طيوف الماضي

البارت(63) طيوف_الماضي الكاتب#احمد

#طيوف_الماضي
بقلم #احمد
البارت_63
.
.
جنى: وصلنا بستان جان كلش جبير ومحاوط بشبك والاشجار الي بيه كلهن كبار وكثيرات ومن دخل بيه مصطفى كلش فرحت لان عرفتو بستانهم وجانت الدنيا مغرب من وصلنا البيت الي موجود بالبستان
.
.
نزلنا من السيارة البيت نظيف ومأثث من كلشي بس مابيه اكل لان يخرب من يبقى فترة طويلة لذلك جنا جايبين ويانا خبز والاشياء الي نحتاجها من ناحية الاكل
.
.
نزلنا الاكل والاغراض وجان البيت طابقين واني ومصطفى اخذنا غرفة وشاهين ولارا بغرفة وكاضم وهند بغرفة والبنات والحجية بغرفة وبقت غرفة فارغة زايدة
.
.
حطيت الملابس بالغرفة ونزلت تحت اني واماني وبلشنا بالعشى وسوينا عشى خفيف جبن وقشطة ومربى ومن هالاشياء هاي وتعشينا
.
.
وكعدنا كلنا ويا بعض نحجي واول مرة ننجمع هيج جمعة لان جانو دائما الولد يروحون للمضيف وهالمرة كاضم من صدك سوا بينا مغص من الضحك
.
.
حتى هند تكول اول مرة اشوفو هيج يصنف ومتونس وما خلى احد يسلم من لسانو استلم العيلة كلها حتى امو ومصطفى واني والبنات بس نسمعو ونضحك
.
.
وبقينا لوقت النوم وبدو ينسحبون نفر نفر لحد ما بقينا بس اني ومصطفى والحجية وجانت الساعة بحدود 11:30 بالليل حجو شوية الحجية ومصطفى
.
.
وكاللها اذا اني التهيت ديري بالج عالبنات ترا الكاع ما تخلى من حياية وحشرات مؤذية ما نريد يصير شي يخرب علينا جيتنا
.
.
واذا يريدن يتمشن بالبستان خلي يروحون وياهن كاضم وشاهين وبعدها راحت الحجية وكلي مصطفى تعاي اكعدي يمي ورحت كعدت يمو وحط ايدو على كتوفي وسحبني لصدرو
.
.
مصطفى: تعبانة
جنى: شوية مو هواي
مصطفى: باجر عود ذكريني اوديج تفترين بالبستان
.
.
جنى: إن شاء الله بس خوفتني بسالفة الحياية
مصطفى: تخافين واني موجود
جنى: اي ههههههه
.
.
مصطفى: صخم الله وجهج طيرتي هيبتي
جنى: مو بايدي والله من اشوفها احس روحي تطلع من الخوف واعتقد عندي فوبيا منهن
.
.
مصطفى: لا تخافين الحية التقرب عليج املص راسها
جنى: فديت حبيبي البطل اني .. وبستو
مصطفى: ليش تتحارشين
.
.
جنى: اذا ما اتحارش بيك لعد بمنو اتحارش
مصطفى لعد تحارشي بكيفج بس تحملي العواقب
جنى: جعلني اعيش عمري كلو بعواقبك
.
.
من حجيت هيج ما حسيت الا انسحبت وشالني على كتفو واحجي وياه اريدو ينزلني خاف يشوفنا احد وهو مو مهتم ولا كأنو دا احجي وياه والمشكلة ماكدر ارفع صوتي لان نايمين
.
.
اخذني للغرفة ومن دخل قفل الباب وكل هذا واني على كتفو مثل الصوصي بس ارافس برجليني وهو ولا مهتم بعدها نزلني عالسرير وصار فوكي
.
.
وكال كلتلج تحملي العواقب واخذ مني بوسة ما خلصت للفجر كعدت ثاني يوم على صوت العصافير فتحت الشباك وطلعلي المنظر الي فعليا يرد الروح
.
.
جانت الشمس خفيفة والمنظر عبارة عن اشجار خضرة والجو بيه هوا خفيفة كلش وبيه برودة خفيفة يعني منعش كلش كلت ياريت يوميا اكعد على هيج منظر حتى بالافلام ماكو هيج منظر
.
.
عفت مصطفى نايم ونزلت تحت لكيت لارا كاعدة وبلشنا اني وياها بالريوك ومن قرب يخلص راحت هي تكعد الموجودين ورحت اني كعدت مصطفى
.
.
وشوية وتجمعو كلهم وحطينا الريوك وتريكنا سوا ومن خلصنا كال مصطفى لشاهين وكاضم روحو جيبو الذبيحة
.
.
جنى: بس ما جبنا ويانا شي
كاضم: موجودة عند الحارس قبل ما نجي
جنى: صدك وين الحارس شو ماكو احد
.
.
مصطفى: بعيد بنهاية المزرعة
جنى: وليش هيج بعيد
مصطفى: احسن علمود ناخذ راحتنا بالبيت هذا
.
.
جنى: اي والله صحيح وهو هم ياخذ راحتو ببيتو
مصطفى: اي وهو هيج
جنى: شرايك نطلع نشوف المزرعة
.
.
مصطفى: جبيرة هواي وبعد شوية نروح نتغدا كلنا بنص المزرعة بس خلي يجيبون الذبيحة بالاول
جنى: تمام لعد
.
.
توزعنا اني والبنات غسلنا المواعين ورتبنا البيت واجو الولد جايبين خاروف واخذ السجين مصطفى وبدا يكصب وهم يساعدوه واني والبنات رحنا نتحظر لان راح نصور
.
.
ما جنت محتاجة دوش لان الصبح اخذتلي دوش بس بدلت ملابسي وكشخت واجى مصطفى اخذلو دوش وبدل عالسريع وطلعنا بالسيارات ورحنا بمكان قريب بين الاشجار
.
.
جان بناء مربع 5 بلوكات تقريبا ومليان تراب نسميه (دجة) ومسوينلو درج وكفو السيارات يمو ونزلنا وجانت الارضية عشب وفرشنا الفرش ونزلو اللحم مصطفى واخوانو
.
.
وجان اكو بوحدة من الزواية مكان للشوي وجابو حطب وبلشو يجهزون للشوي واني والبنات التهينا نطك صور بس جانن البنات تصويرهن حلو بس مو كلش
.
.
والمشكلة ماعرف منو تصويرو حلو وماكدر اطلب من شاهين وكاضم لان عيب منهم وصورت سيلفي طلعن مقبولات وافترينا بالبستان قريب منهم ما ابتعدنا هواي
.
.
وبقينا لحد ما صار وقت الغدا وهالمرة الولد حطولنا الغدا وحطو قوري الجاي عالجمر وكعدنا نتغدا وجان الاكل طيب كلش والمكان يفتح النفس
.
.
وصارت كعدة من صدك ما تتكرر بالعمر وجنت كلش اتمنى وجود اهلي بس بابا رفض ومن خلصنا الغدا شربنا جاي وراحو هند وكاضم واماني بجهة وهنادي ولارا وشاهين بجهة
.
.
وكال مصطفى للحجية امشي ويانا نتمشى كالتلهم مابي حيل اني ابقى هنا وانتو روحو وحاول وياها مصطفى بس كالت اتعب وخابر مصطفى عالولد كاللهم لا تتأخرون امي وحدها
.
.
ورحنا اني وياه نتمشى وجان شابك ايدي بايدو ويحجي وياي وكأننا طيور حب وبحركاتو هاي يحسسني دائما ان مهما عصفت بي الدنيا وزادت علي الهموم راح يكون هو ظلي الاحتمي بيه وهو سندي الي اتكئ عليه وهو اماني الي التجألو من الخوف
.
.
وصلنا مسافة شوية بعيدة عن مكان الغدا طلعت تيلفوني وكلتلو اريد اصورك ووكف كدام شجرة وصورتو كم صورة وكلتلو انت صورني
.
.
اخذ تيلفوني وباوع عليه وضحك كلتلو شكو كال ماكو شي وماعرف شنو جان يضغط ويسوي وصار عندي فضول اعرف شديسوي وبعدها كال اوكفي هنا
.
.
ونزل جسمو وسوا التيلفون مائل شوية وصورني واجيت عليه ومن شفتها ما صدكت عيوني معقولة تيلفوني يصور هيج وباوعت عليه كلتلو شنو سويت
.
.
كال شوية اعدادات للمحترفين مثلي ويضحك وفعليا جانت صورة حلوة بشكل لا يصدق كلتلو امانة شلون طلعت هيج حلوة كال عدلت بالاضائة ودقة الصورة والبعد البؤري وشوية ترتيبات من الاعدادات للالوان الخاصة بالبشرة والخلفية
.
.
كلتلو لعد الله جابك امسك امسك وصار يضحك علي وبدا يطكلي صور وباوعت يمين يسار ماكو احد كال شبيج كلتلو ماطول ماكو احد خلي اخذ راحتي ونزعت الشال
.
.
وباوعلي بخزرة كال منو سمحلج كلتلو فدوة هي مرة بالعمر وماكو احد يشوفنا خلي اصور صور حلوة للذكرى وكوة قنعتو وبديت اسوي حركات بشعري وبعض صور بدون ما اباوع للكامرة
.
.
وكل ما يصورني اروح ركض اشوفها وهو يرزل بي علمود استعجل كلت اتحمل الرزالة احسن ما يروح الوقت قبل ما اصور واشوف صار وجهو احمر وعركان ويباوعلي بنظرات غريبة
.
.
كلتلو شبيك كال ماكو شي كلتلو خلص خلي نرجع كال لا خلي اخذلج بعد كم صورة كلتلو لا نرجع كال بس خلي اصورج ونرجع وصورني ورجعنا بس مو عاجبني وضعو
.
.
من وصلنا اهلو شوية تغير وبقيت منتبهة عليه وحسيتو رجع طبيعي من اجتمع ويا اخوانو وحطينا حلويات واكلنا وبقينا لقبل المغرب ورجعنا للبيت
.
.
نزلنا الغراض وقبل ما اساعد البنات بالمواعين كلي مصطفى تعالي وياي للغرفة كلتلو هسا بس اغسل المواعين وعافني وصعد
.
.
وحصلتلي رزالة من البنات وطردني علمود اروحلو وصعدت لكيتو بالغرفة كاعد دخلت عندو وبدون مقدمات سحبني عالسرير وصار فوكي
.
.
مصطفى: من انطتني جنى التيلفون باوعت لصورتي جانت مبينة مو حلوة وعرفتها مخربة الاعدادات مال التصوير ودخلت رتبتهن من جديد وصورتها
.
.
من شافت الصورة طارت من الفرح وكأنها جانت تنتظر هالشي وبعد كم صورة شو هاي نزعت حجابها بس الحمدلله ماكو احد وماكدرت امنعها لان ماحبيت ازعلها
.
.
وصورتها كم صور واني دا اصورها جانت فتحت الرقبة مالت الفستان شوية واسعة بس من جانت لابسة الشال جان مغطي الفتحة
.
.
ومن دا اعدل وضعية التيلفون الدائرة الي تصير بوسط الشاشة صارت على فتحة الرقبة من عند الصدر وكأني اول مرة اشوف جنى بحياتي
.
.
صعدت حرارتي وعركت ولوما احنا خارج البيت جان تورطت بي جنى وكوة مسيطر على نفسي ومن رجعنا كلتلها تجي عالغرفة
.
.
وكالت تريد تساعد البنات وما لحيت عليها كلت هسا شوية وترجع بس ما توقعتها تجي بهالسرعة واول ما دخلت قفلت الباب فورا ومددتها عالسرير وصرت فوكها كلتلها شسويتي بي
.
.
جنى: باستغراب شنو سويت
مصطفى: بعدت شالها .. هذا .. وحطيت ايدي على فتحة الرقبة مالت الفستان
.
.
جنى: شبيها فتحة الرقبة
مصطفى: حركتيني بيها
جنى: بدلع .. لا ما سويت شي انت منحرف
.
.
مصطفى: ها هسا صرت منحرف
جنى: اي وكلش منحرف مو شوية
مصطفى: وليش لعد تدلعين
.
.
جنى: بدلع اكثر .. لان اموت عليك بكل حالاتك
مصطفى: كافي ترا كوة لازم نفسي
جنى: وليش لازمها
.
.
مصطفى: لعد شسوي
جنى: سوي الي يعجبك
.
.
وسحبت راسو وهالمرة اني اخذت منو بوسة وهو كأنو جان بنتظر هيج اشارة مني ورحنا بعالمنا الخاص وكانت ارواحنا مشتاقة لبعض وكأنو مفترقين من سنة
.
.
بعدها اخذتلي دوش وطلعت دا امشط ومصطفى راح ياخذ دوش وعلى اساس امشط وانزل اكمل السهرة ويا العيلة باوعت للساعة 12 بالليل
.
.
من شفتها تخبلت كل هالوقت واحنا ما ندري بالدنيا رجعت تمددت ودا اكلب بالتيلفون وطلع مصطفى من الحمام نشف شعرو واجى يمي كلتلو تدري الساعة شكد
.
.
مصطفى: بال 9
جنى: 12:10 صارت
مصطفى: لا والله
.
.
جنى: اي والله شوف
مصطفى: قسم بالله فلا ادري بالوقت
جنى: اي بس تنتبه لغير شغلات
.
.
مصطفى: اذا انتي حلوة ومخبلتني شنو ذنبي
جنى: مرة ثانية دير بالك ترا اعاقبك
مصطفى: شلون ادير بالي وانتي ماخذة بالي كلو
.
.
جنى: اي قشمرني بكلامك المعسول
مصطفى: ليش اني مجذب عليج من قبل
جنى: لا حشاك مو هيج قصدي
.
.
مصطفى: شرايج نلعب لعبة حلوة .. وغمزلي
جنى: لا لعبة ولا شي تعبانة واريد انام
مصطفى: ممنوع تنامين
جنى: مدخلني
.
.
وانطيتو ظهري وغمضت عيوني وسحبني لحد ما صرت فوكو وكال ممنوع تنامين اذا ما اسمحلج اني حطيت اصبعي على شفايفو كلتلو اني مدللة واسوي الي يعجبني
.
.
عض اصبعي على كيفو وكال مدللة اي بس تسوين الي يعجبني اني مو الي يعجبج انتي وهسا خلي نكمل موضوعنا لان مايصير يبقى عالنص
.
.
فتحت عيوني على كبرهن كلتلو تحجي صدك انت شنو ما تشبع كال اشبع من كلشي الا منج كل يوم اجوع واريدج وكل ثانية اريدج وبكل وقت اريدج ومستحيل اتحمل بدونج
.
.
كلتلو فدوة والله تعبانة ونعسانة واليوم مشينا هواي بالمزرعة وكلش نعست كال نامي كلتلو ماعرف انام هيج وما سمع مني سحب راسي لصدرو وباسني من راسي
.
.
وصارت اذني على صدرو واسمع دكات كلبو وعلى اساس ماعرف انام هيج ماكو 5 دقايق رحت بسابع نومة وكلش عجبني الوضع لان اسمع دكات كلبو واحس نفسي قريبة من كلبو
.
.
وما كعدت للصبح لكيت نفسي صايرة يمينو كمت منو وبدلت ملابسي ونزلت تحت لكيت لارا كاعدة لحالها كلتلها صباح الخير
.
.
لارا: صباح النور يا مسعدة
جنى: ههههههههه ليش
لارا: شو من صعدتي ما شفنا وجهج
.
.
جنى: نمت ما كعدت للصبح
لارا: باوعت صفح .. اي اي نمتي
جنى: بابتسامة .. اي صدكيني ترا اني ما اجذب
.
.
هند: اي ابد ما تجذبين
جنى: صدك ما شفتن الصور مالاتي
هند: طاح حظج لعد منو صورج غيرنا
جنى: لا يا حظي غير ذنيج انتظرني
.
.
عفتهن وصعدت جبت التيلفون ونزلت فتحتو وطلعتلهن الصور الي صورني مصطفى واشوفهن وكل ما اطلع وحدة يتعجبن عليها ويكولون شكد حلوة طالعة الصورة
.
.
لارا: ايمتى صورتي ذني شو ماندري بيهن
جنى: من رحنا اني ومصطفى
لارا: وشلون سمحلج تنزعين شالج
.
.
جنى: ما وافق بالبداية بس كوة قنعتو لان ماكو احد
هند: بس والله كلش حلوات طالعات
لارا: هند الظاهر عرفنا سبب الغياب
.
.
هند: شو خلي اشوف .. اي والله صدكتي
جنى: شنو من سبب
هند: لا بس اكو واحد خطية متورط
.
.
جنى: منو هو
لارا: مصطفى
جنى: ليش
.
.
لارا: ماخذلو حلقومة
جنى: هسا دحجي شكو والله مدا افهم عليج شي
هند: يا غبية دا تحجي على ملابسج بالصورة ما تشوفين فتحة الرقبة شكدها ومصطفى اكيد ماكدر يقاوم
.
.
جنى: طاح حظج دكولي هيج من الاول
لارا: شدخلني اذا انتي غبية
جنى: وشو انتي صايرة قليلة ادب
.
.
هند: دنجبي قابل هي حاجية كدام العالم
جنى: مايصير
هند: دنجبي وروحي كعدي زوجج وعود انزلو لا تبقون فوك
جنى: هههههههه عابتلج ولا تسكتين
.
.
عفتهن وجنت ناسية موضوع مصطفى من صار وجهو احمر ومن حجي لارا عرفت السبب طلع الاخ رايح بالو بعيد واني شكد غبية ولا ادري بالدنيا بس الحمدلله هالشي ولا غيرو
.
.
كعدتو ونزلنا تريكنا وطلعنا كعدنا بالحديقة واني والبنات نظفنا الباجة وهي جانت تقريبا نظيفة لان منظفاتها البنات البارحة بس رجعنا مرة ثانية نظفنها لان جان تنظيف سريع بس علمود ما يصير بيها ريحة محلوة
.
.
وبعدها اخذتها الحجية طبختها وطبخت وياها لحم لان ما تكفي لحالها بقت يمها لارا وهنادي لان هن الوحيدات الي جانن ما يضبطن الباجة 100%
.
.
واني وباقي البنات كعدنا عند مصطفى والولد بالحديقة ولعبنا حزازير كل واحد يكول حزوة والبقية يحاولون يحلوها وخرب واهسنا مصطفى كل حزورة اصعب من الثانية
.
.
ومن كعدنا لحد ما خلصنا ما كدرنا نعرف جواب ولا حزوة من حزازيرو ومنين يجيبهن ماعرف ومن صارت الدنيا ظهر رجعنا عالمطبخ ورجعت الحجية طلعت
.
.
وغرفنا الغدا واخذناه للحديقة لان الجو ربيعي والشمس خفيفة احسن من البيت بهواي وتغدينا وخلصنا وبقينا كاعدين ونحجي ويا بعض وصوت العصافير بكل مكان بالمزرعة وصوتهن ضايف جمال لجمال المزرعة
.
.
كاضم: اكلك مصطفى
مصطفى: كول
كاضم: ليش ما تشتري غنم
.
.
مصطفى: شريد بيه
كاضم: يفيدك وتخليلك احد يهتم بيهن ويرعاهن
مصطفى: وشسوي بيهن
.
.
كاضم: كل سنة تكدر تبيع منهن واي مناسبة تصير عندك او عند احد يعرفك يشتري منك بدال ما يشتري من الغريب وتحصل حليب منهن وما تتعب بيهن
.
.
مصطفى: الكرايب كلها خساير
كاضم: لا تتفقون واذا ما عجبك لا تبيع قابل هي اجباري
مصطفى: الله كريم هسا مو وقتها
.
.
.......... يتبع
لايك وتعليق حلو مثلكم ❤