🚫🚫🚫🚫القسم هدا تكملة للحدث السابق يعني قصير..القسم قصير قصير حبيت نزله الليله بش ماتقعدوش تستنوا🚫🚫🚫🚫🚫
#طوبى "جنة طوبى"
#جمان_فريد
#الجزء_الخامس_والسبعين"اقاوم"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار..
"إستغفار الإنسان اهم من جميع الأدعيه"...ابن تيميه
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لَقَد فَنِيَت روحي عَلَيكَ صَبابَةً
فَما أَنتَ يا روحي العَزيزَةَ صانِعُ
سُرورِيَ أَن تَبقى بِخَيرٍ وَنِعمَةٍ
وَإِنّي مِنَ الدُنيا بِذَلِكَ قانِعُ🍃
__________________________________________
"ماتبيش تطلعي..تبيني نطيح رقبه..تبيني نطيح رقبه"
وقعد يرمي فيها بأقبح الألفاظ
🍃زينب بضيق:الله المستعان الله المستعان.
وزهره تبكي وهي تقول:حسبي الله ونعم الوكيل فيك حسبي الله ونعم الوكيل..
وطوبى وهي خايفه في سرها قاعده تكرر في دعاء..
"اللهم أستر عوارتنا وآمن روعاتنا"
ويسمعوا صوت ضرب رصاص
علت صوتها وهي تكرر في الدعاء
والابلات حواليها في حالة رعب..
🍃وفي هالوقت..
طلع من استغل اللي قاعد يصير لصالحه..
وحده من الأبلات واقفه في شباك واحد من الفصول وتصور في اللي قاعد يصير..
زميلتها وهي خايفه؛حولي من الروشن توتجيك رصاصه طايشه..
هي وخرت بعد ماصورت وقالت؛خل نطلعوا الطلبه للممر معاش يصير من امتحانات في وضع زي هدا..
هيا نوضوا انتي وياها اطلعوا ونزلوا رووسكم وانتم طالعين
🍃وماكانش هما الفصل الوحيد اللي طلع
كلهم طلعوا ووقفوا في الممرات..
والطالبات مع الابلات في حالة رعب وخوف وهما يتخيلوا في هالمهاجم المسلح راكبلهم ويقتل فيهم...
واللي صورت نزلت الفيديو في صفحة المدرسه وكتبت عليه..
"هجوم مسلح ع مدرسه اجيال"
🍃برا...
وصل الجالي للشارع اللي فيه المدرسه..
بس وقف بسياره عند نهاية السور لما شاف من بعيد سيارات تابعه لجهة ما...نفسها الجهه اللي كانت معتقلاته قبل كم سنه..
قعد جامد في السيارة وهو يشوفلهم وبس..
ع جية سيارة عبد القيوم..وقف ع الجنب التاني من الطريق..
وهو وحسين شافوا نفس السيارات
حسين بصدمه؛هدا مش هجوم فردي!
نزل عبد القيوم من السياره وهو يشوفلهم والخوف عليها سيطر عليه..خلاه مش قادر يتكلم ولايعلق بحرف
نزل حسين وعيونه عليهم..
شويه سمعوا صوت راجل زهره وهو يسب فيها ويلعن ويقول في كلام قبيح..
حسين بإنفعال؛الكلام هدا لمني!؟
عبد القيوم مشي ناحية السور وقف عليه ويشوفله كان عالي..
ومافيش كيف يركب منه..
هني نزل الجالي وهو يقول بإنفعال..
/هدا علاش ماكنتش راضي ع خدمتها في هالمدرسه وخلتني نسايرها ونقول باهي واني مش راضي..
شبحوله الزوز بغضب..
وحسين قال بعصبيه؛وقته القطاف هدا .!
الجالي بإنفعال؛باهي وريني ياحضرة الملازم شن نقدروا نديروا بش نطلعوها من هالمصيبه اللي حطت روحها..
فجأه سكت وحط ايديه الزوز ع راسه وطبس تحت لما سمع صوت ضرب الرصاص..
وحسين وعبد القيوم شافوا للسور والزوز قريب ينجنوا..
ع جية سيارة عبد الرؤوف سكر الطريق وشاف للسيارات اللي قدام المدرسه ووين قري اسم الجهة التابعات ليها قال..
/اها صار هكي هي..!
ورفع تليفونه وهو يدور ع رقم معين لين لقاه واتصل بصاحبه...
🍃زهره وهي تبكي؛خلوني نطلعله خلوني بالله عليكم قبل ليدير خارقه في المدرسه..
طوبى بقلق:كان طلعتي يقتلك الكلب هدا..
زهره ببكي وانفعال:خله يقتلني خله اصلا اني هالعيشه كرهتها معاش نقدر نتحملها..
زينب ودموعها في عيونها..
/لاحول ولاقوة الا بالله..
وحده من الابلات حطت ايديها ع رجليها وقالت بتعب..
/ركابي فشلوا ياناس حاسه سكري هبط!
طوبى شبحتلها وخوفها زاد..
وزينب مشتلها طول وقعدت تسعف فيها..
فجأه..
سمعوا صوت طلقه قريب من المطبخ..
صرخوا بأعلى حسهم..
وهني طوبى حست بمغص في بطنها حطت يدها عليها وهي تقول..
/ياربي..يارب..
زهرة معاش تحملت..
مشت طول تفتح في الباب والابلات مع طوبى يعيطوا عليها وهما يقولوا..
"وين ماشيه..اقعدي في مكانك..زهره لا"
وزهره ماتبي تسمع لحد..
🍃برا...
كانوا في سيارات لأولياء امور وصلت قريبه من المدرسه وشافوا السيارات اللي في بابها وزادت قلوبهم رعب ع صغارهم المحجوزين داخل..
وعاد بعض الناس ماقصروش..قعدوا يصوروا وينزلوا في أخبار اشكال الوان..
🍃حسين بإنفعال شديد..
/شن الهم هدا الواحد بيقعد مكتف هكي !
عبد القيوم شاف جهة السيارات وقلبه يرجف من خوفه عليها..
الجالي خبط السياره وهو يقول..
/ااخ منها ااخ..هادي اخر كساحة راسها ..
حسين قعد يشبحله بغضب شديد قعد منه ع شعره بس..
فجأه..
تتوجه انظارهم للسور..
لما سمعوا صوت طلق ناري..وصراخ نساء واضح..
الجالي جمد في مكانه..
اما حسين وعبد القيوم معاش قعد فيهم عقل..
طلعوا يجروا لباب المدرسه بش يخشولها ويصير اللي يصير..
نزل عبد الرؤوف وقعد يصيح عليهم..
"تعالى انت وياه"..
🍃وهما يجروا..
لين وقفوا لما شافوا باقي المسلحين رافعين سلاحهم في وجوههم..
واحد منهم قال:ولد امه اللي يزيد خطوة..
قعدوا الزوز واقفين يشبحولهم..
وصوت عبد الرؤوف من بعيد ينادي..
"ولي انت وياه جايين من ***** تو يتصرفوا ولوا"
حسين شد عبد القيوم وقاله بألم..
/تعالى مافيهاش كيف..
عبد القيوم مادارش اي ردة فعل..
بين عيونه يمر شريط ذكريات قديمه وجديده ليها
وصوت لطفي الواعر يرن في وذانه..
سمع صوت صراخ مرة تانيه
نفض يد حسين وقدم وهو مش حاس بشي غير بخوفه عليها هي وبس..
اللي قدامه ماكانوش ناووين ينزلوا قطرة دم وحده كانوا يهددوا ويخوفوا بس..
لكن واحد منهم لما شاف عبد القيوم تحرك ضرب عليه طول..
حسين وعبد الرؤوف وحتى الجالي..
جمدوا في مكاناتهم..
وزملاء الشخص اللي ضرب قعد يعيطوا عليه استنكارا للي داره..
لين قال الكبير فيهم..
"اركبوا اركبوا كبسونا ياهوه"
ركبوا سياراتهم ووخروا طول بعدين هربوا..
🍃وحسين وعبد الرؤوف جو لعبد القيوم يجروا..
حسين بعصبيه وقلق:حول يدك خل نشوف.
عبد الرؤوف بعصبيه؛اني قلت ولوا ولا قلت ولوا ماتشوفش فيهم مسلحين!؟
وهو كان شاد كتفه وهو يتألم ويقول..
/شن تبوا فيا!!؟ عدوا شوفوا اللي جوا شن صار فيهم!..
ع جية سيارات اسكندر وجماعته..
درسوا ونزلوا..
خش اسكندر واللي معاه..
وعبد الرؤوف مشي طول لحقهم..
حسين وهو يشوف لعبد القيوم بقلق..
/حول يدك خل نشوف الجرح..
هو قال بوجع والم..
/حافتني حفان ..
حسين:تي غير حول يدك خل نشوفه..
🍃ومن جنبهم فات الجالي بسرعه..
ومشي خش للمدرسه بعد ماطمن..
شاف راجل زهره بين ايدين رجال اسكندر واخدينه ويطلعوا فيه برا..
بعدين شاف مدرس في يده سلاح..
وفيه اثر دم ع الأرض..
شويه رفع عيونه القدام..
شاف زينب طالعه وهي تقول؛استاذه طوبى تاعبه هلبه..
زهرة وهي في حالة نفسيه صعبه هلبه قعدت تخبط ع وجهها وتقول..
/حي عليا حي يرزيني في عمري!..
هو طول مشي ناحيتهم وقال..
/وينها طوبى وين!
زينب تعرفه من قبل قالتله..
/داخل ياخوي داخل..
وخش طول..
لقاها متكيه ع الطاوله بيد واليد التانيه حاطتها تحت بطنها وهي تتوجع..
قال بلهفة خوف..
"/طوبى..
طوبى وهي تتألم قعدت تقول..
/بنتي..بنتي..
وطلعت منها آه وجع خلت الجالي يجري ناحيتها..
وهو يقول..
/طوبى شدي فيا كويس
وبحذر رفعها بين ايديه ومشي طلع بيها من المطبخ..
طوبى كانت تتألم بشده ومن الالم..
قعدت تتخيل في صوت بوها تسمع فيه يكلم فيها بس ماكانش الكلام مفهوم منه الا كلمتين..
"يابابا يابنتي"
نزلوا دموعها وهي تتوجع..
والدوشه حواليها واصوات الناس المتداخله...
سمعت صوت عبد الرؤوف بخوف يقول..
"خيرها"
بعدين سمعت الجالي يقول..
"تعبانه"
وقعدت بعدين تسمع في انفاسه وهو يلهث لانه طالع بيها يجري..
🍃برا..
كان حسين جاي بيخش للمدرسه بش يطمن عليها..
شاف الجالي وهو مطلعها جاه يجري وهو يقول..
/خيرها شن صارلها!؟
الجالي بخوف:تاعبه من الخوف..افتحلي السياره..
مشي حسين فتح الباب الخلفي..
والجالي ركبها...
🍃وعيون عبد القيوم معاهم وهو شاد كتفه اللي قاعد ينزف
شاف وجهها كيف مولي من الوجع والخوف..
قلبه تفتت....
شاف الجالي كيف مرعوب عليها..كيف كان حاضنها بين ايديه وكيف يركب فيها للسيارة وحسين يساعد فيه..
باهي هو وقت الغيره توا!
لامش وقتها لللي يتفرج ع اللي صاير من بعيد مش اللي عايش فيه!
بس المؤلم بجد ماكانش شعور الغيره..
بل شعور عدم أحقيته بالشعور هدا من اصله!
وهني تخلط شعور الحسرة عليهم لما تمنى لو كان ليه فيها حق مايكونش لأي حد من البشر زيه..
ماكانش خلا الاذى يفوت من يلاها...
تباعدت سيارة راجلها اللي كانت رافعتها هي وحسين...
وهو يتبع فيها بعيونه اللي بدوا يغبشوا شويه..
جاه عبد الرؤوف وهو يقول..
/تعالى معاي تعال قاعده تنزف ياراجل..
وخداه ورفعه ع جهامته وضخامة جسمه كان زي الريشه في يد عبد الرؤوف...
ركبه سيارته..
وتحرك بيه لأقرب مكان يسعفه...
مصحة القدس...اللي توجلها الجالي حتى هو...
🍃🍃🍃🍃🍃
واللي صار وصل للقريب والبعيد..
اميمه وفردوس ومطيره واريج طول مشوا للمصحه وهما مرعوبين عليها..
وقعدوا صفيه و آلاء مع غرفه في الحوش والقلق واكل قلوبهم..
وتسمع فايزة وتخلي بناتها معاهم وتمشي للمصحه..
🍃الخبر لما وصل لنسرين مع راجلها خلت ولدها في حوش ماليها ومشت معاه للمصحه..
🍃مغليه وهي تتكلم بالتليفون..
بعصبيه قالت؛قالي مرات ولادة مبكرة..هدا اللي جاها من ورا هالمدرسه سكرت راسها تخدم فيها..تقدر عليها هي تقدر عليها !
"نرجع ونقول الغلط كله راكب ولدك وكان محمرلها العين من الأول راهو مش هدا حالها"
🍃وحداهم..
في شقة نجاة كانت تتكلم بالتليفون حتى هي..
نجاة بغل:ان شاء الله تتسكر ومعاش تقوملها قائمه وهي ان شاء الله يصيرلها ماصارلي وخل تجرب اللي عشته..
"هي في ستين ودرة..لكن حرام العيل شن ذنبها!"
نجاة بحقد؛ذنبها انها بنتها بنت الحقيره اللي خدت مني راجلي...
🍃🍃🍃🍃
والجالي في المصحه على نار يستنى اي حد يطلع يطمنهم..
زي ماصاير لعيلتها...
☘وفي قسم تاني من نفس المصحه..
اسعفوا التارقي بعد ماتأكدوا ان الرصاصه ماخشتش كتفه..
ودخلوه حجرة في المصحه وزادوه دم بكمية بسيطه لأنه نزف هلبه..
كان فايق لما خش عليه ربيع..
قاله بقلق:الحمد لله ع سلامتك..
عبد القيوم بصوت متعب:الله يسلمك..
ربيع:شن الامور توا؟
عبد القيوم؛تمام الحمد لله..
وكان يبي يسأله على طوبى بطريقه غير مباشره لكن ماعرفش كيف..
بس ربيع جاوبه قبل ليسأل وقال بأسف:لاحول ولاقوة الابالله لاعلى بال ولاعلى خاطر..حتى المسكينه بنت لطفي الواعر قاعدين لتوا مش عارفين شي عن حالتها متوقعين ولادة مبكره..
بدت ع وجه عبد القيوم ملامح الضيق الشديد بدون مايعلق بكلمه..
وربيع مركز معاه..
🍃🍃🍃🍃🍃
فايزة بخوف:عليك رعب عاشاته..
نسرين بضيق:ياروحي مسكينه..لكن زعمه كيف بيصير في المدرسه..!؟
فايزة بقلق:علمي علمك ان شاء الله خير وخلاص..
🍃وبعيد عنهم شويه..
مطيره وهي تدعي وتبكي..
/رحمتك بينا ياربي فرج علينا ياربي..ياربي كون معاها ياربي..
وجنبها فردوس نبكي بصمت..
واريج واميمه مقعمزات حداهم وهما في حالة حزن وقلق..
🍃وبعد اقل من ربع ساعه يجوا المحجوب ونبيله..
ع جيتهم..
طلعت الدكتورة اللي تابع عندها طوبى وجتهم بش تخبرهم عن حالتها..
الدكتورة:البنيه مسكرة راسها تجي في موعدها..
مطيره؛معناها مش حالة وضع؟
الدكتورة:لالا..تقلصات بسبب الانفعال والخوف فحصتها كويس واستنيت شويه بش نتأكد ان مافيش حالة ولاده مبكره والحمد لله مافيش..
فردوس:حالة البنيه كويسه؟
الدكتورة؛الحمد لله عال العال..
بس بنقول حاجه ضروريه جدا بالذات ليك استاذ الجالي..
/معاش تخلوها تجهد نفسها الفترة هادي بعدوها عن اي شي يوترها ويخليها تنفعل..
الجالي:بإذن الله دكتورة..
توجهت انظارهم ليه وهما يشوفله بإمتعاض..
هو توتر لكن تجاهل نظراتهم..
الدكتورة:طبعا تقدروا تخشوا تشوفوها هي تقعد الليله وتطلع غدوة قبل الظهر بإذن الله..ان شاء الله لاباس عليها..
ومشت من حداهم..
وهما يردوا عليها..
"لايوريك باس"
مطيره؛وين بنخشولها؟
ع جية الممرضه وهي تقول..
/دكتورة اميمه الحاله تبي تشوفك..
اميمه :حاضر هي..
ومشت بسرعه ورا الممرضه..
الجالي:اني اولى مفروض اني اللي نخش نشوفها..
قعدت نبيله تشوفله من فوق لتحت..
والباقي يشبحوله بنظرات امتعاض وازدراء..
امامطيره قالت بصوت مسموع..
/الصبر...وشددت ع الراء..
جاته نسرين شداته من ذراعه وقالت؛تعالى..
مشي معاها وهو يقول..
/مرتي هادي ليا حق فيها اكثر منهم كلهم..
وقفت نسرين وقالت..
/لما تبي تشوفك وقتها قول هكي.
الجالي:غدوة بإذن الله مروح بيها غصب ع اللي يحب واللي يكره..
نسرين بعدم رضا:زيد لبز زيد..
🍃🍃🍃🍃
"شن حالك طوبى توا"
طوبى بشي من التعب..
/رقم ابله زينب عندك اتصلي بيها وافتحي المايك.
اميمه:ارتاحي توا الشي تاني ملحوق عليه..
طوبى:مانرتاحش لين نطمن ع وضع المدرسه بالله عليك اتصلي بيها..
لبت اميمه رغبتها واتصلت بالأبله زينب مرة واتنين وتلاته وماتردش..
طوبى دموعها نزلوا بخوف وهي تقول..
/معناها صايرة مشكله كبيره..حي عليا يااميمه كان ضيع المدرسه..شن بنقول لسدرة شقا سنين من عمرها ريحته اني في يوم واخد حي عليا!
اميمه قعمزت جنبها وضمتها وهي تقول..
/اهدي..اهدي..
وطوبى في حضنها ترجف وهي تبكي ..
🍃🍃🍃🍃🍃
وبعيد عنهم في احد مطاعم العاصمه..
حديث مهم عن مدرسة اجيال قاعد يجري بين تلاته سيدات..
وحده منهم قالت:قالوا لما طلعت زهره جي بيعطيها طلقه لكن ربك بعت استاذ فتحي طلع مسلح ويقنص مليح صابه في يده خلاه يطيح الكلاشن ويقعد يعيط وهو جاه يجري وطيحه ع الوطى وكتفه وقعد يضرب فيه..
لين خشوا جماعة **** وطبوه..
ناديه نائبه المدير السابقه وقال..
/اللي صار كله في صالحنا لازم ينضرب الحديد وهو سخون ونكملوا اللي بدينا بيه بسرعه..نبي المدرسه هادي تتسكر في اقرب وقت وللأبد...
#أقاوم
#طوبى
....يتبع....
