ربيع الفؤاد (متوقفه)

البارت الثاني

صعبه عليه فرگتك صعبه 
صعبه و انا لي محترك گلبه
مليت من طول الهجر ينعل ابو الغربه
و ردني يا گلبي ردني خليني اشم ريحة خلي
ما يعرف الحُب لأولي إلا الذي مجربه....

****************

لا تنسون التصويت +التعليقات +متابعة الحساب

اذا ما اشوف تفاعل حلو اسوي اضراب و ما انزل بارت

البارت الثاني

************

جوري...

مرت ايام و بلش دوام الجامعه گعدت الصبح بدلت لبست تنوره گابوي طويله و قميص
بهذاك الوكت چانت التنوره الگابوي دارجه خليت مكياج خفيف
و ظفرت شعري نزلت من فوك شفت ابويه و امي يتريگون گعدت يمهم
و مثل كل سنه ابويه ظل ينطيني التوجهيهات

ابو سمير :شوفي جوري اريدج شاطره لمن اجي اسأل عليج اريد الكل يمدح بيج
اريدج سباعيه اهتمي بدراستج و بس
دخلتج جامعه بفلوس بس اريد مقابل الفلوس تفوقج افتهمتي، ما اريد نجاح و بس اريد تفوق

_حاضر بابا

_و هذاك البگال ما اريد تطوخين وياه نوب يجي يخطبج من جديد خو انه مو اصرف و اتعب و ياخذج واحد حافي

اختنكت حيل و ضليت كاعده على اعصابي و بس، اهز براسي حتى نفسي نسدت طلعت بسرعه و شفت بسام يتانيني بالسياره هو فؤاد ركبت ليورا و سلمت عليهم

شكد جنت فرحانه و متحمسه ابويه كسر فرحتي شفت فؤاد يباوع عليه من المرايا الجانبيه حرك شفايفه و كال شبيج ابتسمت علمود ميظل باله و كتله احبك
بادلني لابتسامه و ظلينا طول الطريق سرحانين بعض

وصلنا للجامعه و كل واحد راح لقسمه
  اني ادرس صيدله
و فؤاد يدرس بكلية العلاج الطبيعي
و صديقنا بسام معيد بالجامعه
طبعاً بسام و فؤاد نفس العُمر بس فؤاد ترك الدراسه كم سنه بسبب ظروفه الصعبه

فتت للقاعه و بلشت المحاضرات و الصيدله حيل صعبه مخلتلي عين صاحيه

بعد مكملنا المحاضرات باوعت على الساعه ١١:٣٠
رحت للنادي شفت فؤاد گاعد رحت گعدت گباله

_اشتاقيتلك

فؤاد: مو بگدي

_اييي سولف شلون جان يومك

_ماشي الحال و انتِ

باوعت عليه بيأس و ضوجه
_صعب حيل صعبه الصيدله

_كل الدراسه صعبه تدرين ليش

_ليش

_الله سبحانه وتعالى خلقنا احنا البشر و ميزنا على مخلوقاته 

خلقنا بأحسن تقويم و بأجمل منظر و اتم خلقه
و كملنا بالصحه و العقل و الدين

احنا اذا مندرس و نتعب شنو فائدة عقلنا؟