طيوف الماضي

البارت(30)طيوف_الماضي الكاتب#احمد

تصويت ومتابعه لحتى توصلكم باقي البارتات والقصص❤
#طيوف_الماضي
بقلم #احمد
البارت_30
.
.
مصطفى: من وصلت جنت احس بخوف خايف لا انفجع بيها خايف لا الكيها مخطوفة لو مقتولة خلال ثانية تنعاد الف فكرة براسي وادعي لربي مو صاير شي وياها
.
.
وصلت بيت عمها مبين الوضع طبيعي دكيت الباب شوية وسمعت صوت عمها واجى فتح الباب وتفجاء بي ورحب بي ودخلني داخل كلتلو شلونكم
.
.
علي: الحمدلله اخبارك انت
مصطفى: الحمدلله بخير
علي: يا هلا بيك زارتنا البركة
.
.
مصطفى: الله يبارك بيك
علي: الاهل شلونهم إن شاء الله بخير
مصطفى: الحمدلله كلهم بخير
.
.
علي: عن اذنك ثواني
مصطفى: براحتك .. اريد افتح وياه الموضوع بس ماكدر اكلو جنت احجي ويا جنى انتظرتو لحد ما اجى
.
.
علي: شعجب نورتنا بزيارتك
مصطفى: صار عندي شغل بالموصل وكلت امركم
علي: حياك الله بكل وقت
.
.
مصطفى: ابقاك الله .. ابو هيثم سؤال
علي: كول
مصطفى: البارحة صار عندكم شي بالمنطقة مو طبيعي
.
.
علي: مثل شنو
مصطفى: مثلا ليش تيلفونك خارج التغطية
علي: اي والله صار انفجار هز الدنيا هز
مصطفى: انفجار شنو
.
.
علي: صهريج مفخخ انفجر على السيطرة القريبة من عدنا ولان السيطرة صاير يم البرج والانفجار قوي وكع البرج وانقطعت التغطية عن المنطقة
.
.
مصطفى: وتأذة احد
علي: الجنود ما لكولهم اثر من قوة الانفجار والليل كلو المنطقة داخلة انذار بسبب الانفجار
.
.
مصطفى: اذا اقدملك نصيحة تستقبلها
علي: كول
مصطفى: ليش ما تبيع بيتك وتجي تسكن يمنا واني اوكف وياك لحد ما تستقر ببيتك
.
.
علي: كفو منك بس صعبة والله ودوامي هنا
مصطفى: نقلك انت وزوجتك علي وهم جنى تكمل دراسة هناك بدال ما تتورط بجامعة الموصل
.
.
علي: والله يخوي صعبة كلش
مصطفى: شنو الصعب بيها
علي: انو ننتقل منا ونعوف بيتنا الي كضينا حياتنا بيه
.
.
مصطفى: لا صعبة ولا شي بيع البيت والارض اني انطيك ارض تبني بيها احسن بيت واسجلها باسمك واول ما تستقر تبدا دوامك بالمدرسة الي تعجبك
علي: الله كريم اشوف واردلك خبر
.
.
جنى: جنت احجي ويا مصطفى فجأة اهتزت الكاع وصار صوت قوي كلش بحيث نص الجامات تكسرت من الخوف دفنت نفسي بالفراش وكمت اصرخ
.
.
اجو عمي وعمتي علي وتطمنو ان ما صار بي شي وصار صوت اسعافات وسيارات شرطة وانكلبت الدنيا عمي كال لعمتي اذا صار انفجار ثاني اخذي جنى وصيرن جوا الدرج
.
.
من تأكدنا ان الوضع هدأ نظفنا البيت من الكزاز الي تطشر بس منعو التجول واي شخص يشوفوه خارج البيت يعتقلوه ولهذا السبب عمي ما كدر يطلع يجيب جام بدال الي انكسرن
.
.
بقى الوضع متكركب الليل كلو سيارات الشرطة والجيش رايحة جاية والتيلفونات مابيهن تغطية وبقى بالي عند مصطفى كلت هسا يتخبل اذا سمع صرختي بداية الانفجار
.
.
ثاني يوم الوضع هدا وراح عمي جاب ابو الجوم اخذ قياساتهن وراحو جابو الجوم وركبهن واخذ فلوسو وراح واحنا تغدينا وورا الغدا بشوية اندك الباب وراح فتحو عمي
.
.
واجى كال مصطفى جاي ومبين عليه تعبان سوولو اكل من كال هيج رحت ركض عالمطبخ فتحت الثلاجة وطلعت منها دجاجة كطعتها وحمستها ويا بصل علمود تستوي بسرعة
.
.
وسويت وياها تمن وجنت مخبوصة بتحظير الغدا وانداريت شفت عمتي واكفة بباب المطبخ وشايلة هيثم ومبتسمة كلتلها شنو
.
.
رؤى: جية مصطفى غريبة
جنى: ليش غريبة
رؤى: معقولة يجي صدفة بعد الانفجار بيوم
.
.
جنى: وشدخل هاي بهاي
رؤى: كملي كملي الغدا وبعدين نحجي
جنى: تمام
.
.
كملت الغدا واجى عمي كلتلو لازم اسلم على مصطفى لو عادي اذا ما اطلع كال لا عادي لا تطلعين واخذ الغدا وراح واني رجعت كعدت عند عمتي
.
.
رؤى: يلا احجيلي
جنى: شنو احجي
رؤى: منين عرف مصطفى بالانفجار
.
.
جنى: واني شعرفني اول ما صار الانفجار انقطعت الشبكة وحتى لو اريد اكولو ماكدر
رؤى: جنى اني مو غبية اعترفي
.
.
جنى: حشاج ماما بس هي هاي الحقيقة
رؤى: وين تيلفونج
جنى: هسا اجيبو بالغرفة
.
.
رؤى: اتركيه اني اجيبو
جنى: لا ابقي مرتاحة
رؤى: كلتلج اني اجيبو
.
.
جنى: راحت جابتو واجت واني صار وجهي اصفر
رؤى: الحلو بيج ما تخفين اداة الجريمة
جنى: شنو من جريمة
.
.
رؤى: هذا شنو
جنى: باوعت فاتحة سجل الاتصالات واخر رقم مصطفى
رؤى: ها شو سكتي
.
.
جنى: اتصلت عليه لان رقم اماني مغلق
رؤى: غريبة اماني قبلو بيومين حاجية وياها وبعدها مو متصلة عليها شلون عرفتي مغلق
.
.
جنى: بقيت ساكتة ماعرف شجاوب
رؤى: وتعرفين نفسج مو شاطرة بالجذب ليش تجذبين
.
.
جنى: ماعرف
رؤى: بشنو تفكرين
جنى: ماعرف
.
.
بقت ساكتة عمتي لا تكدر تكسر كلبي وتشوف اهتمام مصطفى وشلون اجى كل هالمسافة وبوسط هالضروف الصعبة علمود بس يتطمن علي
.
.
اني وجهي اصفر مادري شجاوب من جهة خايفة منها وخايفة عمي يعرف ومن جهة جذبتي انكشفت وماكدر اسوي شي بعد وبقيت محتارة
.
.
وسكوت عمتي زاد الموضوع علي كلت الله يعلم بشنو دا تفكر واذا كالت لعمي الله يعلم شيسوي بي هاي الكتلة اسهل شي ممكن يسويه وياي
.
.
شوية واجى جاب المواعين وكال مصطفى تعبان وتركتو ينام واخذت المواعين اغسلهن وكل شوية اكول هسا يصيحني لو يجي يكتلني هنا
.
.
للمغرب وماكو شي بس كلبي مو مرتاح لان ماعرف عمتي بشنو تفكر المغرب عمي كال اجلو عشاكم شوية علمود مصطفى وراح يجيب لحم علمود العشى
.
.
واني استغليت فرصة روحتو ورحت لعمتي جان كاعد بالصالة كلتلها ماما راح تكوليلو
.
.
رؤى: شنو
جنى: راح تكولين لبابا علي
رؤى: اي لازم يعرف بنتو شتسوي من ورا ضهرو
.
.
جنى: كعدت عند ركبها وحطيت راسي بحضنها وانفجرت بالبجي
رؤى: كومي منا جنى
.
.
جنى: ماما فدوة لا تكوليلو التوبة والله بعد ما احجي وياه
رؤى: لو مفكرة بابوج جان ما سويتياه
جنى: فدوة ماما وربي ما اعيدها بس هالمرة
.
.
رؤى: مو عيب عليج تحجين ويا واحد غريب
جنى: التوبة وربي ما اعيدها لو اموت
رؤى: بس لازم ابوج يعرف
.
.
جنى: لا ماما فدوة الا بابا والله يذبحني
رؤى: راح اسكت بس بشرط
جنى: موافقة على كلشي بس لا تكليلو
.
.
رؤى: من اليوم مصطفى ما يسمع صوتج لو تنكلب الدنيا
جنى: موافقة وربي بعد ما احجي وياه
رؤى: وعد
.
.
جنى: اي وربي وعد
رؤى: تمام روحي هسا لغرفتج
.
.
جنى: عفتها ورحت للغرفة دفنت نفسي بالفراش وانفجرت بالبجي واحس راسي يوجعني من الخوف وعلى بجيتي نمت ما كعدت لصلاة العشاء
.
.
كعدت حرارتي مرتفعة وراسي يوجعني بشكل مو طبيعي ومعدتي احسها نار طلعت من غرفتي عمتي بالمطبخ وهيثم بالصالة يلعب بالعابو
.
.
رحت اريد اتوضى واصلي وما خلصت الا اني منتهية انداريت اريد ارجع لغرفتي وطلعت عمتي من المطبخ ماعرف شنو حجت وياي واجيت قبل ما اوصلها فقدت الوعي ومن دخت وكعت لورا وجانت المغسلة وراي وراسي وضرب المغسلة
.
.
مصطفى: جابلي علي الغدا من اول ما اشتميت ريحتو عرفت جنى مسويتو واني جوعان كاتلني الوجع واكلت لحد ما بردت كلبي وشبعت عالمضبوط
.
.
بعدها جابلي غطى ونمت كعدت ورا المغرب وكعدنا دا نحجي اني وياه وننتظر العشى وجنت مقرر من ثاني يوم ارجع للبيت دا نحجي وما سمعنا الا صوت زوجة علي
.
.
واحس كلبي انعصر من صاحت باسم جنى بدون وعي مني ركضت قبل علي دخلت للبيت شفتها واكعة بالكاع ودمها يجري من راسها وزوجة علي كاعدة يمها وتبجي
.
.
بسرعة زتيت السويج على علي وكلتلو بسرعة شغل السيارة وشلتها بايدي وشوفتها ذبلانة هيج كأن سجين انغرس بكلبي ركضت بيها فتحت الباب وصعدت بسرعة وانطلق علي
.
.
ضربتها بايدي على وجهها على كيفي احاول اصحيها وهي ماكو كلتلو بسرعة البنت راح تموت وهمزين اكو مستوصف قريب رحنا عليه
.
.
ضمدها ضماد بسيط وكال اخذوها للمستشفى ماكدر اسويلها شي لان راسها مفتوح واحتمال الجمجمة متأذية رجعت شلتها وركضت بيها للسيارة
.
.
حطيتها بالمقعد الورا واخذت السويج من علي وانطلقت باقصى سرعة وكلبي معصور عليها دا امشي ما حسيت الا ضو الجندي الي بالسيطرة ضرب عالسيارة
.
.
وكوة كدرت اوكف السيارة وشحطت يمكن 10 امتار الجنود سحبو اسلحتهم وجهوها علينا رفعت ايدي وكلتلهم عندي مريض ومستعجل
.
.
اجى الجندي شافها وكال توكلو عدها العافية اعتذرت منهم عالسريع وكملت طريقي وعلي المسكين بس ما يريد يبجي عليها من القهر
.
.
الحلو بعلي من وصلنا الموصل جان يدليني عالطريق قبل ما اوصل فمثلا من امشي بطريق يكلي مو هذا الفرع الي وراه اطلع عاليمين
.
.
اول ما ادخل بيه يكلي اطلع كبل او ادخل بالفرع الي عاليسار وبهالطريقة ما تأخرنا من وصلنا المستشفى راح هو ركض عالدكاترة انطاهم خبر واني شلتها وركضت بيها
.
.
واجو جايبين وياهم سدية حطيتها عليها واخذوها وبقينا ننتظر اني وعلي جنت واكف ودك تيلفوني وشفتو امي واعرفها اذا ما رديت عليها تخبص الدنيا من الخوف ورديت عليها
.
.
الحجية: ها وليدي وصلتهم
مصطفى: اي يمة وصلتهم
الحجية: شلونهم خوما بيهم شي
.
.
مصطفى: جانو زينين صاير عدهم انفجار وواكع البرج
الحجية: ايمتى ترجع
مصطفى: ماعرف والله يمة
.
.
الحجية: ليش شعندك
مصطفى: جنى بالمستشفى
الحجية: يا ستار شبيها
.
.
مصطفى: والله ماعرف جانت بالبيت فاقدة الوعي وراسها مجروح جرح جبير وهسا بالمستشفى
الحجية: وشنو كال الدكتور
.
.
مصطفى: هسا وصلنا يمة
الحجية: ماعدها الا العافية إن شاء الله
مصطفى: الله يعافيج يمة
.
.
الحجية: عود طمني عليها وليدي
مصطفى: بعيوني
الحجية: سالمة عيونك
مصطفى: الله يسلمج يمة
.
.
سكرت منها وبقينا ننتظر ورا نص ساعة لو اكثر اجت الدكتورة كالت كدرنا نخيط راسها بس نزفت دم هواي وتأخرتو لحد ما جبتوها كلتلها اكدر اتبرعلها بالدم لو لا
.
.
الدكتورة: دمك مطابق لدمها
مصطفى: ماعرف
الدكتورة: تعال وياي
.
.
مصطفى: رحت وياها وعلي اجى هم يسوي فحص اذا يصير يتبرعلها ولا لا وسوولنا فحص وبسرعة طلعوه لان مستعجلين عليه طلعنا ثنينا مطابق
.
.
اخذو مني بطل ومن علي بطل وكالت الدكتورة باجر الصبح تكعد علي امنها يمي وكال لازم اروح اطمن امها لان هسا كلبها محترك عليها كلتلو روح واني باقي يمها
.
.
وراح ورا ربع ساعة اجى جايب كباب كال تعشى زين لان اخذو منك دم هواي وتركني وراح بس تصرفو كلش عجبني يوضحلك شكد هالانسان واعي ومثقف وشكد يفتهم بهيج مواقف
.
.
راح هو واني جنت فعلا جوعان وهسا متبرع بالدم وهم الحمدلله جنى بخير تعشيت وكباب مصلاوي بس الريحة تخليك تجوع لو ماكل خاروف كامل شلون الجوعان
.
.
ما حسيت على نفسي الا اني مطير النفر كلو بس من صدك تنكت شكد ما اكلت اخذت العلاليك والفلين مال السفري وذبيتهن بحاوية
.
.
ورجعت كعدت كدام الغرفة وكلت هسا اكدر انتظر براحتي بس جان مجرد حجي لان البارحة بالليل مو نايم والعصر نمتلي يمكن 3 ساعات يعني تعبان ونعسان كلش
.
.
رجعت اتصلت على امي وطمنتها وسكرت منها ودخلت على غرفة جنى جانت نايمة على صفحتها وراسها من ورا مضمد وشعرها واكع على وجهها مغطي نص وجهها
.
.
بعدتو عن وجهها وكعدت مقابيلها وجهها متغير مو مثل قبل خدودها كبرانات ومبين عليها انها مرتاحة بحياتها عند عمها شفايفها صايرات مثل الكرز بدون حمرة
.
.
واكثر شي يجذبني بيها هو البرائة الي بوجهها والمشكلة مو مصطنعة يعني ابسط مثال بوضعها هذا هي فاقدة الوعي بس من تشوفها تحس بالبرائة الي بيها
.
.
اخذت ايدها وامسح بيها على كيفي واني خايف عليها رغم الي اسويه غلط والمفروض ما اسويه بس مو بايدي من خوفي عليها وحبي الها اسوي اشياء بدون ما ادري بنفسي
.
.
يعني جيتي من هناك ودخلتي على بيت عمها بدون استأذان وشيلتها بحضني وكعدتي وياها هسا وماسك ايدها والمشكلة هي ما شجعتني على شي منهن كلهن دا اسويهن لحالي
.
.
ومن جانت تتصل علي ما جانت حتى تلمحلي بشي علمود يكون عليها حق طلعت من الغرفة وبقيت انتظر على نار اريدها تكعد علمود اتطمن عليها
.
.
الفجر اجو علي وزوجتو خطية زوجتو وجهها مخطوف وصاير مثل الليمونة من الخوف عافت ابنها عند علي ودخلت على جنى تشكر من علي كلتلو ترا راح تزعلني منك
.
.
علي: تعبناك ويانا
مصطفى: ولو ابو هيثم تستاهلون انتو شسالفة
علي: تستاهل العافية
.
.
مصطفى: الله يعافيك
علي: ما كعدت او اجتها الدكتورة
مصطفى: لا والله لا اجتها الدكتورة ولا كعدت
.
.
علي: الله كريم
مصطفى: لو مأجلين جيتكم للصبح احسن
علي: يمعود ام هيثم تخبلت تكول ماتت وانت ما تحجيلي
مصطفى: بعيد الشر عنها بس شنو الصار بالضبط
.
.
علي: كعدت من النوم رايحة مغسلة وكايلتلها امها علمود تسوي زلاطة للعشى وتساعد امها وتكول ما حسيت الا البنت انكلبت لورا وانضرب راسها بالمغسلة ودمها صار يجري بالكاع وجبتها علمود تطمن عليها
.
.
مصطفى: الحمدلله مابيها شي
علي: اي والله الحمدلله
مصطفى: شوية وارجع
.
.
طلعت من المستشفى ورحت جبتلهم ريوك كيمر وخبز وجاي ورجعت بين ما جبت ورجعت صارت الدنيا صبح رجعت كلت لعلي ما كعدت كل بعدها ما كعدت
.
.
ورا خمس دقايق طلعت ام هيثم تضحك وكالت كعدت ودخلنا عدها ركض جانت كاعدة بس ما تكدر تفتح عيونها وتتوجع من راسها حجى وياها ابوها وسكتت ما توجعت شوية وفتحت عيونها
.
.
علي: الحمدلله عالسلامة بنيتي
جنى: منو انت
علي: بهت وجهو .. شبيج جناوي
.
.
جنى: منو انت ماعرفك
رؤى: جناوي بنيتي هذا عمج علي
جنى: وانتي منو ماعرفج
.
.
رؤى: متأكد ماتعرفيني
جنى: اندارت .. اعرف هذا .. مصطفى
رؤى: منو هذا
.
.
جنى: ههههههه كسرتي بكلبي
رؤى: شنو
جنى: اروح فدوة لماماتي
.
.
رؤى: بربج هي هاي هم سالفة تسويها بينا
جنى: اسفة ماما بس حبيت اضحك وياكم
مصطفى: الحمدلله عالسلامة
.
.
جنى: الله يسلمك .. يااااا وين حجابي
مصطفى: كولي وين شعري مو وين حجابي ههههه
جنى: مسكت شعرها .. شبيه شعري
.
.
علي: نصو طار علمود الخياط
جنى: بدموع .. صدك والله
علي: اي والله
.
.
جنى: وليش خليتهم يسوون هيج بي
علي: لعد تبقين مفتوح راسج
.
.
مصطفى: كامت تبجي من كل عقلها وكوة هديناها ورحت جبت الريوك قبل ما يبرد الجاي وتريكنا كلنا وسجلنالها خروج ورجعنا للبيت
.
.
جنا محتارين براسها شلون تلفو بس ام هيثم جانت جايبة شال ولفت راسها بس علمود ما يبين شعرها ورجعنا للبيت
.
.
........ يتبع
لايك وتعليق حلو مثلكم ❤
حطولنا ارائكم وتوقعاتكم ❤
بيج الفيسبوك @AS413