اسكربتات مُتنوعة"بقلم رُقية محمد عبداللاه"

27

*#بقلم_الكاتبة*
*#رُقية_محمد_عبداللاه*
#قصة_قصيرة
***       *****      ***
إلا بـذڪر الله تطمئن القلوب  .
سُبحان الله وبحمده سُبحان اللهِ العظيم  .
نبدي في القول المُفيد بعد ما صلينا على الحبيب ﷺ  .
✿✿✿         ✿✿✿✿         ✿✿✿
_ يلا يا ورد ده كُله تأخير؟!

خرجت ورد مِن الحمام وشها مِصفر وخايفة جدًا وِ شكل وشها مخطوف قربت منها مامتها بقلق وكانت هتتكلم بس ورد اترمت في حُضنها وفضلت تعيط فجأة الأم قلبها اتقبض في ساعتها وقالت بـ نبرة مُرتعشة
الأم:
_ مالك يا ورد؟! مالك يا حبيبتي بتعيطي ليه!؟
عنيها زاغت في المكان وقالت بـ شهقات:
_ لقيت دم وأنا واللهِ يا ماما واللهِ صدقيني..!

وسكتت مش قادرة تكمل لا من الخوف ولا من الإحراج والخجل أمها ست لماحة وجابتها وهي طايرة فتلاشى القلق ومسحت على شعرها وأخدتها أوضتها بعيدًا عن إخواتها وابتسامة صغيرة مرسومة على شفايفها ورد استغربت رد فعل أمها وعيطت أكتر قفلت أم ورد الباب وقعدت بنتها جنبها وهي بـ تقول بـ إرتياح

الأم:
_ وأخيرًا طمنتي قلبي تعالي أقولك دلوقتي
بصتلها ورد بـ انتباه بس برضو لسه مستغربة وبتعيط وعاوزة تبرر إللي بيحصل ومش قادرة أمها أخدت علبة المناديل إللي على المكتب بتاع ورد ومسحت دموعها وقالت بـ نبرة هادية:
_ إمسحي دموعك علشان تسمعيني كويس
مسحتها ورد وانتبهت فقالت الأم:
_ بقيتي بنوتة حلوة قمور يا ورد بقيتي آنسة بالغة
ورد مفهمتش فكملت الأم:
_ بلغتي سن البلوغ يا ورد ولله الحمد طمنتيني

ورد بنوتة عندها تلتاشر سنة لسه صغنونة ربنا كتب عليها خلاص وبقيت زي البنوتات الكُبار ومن حقها تعرف كمان ورد بتتكسف جدًا وملهاش إحتكاك مع حد وصُحابها مبتتكلمش معاهُم ومن الأفضلية في حاجات مينفعش الأصحاب الصغننين يتكلموا فيها علشان ممكن تتنقل المعلومة خطأ لازم إللي تُنقل المعلومات واحدة واعية وفاهمة كويس  .

مسكت الأم إيد ورد وقالت:
_ دلوقتي رحم ورد ابتدأ في وظائفه كويس وكبرت ورد بنتي وبقيت بنوتة بالغة

عادت الكلمة مرة تانية وقالت:
_ دلوقتي لازم ورد تفهم إي الدم ده ويسمى إيه! الدم ده اسمُه دماء الحيض أو الدورة الشهرية ودي بـ تكون من بداية سن البلوغ لحد سن اليأس وده بيتراوح من الخمسين للخمسة وخمسين وسن البلوغ بدايتُه اتناشر وأو حداشر في الوقت ده كُل 28 يوم في دم بينزل والدم ده فاسد بيطرد برة الجسم عشان لو اتوجد جواه هيسبب مشاكل صحية كتيرة.

بدأت ورد تفهم وتسمع كلام أمها بتركيز فكملت الأم:
_ ورد دلوقتي فهمت الدم ده واسمُه يجب علينا معرفة مُدته بقى.. مُدته الدم ده بتتراوح ما بين ست أو سبع أيام في بداية الدورة الشهرية في دم لمدة أربع خمس أيام أحمر اللون ولكن بعد اليوم الخامس لونه بيبقى برتقاني أو اصفر أحمر خفيف زي كده وده برضو اسمُه الطمث.. حالتها المزاجية بتتغير في بنوتات بتكون حالتها المزاجية كويسة وفي بنات وحشة جدًا وفي بنات بين الاتنين.. بيكون سابق بداية العِدة الشهرية ألم أسفل البطن والتغير من الأحوال المزاجية حاسة نفسك زعلانة بدون سبب والسبب هرموناتك الشغالة  .