طيوف الماضي

البارت(27)طيوف_الماضي الكاتب#احمد

تصويت ومتابعه لحنى توصلكم باقي البارتات والقصص❤و
#طيوف_الماضي
بقلم #احمد
البارت_27
.
.
مصطفى: من اكعد لحالي ترجع صورة جنى كدامي من تفز من تضحك من تبجي من تمشي من تكعد من تحجي من تسكت من شفتها بالفستان الاسود من شفتها بالعيد واكثر وقت اتذركها بيه من اريد انام تبقى تتجول براسي وذكرياتي لحد ما انام
.
.
جنى: بعد اتصالي على اماني بيومين جنت كاعدة بغرفتي كدام الصوبة والدنيا مطر وباردة ودا اكلب بالتيلفون واجا اسم مصطفى كبالي وبعد صراع نفسي لمدة نص ساعة اتصلت عليه
.
.
مصطفى: الو
جنى: هلا مصطفى شلونك
مصطفى: هلا يابة عاش من سمع هالصوت
.
.
جنى: شلونك
مصطفى: الحمدلله وانتي شلونج
جنى: اني زينة
.
.
مصطفى: شخبارج
جنى: كملت امتحانات قبل كم يوم
مصطفى: وشلون اجوبتج
.
.
جنى: كلهن زينات الحمدلله
مصطفى: عفية بوية هيج اريدج
جنى: الله يعافيك
.
.
مصطفى: عمج وعمتج شلونهم
جنى: الحمدلله كلش زينين
مصطفى: الله يجعلكم بخير
.
.
جنى: تسلم يلا اني اترخص
مصطفى: الله يسلمج مرخوصة بوية
.
.
جنى: سكرت منو باوعت لايدي ترجف من التوتر وكمت اسب نفسي لان اتصلت واكول عابتلج شعندج متصلة عليه هسا اذا وياه احد شيكول عنج
.
.
بس لا شيكول يعني اني ما حجيت شي مو زين بس سلمت عليه وهاي هي اي هاي هي المهم يكون هو بخير والباقي مو مهم يخرب بيتك شحلو صوتك يمصطفى
.
.
زتيت نفسي فوك السرير واضحك على تفكيري صايرة قليلة ادب اني يرادلي جرة اذني هههههه بدون وعي كلت بصوت عالي علي تعال سوي لبنتك جرة اذن وارجع اضحك
.
.
شوية ودخل عمي كال شبيج بنيتي سمعتج تصيحيني وجهي انكلب احمر من الفشلة وضحكت كلتلو لا ما بي شي بابا جنت اسولف بيني وبين نفسي وصار صوتي عالي بدون ما انتبه
.
.
وضحك وطلع وسكر الباب وراه واني حطيت تيلفوني عالشحن وطفيت الصوبة وطلعتها علمود الدخان الي يطلع منها اول ما تطفي ما تبقى ريحتو بالغرفة ورحت على عمتي كلتلها ها رؤى شلونج
.
.
رؤى: هلا بالخبلة
جنى: تؤتؤ احترميني صرت جبيرة
رؤى: تمام خالة اسفة
.
.
جنى: ههههههه خالة فد مرة
رؤى: اي خالة لان صرتي جبيرة
جنى: شرايج نسوي حلويات
.
.
رؤى: شنسوي بالضبط
جنى: انتي جيبي هيثم وتعالي يمي واني اسوي الباقي
رؤى: تمام
.
.
جنى: راحت هي تجيبو واني طلعت احتياجات الكيكة بس جان اكو نقوصات بيهن من اجت كلتلها بابا موجود كالتلي اي تلكيه بالغرفة كاعد عند الصوبة ورحت عليه كلتلو علاوي
.
.
علي: هلا بنيتي
جنى: كوم كوم يلا بسرعة
علي: شكو يا ستار
.
.
جنى: روح جيبلنا غراض الكيكة
علي: شنو من كيكة
جنى: روح جيبهن وانت تعرف يلا يلا
علي: يلا خلي ابدل وارجع
.
.
جنى: عفتو يروح يبدل ورجعت للمطبخ اخذت هيثم كعدتو عالطاولة وكمت اصفكلو واغني واركص وهو يضحك وعمتي تضحك وتكول خوش جبيرة
.
.
سحبتها من ايدها وما قبلت ولحت عليها لحد ما كامت ورحت بسرعة جبت التيلفون وشغلت اغاني وكمت اركص وياها شوية واجى عمي وكف بباب المطبخ وهز ايدو
.
.
كلتلو لا تهز ايدك جيبلنا الاغراض وعددتهن الو وراح هيثم جان كاعد ويصفك ورجعت اركصلو وهو شبعان ضحك من تعبت اخذتو بحضني وحضنتو قوي
.
.
وكلتلو انعل ابو المايحبك شكد حلو وصاك على اختك ورا شوية اجى عمي انطاني الغراض وكعد يحجي يمنا وانا كملت العجينة وتركتها شوية ترتاح وعمتي بلشت بالغدا
.
.
وبعدها طلعت العجينة حطيتها بالقالب وحطيتها بالفرن وتركتها تستوى لحالها رحت طلعتلي ملابس واخذتلي دوش ورحت ركض للغرفة الي بيها الصوبة ام بواري
.
.
كعدت يم الصوبة لحد ما دفيت وبعدت عنها ومشطت شعري وبقيت بالغرفة لان الجو بارد ومن كمل الغدا تغدينا كلنا بالغرفة وبعد الغدا رحت عالمطبخ لكيت عمتي مطلعة الكيكة
.
.
حطيت عليها كريمة وزينتها بفراولة وحطيتها تبرد بالثلاجة كملت اليوم طبيعي بالليل جنا متابعين مسلسل طلعتها وقسمتها وانطيت عمي وعمتي حصتهم
.
.
واخذت حصتي واكلتها اني وهيثم وجانت كلش طيبة والحمدلله ما افتشلت كدام عمي وعمتي وعجبتهم كلش طعمتها
.
.
مشت الايام ورجعت لدراستي مرة ثانية وجنت انتظر نتائج التمهيدي وقبل يومين انتشر الخبر انو راح ينزلن من التوتر حتى ماكدر اركز بالدراسة
.
.
من اجى يوم نزولهن كعدت من الصبح ورحت للمطبخ شغلت الصوبة وكعدت يمها لحد ما كعدو عمي وعمتي وتريكنا سوا وبال 9 راح عمي عالتربية يشوف اسمي
.
.
ولان بوقتها النت جان قليل جانو يدزون النتائج للتربية ويروح عمي يستلمهن شوية ورجع كال للعصر وكل ثانية احسها سنة من التوتر رغم مو نهائي بس هو الي يحدد اكمل السنة لو اعيد السنة الثانية
.
.
مصطفى: جنت بالبيت نزلت من غرفتي وسمعت اماني دا تحجي بالتيلفون وعرفتها ويا جنى تحجي بعدها بيومين طلعت للسوك اريد اجيب مسواك
.
.
اول ما مشيت من البيت دك تيلفوني وعبالي اهلي ناسين شي بس من طلعتو شفت اسم جنى ورديت عليها واحس بكل كلمة تروي كلبي المتلهف لشوفتها
.
.
من خلصت منها احس ارتاح كلبي لك اي احبها والله احبها مو بايدي بس هي تدرس هسا مو وقت هيج سوالف خلي تخلص دراستها والله كريم
.
.
مال ابقى هيج اتعذب ببعدها نص سالفة لازم اتزوجها واخلص من هالعذاب هذا رحت للسوك كملت المسواك ورجعت عالبيت كعدت ويا امي
.
.
الحجية: شنو اخبار العشيرة هالفترة
مصطفى: الحمدلله يمة ماكو شي مقلق
الحجية: لعد يمة شرايك تتزوج
.
.
مصطفى: مو هسا يمة بعد وقت
الحجية: يا وقت يمة وصل عمرك 30 سنة شكد تريد لعد
مصطفى: عن قريب يمة إن شاء الله مو مطول
.
.
الحجية: لا تنسى اخوانك هم يريدون يتزوجون
مصطفى: والله يمة يوم الهنا من اشوف اخواني متزوجين
الحجية: ما يقبلون يتزوجون قبلك
.
.
مصطفى: وشنو جاب هاي لهاي
الحجية: انت الجبير ويشوفون انو انت احق منهم بالزواج
مصطفى: لا يمة شوفي الي يريد منهم يتزوج اخطبيلو وخلي نفرح بيه ومعليكم بي
.
.
الحجية: وانت ليش ما تريد تتزوج
مصطفى: اني ما اريد هسا اكو كم شغلة ببالي اريد انفذهن وبعدها إن شاء الله افكر بالزواج
.
.
الحجية: الله يهدي بالك
مصطفى: الله يحفظج النا يمة
الحجية: ويحفظك إن شاء الله
.
.
جنى: العصر راح للتربية وورا ساعة اجى شايل الورقة وانطانياها باوعت عليها ناجحة بكل المواد ودرجاتي من 70 وفوك صحت بكل صوتي ياااااااي وكزت عليه وهو يضحك
.
.
اجت عمتي تركض واخذت الورقة مني وكلش فرحت من شافتني ناجحة وراح عمي جاب حلويات وسوينا حفلة صغيرة بنجاحي
.
.
صحيح جان مجرد دخول وزاري بالسادس ابتدائي بس عمامي سوو هيج علمود يصيرلي واهس ادرس واشد حيلي
.
.
بعدها رجعت لدراستي ونفس النمط بالنهار دراسة وبالليل تيلفون وجنت من امل من المقاطع الي عندي ادز الميموري ويا عمي يغيرلي الفيديوهات الي بيه
.
.
ومن اكعد بالليل ما اخلي شي بالتيلفون ما ابحوش بيه علمود اتعلملو مرة من المرات كاعدة ابحوش بيه كالعادة ودخلت للضبط وشغلت ميزة (talk back)
.
.
والي هي ميزة تساعد الي نظرهم ضعيف انهم يستخدمون التيلفون بدون ما يدخلون على اشياء ما يريدوها جنت كاعدة لحالي ومندمجة شو فجئة التيلفون صار يحجي انكليزي
.
.
فزيت وزتيتو من ايدي من الفزة رجعت اخذتو عزااا شو ما يدوس بس يحجي وما مفتهمة منو كلشي وعود اريد اسوي شي بيه خير طفيت الجهاز ورجعت شغلتو وتورطت بالقفل
.
.
اريد افتحو والتيلفون بس يجوعر بالانكليزي وخفت لا يشوفو عمي ويزعل مني لان خربتو لاحظت انو الا اضغط عالشي مرتين يلا يضغط وكوة كملت الرمز وفتحتو وبالف يا ويلاه لحد ما طفيتو
.
.
وقريت عن الميزة هاي وعرفت كلشي عنها بس ما حبيتها مو حلوة وفوك هاي وكفت كلبي كلت خرب التيلفون من اجى وقت النوم طفيت الصوبة وحطيت التيلفون تحت راسي عن البرد ونمت
.
.
وبهاي الطريقة كمت اعرف كلشي بالتيلفون وصرت خبرة باستخدامو لدرجة عمي من يحتار بشغلة اني اسويها الو ويضحك ويكول من صدك هالمرة التلميذ غلب استاذو
.
.
بلش الربيع وجنا منتظرين عيد نوروز الي يصادف بنفس اليوم الي بيه عيد الام وهو عيد عن الاكراد وسبب هذا العيد ان الشعب الكوردي بقديم الزمان كان يحكمهم حاكم ظالم
.
.
وكان عندو ثعابين ثنين لافهم على ركبتو وبكل يوم يقتل شاب ويقدم دماغو للثعابين علمود ياكلنو وبيوم من الايام ملو الاكراد من هذا الظلم فهجمو على قصر الملك
.
.
وجانو بقيادة حداد اسمو كارة وكدرو يقتحمون القصر بذاك اليوم وكدر كارة انو يضرب الملك بالجاكوج (المطرقة) على راسو وهشم راسو وبعدها حرقو جثتو
.
.
ومن ذاك اليوم كل سنة يحتفلون بنفس اليوم ويشعلون نار فوق قمم الجبال والاماكن العالية نسبة لحرق جثة الملك الظالم
.
.
وجانت النار الي يشعلوها جبيرة بحيث تكدر تشوفها من بعد الاف الامتار شكد مو جبيرة جنا كاعدين كدام التلفزيون ونشوف تحظيراتهم للاحتفالات
.
.
رؤى: شرايك علي نروح سفرة بعيد زوروز
علي: وين نروح
رؤى: للشمال
.
.
جنى: ياااااي اي بابا وافق فدوة
علي: احتمال ما يعبرونا
رؤى: نجرب حظنا
.
.
علي: خلص مثل ما تريدون
رؤى: لعد باجر نكمل كلشي نحتاجو وبعد باجر نروح
علي: تمام
.
.
رؤى: راح ناخذ ويانا جدر دولمة وجيبلنا لحم نشوي كباب هناك
علي: من عيوني
رؤى: تسلم عيونك 
.
.
جنى: بابا راح يكون اكو ناس هناك
علي: ماعرف والله بس راح اختار مكان بعيد عنهم اذا اكو علمود نتونس وناخذ راحتنا وهم نشوفهم من بعيد
.
.
جنى: حلو خوش فكرة 
علي: بس ديرن بالكن تهملن الحجاب
.
.
رؤى: توصينا احنا عالحجاب يا علي
علي: سؤال جنى ذكرني بالموضوع
رؤى: لا تهتم عيوني انت
.
.
جنى: طرت من الفرح من وافق ثاني يوم بدينا بالتحظيرات من الصبح عمي جاب ورق عنب ولحم للدولمة واللحم مال الكباب اجلو لثاني يوم سوينا الدولمة اني وعمتي ولفيناها وحطيناها بالثلاجة
.
.
ثاني يوم كعدت من الفجر اخذت ملابس ودخلت سبحت وطلعت كعدت كدام الصوبة ومشطت شعري وطلعت فستان احمر كلش حلو لبستو ووياه شال واكسسوارات حظرتهن علمود البسهن
.
.
وكعدو عمامي وتحظرو وبال 7:30 مشينا علمود نلكي مكان قبل ما نتأخر مرينا على كصاب واخذنا منو لحم للكباب ورحنا من صارت الساعة 8 عمي شغل اغاني
.
.
وجانت عمتي وياه من كدام واني وهيثم ورا رحنا على زمار ومن زمار عبرنا على منطقة گوزگيران جان من ضمن المناطق التابعة للاقليم بس بالاطراف وصايرة يم نهر دجلة
.
.
ومشينا بالسيارة مع مجرى النهار مسافة ولكينا مكان مرتفع وفارغ مابيه احد ورحنا بيه من نزلنا جان المنظر عبارة عن قطعة من الجمال شكد مو حلو
.
.
طلعنا فراش فرشناه ودواشك والشمس جانت طالعة والجو رهيب حطينا هيثم عند عمي ورحنا اني وعمتي سوينا مكان للجدر وحركنا بيه نار وحطينا الجدر مالت الدولمة عليه
.
.
ورجعت اخذت هيثم وطلع عمي المنقلة (الي ينحط بيها الفحم) ولان اكو خشب ما استخدم الفحم جمع من الخشب الي بالمكان وحركو بالمنقلة وبدا يسوي الكباب ومن بقى بس الفحم بدا يشوي بيه
.
.
واني اخذت التيلفون وصرت اكص صور الي وللمكان ولعمامي وامشي واصور وصورت فيديوهات بعدها انطيت التيلفون لعمتي
.
.
ولبست الاكسسوارات وطلعت نص شعري من الشال لان ماكو احد وخليت عمتي تصورني وبعض الصور صورتهن بدون شال وفتحت شعري على طولو
.
.
ومن خلصت التصوير رجعت لبست شالي وعدلتو وبصراحة فكرة عمي انو نبعد عن الناس جانت كلش حلوة اول شي ناخذ راحتنا وهم ما نكسب ذنوب من يشوفنا شخص غريب اني وعمتي
.
.
ولو اكو ناس مستحيل اخذ راحتي واكدر اصور بدون شال رجعت شفت الصور جانن كلش حلوات من استوت الدولمة غرفتها عمتي وعمي كمل شوي
.
.
وحطينا الغدا وترمز الماي يمنا والمكان يفتح الشهية جنا كاعدين ونشوف دخان النار فوك الجبل مبين والمكان كلو عشب اخضر ونهر دجلة مبين من مكاننا
.
.
واكلنا لحد ما شبعنا وشلنا المواعين ورحنا اني وعمي تمشينا بالمكان وصورنا ورجعنا كعدنا  سوا نحجي لحد ما صار وقت اذان العصر وطلعنا الحلويات والببسي واكلنا
.
.
وجان يوم حلو بكل ما تعنيه الكلمة من معنى وبعد العصر شلنا غراضنا وهيثم تعب ونام ورجعنا للبيت بس جنت اتمنى اليوم ما يخلص شكد مو حلو
.
.
بالطريق نعست ونمت بس نومتي تعبتني اكثر من ما تريحني ومن وصلت البيت كعدت نزلنا الغراض وجانت بطني مليانة وتعبانة تعب مو طبيعي
.
.
رحت لغرفتي بدلت ملابسي وحطيت تيلفوني عالشحن ونمت ما كعدت لثاني يوم اول ما كعدت اخذت التيلفون وبديت اكلب بيه واشوف الصور والي ما تعجبني احذفها
.
.
من خلصت ثبتت على 200 صورة وفيديو كلت لنفسي صخام يا جنى شو خلصن بس 200 بقن يلا 200 يكفن بس اهم شي صوري بالفستان فديتني اخبل جني العافية
.
.
رؤى: مداحة نفسه يرادلها رفسه
جنى: هههههه بشرفج مو اخبل
رؤى: وعرض اختي تملخين
.
.
جنى: هههههه ولج اروحلج فدوة
رؤى: هههههه فداج الكون
جنى: يابة يا علاوي شلون محظوظ
.
.
علي: ليش محظوظ
جنى: عندك هالكيكة هاي
علي: الله يخليها النا .. وحضن عمتي
.
.
رؤى: ويخليك خيمة فوك راسنا
جنى: اكول روحو تغازلو بغرفتكم
علي: افه تطردينا
.
.
جنى: لا بس اكو نفر هنا غيركم
علي: قصدج نص نفر
جنى: يااااا هاي اني نص نفر
.
.
علي: لا انتي وهيثم تطلعون نص
جنى: خيولي هيثم ما اريدو
علي: شوفي حبيبتي تحجي على ابننا
.
.
رؤى: والي يحجي على ابننا
علي: لازم يتعاقب
.
.
جنى: من كال هيج هجمو علي ثنينهم ما لحكت اسوي شي وعمي ثبتني وعمتي تدغدغني لحد ما اختنكت من الضحك وكمت اتلاوى وياهم وسحبت عمتي عالسرير
.
.
وعمي تركني وثبتها وكمت اني ادغدغها وهي ميتة ضحك وبعدها هجمنا اني وياها على عمي ودغدغناه بس ما كدرنالو لان رجال وقوي مو مثلنا
.
.
عدلت شعري بايدي وكلتلو اني اعرف شاون اخذ حقي منكم وركضت على غرفتهم وهم ركضو وراي لكيت هيثم كاعد ويلعب واخذتو وانهزمت بيه وهم يلحكوني وهيثم يضحك من كل كلبو
.
.
ومسكوني بالمطبخ وتعاقبت مرة ثانية ودغدغوني لحد ما بطني كامت توجعني من الضحك بعدها سوينا الريوك اني وعمتي تريكنا وجبتلهم التيلفون علمود يشوفون الصور
.
.
واني رحت لغرفتي علمود ادرس وجنت كلش متشوقة علمود اشوف الصور لاماني وهنادي بس صار الي ما جنت متوقعتو اجت عمتي كالت اكو بنت ومرة يصيحوج
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413