طيوف الماضي

البارت(69) طيوف_الماضي الكاتب_احمد

تصويت ومتابعه لحنى توصلكم باقي البارتات والقصص❤
69
#طيوف_الماضي
بقلم #احمد
البارت_69
.
.
جنى: ومن بدا دوام الجامعات جنت اني واصلة الشهر التاسع بالحمل وصايرة مثل البرميل ايديني ثنينهن منفوخات ووجهي سمنان وانتفاخ بجسمي كلو
.
.
صايرة على كولة ام زكي برميل مخلل مدعبلة وما يشوفني كاضم الا يضحك علي اني وهند يكول خلي ادعبلكن ونشوف منو الي تفوز عالثانية ومسوينا مسخرة للعيلة
.
.
بيوم 14/10/2017 كعدت الصبح واحس اكو وجع ببطني ودائما يصير عندي بسبب التقلصات فما اهتميتلو اخذتلي ملابس ودخلت اخذت دوش احس نفسي شوية احسن
.
.
من طلعت لكيت مصطفى كاعد دخل اخذلو دوش بين ما جففت شعري ومشطتو طلع هو لبس ملابسو ونزلنا سوا لكيت لارا دا تجهز الريوك
.
.
ساعدتها بس احس الوجع رجعلي واعتذرت منها ورحت يم مصطفى والحجية لاحظت الحجية انو مو طبيعية وسألتني كلتلها تقلصات من اول ما كعدت لحد الان هسا شوية وتروح
.
.
ورجعت تحجي ويا مصطفى بس اني مو يمهم ولا ادري شنو دا يحجون وشفت لارا جايبة الصحون دا تنقل الريوك كلتلها لارا فدوة جيبيلي عباتي كلت ليش
.
.
كلتلها جيبيها علمود اذا ما راح الوجع ياخذني مصطفى للمستشفى وخطية تركت الريوك وراحت جابتها مصطفى مجان يسمعني من وصيتها بس من جابت عباتي انتبه الها وتقرب علي كلي توجعج بقوة
.
.
اريد احجي مو كادرة من جهة اريد اكتم الوجع ومن جهة اريد احجيلو ومدا اعرف شنو اسوي بيهن فجأة حسيت بوجع كلش قوي مع صرختي ركضو علي هم
.
.
مصطفى: من حملت جنى حسيت باحساس غريب بس حلو كلش حسيت لاول مرة عندي مسؤولية خايف منها
.
.
رغم جنت ولا زلت مسؤول عن عائلة كاملة بس هالطفل هذا احس مسؤوليتو اكبر منهم كلهم وجنت دائما مهتم بيها علمود ما ترجع تعيش نفس الموقف ونخسر الطفل الثاني
.
.
واذا لا قدر الله وسقط راح يكون الو تأثير على صحتها وعلى نفسيتها بنفس الوقت
.
.
مرة من المرات الصبح كالت عدها وجع بسبب التقلصات وكلت مثل كل مرة شوية وتروح  فجأة صرخت بس اخذت روحي ويا صرختها امي كالت اخذها بسرعة للمستشفى راح تجيب
.
.
لفيتها بالعباية بسرعة وكلت لامي الحكيني ويا شاهين وشلتها وطلعت ركض بيها حطيتها بالسيارة وكبست بانزين بكل ما برجلي قوة بحيث صوت السيارة ترس الدنيا
.
.
واسوق وعيني عليها وكل صرخة منها تسحك روحي سحك واحس نفسي اختنكت من خوفي عليها واحجي وياها علمود اخفف عنها بس جنت اني الي احتاج احد يخفف عني الضغط الي صار علي بسبب خوفي عليها
.
.
واكللها حاولي تسحبين نفس على كيفج بس من الوجع مو مركزة وياي ومن كمية التوتر العندي والعصبية ضربت الستيرن كل قوتي الا انكسر من كدام وصارت بيه رجفة
.
.
وحسيت على نفسي وكلت هسا بسبب عصبيتي اخبص الدنيا مسكت الستيرن زين علمود ما يفتر واسوق بكل سرعة ما وصلت المستشفى الا اني روحي ممرودة عليها
.
.
طبكت السيارة كدام المستشفى بدون ما انتبه للمكان اذا ممموع ولا لا ونزلت وشلتها وركضت بيها للمستشفى
.
.
اكو ممرضة جانت واكفة كدام المستشفى من شافتني شايلها راحت بسرعة جابت سدية حطيتها عالسدية وكلتلها عدها ولادة واخذتها ركض للصالة ولان صالة ولادة ماكدر ادخل
.
.
بس جان شعور الانتظار سيئ بشكل لا يوصف شوية واجو شاهين وامي ودخلت امي للصالة واني وشاهين بقينا ننتظر خارج واحس اعصابي تلفت عالاخر
.
.
كعدت عالكرسي وحطيت ايدي فوك راسي وماعرف شسوي كعد يمي شاهين كال توكل بالله إن شاء الله تطلع بخير مثل لارا عدها رب ما ينساها
.
.
رفعت راسي وباوعتلو وعيوني حمر وكوة لازم دمعتي من خوفي عليها كلتلو صرختها مردت روحي يخوي
.
.
ابتسملي وكال لا تنسى هاي ولادة مو شغلة سهلة وهاي كلها اجر الها ولازم تسند نفسك علمود هي تستند عليك ولا تخاف إن شاء الله بعد شوية تدخل تشوفها هي والطفل وتتطمن عليها
.
.
رجعت حطيت راسي على ايديني واول مرة يصير بي ضعف لهاي الدرجة حسيت نفسي طفل مضيع امو وخايف من كلشي بالدنيا اني هيج من خوفي عليها
.
.
احس كلشي بالدنيا يهدد حياتها وبالاخص انو جنت اشوفها تصرخ وتتوجع ومابيدي شي اسويه واني بهالحالة والتفكير ماكل عقلي سمعت صرختها
.
.
بجزء من الثانية وكفت على رجليني واتجهت للصالة واجى شاهين يدفعني ويريد يبعدني واني فاصل عن الدنيا كلها بس اريد اشوفها
.
.
نسيت اني بمستشفى ونسيت انو هي بالولادة ونسيت انو ممنوع ادخل للصالة ورغم قوة شاهين بس ما جان يكدر يبعدني حسيت عيوني دا تغوش
.
.
واني امشي انفض راسي بقوة علمود اكدر اشوف مديت ايدي اريد افتح الباب وادخل وشفت ايدي صايرة حمرة من الدم وبعدها ماعرف شصار
.
.
كعدت لكيت نفسي بغرفة ومشكليلي مغذي وملابسي عليهن اثر دم بس يابس واول ما كعدت ماعرف شصاير مثل الفاقد الذاكرة فجأة اجت جنى على بالي وتذكرت
.
.
فورا نزعت المغذي عن الكانونة وطلعت وكوة متوازن شفت شاهين وامي واهل جنى موجودين من شافني شاهين اجى ركض وسندني كلتلهم وين جنى
.
.
كالو دا ترتاح بغرفتها شوية وندخل عليها كلتلهم يعني جابت كالت امي اي يمة اجتكم بنت مثل الكمر تتربى بعزكم ودلالكم والله يجعلها من الصالحات
.
.
كلتلهم اريد اشوف جنى كالو خلي تطلع الدكتورة واسألها وكفت انتظر على احر من الجمر وهمزين الدكتورة ما تأخرت وطلعت
.
.
كالت الحمدلله على سلامتها صحتها ممتازة وتكدرون تدخلون تشوفوها تجاوزتها قبل ما تكمل كلامها ودخلت للغرفة شفتها متمددة ووجها ذبلان
.
.
تقدمت عليها وكعدت يم السرير ونزلت جسمي علمود ما تشوف الدم وتخاف مسكت ايدها كلتلها الحمدلله على سلامتج يا عمري شلونج هسا
.
.
جاوبتني بتعب كالت الحمدلله شنو اجانا كلتلها بنت كلش حلوة كالت لعد حظر نفسك للخبال الي جايك بالطريق رغم خوفي عليها بس من كالت هيج ضحكت على كلامها
.
.
ومسحت راسها بايدي وغمضت عيونها ودخلو الي جانو خارج كالو شو نايمة كلتلهم هسا نامت لان تعبانة ورجعو طلعو واني بقيت داخل انتظرها تكعد
.
.
بس طلعت وصيت شاهين يجيبلي دشاشة نظيفة لان هاي بيها دم ورجعت دخلت وبعد اقل من ساعة جابليها ولبستها تقريبا ساعتين وكعدت جنى
.
.
كلتلها ها يا روحي شلونج هسا ابتسمت وكالت الحمدلله كلش زينة طلعت كلتلهم انها كعدت ورجعت دخلت ودخلو تحمدولها بالسلامة كالت اريد اشوف شريكتي الصغيرونة
.
.
وراحو علي وزوجتو علمود يجيبوها واني كاعد يمها وافرك بايدها ومو مصدك نفسي انو شفتها بخير وتطمنت عليها شوية وجابوها علي ورؤى ووياهم ممرضة
.
.
وجانت من صدك مثل الكمر مثل ما كالت امي وجها ابيض تتراسيمها ناعمات حطتها رؤى بحضن جنى وجنى تخبلت عليها تباوعلها وتباوع علينا وتضحك مثل الطفل من يجيبولو لعابة جديدة واني صافن عليها واضحك وياها
.
.
دقني علي وكال اذن باذنها رفعتها بايدي جانت خفيفة كلش اخف حتى من صوفي اول ما صار بس ماعرف ليش مابستها اذنت باذنها وضميتها بحضني
.
.
وجان احساس الابوة غريب وحلو بكل معنى الكلمة رجعتها لجنى والممرضة كالت عوفوها لحالها علمود ترضعها لان الطفلة جوعانة
.
.
وطلعنا كلنا بس بقت الممرضة وام جنى علمود يساعدنها طلعت خارج واضحك مثل الخبل بسبب فرحتي بسلامة جنى وفرحتي بالطفلة
.
.
علي: هسا لازم تلكولها اسم
مصطفى: ما يحتاج اسمها جاهز
علي: وشنو الاسم
.
.
مصطفى: رانية
علي: تقصد ....وقاطعتو
مصطفى: اي على اسم جدتها الله يرحمها (ام جنى)
.
.
علي: الله يرحمها
شاهين: احسب حسابك من هسا رانية لابني
مصطفى: دنكلع انت وابنك ما اشتريكم بربع
.
.
علي: ههههههههههه بعتو بهاي السرعة
مصطفى: كلشي الا رنو
شاهين: استلم صار يدلعها هم
.
.
علي: لا تخرب اسم البنية صيحها باسمها العادي
مصطفى: والله صحيح كلامك
شاهين: وترا اذا سمعوك الجهال يبقون يسموها رنو لحد ما يخرب اسمها ويلزك هالاسم بيها
.
.
شاهين: لا يابة كلشي الا يخرب اسم بنيتي
علي: راح ياكل راسنا ببنتو
شاهين: هههههههه بعد كم يوم يسويها شيخ العشيرة ويكعدها بصدر الديوان
.
.
علي: ههههههههه مو بعيدة عنو
الحجية: يمة شاهين اخذني للبيت تعبت كلش
شاهين: تمام يمة
.
.
الحجية: يمة مصطفى من ترتاح جنى عود طلعها واني راح اخلي البنات يحظرلها فراش اول ما اوصل
مصطفى: تمام يمة لا تهتمين
.
.
راحو امي وشاهين وشوية وطلعت الممرضة من عند جنى ودخلنا اني وعلي وبقينا تقريبا ساعة ورحت سجلتلها خروج وطلعت شفت الدنيا صايرة مغرب
.
.
ركبتها بسيارة علي لان سيارتي من ضربت الستيرن احسها مو مضبوطة والطفلة بقت بحضن رؤى ورجعت ركبت سيارتي ورجعنا للبيت واني احمد ربي انو كومها بالسلامة
.
.
بس احس نفسي انتهيت اليوم من التعب من وصلنا البيت رحت فورا سندتها واخذتها للبيت لكيت خواتي جايات وكلهن تحمدن لجنى بالسلامة
.
.
ومن دخلت رؤى تراكضن كلهن للطفلة ومن وحدة لوحدة وتخبلن عليها وجنى تباوعلهن وتضحك تمددت بالفراش واجو هيثم وكاضم
.
.
هيثم وكف يباوع ومستغرب وما شاف الطفلة لان متجمعات عليها البنات بس شاف جنى متمددة ومبين عليها تعبانة عاف الكل واجى عليها هي ابتسمتلو ومدت ايدها ومسك ايدها
.
.
هيثم: ليش مريضة
جنى: مو مريضة يا روحي
هيثم: لعد شبيج
.
.
جنى: تعبانة شوية
هيثم: ليش تعبانة
جنى: عوفك مني جبت شغلة وياي كلش حلوة
.
.
هيثم: شنو هي
جنى: اماني فدوة جيبيها خلي يشوفها هيثومي
اماني: تعال استاذ هيثم شوف
.
.
جنى: اخر شي اتذكرو الوجع الي اخذ روحي بعدها كعدت تعبانة بحيث مابي حيل احجي من التعب ورجعت نمت من كعدت بديت اتحسن شوية شوية
.
.
من كالت الممرضة خلي ترضع الطفلة اجاني شعور غريب بس من شفتها نايمة بكل هدوء وترضع بهدوء جان شعوري كلش حلو وجانت مثل الكطنة خفيفة وبيضة
.
.
بعدها ارتاحيت واخذني مصطفى للبيت من جابتها اماني لهيثم اخذها بحضنو ويباوعلها ويضحك كال منو هاي
.
.
جنى: لسه ما سميتها
شاهين: مصطفى سماها
جنى: صدك والله .. جان مصطفى فوك يسبح
.
.
شاهين: يكول اني ابوها واني اولى بتسميتها من غيري
جنى: لا صدك سماها
شاهين: اي والله
.
.
جنى: باستغراب .. وشنو سماها
شاهين: نورية على اسم جدتي الله يرحمها
جنى: شنوووووو شنو هاي نورية
.
.
شاهين: غير هو سماها بس عالقليلة اذا واحد يدلعها نور او نورة يطلع شوية حلو الاسم
جنى: والله ما يسميها نورية الا على جثتي
.
.
شاهين: لا اني اكلج بهالحالة تخلينو يغير حتى اسمو
مصطفى: شنو من اسم هذا
.
.
جنى: شنو هاي  نورية قلة اسماء وربي ما تسميها نورية لو اعرف اموت 9 شهور شايفة الضيم وشفت عظام اهلي لحد ما جبتها وتجي بكل سهولة تخرب اسمها وتركت كل اسماء الدنيا وسميتها هالاسم الخايس وربي فلا تسميها لو اموت
.
.
مصطفى: لحضة لحضة ابوية شبيج اكلتيني بكشوري
جنى: شنو هذا اسم نورية
مصطفى: لج بابا يا نورية .. ولك شاهين ايمتى تترك شقاك الخايس
.
.
شاهين: هههههههههه قسم بالله طلعت جنى تخوف
مصطفى: عوفج منو بنيتي سميتها رانية على اسم المرحومة
.
.
جنى: من كال هيج ماي بارد ونزل على كلبي بس بنفس الوقت نزلت دموعي وحسيت بكمية الحب الي بكلب مصطفى تجاهي لدرجة سمى بنتنا على اسم امي بدال امو
.
.
يعني قدم فرحتي على فرحتو مستحيل اكو رجال يهتم بزوجتو وبمشاعرها مثل مصطفى اجى باسني براسي وكال خيويلي شاهين
.
.
باوعت لشاهين كلتلو احمد ربك ماكدر اكوم ولا جان شوفتك نتيجة شقاك الثكيل وهو يضحك على ردة فعلي باوعت لهند كلتلها اجى دورج
.
.
شاهين: لا بشرفج مابقى بي حيل
جنى: شنو قابل انت تجيبها
شاهين: يمعودة ياريت اني جايبها
.
.
جنى: ههههه ليش
شاهين: انتي ما شفتي رجلج شصار بيه
جنى: باستغراب شصار بيه
.
.
شاهين: كعد بالممر يبجي عليج وكام يريد يدخل صالة الولادة وادفع بيه وهو يبجي ويدفع بي يريد يدخل اخير شي فقد الوعي من كد ما بجى عليج
.
.
مصطفى: راح اكوم اخلي لارا تبجي عليك
شاهين: ههههههه تنكر انك جنت تريد تدخل للصالة
مصطفى: بس ما بجيت ابن الاوادم
.
.
شاهين: لا والله للامانة ما بجى بس جان يريد يدخل للصالة وقبل ما يدخل طك خشمو دم وفقد الوعي وكوة لحكنا عليه
جنى: بخوف .. هاي ايمتى صار هيج
.
.
مصطفى: لا تخافين بنيتي ماكو شي
جنى: كل هذا صاير وياك وتريدني ما اخاف
مصطفى: هسا وقت هيج كلام بربك شاهين
.
.
شاهين: لا خيتي لا تخافين ماكو شي شوية نزف لان ارتفع ضغطو من خوفو عليج
جنى: وشلون ما اخاف عليه
.
.
شاهين: الحمدلله هو بخير وانتي بخير وهسا افرحو بطفلتكم الصغيرة وعوفو هذا الموضوع
جنى: تمام
.
.
سكتت بس كلش خايفة على مصطفى خاف تأذى من ارتفاع الضغط لو صاير وياه غير هالشي وما يحجولي علمود ما اخاف بعد اكثر بس مبين زين الحمدلله
.
.
قطع سلسلة افكاري صوت البنات جابن العشى ومحظرات صينية صغيرة بيها عشى لكاضم وبابا لان ماما مو طابخة واني مسوياتلي شوربة
.
.
وجانت امي تريد توكلني واخذ مصطفى الصحن منها وكعد يمي ويوكلني ويباوعلي بكل حب كلتلو الله لا يحرمني هالنظرات الحلوة
.
.
باسني براسي وكال ولا يحرمني من وجودج بحياتي من خلصت اكلي شالن المواعين وجنت نعسانة كلش
.
.
كلتلو اريد انام كالت ماما رضعي الطفلة بعدين نامي واخذتني لغرفة حاطيلي بيها فراش  رضعتها ونمت بفراشي وماعرف شصار بعد
.
.
مصطفى: وصلتها للغرفة الي حاطين فراشها بيها لان ماتكدر تصعد ورحت لغرفتي وتعبان تعب مو صاير ومن اخذتلي دوش احس تعبت بعد اكثر لان ارتخى جسمي
.
.
زتيت نفسي عالسرير وافكر بالي صار اليوم جان يوم مليئ بالاحداث الحلوة والمرة بنفس الوقت بس الحمدلله النهاية سعيدة
.
.
بس مو مصدك معقولة صرت اب وهاي الطفلة بنتي من صدك شعور لا يوصف الحمد الك يارب انو رزقتني هالفرحة هاي بس من اليوم مستحيل اخلي جنى تحمل مرة ثانية
.
.
يكفي الي شافتو وشفتو اني هم اليوم مستحيل اخليها تتأذى لهالدرجة مرة ثانية حتى لو الموضوع يتعلق بكوني اريد ولد يشيل اسمي تبقى جنى اهم من كلشي ثاني
.
.
والي صار اليوم جان كافي ويكفي انو الله رزقنا ببنت تملي علينا حياتنا بس من صدك الله يعينك يا مصطفى عالي راح تشوفو بالايام الجاية
.
.
راح تكضي حياتك لا تحضنها ولا تبوسها ولا تنومها بحضنك جنى واعرف غيرتها مستحيل تتحمل الموقف وتبقى ساكتة بقيت افكر لحد ما قفلت كلش وغمضت عيوني ونمت بس نومتي مو مريحة لان جنى مو بحضني
.
.
.......... يتبع
لايك وتعليق حلو مثلكم ❤
حطولنا توقعاتكم شلون راح تتصرف جنى ❤