سبحة الليل طويل وصنطه يتراوالي حس
ضلمه بس ضوتلي جروحي خيط من الشمس
ادري تعرف كلشي بيه
بكلبي اسولفلك علي
شما شمرتلهم ايدي
تردلي شبجه بلايه شص
سفره ممدوده السوالف
لا عتب ضلت بقيه
وناس اكلت ناس من جتهم فرص
.....
بقلمي
زينب
غسق...
افكار تتضارب براسي وحيلي نهد من افكاري حجيت بصوت مبحوح
_انت ويه صفاء
عقد حواجبه باستفهام شمر جكارته ب الكاع وداس عليها
_شنو
_لا تاذيني والله ممسويه شي الصفاء رجعني لابوي لو حتى يمه ب السجن بس لاتعوفني هنا
رخت ملامحه وهو يحجي وياي
_هيج تظنين بي
_واكثر
جر نفس رجع شعره ليورا وكال
_من اول مكالمه عرفت انتي منو مجرد ماكلتي اسمج وتاريخ سجن ابوج رحت للبصره بحجه ازور امي بس ب الواقع اني رحت الاخوي ب البصره وجان عنده علم بخبر طلعت ابوج وقتها الفرحه مسايعته بسبب حسين الي منع اعرف عنج شي او اخبرج بشي ماقبل مو لان عنده علم اني اعرف بكلشي ابد مجان يعرف شي بس هو اصر انتو تدورونه لهذا سحبت نفسي عنكم
اخوي مسولفلي عن صداقته ويه ابوج وبسبب سجنه وشلون حيبقى مديون بحياته طول عمره الابوج وشلون انتي اختفيتي من البصره كلفني ادور عليج جان يحس ب الذنب بكلشي صار بس للاسف ماكدرت الكه الج اثر بس كلتيلي اسمج خابرت الاخوي بنفس اليوم الي رحتي بي للبصره اني هم رحت وبلغت ابوج انتي تدورين علي وجايه للبصره وانتي جنتي سباعيه بنفس اليوم عرفتي ابوج منو وبنفس اللحظه مخابره الابن عمج
ماتدرين غسق شكد جنت ادور عليج بس علمود اخوي مايحس ب الذنب درت مستشفيات اسأل مناطق لحد ما ايست الكه الج اثر
يحجي بهدوء وهو يباوع للفراغ بدون مايرمش
الغصه وكفت بلعومي وجهي احتقن شكد جنت قريبه من ابوي شلون القدر وضع عزيز بطريقي شلون كل هاي الصله بينه واني سنين مثل الاطرش ب الزفه لو بس محاوله استخير حسين ويعرفني على عزيز جان لكيت ابوي من زمان
مسحت وجهي بتوتر واني اباوع بعيونه
_جاي احسني وسط فلم مجاي اوازن شي شلون الاقدار هيج جمعت بيناتنه تعرف شنو الصار عزيز
_شنو
_ب البيت الجديد الي اجرناه اريد اسولفلك احسني راح اختنك اذا اضم اكثر
_دخلي للبيت نسولف
انتبه علي واني لازمه ايدي الاذاها
حك كصته بطرف ابهامه وهو يكول
_ماكدرت الزم اعصابي تستفزيني انتي
_انت تريد محد يجادلك على ابسط شي تعتبره استفزاز
اكو قنفه يم باب المطبخ كعد عليها وهو يكول
_تعالي سولفي شنو صار
تربعت ع القنفه الكاعد بيها واني اسولفله
_شوف ماعرف شنو تدري عني ب الضبط بس من اجرنه هذا البيت العصر اجه صفاء بدون استأذان دخل للبيت
ضحك باستهزاء وهو يكول
_واحد مثل صفاء تتوقعين يستاذن اجه العصر بدون متشوفينه ابد قبل هاي الفتره
ركز بعيوني وشدد على اخر كلامه
أنت تقرأ
قلوب بليده
Romanceانا عينيك الثالثه انا نفسك الثاني انا قلبك الذي لا يتوقف فكرك الذي لا يهدأ انا حرب لاتنتهي انا عصف حياتك انا كل عثراتك
