အသိုက်ထဲက ဆည်းလည်းလေး [COMPLETED]

(၂၅)

ရတီ နေခဲ့တဲ့ အဆောင်တင်သာမက သူမနဲ့ အမှတ်မထင် ဆုံတွေ့ခဲ့သည့် bar ကိုပါ Lia သွားခဲ့သေးသည်။

"သူက အချိန်ပိုင်း သီချင်းဆိုတဲ့သူပါ ဒီမှာလုပ်တာ ဘယ်နှလမှ မရှိသေးဘူး လွန်ခဲ့တဲ့ နှစ်လလောက်က အလုပ်ထွက်သွားတာလေ ကျန်တာတော့ ကျွန်တော်တို့လည်း သေချာမသိဘူး "
မန်နေဂျာ၏ စကားဖြစ်သည်။

Lia ဘက်က ဒီလောက်ပဲ တက်နိုင်တော့တာမို့ ရတီ့အကြောင်း ဆက်လက်စုံစမ်းဖို့ လက်လျှော့လိုက်တော့သည်။

ဒီအတိုင်း ကလေးကို တစ်ယောက်တည်းမွေးဖို့ ဆုံးဖြတ်ထားတာဖြစ်ပြီး သူမကို သေချာ စောင့်ရှောက်မယ့်သူနဲ့ တွေ့ဖို့သာ ဆုတောင်းရတော့မည်။

Christine ကို စာမေးပွဲအတွက် အကူအညီပေးပြီးနောက်ပိုင်း ထို ကလေးမလေးက Lia အပေါ်ပိုပြီး ခင်မင်လာသည်။

သူမ အားတဲ့ အခါတွေမှာ သူမ အလုပ်မှာ ကြုံတွေ့ရတဲ့ ဟာသတွေ လုပ်ဖော်ကိုင်ဖက်တွေရဲ့ အကြောင်းတွေ ဆေးရုံမှာ သရဲခြောက်တဲ့ အကြောင်း အရာတွေကိုရော Lia ဆီကို ပို့ထားလေ့ရှိသည်။

Lia က အလုပ်များလို့ seen မပြရင်တောင် နောက်ရက်တွေမှာ ပို့တဲ့ စာအရေအတွက်ကလျှော့သွားခြင်းမရှိပေ။

အလုပ်ဆင်းပြီး နားတဲ့ အချိန်ရောက်မှ Lia က သူမ ပို့ထားတဲ့ စာတွေကို တစ်ခုချင်း ဖတ်ပြီး reply ပြန်လေ့ရှိသည်။

ထိုသို့ ပြုလုပ်ချင်းက သူမတို့ နှစ်ယောက်ကြားက အလေ့အကျင့်လိုပင် ဖြစ်လာ၏။

နောက်ပိုင်းမှာ ဆေး‌ပညာနဲ့ ပတ်သက်တဲ့ article တစ်ခုတွေ့ရင် Lia က  အရင်ဆုံးဖတ်ပြီး Christine ဆီ ဝေမျှ တဲ့ အလေ့အကျင့်ပါရသွားသည်။

Christine နားမလည်တာရှိတဲ့အခါလည်း Lia ဆီသာ လာမေး၏။

သူတို့နှစ်ယောက်ရဲ့ ဆက်ဆံရေးက အပြင်မှာ တစ်ခေါက်သာ တွေ့ဖူးပေမယ့် online ပေါ်မှာတော့ အတော်လေး အဆင်ပြေနေသည်။

Christine သည် ခေတ်ဆန်ကာ အများနဲ့ မတူတဲ့ အတွေးအခေါ်ရှိသည့် မိန်းကလေးဖြစ်သည်။

သူမ မှန်တယ်ထင်တဲ့ အရာကို ရဲရဲဝံ့ဝံ့ ပြောဆိုရဲတာကြောင့် Lia ရဲ့ အကြိုက်နဲ့ ကိုက်ညီသည့် ပုံစံမျိုးလည်း ဖြစ်သည်။