طيوف الماضي

البارت(35) طيوف_الماضي الكاتب#احمد

تصويت ومتابعه لحتى توصلكم باقي البارتات والقصص😁❤
#طيوف_الماضي
بقلم #احمد
الباره_35
.
.
اخذت السويج ونزلت من الغرفة مثل المخبل ماعرف امي شنو حجت وياي بس من الاستعجال ما انتبهتلها طلعت ركبت سيارتي وانطلقت بسرعة وشفت شاهين بالمراية طالع وراي وتيلفوني نسيتو واكع بالغرفة انطلقت بالطريق الي ياخذني لبغداد بسرعة جنونية بحيث السيارة الي دوبها تبين خلال دقايق قليلة كلش اني عابرها واكثر من مرة اخلص من الحادث على شعرة ومرات الغلط مني ومرات منهم بس ما اهتميت ولا وكفت وحتى لو اسمعو يسبني مستحيل اوكف علمودو واتأخر على جنى من وصلت بغداد كوة لزمت نفسي علمود ما اكفر بسبب الازدحامات الي بيها ما تخلص من الازدحام الا انت كاره نفسك طلعت من بغداد ورجعت لسرعتي السابقة قبل المغرب طبيت الموصل ولان ماعرف بيها بالمستشفى رحت فورا لبيت عمها المغرب طبيت بيت عمها ما لكيت احد دكيت الباب الا مليت ومحد رد وطلع جارهم كال بنتهم مسوية حادث وهم بالمستشفى كلتل  رجمة لوالديك ما تخابرو تشوف اي مستشفى لان تيلفوني مو وياي كال تدلل واتصل على علي شوية وسكرو وانطاني اسم المستشفى والعنوان وتشكرت منو ورجعت للموصل وجنت كلش خايف عليها من وصلت الموصل سألت ودلوني عالمستشفى وبعد انتظتر طويل وقاتل وصلت المستشفى ودخلت مثل المخبل سألت عليها بالاستعلامات ودلوني عليها ورحت بسرعة اول ما طبيت الممر شفت علي وزوجتو وابنو وجانت زوجتو تبجي وهو دا يحجي وياها بس لان بعيدين ما اسمع شي رغم انو من سمعت الخبر بس اريد اوصللها بس من شفت منظرهم كمت اتقدم بخطوات بطيئة ومتثاقلة من تقربت عليهم انتبه علي واستغرب من وجودي كام يريد يسلم علي بس من حركة كلبي ما اهتميتلو تجاوزتو ودخلت للغرفة مالتها جانت نايمة ووجها مضمد جفن عيونها عليه لون ازرك ايديها ورجليها مجبصات ومشكليلها مغذي منظرها حطمني تحطيم اجى علي حجى وياي واني بغير عالم وما اشوف بس صورتها وهي بالوضع هذا بقيت واكف وكلبي يوجعني عليها ومتجاهل كل العالم انداريت على علي وكلتلو بعصبية وين الي دعمها
.
.
علي: بالسجن
مصطفى: شلون دعمها
علي: من طلعت من الامتحان دعمها
مصطفى: ليش ما انتبهتلها انت
علي: ما حسينا الا هو داعمها
مصطفى: يصير خير
.
.
جان اكو كرسي بالغرفة اخذتو وكعدت كدامها وعمها طلع والمشكلة لا اكدر امسك ايدها ولا اسوي اي شي لان ايديها ثنينهن ورجليها مجبصات يعني اطرافها الاربعة كلهن بقيت كاعد واكل بروحي وهي نايمة رجعت طلعت خارج والعصبية صعدت فول احس راسي راح ينفجر ما حسيت الاعلي صاح علي باوعت لدشداشتي مكلوبة حمرة من الدم واحس بدت الدنيا تغوش شوية شوية وماعرف شصار بعدها كعدت لكيت نفسي بغرفة واكو كانونة بايدي ومعلكة يمي دشداشة عرفتها لعلي نزعت دشداشتي الي بيها دم ولبست الثانية وطلعت لكيت علي وزوجتو تحمدولي بالسلامة وكعدت يمهم كالو ارتفع ضغط البارحة بالليل وخشمك نزف كلتلهم جنى شلون صحتها كال علي ايديها ورجليها مكسورات وعدها كسر بالحوض ومن دعمتها السيارة ما تأذن ايديها بالبداية بس من قوة الدعمة اندفعت على بوري وضرب ايديها ثنينهن هو يحجي واني ضيم كلبي يزيد ولو ما عيب جان بجيت عليها اجت الدكتورة دخلت عليها شوية واجت كالت منا لليل تكعد بس راح نضطر ننطيها مسكن لان ما تتحمل الالم الي راح تحس بيه وراحت اخذت تيلفون علي واتصلت على شاهين
.
.
شاهين: الو
مصطفى: الو شاهين
شاهين:  مصطفى وينك من البارحة كلبنا الدنيا عليك
مصطفى: اسمعني زين اني بالموصل واحتمال هالكم يوم ما ارجع حظرلي فلوس علمود اروح اشوفلي مكتب يستقبلهن منك ودزلياهن علمود اخذلي تيلفون
شاهين: تمام تدلل
مصطفى: ومن راح اخذ خط راح اخابرك
شاهين: امي تريد تحجي وياك
مصطفى: انطينياها
الحجية: الو مصطفى
مصطفى: هلا يمة
الحجية: وينك من البارحة محترك كلبي عليك
مصطفى: عذريني يمة بس ماجنت بوعيي
الحجية: ليش شصاير وياك
مصطفى: جنى مسوية حادث
الحجية: بسم الله وشبيها
مصطفى: اطرافها وحوضها مكسرات
الحجية: بسم الله بسم الله
مصطفى: المهم يمة راح اسكر هسا لان لتزم اروح للسوك
الحجية: تمام
.
.
مصطفى: سكرت منها وكلت لعلي محتاج تيلفونك نص ساعة وارجع وطلعت ركبت سيارتي وحفظت الطريق علمود ما اتيه ورحت للسوك وتحديدا لمكاتب للصيرفة سألت كم واحد جانو كلهم يستقبلون من السعودية او المحافضات القريبة واخير شي لكيت واحد يستقبل من العمارة خابرت شاهين كلتلو دزلي 5 ملايين كل وين اكو هيج سعر لتيلفون كلتلو اريد اساعد عم جنى بيهن واخذهن للمكتب الي بالعمارة سلمهن واني استلمتهن من الموصل ورحت اخذتلي تيلفون وخط وخابرت شاهين وخليتو يدزلي رقم جواد والحجية والبنات لان اكيد راح احتاجهن ورجعت للمستشفى انطيت علي تيلفونو وبقيت انتظر وياه من قرب اذان الظهر رحت جبتلهم غدا واكلتلي شوية بس علمود لا يصير عندي هبوط واتخربط والبارحة هم نزفت دم هواي طلعت اكو جامع قريب من المستشفى توضيت وصليت بيه ودعيت ربي انو يشافيها ويردلها عافيتها ومن خلصت صلاة انتبهت اكو اتصالات جايتني من اهلي واني اصلي وما ادري بيهن لان التيلفون صامت طلعت من الجامع وخابرت امي كلتلها الدكتورة تكول بالليل تكعد ومانعرف عنها بعد ورجعت للمستشفى بقيت انتظر ويا علي وزوجتو وخطية زوجتو تبهدلت هي وابنها كلت من تكعد جنى ونتطمن عليها اخليها يوديهم للبيت اذا يبقون هنا بدون فايدة بالليل صرنا كل شوية ندخل نشوفها اذا كاعدة ولا لا بس تأخرت تقريبا لل 10 لحد ما كعدت بس ما فهمنا منها شي بس تون والونة تاخذ روحي وياها ومسكرة عيونها بس نزل منهن دموع من كمية الوجع الي تحس بيه شوية واحت الدكتورة انطتها مهدئ ورجعت نامت بس كلبي احترك عليها واحس اريد ابجي من القهر من نامت كلت لعلي اخذ هيثم وامو ووديهم للبيت واني راح ابقى هنا وفعلا اخذهم وراح واني بقيت كاعد على كراسي الانتظار وجانن مصفوفات ويا بعض والكهرباء جاية والجو مال المستشفى يخلي الواحد غصب عنو ينعس تمددت عالكراسي واهذتني النومة كعدت وقت صلاة الفجر سمعت الملا يأذن دخلت عند جنى بعدها نايمة وطلعت رحت للجامع صليت ودعيتلها ورجعت عدها ومن صارت الدنيا صبح اجى علي لحالو وبقينا اني وياه بالمستشفى وسألني شلون عرفت كلتلو اختي اتصلت على جنى وردت عليها ام هيثم وكالتلها عالحادث وهي كالتلي واجيت حسيتو مو مقتنع بكلامي بس ماكدر اكلو اتصلت على جنى وفوكها ردة فعلي اول ما اجيت جانت واضحة للاعمى انو احبها ومتأثر بالي صار وياها بس مو بايدي غصب عني تصرفت هالتصرف وكلت اولها واخرها اني راح اخطبها ووقتها احجي وياها براحتي بس المهم هسا انو تتعافى وترجع مثل قبل بقينا ننتظر بالليل هم كعدت وراح علي علمود يجيب الدكتورة وما لكى بس ممرضين خفر ومايكدرون ينطونها مسكن الا الدكتور يكول جانت تون وشوية شوية صوتها يعلى ودموعها تنزل رجع علي وبلشت تصحصح وكل ما تصحصح كل ما يزيد عندها الوجع وتزيد ومنها ودموعها واني بس اباوعلها واحترك من القهر فتحت عيونها وشهكت من الوجع باوعت لعلي كلتلو فدوة بابا راح اموت مو كادرة اتحمل الله يخليك سوي اي شي وخلصني من هالوجع رجعت اندارت علي كالت مصطفى فدوة والله مو كادرة اتحمل الله يخليك سوي اي شي حتى لو تقتلني بس لا تخليني اتعذب هيج دا اموت عالبطيئ اني فدوة ارحمني وخلصني من هالوجع علي انهار وماكدر يتحمل وطلع خارج يبجي مسحت دموعها وكلتلها هسا ارجعلج تحملي شوية واني يمج وطلعت جان علي كاعد عالكراسي وحاط راسو على ايدو ويبجي بحركة رحت للاستعلامات كلتلها منو الدكتورة المسؤولة عن حالة جنى منصور كالت دكتورة نهى وهي مو هنا كلتلها اتصلي عليها البنت راح تموت كالت اعتذر ماكدر ضربت الشباك بقوة كلتلها بعصبية وعيوني يتطاير منهن الشرار اتصلي عليها لا اكلب المستشفى فوك راسج وراح الي عينج بيها من هددتها اشوفها جرت عدل واخذت التيلفون فورا واتصلت عليها شوية وكالت روح لغرفة الخفر خلي ينطوها مسكن رحت عليهم واجى واحد وياي جاب المسكن دخلت عليها لكيتها تشهك من الوجع انطاها المسكن وراح مسحت دموعها وراسها وكلتلها خلص هسا شوية ويروح الوجع تحملي عيوني انتي باوعتلي وبعيونها الف كلمة والف حجاية ومبين الوجع من خلال نظراتها شوية وهدأت عرفت ان المسكن بلش مفعولو وشوية شوية بلشت تنعس وبالاخير كدرت تنام بس بعد ما انهكها الوجع واخذ حيلها كلو والمصيبة ماتكدر تتحرك علمود تبرد كلبها لو تلزم مكان الوجع من نامت طلعت اني عند علي وحجيت وشاه هدأتو وخليتو يروح عالبيت لان ما يصير يبقى هيثم وامهم لحالهم واني بقيت ويا جنى
.
.
.......... يتبع
لا تقراء وترحل كافئ جهودي ولو بكلمة او لايك ❤
بيج الفيسبوك @AS413
.
.
البارت قصير وبدون تعديل لان انشغلت وكوة كدرت اكمللكم 1200 كلمة علمود اوضحلكم حالة جنى