طيوف الماضي

البارت(67) طيوف_الماضي الكاتب#احمد

#طيوف_الماضي
بقلم #احمد
البارت_67
.
.
وشفت نفسي فاضية وماعندي شي ورحت عند ماما كضيت الوقت يمها ومن رجعو رجت للبيت وقبل العيد بيوم حبيت اخبث ويا مصطفى على طريقتي الخاصة
.
.
بالليل بعد العشى انتظرت مصطفى لحد ماراح لصلاة التراويح ورحت لغرفتي صليت العشى وطلعت ملابس العيد وجان دائما يجي بعد صلاة التراويح للبيت وبعدها يروح للمضيف
.
.
اخذتلي دوش وطلعت لبست الفستان جان من صدك تحفة وتعمدت البسو بدون بدي لان ماراح اطلع من الغرفة ولبست الاكسسوارات وحطيت مكياج
.
.
قبل ما اكمل رجع هو لان اثبتو رؤية الهلال وماكو صلاة تراويح فتح الباب ودخل اني انداريت شفتو هو ورجعت احط مكياج ومسوية نفسي مو مهتمة لوجودو
.
.
وهو من شافني بقى واكف بمكانو وصافن واني كوة ماسكة ضحكتي واباوعلو بطرف عيني علمود اشوف ردة فعلو اجى حضني من كتوفي وحط حنجو على كتفي وجانت هاي حركتو المفضلة
.
.
مصطفى: شتسوين
جنى: اجرب ملابس العيد واريد اشوف اكثر مكياج يناسبهن علمود باجر اسوي مثلو
.
.
مصطفى: وليش تعذبيني واني محروم منج
جنى: بشنو اعذبك
مصطفى: اششششش كملي ولا تحجي
.
.
جنى: دفن وجهو بركبتي واريد اركز بالمكياج ماكدر اخير شي رجعت كلشي عالمراية وانداريت عليه رفعت راسو وباوعت بعيونو ومبين اشتياقو الي بعيونو
.
.
من شفت عيونو هيج ما تحملت اشوفو تعبان هيج وابقى ساكتة اخذت منو بوسة وكأنو جانت هاي اشارة الو انو اني هم مشتاقة الو وهو ما خيب ضني وجان مثل ما توقعت
.
.
شالني بايديه ونزلني عالسرير بهدوء لان يخاف علي ورحنا بعالمنا الخاص ونسينا نفسنا ونسينا الوقت ومركزين ببعض لحد ما صارت الساعة 12 اخذنا دوش ورا بعض وتمددت بحضنو وكلتلو هاي هي يلا عالنوم
.
.
مصطفى: اليوم ماكو نوم
جنى: وليش إن شاء الله
مصطفى: غير اليوم حررنا القدس
.
.
جنى: يا قدس هاي
مصطفى: حصلنا هدنة وياج
جنى: هههههههه وخلصت الهدنة
.
.
مصطفى: لا بعد وقت
جنى: شنو ما تشبع انت
مصطفى: غير انتي حلوة واني طماع
.
.
جنى: شكد تحبني
مصطفى: اكثر من امج وابوج
جنى: معقولة تجي وحدة تاخذ مكاني بكلبك
.
.
مصطفى: مستحيل يصير هالشي
جنى: وشنو الي يأكد هالشي
.
.
مصطفى: لان اني حبيتج الج ومن حبيتج ما حبيتج علمود شي محدد لا حبيت روحج وحبيت اخلاقج وحبيت شكلج وحبيت طبعج وحبيت تصرفاتج
.
.
جنى: اروحلك فدوة اني شكد كلامك حلو ويبرد الكلب
مصطفى: بغمزة .. وفعلي هم يبرد الكلب
جنى: عزاااا شكد ما تستحي
.
.
مصطفى: ههههههههه اي يابة شسوي بالمستحى
جنى: وشنو بعد غير انك تحبني
مصطفى: احب جفصاتج
.
.
جنى: لا تذكرني بربك
مصطفى: لحد الان اتذكر من تكولين الي ولاخواني عواريس وكل ما اتذكرها اضحك
.
.
جنى: ههههههههه اي وربي فد جفصة ما تتصلح
مصطفى: انتي لو سالمة من كاضم مابيج شي
جنى: هو كل عيد يرجع يكولها وباجر متأكدة حيكولها
.
.
مصطفى: اي تحملي نتائج جفصاتج
جنى: يلا تصبح على خير
مصطفى: يعني ماكو جولة ثانية
.
.
جنى: اولا هسا طلعت من الحمام ومابي حيل اسبح مرة ثانية ثانيا تأخر الوقت وباجر لازم نكعد من الفجر علمود تروح للصلاة لو نسيت حظرتك
.
.
مصطفى: يلا لعد كليبي نامي نوم العوافي
جنى: الله يعافيك يا روحي انت
.
.
حضنتو من ركبتو وبستو بصدرو ودفنت راسي بصدرو ونمت ماكعدت للفجر كعدني هو وكام بدل ملابسو وكشخ ورتب نفسو علود يروح لصلاة العيد
.
.
واني هم عدلت ملابسي ونزلت اشوف البنات كاعدات ولا لا لكيتهن كاعدات ومن راحو الولد للصلاة جهزنا الريوك ومن خلصنا رحت كشخت
.
.
وهالمرة لبست بدي ويا الفستان لان راح اطلع كدام الولد بيه ولبست شال ورتبت نفسي ونزلت تحت وننتظرهم يجون علمود نحط الريوك والساعة 6:30 تقريبا اجو
.
.
جان اول واحد بيهم مصطفى واحنا واكفات واول وحدة بينا الحجية سلم عليها وباس راسها واجى باسني بس من خدي لان عيب يبوس شفايفي كدامهم وباسني من راسي
.
.
وصافح زوجات اخوانو وباس مصطفى الصغير وبعدو شاهين سوا مثل ما سوا مصطفى وبعدو كاضم سلم على امو وصافحني وكلي كل عام وانتي بالف خير وعيد الاخر عريس ضحكت وكلتلو وانت عاروس وشبع ضحك
.
.
ورغم انو بعض ناس يعتبرون هالشي اهانة الهم انو هو زلمة واشبهو بالمرة بس كاضم جان يعتبرها شقى وما يزعل ابد ومن سلم على لارا وهند رحنا سوا حطينا الريوك
.
.
وهالمرة ما سوينا كليجة لان اني وهند حوامل ولارا ملتهية بمصطفى والحجية عدها برمضان اهم شي قراءة القرأن اهم من الكليجة بهواي لهذا اجلنا
.
.
كلنا على عيد الاضحى او السنة الجاية اذا الله خلانا حيين وطيبين نسويها من تريكنا راحو الولد للمضيف وبلشو يجونهم زلم علمود يسلمون عليهم
.
.
ورغم ان مصطفى اصغر واحد بعمامو بس لان هو الشيخ ولازم يبقى بالمضيف فهم يتجمعون عندو ولمحت بابا وهيثم راحو للمضيف
.
.
ووراهم بشوية اجت ماما علمود الحجية وعايدتنا وكعدت ويا الحجية وبلشن يجن نسوان من عمام مصطفى وخواتو وجانو الي يجون الحجية تكوللهم غداكم يمنا
.
.
ومنهم الي وافق ومنهم الي اعتذر لان يجونهم بناتهم او خطار ومايكدرون يبقون ويكعدون نص ساعة لو ساعة ويروحون
.
.
واني اريد احصل فرصة علمود اكول للحجية محد جاب غدا وماكدر ومصطفى ماكدر ادك عليه لان عندو ضيوف واتصلت على كاضم
.
.
كلتلو عدنا ناس ونريد نسويلهم غدا وما جبتو شي قابل نسويلهم تمن وزلاطة كال لا تخافين حسبنا حسابنا وهسا اني بالطريق جايب وياي اللحم بلشو بالتحظير بين ما اوصل
.
.
وسكرت منو وكلت الحمدلله جان بين ما يروح يجيب ويرجع تصير الدنيا ظهر وتقريبا بال 9 الصبح وصل اللحم وبلشنا بالغدا واجن البنات ساعدننا
.
.
واني استلمت الزلاطة علمود ابقى كاعدة وهند تلكط الكرافس والبقدونس ونحجي ويا بعض ورغم الهوسة بس متونسات بالجمعة وبالاخص وجود البنات زاد ونستنا وما حسينا بالتعب مثل من نكون لحالنا
.
.
ومن صارت الدنيا ظهر استوى الاكل وغرفناه واتصلنا على كاضم اجى اخذ هو وولد عمو للمضيف وحطينا للنسوان بالصالة وتغدينا كلنا
.
.
ومن خلصنا جمعنا المواعين بالمطبخ بس منظرهن من صدك يخوف صايرات كوم كامل عدا خبصة البيت الي يحتاج ترتيب وتنظيف من الراس للراس
.
.
لهذا اماني وهنادي كالن احنا نبقى وياكن علمود نخلص بسرعة وانتي وهند لا تشتغل هواي ترا مو زين الكن واكو ثنين من بنات عمامهم هم اتفقن ويانا انو يبقن ومن راحو اهلهن كالن الهم وبقن يمنا
.
.
وبلشن بالتنظيف واني وهند عزلنا البيت ونظفناه وكعدنا عند الحجية نرتاح وكأنو صارلنا ساعة نركض من التعب ومابقى بينا حيل نشتغل غير شغلة
.
.
والبنات بقن يشتغلن بالمطبخ ومن خلصن شغلهن كلو اجن كعدن يمنا واماني اتصلت على زوجها وبنات عمامهم كل وحدة اتصلت على اخوها
.
.
ورغم كالتلهن الحجية علمود يتعشن بس كلهن رفضن حتى اماني وهنادي وراحن كلهن قبل المغرب بشوية بعدها اجو الولد ومبين عليهم التعب لان بقو بالمضيف النهار كلو
.
.
وكلت لمصطفى بعد العشى اريد اروح اسلم على بابا كال ماكو اي مشكلة وحطينا العشى وتعشينا وقبل ما نروح اني ومصطفى اجى هيثم
.
.
دفع الباب وكال السلام عليكم يا قوم واجى سلم عالحجية وباسها من خدها وراسها واجى باسني اني هم ووصل لعند لارا باوعلها كال انتي ما ابوسج
.
.
دنكت عليه كالتلو ليش ما تبوسني شنو اني مو حلوة كال لا حلوة بس عيب تبوسين رجال غريب ومد ايدو علمود يصافحها كالت والله ابوسك لو تنكلب الدنيا
.
.
وسحبتو عليها وباستو من خدو وهو يضحك وراح على هند وكرر وياها نفس الموقف وهي هم سوت مثل لارا وباستو
.
.
وشاف مصطفى الصغير(راح اسميه صوفي علمود اختصر الاسم) بايد لارا اخذو وكعد يم مصطفى ومرة يباوع لصوفي ومرة لمصطفى وانتبهت عليه
.
.
كلتلو شبيك كأنك مستغرب كال هذا مصطفى وهذا مصطفى مو كلتلو اي كال هذا ولد وهذا رجال مو (يقصد ان مو واحد منهم بنت) كلتلو اي كال لعد ليش هذا(صوفي) ينحب وهذا (مصطفى) ينذب
.
.
يا ويلي من كال هيج شضحكو عليه ضحكة كاضم وشاهين الا طلعت دموعهم والي موجودين كلهم يريدون يسكتون مايكدرون حتى مصطفى الي هو اكلها شبع ضحك
.
.
كالو ولك هيثم اني انذب كال اي الصراحة انت مو حلو مثلو باوع هذا وجهو مثل الكيكة كالو مصطفى واني وجهي يطرد النعمة مو وهيثم صغر عيونو وابتسم وهز راسو بمعنى اي
.
.
وكاضم كيف تكابل هو وهيثم ويصنفون على مصطفى ويضحكون ومصطفى ماخذ الموضوع بكل روح رياضية ومتقبل كل التصنيف الي تعرضلو منهم
.
.
ومن اذن العشاء صلينا اني ومصطفى ورحنا لاهلي سلمت على بابا وكعدو هو ومصطفى ويانا لان تعبانين من المضيف وماكو احد القريبين كلهم اجو بالنهار وبال 10:30 اجى هيثم نعسان ويتثاوب يريد ينام
.
.
مصطفى: ابو هيثم ترضاها هيثم يصنف علي
علي: ولك هيثم صحيح
جنى: اي بابا صحيح يصنف على مصطفى
.
علي: ولك هذا منو معلمك تصنف عالاكبر منك
هيثم: لا بابا هذا مصطفى صديقي واني احبو واتشاقة وياه ما اصنف عليه وهو اكبر مني
.
.
علي: شفت مصطفى هو يحبك ويشاقيك
مصطفى: يلا اذا بعد ما يعيدها اسامحو
علي: بعد تعيدها
.
.
هيثم: بابا ترا ما صنفت عليه كلت الحقيقة
علي: يا حقيقة
هيثم: كلت صوفي احلى من مصطفى
.
.
علي: بس هيج
هيثم: لا بابا
علي: لعد شنو بعد
.
.
هيثم: كاضم صار يصنف على مصطفى واني وياه
علي: يعني هم صنفت عليه
هيثم: اووووه سويناه دوشك تنمر
.
.
جنى: رغم بابا جان مسوي نفسو عصبي بس من كال هيج هيثم بابا ما تحمل وضحك ومصطفى ضحك على سالفة هيثم وضحكة بابا وكدر هيثم يخلص نفسو
.
.
رغم صغير بالعمر بس بسبب روحاتو المتكررة للمضيف عقلو كبر اكثر من عمرو صار يعرف شلون يتصرف ويحجي ويعرف شلون يكلب الموضوع لصالحو
.
.
وبعدها ترخصنا اني ومصطفى لان كعدنا من الفجر وتعبنا كلش من رجعنا للبيت لكينا الكل نايمين واني ومصطفى صعدنا لغرفتنا بدلنا وحطيت نفسي بحضن مصطفى ومن التعب فورا نمت
.
.
كعدت ثاني يوم بال 9 الصبح رفعت راسي مصطفى ماكو اكيد شافني مرتاحة بنومتي وماحب يزعجني وعافني وراح وكمت بدلت ملابسي وصليت الفجر ونزلت تحت
.
.
صبحت عليهم وكعدت اتريك واكلت لحد ما شبعت وجنت جوعانة كلش لان بالعشى ما اكلت زين من التعب وبال 10 اجن نسوان سلمن عالحجية وبقن نص ساعة وراحن
.
.
وكضينا العيد بين خطار منا وكرايب منا وعمام مصطفى لان اجو علينا ما رحنا الهم بس مصطفى واخوانو راحو لعمامهم لان يكولون هم كبار ولازم نروحلهم كأحترام الهم مثل ما اجو علينا
.
.
وخصصولهم يوم افترو عليهم كلهم وبعدها قررو يصومون 6 ايام من شوال واتفقو يبلشون بيهن يوم السبت من ثاني اسبوع بشوال ويخلصونهن الخميس وطبقو الفكرة
.
.
وبلشو من يوم السبت بالصيام واني وهند رجعنا مثل رمضان ناكل وحدنا بالنهار بس بسبب البرتقال جان اكلي قليل بالنهار وجنت كل ما اجوع اكل برتقالة وتنسد نفسي
.
.
والبرتقالة بيها فيتامينات هواي يعني ماكو اي ضرر اذا اكلها بدال الاكل لهذا اعتمدت عالبرتقال وكوة خلصن هال 6 ايام احسهن تأخرن اكثر من رمضان
.
.
يمكن لان جنت احسبلهن عكس رمضان جنت ما مهتمة لان شهر وما يخلص بالحساب من خلصو صيام ال 6 ايام رجعت حياتنا طبيعية وبسبب حرارة الجو محبوسين بالبيت
.
.
ومرة من المرات الساعة 12 الظهر طفت الكهرباء وراح كاضم يريد يشغل المولدة وطلعت فارغة كاز (نفط)  وناسين يجيبون ولازم يروح واحد منهم يجيب
.
.
وراح شاهين بس بين ما راح ورجع ماعت روحنا من الحر كأنو عايشين بتنور من الحر من صدك بذاك اليوم انحمسنا حمس من الحر
.
.
اني وهند كعدنا عالكاع علمود البرودة الي بيها وفوك هاي عركنا يصب من الحر وما اكدر انزع شالي لان كاضم موجود ولا اكدر اروح للغرفة لان حارة بعد اكثر
.
.
كلت ماكو حل الا انو اخذلي دوش وفعلا رحت لغرفتي اخذتلي ملابس ودخلت للحمام وجنا بالصيف ما نشغل الصخان لان ما نحتاجو لهذا الماي الي ينزل بيه يبرد لان ما يبقى تحت الشمس ويصير ابرد من ماي التانكي
.
.
فتحت الدوش ووكفت تحتو لحد ما حسيت طلعت كل الحرار  من جسمي وسمعت صوت المولدة اشتغلت وكملت بسرعة وطلعت مشطت شعري ولبست شالي ونزلت تحت
.
.
واحس البيت جان جحيم وصار جنة بس لان اجت الكهرباء وشوية صار ابرد ومنها صارو ينتبهون للكاز مال المولدة ومن يخلص يروحون فورا يجيبون غيرو
.
.
واستمرينا على هالروتين الطبيعي بدون اي احداث مهمة من خلص شهر شوال بدت تكبر بطني شوية شوية ويبين علي الحمل وجنت كلش اتعب من اسوي شي
.
.
ودائما الحجية ومصطفى يوصوني انو ما اشتغل علمود ما اتعب وجان مصطفى دائما ينتبهلي علمود لا اتعب وينتبه لسكري علمود لا يتخربط ويصير بيه صعود لو نزول
.
.
وهو جان اكثر شي ينزل من اتخربط وما اتذكر مرة صعد اكثر من الحد الطبيعي وجنت من اصعد الدرج احس نفسي صاعدة جبل مو طابق ثاني والحجية لاحظت تعبي السريع
.
.
وكالت مو معقولة تتعبين هيج بسبب الحمل اني من حملت باولادي كلهم ما جنت اتعب هيج لازم تروحين لدكتورة تجيكين وضعج
.
.
وهي جانت تقصد انو خاف حامل بتوم لهذا اتعب بسرعة بس ما كالتلي علمود ما يصير عندي امل ويخيب اذا ما كنت حامل بتوم واني افتهمت قصدها بالعكس وعبالي بي شي
.
.
ومن كالت هيج كتلني الخوف وما اريد اروح للدكتورة وبنفس الوقت اريد اعرف شكو علمود اذا لا قدر الله اكو شي بلكي يكون بداية واتلاحك نفسي قبل فوات الاوان
.
.
واتفقنا اني وهند نروح ثاني يوم لان تكول اني هم اروح اجيك وضعي ماطول انتي رايحة وبقيت الليل كلو انام ثواني واكعد وكتلني القلق وخايفة من الروحة
.
.
وماعرف شسوي علمود ارتاح وما اكدر اتحرك خاف يكعد مصطفى وتخرب نومتو لان اني صايرة بحضنو وهو نومو خفيف ادنى حركة راح يكعد واني ما اريد هالشي يصير
.
.
وبقيت متحملة للصبح لحد ما كعد وكمنا تريكنا اني وهو وهند وتجهزنا ورحنا للدكتورة وسجلنا سرا ومن وصلنا الدور دخلت والدكتورة كالت سونار قبل اي شي علمود نتأكد
.
.
........... يتبع
لايك وتعليق حلو مثلكم ❤