ب الدموع
بياض عينها الي صاير احمر من البجي
شفايفها وخشمها الي طاغي عليهن الحمار من البجي
لون عيونها الضارب بي الشمس قريب لونهن على لون الشمس
حطيت ايدي على وجها
اردفت بصوت متحجر
_بشائر ليش هيج تسوين بروحج
_عوفيني سديم روحي طالعه
_بشائر ماعندي وقت اريد تلفونج اليوم كله
مسحت دموعها من عيونها بشوغه
ضيكت عيونها باستفهام
_لا عبالج مملاحظتج انتي وراج سالفه شعندج
_مافارغه هسه بس انطينس التلفون
حطته بيدي وهيه تكول
_ادري بيج مستوين شي غلط بس مهما يصير ديربالج
هزيت راسي وطلعت اركض من يمها
YOU ARE READING
قلوب بليده
Romanceانا عينيك الثالثه انا نفسك الثاني انا قلبك الذي لا يتوقف فكرك الذي لا يهدأ انا حرب لاتنتهي انا عصف حياتك انا كل عثراتك
