خادمة القاسي

الجزء 21

سيفطها جابت اللوحة والباكية ديال الطباشير وبدا معاها من جديد .... هاد المرة هو تايكتب ليها الحرف ويخليها تحفظو ويطلب منها تكتبوو وتقول سميتو حتى شدات الحرف اللول والثاني واللي وراه وبقا معاها على داك الحااال حتى شدات اكثر من 7 أحرف بلا ماتعدبو ولا يعدبهاا ...طلب منها تراجعهم وتحفظهم وفالحصة الثانية غايطلب منها تكتبهم وتعرضهم والى غلطات غايعطيها عقووبة .

روح الطمووح ولات مجهدة عندهاا من تصرفااتو القاسية معاهااا كانت خايفة ترجع تعصبوو ويرجع يتعامل معاها بصرامة كيفما داار من قبل حتى سخفات ليه فبيتو ....وهو عجباتو النتيجة من بعد العقوبة اللي عطاها....تركيزها كولو وللَّا معاه وعقلهاا خاوي من المشاكيل وصداع الزمان ولا تايشد كلاموو ويعقل عليه  تم تم بلا مايجيب الدورة... هو من واحد الناحية راها مطيعة وكاتسمع للهضرة وماكاتردش الكلام وهادئة ماكايلقاش معاها صعوبات فهاد الجانب.... ولكن غبائها كايمرضوو وكايكره يقول ليها شي حاجة ويعاودها  وماتفهمها ش ويبدا يشرح ليها هاد شي علاش بغا يقريها ويوعيها لمصلاحتو ومصلاحتها حيت مايقدرش يكمل معاها هكا وفنفس الوقت مايمكنش يردها منين جات حيت هيا محتاجة لهاد الخدمة وهو محتاجها وهيا معاااه.......ناض ناااشط حيت مامحناتوش و طلع ياخد دوش....اليوم هو خدام نص النهار اللخر كامل يعني غايتغداا فالدار  عاد يخرج ...هادشي علاش ناضت توجد الغداا وتجمع اللي بقاليها فالدار قبل ماينزل.

بخفة جمعات ولممات ونقات وخملات ووجدات الطبلة وشدات الكرسي حداها فالسكات....كيف العادة صوت خطواتو طرق لمسمع اذنيها وتلفتات ببطئ للدروج مطلعة معاه الشوفة من رجليه لراسو...كعادتوو مكحلها بلباس اسود من الفوق للتحت ... الكاسكيط مقلوب للجنب ومعلق نظاظرو فعنق التيشورط وتايتمشا بختارة وثقالة خطواتو موزونة مثقونة ....جلس قدامها  بهدوء وحط تيليفونو حداه وباكية دالكارو وسوارت اللوطو ....هز فيها الشوفة بزربة وهي حدرات العين عليه...رجع شاف فالطاجين قدامو وهي مدات يدهاا محيدة ليه الغطا وبنتو بانت فريحتو.

أريناس(تبسمات ليه فوجهو): قرب تاكل... بصحتك اسيدي.

يالله لاح يدو ياكل وهي تنطق من جديد كي تفكرات بلي عمرها سمعاتو سمَّى الله قبل مايلوح الدغمة لفمووو.

أريناس:سمي الله اسيدي.

على حاجب ونزل الثاني فيهاا  كيحسو أمر منها وهيا فهمات شوفتو وكملات كلامها بنبرة خافثة خايفاه يدور فيها.

" باش مايشركش معاك الشيطان الطعام اسيدي".

رجع باللور مسند ظهره على كرسيه وضيق فيها عينيه.

كيسر:الى مابغيتيش تشركي معايا الطعام ماتاكليش ...!

جاتها الضحكة من كلامو ولكن دغيا حنات راسها وحبساتها زامة على شنيفاتها .... واخا قمعها ضحكها.....هي  من نيتها قاتليه سمي الله باش مايشركش معاك الشيطان الطعام ....وهو بمكرو رجعها هي الشيطان  وقاليها لامابغيتيش تشركي معايا الطعام ماتاكليش ......بقات تاتفرك فصبيعاتها وهو ملاحظ تصرفاتها ...غفلها ونطق.