طيوف الماضي

البارت(10) طيوف_الماضي الكاتب#احمد

تصويا ومتابعه لحتى توصلكم باقي البارتات والقصص❤
#طيوف_الماضي
بقلم #احمد
البارت_10
.
.
انداريت اريد ارجع شفت السيد واكف عند باب الصالة ومبتسم من وصلت عندو كال لعد شلون تقرين انتي كلتلو اكو من يجيبلي كال ما اجيبلج كلتلو ما جنت اقصدك وعفتو ودخلت طبيت للغرفة قبل ما اسكر الباب دفعو ودخل
.
.
السيد: شبيج انتي
جنى: مابي شي
السيد: ترا فهمنا زعلانة بس طوختيها
.
.
جنى: كيفي
السيد: راح تبقين زعلانة طول عمرج
جنى: اي طول ما انت موجود ابقى زعلانة
.
.
السيد: زين خلينا نتصالح وننهي هالخلاف هذا
جنى: اذا تريدني ارضى اخذني لعمي علي
السيد: هالشي مستحيل جنى
.
.
جنى: لعد مستحيل ارضى
السيد: طبج مرض ابقي زعلانة
جنى: بعد احسن
.
.
طلع ضايج والله حلو فوك ما خاطفني وحابسني هو الزعلان اصلا انت حرام تكون بشر وانت هيج طبعك عبالو راح ارضى بسرعة وانسى الي سواه
.
.
مرت الايام والايام صارت اسابيع والاسابيع صارت شهور والشهور صارت سنين واني محبوسة بهالبيت جنت مثل الشخص الي بيه مرض معدي وممنوع احد يتقربلو
.
.
جنت كل يوم اكول راح يجيني عمي وكل يوم يخيب املي اكثر بس للامانة السيد ما جان منقص علي شي جان شكو شي اريدو يوصلني
.
.
قران اشتريت غير الي انطيتو للحارس والحارس بعد ما انطيتو القران بفترة ترك الشغل واجى واحد غير وهم رجع هو والثاني بالليل ركص وشرب لحد ما ينسطرون ويروحون ينامون
.
.
والسيد ما تغير بقى مثل ماهو ما يتدخل بيهم بس حسب الي يحتاجهم بيه والباقي ما يتدخل بيه اني كضيت كل وقتي بين الالعاب الي كل كم يوم يجيبلي منهن الحارس وبين الطبخ الي جنت اتعلملو وقراة القران
.
.
صحيح جان عقلي جبير والالعاب للاطفال بس اني من الملل اوصي الحارس يجيبلي العاب ومن امل منهن يجيبلي غيرهن
.
.
بس جنت اعشق العاب اختبار الذكاء لان احس نفسي ذكية من اكملهن وبخلال هالفترة الطويلة اتقنت هواي اكلات
.
.
وجنت كل ما يجيبلي السيد او الحارس كتاب وصفات ابقى اجرب لحد ما احفظ الاكلات عالغيب واتركو ويجيبون غيرو
.
.
وحلويات صرت احسن من الف شيف لدرجة كمت اخترع اكلات وكيك شكد ما تعلمت كبرت بالعمر والعقل ورا بعض جنت كل يوم اعتبر نفسي كبرت سنة
.
.
واحس كل يوم يتغير تفكيري ونظرتي للحياة بعمر ال 12 احس عقلي بعمر ال 20 وبعدها صرت 13 و 14 لحد ال 17 سنة واني بمكاني
.
.
جسمي كبر صارت عندي طاقة اكبر صرت اتقيد بوجود السيد عكس قبل صحيح افرح من يجي لان اطلع بالحوش بس اتقيد من يكون هو او الحراس قريبين علي
.
.
ولهذا السبب خليت الحراس يزرعون اشجار حول الحديقة ومن كبرن كمت اكعد وراهن علمود ما يشوفوني وهم من يعرفون طلعت ما يتقربون عالحديقة يبقون بعيدين
.
.
والسيد هم تحججت بالزعل علمود ما ننجمع سوا رغم جان زين وياي وموفرلي طلباتي بس ماكدرت انجذبلو وهو حاول اكثر من مرة يراضيني بس جنت اصر عالزعل علمود يبقى بيناتنا حاجز وما نحجي هواي ويا بعض
.
.
بعد ما صار عمري 17 عرفت انو بعدلي سنة ويروح تعب ابوي كلو للغير واذا راحن ماكدر ارجعهن لان راح يجبروني اوقع على تنازل وقتها اخسرهن بشكل قانوني
.
.
جنت دائما افكر بطريقة تطلعني من هالمكان بس ما الكي نتيجة مرة من المرات صعدت للبيتونة باوعت للشباك والباب اذا كدرت افتح واحد منهن اكدر انهزم
.
.
بس شلون اكدر افلشهن بدون ما يعرفون وشلون اكدر افلشهن اساسا رحت دورت بالبيت جانت اكو عدة مالت تصليح بالبيت بيها درنفيسات وبراغي
.
.
اخذت درنفيس قوي وخليتو عندي بالبيتونة وبقيت تحت وانتظرت لحد ما صارت الدنيا ليل وطلعو الحراس بالخارج يشربون ومشغلين اغاني
.
.
ورحت فوك حددت مكان بلوكتين بس ماعندي شي ادك بيه علمود احفرهن نزلت تحت دورت ماكو ابد كل الغراض الموجودات بالبيت خفيفات وما يندك بيهن
.
.
اخير شي فقدت الامل ورحت نمت ثاني يوم الصبح بعد ما تريكت اجى السيد وفتح الباب واخذ كرسي وطلع واني اخذت العابي وطلعت خارج
.
.
حطيتهن بالحديقة ورحت افتريت حول البيت ولكيتلي حجرة حجمها جان مناسب اخذتها وحطيتها بين العابي جانن اكثرهن ما احتاجهن بس طلعتهن علمود احط الحجرة بينهن
.
.
اخذت لعبة مالت اختبار ذكاء ولعبت بيها لل 10 شلت الالعاب والحجرة رجعتهن لغرفتي وشلت الحجرة بين الملابس علمود ما تبين وانكشف
.
.
سويت غدا وانتظر الليل على نار بس جنت كوة مسيطرة على نفسي من الارتباك واحس على شوية ويكشفوني بس الي سهلةعلى الامر انو السيد ما يحجي وياي فماراح يلاحظ ارتباكي
.
.
وبهذا اليوم اكلت هواي علمود جسمي يصير بيه طاقة من انهزم واحتمال ابقى يوم يومين بدون اكل جنت احط احتمالية لكل التوقعات مهما كانت نسبتهن ضعيفة
.
.
من صارت الدنيا عصر السيد راح اني اخذت علاكة وحطيت بيها من الحلويات الي جابهن الي الحارس ومن الكيك الي مسويتو
.
.
ورحت للغرفة حطيت ملابس بعلاكة بس ما جان عندي عباية كلها ملابس بيت عادية وفلوس ماعندي هم بس كلت مو مشكلة اهم شي انهزم
.
.
انتظرت لحد ما بلشو الحراس بسهرتهم والتهو بصوت الاغاني واني اخذت الحجرة وبلشت ادك بيها من حسن حظي جان البناء مو متماسك لان مبنيات لحالهن الشباك والباب وفوك هاي مو مرشوشات زين بس مع ذلك مو سهلة الشغلة لهذا الحد
.
.
بقيت الليل كلو احفر بيهن لحد ما صارت الفتحة توسعني واكدر اعبر من خلالها بس الدنيا فجر وماراح استفيد شي اذا انهزمت هسا
.
.
عبرت عالسطح وشفت المكان جنت اكدر انزل عالحمام لان مو مرتفع مثل البيت ومن الحمام انزل للكاع وانهزم صحيح مسافتو مرتفعة بس اهم شي ما ابقى
.
.
رجعت دخلت للبيت وحطيت غراض كدام الفتحة علمود ما تبين ورجعت نمت بس ياريت كدرت انام من الخوف والارتباك ثاني يوم السيد ما اجى وهمزين ما اجى
.
.
وهم انتظرت لحد ما بلشو الحراس بسهرتهم سكرت الشباك مال البيت وحطيت البردة كدامو واخذت علاكة الحلويات والملابس وعبرتهن من الفتحة وعبرت وراهن
.
.
ونزلت عالحمام وزتيت العلاليك للكاع ودندلت نفسي مع الحايط ونزلت ورجلي كامت توجعني بس وجع خفيف شوية واختفى رحت من ورا البيت صعدت فوك الحايط
.
.
ومن نزلت تمسكت بالعلاليك وركضت الدنيا ليل والمكان فارغ وموحش بشكل مو طبيعي واني لحالي ما وياي احد كمت اركض وابجي واني ماعرف شنو مصيري بهالليل
.
.
بقيت اركض وكل ما اتعب ارتاحلي شوية واكمل ركض طول الليل واني اركض وين وصلت وشكد المسافة ماعرف بس الي اعرفو اني ما شفت اضوية بيوت بطريقي كلو
.
.
من صارت الدنيا فجر جان اكو وادي قريب رحت بيه وتأكدت انو فارغ من الحياية وكعدت بيه ارتاحيت شوية واكلت وكملت طريقي
.
.
مع طلعة الصبح شفت بيوت بس بعيدات كلش بقيت اركض لحد ما وصلتهن دكيت الباب طلعتلي مرة جبيرة بالعمر رحبت بي كلتلها الله يوفقج خالة ضميني عندج
.
.
الحجية: منو انتي
جنى: بس خليني ادخل واحجيلج
الحجية: تفضلي يمة تفضلي
.
.
جنى: دخلت داخل انطتني ماي بس خايفة مني
الحجية: يمة انتي منهزمة من اهلج
جنى: لا خالة اهلي كلهم ميتين
.
.
الحجية: وشنو جابج هنا
جنى: اني انخطفت من زمان والبارحة بالليل انهزمت وانتو اول بيت طلع بطريقي من وصلت المنطقة هاي
.
.
الحجية: بسم الله ومنو خاطفج
جنى: ماعرف بس اذا لكوني يقتلوني
الحجية: وين تروحين هسا
.
.
جنى: من سألتني هيج مبين من طريقة كلامها انو ما تريدني ابقى عندها ووياها حق لان الناس تخاف لا يكون وراي طلابة لو شي واسببلهم مشاكل
.
.
كلتلها بس ابقى هنا لليل واروح كالت ماشي بقيت عندها سوتلي ريوك ومن التعب نمت ما كعدت للعصر كالتلي علمود الغدا ورفضت كلتلها ما اشتهي
.
.
بقيت لليل سوتلي عشى وردت اروح كالت اكلي بعدين روحي علمود ما تجوعين بنص الطريق اكلت شوية وتشكرتها وطلعت كملت طريقي
.
.
جانت المنطقة صغيرة بسرعة طلعت منها بعد ما عبرتها بمسافة انتبهت ان علاكة الحلويات مو موجودة اني متأكد من اكلت الفجر حطيتها ويا الملابس
.
.
حاولت اتذكر وتذكرت اني طلعتها من جنت عند الحجية ونسيتها هناك وصرت بعيدة عنها كلت ختولي اكمل والي كاتبو الله يصير
.
.
مشيت بنص الليل جنت احس بخوف مو طبيعي ماعرف على اي ساعة يهجم علي حيوان مفترس لو تلدغني حية بنص هالظلام بدون ما اشوفها واموت ومحد يدري عني
.
.
للحضة تمنيت انو مو منهزمة بس ما يفيد بعد هسا حتى لو ردت ارجع لا السيد راح يسامحني ولا اندل البيت وارجعلو شفت اضوية بيوت على يميني
.
.
اتجهت عليهن ادورلي ملجئ بنص الليل ومن صرت قريبة سمعت صوت جلاب عدهم والدنيا نص ليل اذا مسكني الا يكطعني ومن الخوف غيرت طريقة وابتعدت عنهن
.
.
جانت مبينة قرية والقرى متروسة جلاب فكلت اروح بغير اتجاه احسن ما يعضني جلاب وبين ما يكعدون اهل القرية اصير في خبر كان
.
.
كملت طريقي ومالي بهالظلام غير ربي الي يكدر يحميني من كلشي جنت امشي واردد بسم الله سبحان الذي لا يضر مع اسمه شيء في الارض ولا في السماء وهو السميع العليم
.
.
طول الطريق واني اردد بيها ومتأكدة ربي راح يحميني بس هالمرة طلع علي النهار واني بمنطقة فارغة وماكو ناس بقيت امشي وكتلني الجوع والتعب والجو جان حار لان صيف
.
.
كمت من التعب والحر كوة امشي ما حسيت على نفسي وفقدت الوعي واكيد فقدان الوعي مو بس من الجوع والحر جان التوتر والخوف الو تأثير قوي
.
.
كعدت الدنيا جانت عصر ملابسي صايرات ماي من العرك وكل هالحر واني مادري بنفسي مدري شلون ما متت كمت على حيلي الي مابقي منو بس شوية
.
.
باوعت يمين يسار ماعرف من اي اتجاه جنت امشي شفت من بعيد سيارة دا تمشي بس تبين بكبر النملة على كد مو بعيدة وعرفت ان اكو شارع على طريقي واتجهت عليه
.
.
شو امشي وامشي والشارع ماكو والسيارة ماعرف وين صارت مدا اشوفها كملت طريقي وصارت الدنيا ليل والشارع ماكو فقدت الامل من الشارع وكملت طريق كلت يجوز الشارع متجه لغير جهة واني توهمت
.
.
جنت امشي وبطني توجعني من الجوع بس برودة الليل شوية ساعدتني والغريب المكان الي امشي بيه لا يبين ضو بيوت ولا يبين ضو سيارات
.
.
المكان كلو عبارة عن ظلام الشي الوحيد الي جان يضوي هو القمر والنجوم وماكو ضو غيرهن طلع النهار علي واني ما واصلة لمكان
.
.
شفت من بعيد شارع ثاني واتجهت عليه بس السيارة الي جانت تمشي عليه بعيدة كلش ومتجهة عكس اتجاهي يعني ماراح يشوفوني
.
.
مشيت ويا الشارع واني انتظر تجي سيارة تاخذني وماكو والجو بدا يحتر وصلت مكان بيه وادي والشارع صاير من فوك الوادي وحاطين مثل النفق مصبوبة صبة كونكريتية وصاير جبيرة ومرتفعة
.
.
دخلت بيها عن حرارة الشمس من التعب والعطش حطيت العلاكة مالت الملابس عالكاع وتمددت وحطيت راسي عليها ومادري نمت ولا فقدت الوعي بس الي اعرفو اني مو كاعدة
.
.
كعدت الظهر من الحر حلكي ناشف وكوة ابلع ريكي من العطش واحس بطعمة مو طيبة بحلكي من العطش وماكو يمي مكان بيه ماي
.
.
بقيت كاعدة بمكاني وانتظر تخف حرارة الجو شوية واحس اقتربت نهايتي ماكو اي بيت قريب علي علمود اطلب منهم ماي او اكل وبنص مكان مجهول والدنيا صيف وحر مو طبيعي
.
.
جنت كاعدة وسمعت صوت سيارة اقتربت كمت بسرعة بس جان المكان شوية عالي بين ما صعدت راحت السيارة اشرتلهم علمود يشوفوني بس ماكو نتيجة وابتعدت السيارة
.
.
رجعت دخلت لمكاني لان حرارة الشمس ما تنحمل الساعة يمكن جانت 2 الظهر يعني حر مو طبيعي من صارت الدنيا عصر شوية خفت الحرارة
.
.
كملت طريقي ويا الشارع وماعرف هالشارع وين يروح بالضبط لان سيارات كلش قليلة تمر منو وحتى لو طالعة خارج العراق مادري بس الي اعرفو دا امشي حول المجهول
.
.
دا امشي وشفت سيارة اجت كمت اشرلهم ووكفت يمي جان بيها زلمة ومرة متوسطين بالعمر كلتلهم فدوة بس اريد ماي نزل الرجال وانطاني ماي شربت لتر ماي كامل من العطش
.
.
الرجال: انتي منو وشجابج هنا
جنى: جنت مخطوفة وانهزمت وصارلي اليوم الثالث الي امشي بيه وماعرف وين اروح
.
.
الرجال: شوفي تريدين ماي ننطيج ماي عادي بس اعذريني ماكدر اخذج وياي لان العشاير العدنا ما يتفاهمون
جنى: شكرا عمو الله يجزيك خير لان انطيتني ماي
.
.
الرجال: شوفي تريدين توصلين لمدينة لو لا
جنى: اي اكيد
.
.
الرجال: تبقين تمشين بهذا الطريق راح يجيج تقاطع بعد كم كيلو متر من توصلين عليه اتجهي عاليمين وراح توصلين العمارة هذا الطريق مابيه احد بس ذاك الطريق بيه سيارات
.
.
جنى: طيب تكدر تاخذني للتقاطع
الرجال: اعذريني ماكدر بس دليتج عالطريق واذا تريدين انطيج ماي بعد قبل ما نمشي
.
.
جنى: لا يسلمو
الرجال: يلا في امان الله
جنى: الله وياك .. بس عمو ممكن طلب اخير
.
.
الرجال: اطلبي
جنى: اريد عباية اذا عدكم
الرجال: راح لمرتو جانت بالسيارة وجابلي عباتها
.
.
جنى: شكر عمو الله يوفقك
الرجال: ويوفقج ويبعد عنج ولد الحرام
.
.
راح الرجال ومرتو واني كملت طريقي مثل ما كال بس من شربت ماي احس اجتني قوة ورجعتلي طاقتي وصارت حركتي شوية اسرع
.
.
بقيت امشي هواي وما وصلت التقاطع الا اني منتهية من التعب وجانت الدنيا ليل بس من خلال ضو القمر جان مبين مشيت مسافة جان اكو صوت جلاب مدري ذئاب بس الي اعرفو الصوت مخيف
.
.
وصلت لجسر مثل الي نمت بيه ونزلت كعدت بيه واني ارجف من الخوف واتلفت يمين ويسار وبطني توجعني وجع مو طبيعي من الجوع
.
.
اجت سيارة بس ما طلعت ماعرف ليش بقيت بمكاني واني كاعدة غفيت ومدري شكد مر وقت من صارت الدنيا فجر تأكدت ان المكان فارغ
.
.
بدلت ملابسي وذبيت الي جنت لابستهن ولفيت نفسي بالعباية الي اخذتها من المرة والرجال واخذت الملابس الباقيات وانتبهت ان اكو حية بالمكان الي اني بيه ومتجهة علي
.
.
واحس متت بدمي من الخوف وجانت جبيرة كلش ركضت كل سرعتي وطلعت من المكان صرت بالشارع واخر شي اتذكرو صوت شحطة التواير بالشارع ومنظر السيارة الي متجهة علي
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413