#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له....🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 عرجون فل عشـــــــــــــــــيه
شميت فيه ايام حلوة هــــــنية
منين كان بدلة مزينه المنشيه
بيني و بينك كان ليه مــعاني🍃
__________________________________________
"شن اللي صاير بينك وبين راجلك احكيلي كل شي"
غرفه استجمعت شجاعتها وقالت..
/بنحكيلك كل شي صار من زمان لتوا..
سدرة عقدت حواجبها وقالت بإستغراب..
/من زمان!..رفعت حاجبها الايمن وضيقت عيونها وهي تقول..احكي احكي..
🍃🍃🍃🍃
وطوبى في دار المعيشه مع باقي نساوبن العيله حاطه بنتها جنه في حضنها وضامتها وهي تفكر بقلق في الحديث اللي حيدور حاليا بين غرفه وسدرة..
مش هي بس حتى اميمه اللي مش قادره تركز في كلمه من هدرزة امها وباقي نساوين العيله..
ويجي اتصال ماسنجر لأريج يلفت انتباه الجميع بدون استثناء لما سمعوها قالت..
"امي"..
ردت عليها وهي تقول..
/السلام عليكم...شن جو..
"وعليكم السلام بنتي شن حالكم"
اريج؛الحمد لله كلنا بخير..
"قاعدين برواحكم ولاعندكم حد"
اريج بإبتسامه..
/العيله ملتمه عمتي مطيره وخالتي صفيه وخالتي هاديه وفتون مرت خالي وميمو حتى خالتي سدرة خشت توا..
"ماشاء الله ماشاء الله."
اريج وهي تمرر في نظرها عليهم وتسمع فيهم يقولوا..
"سلمي عليها"قالت لأمها..
/يسلموا عليك..
"سلمهم وسلم من جاب سلامهم..حتى انتي سلمي عليهم وقوليلهم وليت جده"
اريج صاحت بدهشه وهي تقول..
/الله!..
كلهم انتبهوا معاها بلهفه..
"والله..جابت وليد"
اريج بضحكه..
/للوش جابت وليد..
تعالت اصواتهم بالتهاني والمباركات ومطيره قالت بصوت عالي..
/وليتي جدة يادوسه..
فتحت اريج المايك وهي تمسح فدموعها وتقول..
/قالتلك عمتي وليتي جده..
ضحكت وقالت..
"ريتوا بالله كبروني خلاص"
صفيه:فردوس مش مازال بكري عليها!؟
"ايه مازال عشرة ايام وتكمل التاسع لكن المسالك تعبوها هلبه معاش قدرت تتحمل"
اريج؛كويسه هي ولا!؟
"ايه الحمد لله وكل شي هني كويس محافظين هلبه والدنيا معقمه والامور كلها تمام"
طوبى بإبتسامه..
/ابعتوا الصور ابعتوا..
"طويبه هادي.."
اريج:ايه..
"ياعمري حاضر حبيبتيتو نقول لعزو يصوره ونبعتلكم..شن حال جنيوه"
طوبى وهي شاده دموعها بقوة قالت..
/اهي راقده في حجري..
ويجيهم صوت سدرة وهي تنادي بنبرة غاضبه..
"طوبى"
طوبى من خوفها تلقائيا حطت بنتها ع الفراش وناضت طلعت بسرعه..
"صوت سدرة هدا ولا؟!"
اريج وهي تحاول تخفي ارتباكها..
/ايه اشبح شن تبي..
واللي حواليها بين المستاء والقلق ...
🍃في دار البنات..
خشت طوبى لقت غرفه واقفه منزله راسه ودموعها ينزلوا..
سكرت الباب وشافت لسدرة..
سدرة بنظرة غضب..
/عندك علم بعمل اختك الاسود!
طوبى شافت لغرفه بضيق بعدين ردت نظرها لسدرة وهزت راسها بإيجاب..
سدرة بتعجب..
/ومازال تناصري فيها وجايه في صفها ومستقبلتيها في الحوش عادي!..ع اللي داراته مفروض تقعد تنطمر في حوشها وتربي صغارها وتسكر فمها..واني اللي كنت نحسابه
الحكاية ليها علاقه بمختار بس طلعت اختك بحد ذاتها وحده حقيره شوهت ربايتنا ليها وهي اللي نزلت من قدرنا وقدرها قدام راجلها قبله..
غرفه تسمع فيها ومش قادره ترد مالهاش عين ترد وكذلك كانت خايفه من سدرة..
وخرت سدرة شعرها للخلف بعصبيه وقالت..
/من غدوة تلمي شلاتيتك وتروحي بصغارك وتشدي حوشك فاهمه..
"مش حتطلع من هني الا بإرداتها"
قامت غرفه عيونها في طوبى اللي شافتلها سدرة بتعجب..
طوبى بحزم..
/ايه معاك حق وهي غالطه والغلط راكبها من ساسها لراسها لكن مااصرتش ع الغلط..صلحت من نفسها ودارت فوق اللي تقدر عليه بش تكون زوجه صالحه وام كويسه وبري اسأليه راجلها بروحه..اكبر دليل ع انها عرفت تكفر عن ذنبها تمسكه بيها وان لعند هاللحظه مازال يبي يحاول يرضيها ويخليها ترجعله وهو بروحه قالي الكلام هدا..
غيرت سدرة نظرها لغرفه لقتها تشوف طوبى بنظرات حب وامتنان..
طوبى:اني لامع انها تطلق ولاتولي..اني معاها هي بس القرار اللي تاخده بقناعة تامه وهي راضيه عنه اني معاها فيه المهم هي تكون مرتاحه...
بلعت سدرة ريقها وهي شاده دموعها بعدين قالت..
/والصغار ياطوبى..الصغار...عادي عندك يعيشوا الحاله اللي عايشتها جنه!
شافت غرفه لسدرة بصدمه ووجع..حست بوجع طوبى من الكلام اللي قالاته سدره..سدرة حطت يدها ع مكان جرح طوبى العميق وضغطت عليه بدون ماتقصد..
ولأن طوبى تعرف نيتها كويس ردت تقول..
/لا والله ماعادي عندي..اني لو كنت نعرف ان جنه حتعيش حياة مستقرة وهاديه بيني وبين بوها ماكنتش طلقت بكل..راهو الطلاق في هلبه حالات رحمه للصغار مش نقمه وشر ياسدرة...
سكتت سدرة وهي تشوف لطوبى بألم بعدين غيرت نظرها لغرفه..
طوبى:انتي توا عرفتي اللي صار من البدايه..متوقعه ان حياة هدا اساسها ممكن تستمر!؟..
غيرت سدرة نظرها لغرفه شافتلها شويه بعدين مشت فتحت الباب وطلعت..
سكرت طوبى الباب وشافت لغرفه بعدين قالت..
/ماتلوميش عليها هلبه حاجات صارت معانا وهي غايبه..
جتها غرفه وضمتها بكل قوة..
ضحكت طوبى وقالت..
/خيرك!؟
قعدت غرفه تبكي بدون ماتقول كلمه.
وطوبى حطت ايديها ع ظهرها وقعدت تمسح عليه بحنان..
🍃🍃🍃🍃🍃
"اول مرة نشوفه هكي ياراجل"
ربيع بضيق..
/تعرف باهي اللي صار هكي..
سامي شافله بإستغراب..
ربيع؛ايه باهي اللي صار هكي..خليه يلهى بسلافه وماليها ويفوت سريب بنت الواعر..
سامي بضحكه متهكمه...
/ربيع انت لتوا مازال ماعرفتش عبد القيوم!؟ بعد اللي صار فيه هدا كله قاعد متمسك بيها حتى بعد خطبها وردوه مازال مصر عليها..الحالة اللي خش فيها اليومين اللي فاتوا سببها ان هداكا المحامي كلم نسيبك المهدي عليها..
ربيع ضيق عيونه وقال..
/هو قالك؟!
سامي؛ايه امس هدرزنا وحكالي..
ربيع بإبتسامة تعجب..
/بدي يدس عليا!
سامي:مش قصة دسان هو عارفك شن بتقوله لو حكالك..
تنهد ربيع وقعد ساكت..
سامي:المهم توا معاش تلمحله حتى التلميح عن قصة سلافه مرات تخسره بكل..
ربيع غمض عيونه بعدين فتحهم بمعنى..
"باهي"..شاف لواحد من العمال عنده في المطعم اشرله يجيه وهو يقول..
/شن تبي نعشيك..
سامي بإبتسامه..
/اي شي يسكت جوع ليل الشتي..
ضحكت نص ضحكه وقال..
/من عيوني..
🍃🍃🍃🍃🍃
"ايه جابت بالعمليه"
سدرة:باهي الحمد لله ع سلامتها ويتربى في عز الله ثم بوه وامه
"آمين..تو لما يولي حالها باهي نكلمكم بش تشوفوها"
سدرة؛ان شاء الله..سلمي عليها هلبه
"يوصل بالسلامه توا"
سدرة:بالسلامه..ونهت مكالمة الماسنجر..حطت تليفونها جنبها ورجعت تفكر في هموم حملها حمل جبال..ومن يومها سدرة حمالة هموم ثقيله..
سمعت اصوات ولاد غرفه يلعبوا مع بعض زاد وجع قلبها وضيق صدرها...
ويجي بين عيونها مشهد لقاء جنة ببوها..هالمشهد بالذات مش قادرة تتخطاه والاسباب عديده...
"عروستنا"
انتفضت بفجعه وشافت لمدخل الصاله..
مختار بضحكه..
/اسف عليت صوتي شويه..
قدملها ومدلها يدها وهو يقول..
/شن جو..
مدت يدها وصافحاته وهي تقول..
/الحمد لله..
نهضها بقوة وضمنها وهو يقول..
/ماشفناش بعض من هداكا اليوم..
ضماته وهي تقول..
/قالوا عازل روحك عن الناس..
وخر وقال..
/فاتن ماخلتش فيها عزل..لكن توا في وضعها هدا حنعزلها غصب عنها..
سدرة بإستغراب..
/وضع شني!؟بتعجب قال..
/قصدك ماخبرك حد!؟ بتولي عمه..
تصارعت ع وجهها ملامح الصدمه والابتسامه وهي تقول..
/الله!..ضحكت وقالت..مبارك..
عقد حواجبه بإبتسامه وقال..
/توقعت ردة فعلك تكون غير هكي..
سدرة عقدت حواجبها وقالت بشي من الارتباك..
/كيف يعني!؟
مختار:يعني توقعت انتي اكثر من يفرح..
بلعت ريقها وقالت بضيق..
/مشكله غرفه مكدرتني..
رفع حواجبه وقال..
/امم..نزلهم وقال..تبي رايي في الموضوع..برغم كرهي لراجلها مانبيهاش تطلق منه ع خاطر الصغار..
سدرة:اها..ع ذكر كرهك لراجلها..هي قالتلي انك انت اللي دبرتله حبسته اللي حكيتيلي عنها..
ابتسم بثقه وقال..
/شن قتلك قبل! حطوها في راسي..لكن ياريتك سألتيها من طلعه..
سدرة هزت راسها بصمت..
هو قال:اسمعي هادي..عندك علم ان في حد كادله وكان ناوي يخطفه واني اللي خلصته من ايديهم قبل ليوصلوا فيه..بري اسألي خالك المحجوب وهو يقولك..
سدرة بقلق..
/منو هادم اللي يبوا يخطفوه..
مختار:شوفي سدرة راجل اختك كان خاش في معامع كبيره واللي زيه طبيعي جدا يكون عنده عداوات وناس تترصدله..الله يرحمه بوي كيف رضي يعطيهاله مش عارف..
سدرة بضيق:الله يرحمه ويغفرله قداش تحمل في حياته وقداش عاني...ونزلوا دموعها..
قعد يشوفلها مختار وهو يقول في نفسه..
"اللي عاناه بوك مايجيش في ربع اللي عانيته..مايجي جنبه شي"
مسحت سدرة دموعها وهي تقول.
/الله يرحمه ويغفرله..
هو تنهد وقال..
/آمين..ايه روحتي بجنة؟
هزت راسها بإيجاب..
ابتسم بلهفه وقال..
/وينها بنت قلبي وين..
سدرة ودموعها في عيونها..
/راقده..
ع خشة طوبى لما شافتهم قالت..
/هاه..جي مختار المخاتير...
مختار:بري نوضي بنتك وجيبيها..
طوبى:خلي البنت راقده تنوض لما تشبع من النوم..
شاف مختار لسدره وقال..
/هكي ربيتي انتي!؟
جت طوبى لسدرة ضمتها وقالت..
/واحسن تربيه والله..
مسحت سدرة دموعها وقالت..
/مازال العشي!؟
طوبى:يوتوا فيه..
تباعدت سدره عن طوبى وخدتها من يدها وهي تقول..
/وشن نديروا قاعدين هني خل نمشوا نعاونوهم..
ومشت بيها طول وطلعوا من الصاله ومختار معاهم بعيونه بعد ماطلعوا مرر نظره ع الصاله لين جو عيونه ع الروشن..
قدمله ووقف فيه..تمعن بنظره في الجنان..
ركز ع الركن اللي كانوا دايرين فيه الدرجيحه"المرجوحه"
وشبح الذكريات يحوم حواليه ويفكره بالأيام الخوالي
لما كان يدف في سدرة وهي راكبه عليها كل صبح وهما يسمعوا في صوت امهم تغني ويغنوا معاها..
مسح دموعه قبل لينزلوا..حمحم بعدين قعمز تحت الروشن.
طلع تليفونه من جيبه وانشغل بيه عن التفكير في أي شي ينوض عليه جروح الماضي اللي ماتبيش تبرا...
🍃🍃🍃🍃🍃
الساعه 1:00ليلا..
عم الهدوء في الحوش...
الصغار راقدين..
وهما الثلاته هالليله اختاروا يرقدوا مع بعض في دار المعيشه..
جفاهم النوم..وسيرة جابت سيرة لين ولى محور حديثهم مختار...
"مش عارفه علاش نحس فيك تعودتي عليه"
هالكلام قالاته اريج لطوبى..
وافقتها غرفه الرأي لما قالت..
/حتى اني حسيت هكي..حسيتك تخطيتي اللي داره فيك
طوبى:نهائي لين نموت مش حنقدر نتخطاه..تنهدت وقالت..اني توا بس نبي نتعود ع وجوده بيناتنا بعد ماحملت مرته..نبي العيل اللي يجي يتربى معانا مش معاه هو..
غرفه:ع الاساس بيخليه هني!؟
طوبى:اني نعرف كويس شن يبي مختار مش حيخلينا بكل..
اريج:مش عارفه..بس مرات نحس في روحي ننسى من يكون ويبدا خاطري يجينا كل يوم..نحس في وجوده بالقوة نحس ان في عندي عزوة..مانبيش ننكر اللي داره مع عمي وكيف عزنا قدامه وخلا اللي اسمها ثريا تجي لعند امي وتستسمح منها..
غرفه؛هدا كله جو داره بش يكسبكم لصفه بس..
اريج؛تصدقي كنت نفكر هكي لكن توا لا..كاذبه ع روحي كذبه ونبي نصدقها..
طوبى مابتش تعلق ع كلام اريج..عقدة فقدان بوها هي السبب...
وغرفه اللي كانت فاهمه الشي هدا حتى هي معاش ناقشتها والتزمت الصمت..
قعدوا ساكتين للحظات بعدين طوبى قالت..
/عجبتني خالتي صفيه كيف ولت تهتم بنفسها الصبغه طالعه عليها مش عاديه..
غرفه بضحكه؛بركات الضرة..
ضحكت اريج..
طوبى:لالا مش هكي اللي دير فيه توا كنوع من المجارة لأهل راجل اميمه..هما ناس راقيين ومرتاحين ماديا تبي تبان زيهم..
اريج وهي تفكر:صح..
غرفه؛معناها قاعد مأثر فيها اللي داروه فيهم عيلة اللي مايتسموا..
طوبى:مش هدا بس..حتى حياتها زمان كانت كلها حرمان في حرمان وتوا ربي عطاها من واسعه زي مايقولوا تبي تعوض اللي فاتها..
اريج بضحكه...
/اني لتوا مش فايقه من صدمة خالي حسين اللي طلع طاطاناكي وحني اخر من يعلم..
طوبى:عمارات وشركه وشقه في دبي..وماخفي كان اعظم..
غرفه؛باهي اللي ماطلعش لبوه اني بعد ماعرفت اللي داسه قلت ماشابه اباه ماظلم لكن بعد فهمت علاش دس وكيف قعد يصرف ع ماليه من غير حساب طمنت ع مرته المستقبليه..
اريج:لو منه مانتزوجش بكل..
طوبى بضحكه..
/علاش!؟
اريج؛ماعنده مايدير بوجع الراس..
غرفه؛بصراحه طوبى وماتزعليش مني نتمناه ياخدك..ا
اريج بحماس:والله خطر ع بالي يومها تخيلي يرجع يخطبك مرة تانيه شن تقولي..
طوبى وهي تمرر نظرها بيناتهم../منكم جد انتم!!؟ اكيد لا..حسين حيقعد طول عمره ولد عمي وزي خوي بس..وحتى هو ولى يحس بنفس الشي ناحيتي معقوله مش ملاحظين كيف تغير معاي! ولى يعامل فيا زي مايعامل في ميمو بالزبط..
اريج وهي تفكر..
/صح..
غرفه تنهدت وقالت..
/طوبى..
"انتي تحبي التارقي"
وكأن قلبها انتفض لما سمعت السؤال..حست بقشعريرة سرت في جسمها كله..صقعت وسخنت في نفس الوقت..
ووجهها اكتسي باللون الاحمر..
اريج قعدت تشوفلها بطرف عينها..
وغرفه قالت..
/علاش ياطوبى! معقوله من رجالة الدنيا كلها ماحبيتي الا هدا!؟
شافتلها طوبى وهي عاقده حواجبها وقالت..
/علاش شن ناقصه ايد ولا راجل!؟
غرفه:مش قصدي..لكن هو يحب وحده وكلنا عارفين شن دار ع خاطرها ولما ماصارش منها حط عينه ع وحده تانيه..يعني مش عارفه كيف بنفهمك..قصدي عمره مافكر فيك..
اريج قامت راسها شويه وفنصت في غرفه..
وطوبى تشوف لغرفه بألم ودموعها عبوا عيونها..
غرفه بضيق..
/عارفه كلامي واعر شويه لكن هدا اللي لازم تسمعيه..الحب من طرف واحد خي عليه ياطوبى حيخليك تقهري روحك وبس..معاش تستسلمي لمشاعرك وحطيلها حد بش ماتتعبيش القدام..
غيرت طوبى نظرها لإيديها اللي حطتهم ع بعض فوق بطنها وهي تقول بنبرة باكيه..
/قاعده نحاول والله نحاول ديما نقول لروحي الراجل يبي غيرك..مايندريش عليك حية ولاميته..حتى في اخر مرة شفته فيها لما مشيت نعزي مع هاديه قعدت نهزب في روحي ونقول..شن تراجي لين تسمعي بيه تزوج!!؟..حطت ايديها الزوز مكان قلبها وقالت..لكن مافيش فايده..هدا وين نسمع اسمه بس يقعد يرعش شن ندير..وحطت ايديها ع وجهها وقعدت تبكي..
اريج وغرفه انوجعت قلوبهم عليها قربوا منها وضموها مع بعض..وهي مازال تبكي بصمت...
🍃 جَفاني النَومُ من قَلقي عَليكا
فهلْ عن شَقوَتي عِلْمٌ لديكا ؟؟
يُزلزلُني الحَنينُ وأنتَ ناءٍ
فأهْرُبُ من لظى وَجْدي إليكا
وَلو عرَضوا القصورَ وما حَوَتها
سأترُكُها وَأسكُنُ مُـقلَتَيـكا
متى ألقاكَ كي أحْيا فإنّي
بلا رُوحٍ .. فَروحي في يَديكا 🍃
🍃🍃🍃
وفي الثلث الاخير من الليل شكت طوبى من وجد الحب لخالقها هو بس اللي يعرف شن تحس وشن تعاني..شايف اللي في قلبها مايغيب عنه شي..طبيبها ودواها عنده ومايقدر حد يخفف عنها غيره سبحانه...
🍃واللي قلبها معلق في حبه من لما روح من العزي اللي كان هاليوم تالث ايامه..
وهو متكي في داره ويفكر..مش قادر يتجاوز اللي صار حتى شويه بالذات بعد ماعرف ان اخ نبيه مش جاي يوقف في عزي خوه..يعني هما توا حيقعدوا برواحهم..
حتى معز للآن يقعد راجل غريب عنهم لأنه مجرد خطيب لبنتهم مايقدرش يكون معاهم في كل وقت..
تنهد بضيق وتقلب ع جنبه الايمن وربع ايديه وهو يقول..
/ياربي ساعدني بش نكفر عن الغلطه اللي درتها مش قادر نسامح نفسي ياربي..
🍃هدا حال اللي عنده قلب يحس وضمير اللي تربى يكون فزاع وعنده نخوه..وماعرفش في حياته يرد حد محتاج🍃
🍃🍃🍃🍃
ويطلع فجر تاني يوم..
طوبى بعد ماصلت ركبت فوق السطوح تشوف البساط المنشور كان جف ولامازال..لقاته قاعد مبلول من اطرافه..خلاته ومشت لدار الخزين..
خشتلها وجت للوحه مغطيتها..حولت الغطا وقعدت تتفرج ع رسمة ليها فترة ترسم فيها موضوعها ليه علاقه بمحتوى صفحتها العامه ع الفيس..
قضت نص ساعه وهي تكمل فيها لين جتها رساله من اريج..
(انزلي جنونه ناضت دور فيك)
طوبى:ياروح مامي..حطت الادوات متاعها..مسحت ايديها كويس بمنشف خاص..بعدين غطت اللوحه وطلعت..
قبل لتنزل سمعت صوت المهدي يتكلم..مشت وقفت ع السياج بش تشوفه..
☘في نفس الوقت..
بعد ماروح التارقي من الجامع..
فتح شبابيك الشقه بش يهويها..وصل في الشباك المطل ع سطوح حوش ام العيون الحايرة..
فتحه ويلقاها قدامه..ابتسم ابتسامه خفيفه وقال في نفسه..
"ااه يامحلاه من صبح..غير امتى ربي يقربك ونقعد نصبح في عيونك اللي ذهبن شيرتي.."
عقد حواجبه وهو مبتسم لما لاحظها مركزه بنظرها ع جهة معينه في الشارع..نزل عيونه وشاف وين ماتشبح لقي المهدي ماشي لسيارته بشنطه صغيره وسدرة وراه..
فتحلها الباب ركبت بعد ماسكره فتح الباب الخلفي حط فيه الشنطه وسكره بعدين مشي ركب..
🍃طوبى بقلق:إن شاء الله خير!
قعدت مع السيارة بعيونها لين طلعت من الشارع..قامت عيونها بنظرة عابره في شقة التارقي لقاته واقف في الروشن يشوفلها..
انفجعت..توترت..وارتبكت..وكيف جت بتمشي هاربه كعادتها بدون ماتركز خبطت بكتفها ظهر الكرسي المحطوط ع البساط..
تجاهلت وجعها وكملت طريقها ونزلت تجري وكأنه قاعد يجري وراها
🍃اما هو بعد ماشاف اللي صار معاها انوجع وكأن الضربه جت ع كتفه..وخر عن الروشن وقال..
/غير ليش هالفركسه بس..ضحك غصب عنه وقال..والله مامصبرني ع الدنيا غير انك فيها ياقلبي..ااه ياربي مانبي كان معجزة تخليها تولي حلالي عاجلا غير آجل
🍃🍃🍃
وهي كانت بتموت من الخجل والاحراج تحكي في اللي صار معاها لأريج وهي تهزب في روحها..
طوبى بإحراج..
/ماتصيرليش اللقطات العبيطهوالمواقف المحرجه كان قدامه..قدامه نولي مرعوشه مانعرفش نتصرف..
اريج بضحكه:اصلا المواقف الزفته ماتصيرش مع الوحده فينا كان قدام الراجل اللي تحبه..
طوبى بضيق..
/تو ياخد عني فكرة اني وحده مرعوشه ومش راكزه..
سكتت اريج وهي تشوفلها بضيق..
تأففت طوبى وقالت بتوتر..
/معاش تعدلي ع كلامي فوتي فوتي..ايه حقه توا شفت سدرة والمهدي طالعين ورافعين معاهم شنطه..
اريج بصدمه:حيي لزوهم !!؟
طوبى:عينك..رافعين شنطه صغيره زي الساكو..
اريج وهي تفكر..
/زعمه رافعها شهر عسل!؟
طوبى:وين ان شاء الله فهالوباء!؟
اريج:مرات في البلاد..
طوبى:باهي شن رايك نتصل بيها نشوفها!؟
اريج:لالا فوتي كان في حاجه راهو اتصلت بينا وخبرتنا صدقيني زي ماقتلك ماشيين شهر عسل..
طوبى بقلق..
/ان شاء الله يكون هكي..
🍃🍃
واستنت طوبى لين تناصف النهار واتصلت بسدرة لكن لقت رقمها مقفل..زادت انشغلت وخافت..واضطرت تتصل بسميرة بش تعرف منها..
☘"الصبح قالي عمك الحاج ماشيين للخمس"
طوبى بإستغراب..
/الخمس!؟
"ايه المهدي عنده حوازه غادي مشولها"
طوبى:الحق اول مرة نعرف ان عنده حوازة غادي..ضحكت وقالت..معناها اريج عندها حق لما قالت ماشيين شهر عسل..
ردت عليها سميرة بضحكه وقالت..
"ايوه زي ماقالت اريج.."
🍃ونضال وهو متوجه لباب الحوش لما فات من قدام الكوجينه سمع اسمها ابتسم غصب عنه وقلبها دق بسرعه..
وصل في الباب فتحه وطلع ومشي طول بإتجاه القراج..
☘☘☘
كان ناوي يقضي مشوار لمحل ذهب يبي ياخد لأمه هديه يرضيها بيها..
🍃لكن فحيح الافاعي اللي حوالين امه خلاها من خوفها يعاندها زي خوه الكبير فكرت ديرله شي تحطه بيه في الأمر الواقع..
🍃في دار المعيشه كانت مقعمزه مع بنتها ومسكرين عليهم الباب..
مغليه؛بتمشي معاي انتي ونجاة وردي بالك تخبري اللي ينقاللها نسرين..
خديجه:من غير ماتوصي مستحيل نخبرها..
مغليه هزت راسها بعدين قالت بكبر..
/مش يبي رضاي خلاص اني هكي نرضى..
خديجه:نضال مايقدرش يخالفك انتي عنده فوق كل شي..
🍃ومن دار المعيشه لباب الحوش..
خشت نجاة..ومشت طول بإتجاه الدروج..ركبت فوق..
لما وصلت في الدور التاني توجهت لجناح راجلها..
وقفت في الباب وطلعت المفتاح من جيب سروالها..
وحطاته في الباب..بلعت ريقها..وفتحاته..
غمضت عيونها بشده بعدين فتحتهم وخشت سكرت الباب وراها..
وهي تمرر في نظرها ع الدار توسعوا عيونها ع الاخر من الصدمه والدموع عبوهم..
تشوف في صور غريمتها في الدار كلها ولما شافت اكبر صورة ليها مشت وقفت عليها وهي تمرر في نظراتها اللي كلها حقد وحسد عليها..
حطت يدها ع وجه طوبى في الصورة وهي تقول بحقد شديد..
/ربي ياخدك ياحقيره ربي ياخدك..
كانت حتغرز اصابعها فيها لكن تراجعت في اخر لحظه ووخرت عنها ومشت طلعت من الجناح..
🍃وسميرة وهي طالعه من الكوجينه وقفت في الباب مفجوعه لما فاتت نجاه من قدامها نجاة تمشي بسرعه وكان باين عليها اثر البكي قعدت معاها بعيونها لين طلعت من الحوش..
رفعت عيونها فالدروج وهي ماطة شفايفها للأسفل بإستغراب بعدين رختهم ونزلت عيونها ومشت بإتجاه جناحها..
🍃وتوصل نجاه لشقتها..بعد ماخشتلها مشت طول لدار النوم ردت المفتاح لمكانه وهي تشوف للجالي اللي كان غارق في النوم بنظرات كلها غل...
🍃🍃🍃🍃
الساعه 5:30عصرا..
في المربوعه الدخلانيه لحوش طوبى..
كان مقعمز الحاج علي وفي حجره جنه تلعب بساعته وامها واقفه مقابلاته وهي تقول..
/قالت مشوا للخمس المهدي عنده حوازة غادي..
هز راسه بعدين قال..
/باهي ناديلي غرفه..
طوبى بإستغراب..
/علاش!؟
علي:بعدين تعرفي منها..
طوبى بشي من القلق قالت.
/حاضر..
علي:ارفعي بنتك..
قدمت طوبى لجنه خدتها ورفعتها وهي تقول..
/هي نمشوا نلعبوا بالسيارة مع اوبا وهوبا..
جنه بفرح..
"سياته"..سيارة..
ابتسم الحاج علي ابتسامه خفيفه وهو يلحق فيهم بعيونه لين طلعوا من المربوعه..
تبدلت ملامح ابتسامته للحزن وغير نظره للأرض وهو يفكر..
لحظات وخشت عليه غرفه وهي دق في الباب..
/جدي..
رفع عيونه وشافلها قال..
/تعالي بنتي تعالي..
قدمتله غرفه وقعمزت قريبه عليه..
حط ايديه الزوز ع راس عكازه وقال..
/شن حالك؟!
هي بإبتسامه مجامله ردت..
/الحمد لله شن حالك انت؟
علي:الحمد لله ع كل حال..تنهد وقال..بنتي بكري جاني راجلك في الحوش وكلمني عنكم..
نزلت راسها وهي مضايقه ع الآخر..
علي:اني معاك يابنتي غلط وغلطه كبير لكن يابنتي في بينكم صغار عطيه فرصة تانيه ع خاطرهم..
غرفه:عطيته فرصته من زمان ياجدي..
علي:معليشي يابنتي اعطيه غيرها لعيون صغارك خليهم يتربوا بيناتكم يابنتي..شوفي لصفيه مرت عمك عبد المطلب عمك وتعرفيه مافيش مراة تتحمله وهي صبرت عليه وتحملت ع خاطر صغارها قعدت عليهم وربتهم لين كبرتهم وشوفيهم توا شن ولوا الله يبارك..
غرفه:بعد شني ياجدي!؟ انت اكثر واحد تعرف قداش عانوا صغار عمي وبالذات اميمه نسيت العار اللي داره في الشارع وخلا الناس كلها تشهد عليه!! وبعد صبرها عليه بش كافاها خدي عليها مراة تانيه ولاعبرها..
علي:باهي عندك حق..لكن كيف عبد المطلب كيف عبد الرؤوف!؟
ابتسمت تهكما وقالت..
/الراجل اللي يستوطي حيط مرته ويهنيها مهما كان عنده من حاجات باهيه ماتشفعلاش ياجدي..اللي يرضى يسمع اهانة مرته ويسكت عنها ويرضاها عليها مرته اللي مفروض قدرها من قدره وكرامتها من كرامته مافيشي امان ياجدي..
سكت علي شويه بعدين قال..
/شكلك حاسمه امرك خلاص..
رفعت عيونها فيه وهي تقول..
/ايه خلاص..
هز علي راسه وقال..
/إن شاء الله خير..إن شاء الله...
🍃🍃🍃🍃🍃
"لامش حنحاول معاها نبي نعرف هي شن قررت بس"
المحجوب وهو يسوق في السيارة قال بحمقه..
/ايوه هو هدا..اني قبل جيت معاه ودافعت عنه لدرجة حسيتهم بالغوا في ردة فعلهم لكن بعدين هو اكدلي اني كنت غالط..لتوا الكلمه اللي قالها قاعدة ترن في وذني..سادهم فضايح..لابارك الله فيك ياسيدي ويكثر من امثالك..
ونبيله تسمع فيه بضيق وهي ملتزمه الصمت..
🍃🍃🍃
بعد طول مسافه وصلوا لشارع القهوة..
درس المحجوب سيارته قدام حوش طوبى ونزلوا هو ومرته..
شاف جهة حوش شنيبه لقي الجالي بسيارته مع امه ومرته واخته..رمقه بنظرات حاده وكمل طريقه للباب..
والجالي كان يسرقله في النظرة تحت عيون نجاة...
**********
نبيله؛اني مش جايه ضدك نهائي ولانبي نحاول معاك توليله ع خاطر اي شي حتى الصغار..اني مسكت قضايا لنساوين صبروا ع خاطر الصغار واخر صبرهم كان الندم تمنوا لو خدوا قرار الطلاق من البدايه وقصتك انتي وخوي من البدايه كانت غلط..
غرفه بضيق:هي هادي من البدايه كانت غلط..
نبيله:قدر الله وماشاء فعل..
غرفه بقلق:باهي كان سكر راسه وقال مش طلق..
نبيله وهي تحاول تخفي ضيقها قالت..
/حيطلق حبيبتي اخرته حيطلق..
🍃الطلاق..فراق نهائي..
وفراقهم توا مش طايقه عبد الرؤوف فكيف حيقبل بالفراق النهائي اللي يطلع غرفه من حياته..
برغم كل شي..يحبها حب كبير..حب متغلغل في داخله في كل جزء فيه لكن للأسف ماكانش قوي كفايه بش يغلب بقايا احقاد قعدت من ماضي رفض عبد الرؤوف يرميه ورا ظهره..
🍃وصله الرد من الحاج علي..وكلماته نبيله واكدت ع الرد اللي وصله منها..
خلاص..السطور الاخيرة في قصتهم قاعده تنكتب وهو مازال رافض يسلم لهالنهايه اللي رسمها بإيديه..
🍃🍃🍃🍃🍃
الساعه 7:30مساءا..
نزل نضال من الدور التاني وهو لابس بيجامه شتويه لونها اسود وفي يده زوز كياس هدايا صغار..
مشي للكوجينه وقف ع الباب ودق عليه وهو يقول..
/خالتي سميرة!.
"في الصاله يانضوله في الصاله"
ابتسم ومشي للصاله خش عليها لقاها تشرب في السحلب وهي تتفرج ع الاخبار..
قعمز قريب عليها وقال..
/ماتعرفيش وين مشوا!؟
سميرة؛لاوالله..
تنهد وقال..
/باهي خودي هادي..وعطاها وحده من الكياس..
هي بإبتسامه استغراب خدتها وقالت..
/شن هادي!؟
نضال بإبتسامه..
/شوفيها وتو تعرفي..
طلعت سميرة من الكيسه علبة مجوهرات صغيره لونها اسود..
فتحتها لقت فيها خاتم ذهب بدت ع وجهها ملامح المفاجأة وهي تقول..
/قصدك ليا اني هادي!؟
هو بضحكه:ايه ليك..مش حاجه كبيره ان شاء الله مرة تانيه نجيب خير منها..
هي شافتله بإمتنان وقالت..
/شن تقول ياولدي !غير المحسبانيه ساده..ربي يجبر بخاطرك ويفتحها عليك ويعطيك ع قيس نيتك..
هو قال بإبتسامه..
/بارك الله فيك..انتي توا امي التانيه اللي نديروهلك واجب مش جميل..
تعبوا عيونها دموع وهي..
/ربي يحفظك ويفرح قلبك زي مافرحتني..
رد عليها يقول..
/آمين..رفع الكيسه التانيه وقال..جبت لأمي حاجه نرضيها بيها ان شاء الله تعجبها وترضى..
شافتله بشي من الحزن بعدين قالت..
/من غير شي تو ترضى امك هادي مهما حاولت تقسي قلبها يلين غصب عنها لصغارها..
نضال:إن شاء الله..
ناضت سميره وهي تقول..
/مرات يجوا خاشين توا خل نوض ندس هديتي قبل لتشوفها..ومشت تجري وخلت نضال يضحك عليها..
🍃🍃🍃
وتعدي ربع ساعه..
ويروح الجالي بأمه واللي معاها من مشوارهم..
خشوا كلهم مع بعض للحوش..مغليه والجالي وخديجه مشوا لداى المعيشه..اما نجاة مشت للكوجينه بش تشرب ميه..
🍃خشت لقت سميرة دير في العشي قالت..
/وين معاذ!؟
سميرة وهي تلبس في دبابيس الدجاج بالبوقسماط قالت..
/راقد في الدار..
عبت نجاة طاسه الميه وقالت..
/وجوري!.
سميرة:مع سدرة في نفس الدار يقروا وحمزة مشي مع يزن للملعب..
هزت نجاه راسها وشربت من الميه وسميرة تشتم فيها بينها وبين نفسها..
🍃فهالوقت طلع نضال من الصاله ومشي لدار المعيشه
خش وقال..
/السلام عليكم..
ردوا عليه خوته لكن امه قلبت وجهها عنه..
هو جاها باس ع راسها وقعمز جنبها مدلها الكيسه وقال..
/خلاص موغي سادك جفي شوفي شن جبتلك وارضي علينا..
الجالي:خلاص يام عاد مانعرفكش قلبك اسود!
مغليه:قلبي مش اسود وعمره مايكون اسود ع صغاري لكن في منهم مايدير كان اللي تحرق دمي..
نضال:الموضوع صار وفات حتى خديجه نساته يام..
خديجه:امي مش واخده منك موقف ع خاطري امي تراكم عليها الشي يانضال..
عقد الجالي حواجبه بإستغراب..
ونضال قال..
/شن قصدك!؟
مغليه؛واضح قصدها! شوف روحك كيف تعامل في هديكا كيف مساويها بيا ومكبرلها قدرها لين فضلتها عليا..نضال بإنزعاج..
/من هي يام!؟
الجالي:قصدها مرت بوك..
نضال بضيق..
/غير شن تقولي يام بس!
مغليه:نقول في الحق..حتى يومها هنت اختك وبنت اختك وضربتها قدامها وصدقت كلامها هي وكذبت كلامنا..
نضال وهو يحاول يتمالك اعصابه قال..
/لاحول ولاقوة الابالله..
خديجه؛هدا الحق يانضال اني مش مدورة علاقتها بالمهدي معروفه اسبابه ولاعمر لانه يتعامل معاها بسطحيه ومستحيل يفضلها ع امي..لكن انت انت..! انت بالذات مفروض ماتشبحش في وجهها حتى الشبح..
نضال ضحك بصدمه وقال..
/الله المستعان..غير شن تقولوا شن تقولوا..بأمانه مقتنعين بيه اللي تقولوا فيه توا!؟
مغليه بحده:اسمع من غير كثرة دوة كان تبي رضاي حق دير مانبي..
شافلها شويه بعدين قال..
/شن هو اللي تبيه يام!؟
الجالي شاف لأمه بإمتعاض عارفها شن تبي تقول..
مغليه:كنا في حوش خالتك وهيبه مشيت تكلمت في بنتها ليك انت..
بدت ع وجهها ملامح الصدمه الشديده وهو يشوف لأمه..
مغليه بكبر:تبي رضاي ماتعارضنيش وتاخدها بتسكر راسك وتقول لا وتحشمني مع اختي لاعادولدي ولانعرفك..
حرك الجالي راسه يمين ويسار بأسف بعدين شاف لخديجه اللي قالت..
/البنيه الله يبارك عليها ماناقصها شي ومتربيه احسن تربيه ع ايدين مراة مقومه وبين رجاله مقومين حافظوا عليها وحتى في الجامعه ماخلوهاش تقرا ولاعندها دوران وتنسريف وطول عمرها بالعبايه والشاربه..
نضال بملامح امتعاض ونبرة حاده..
/خوديها لمحمد..وناض بعصبيه بيطلع..
مغليه بإنفعال:مالا من تبي ناخدلك كان هادي ماتبيهاش!!؟ هديكا اللي فيسع باعاتك وبدلاتك!؟
الجالي:يام!؟
التفت لأمه وقال بعصبيه..
/ارجوك يام الدوة هادي معاش تعاوديها بكل وبش نريحك اني مش متزوج بنقعد هكي بروحي لاخر يوم في عمري..
خديجه؛هدا الدين اللي تعلمته صياح وعياط ع امك وتبي تكسر كلمتها وتحشمها مع خالتك..
اشر ع خديجه وقال بغضب..
/انتي بالذات اطلعي منها ياسبب الخراب كله مافيش واحد فينا خشتيله في حاجه ومشي القدام..
خديجه بانفعاال مبالغ فيه قالت..
/صار اني سبب الخراب بارك الله فيك ياخوي..وبدت تخبط ع وجهها وهي تكرر في جملة"بارك الله فيك"
الجالي ناضلها وهو يقول..
/خديجه بلاهبال خديجه..
وامها ناضتلها شدتها من ايديها وهي تقول..
/خلاص بنتي خلاص..
خديجه ببكي وعياط..
/ريتي يام ريتي طلعت اني سبب الخراب بختي اسود اني بخته اسود..
شافت مغليه لنضال بغضب وهي..
/امشي ياحقير اطلع اقلب وجهك..
هو بألم قال..
/حسبي الله ونعم الوكيل..
ومشي طلع..
مغليه؛وصلت بيك لهني تتحسب عليا ياعاصي!! جعنك ماتربح ولاتفلح ان شاء الله جعنك مقهور زي ماقهرتني وقهرت اختك..
الجالي وهو مستاء طلع بيلحق نضال..
🍃وهو ماشي فات من قدام الكوجينه شاف سميرة واقفه ودمع بصمت رمقها بنظرات حاده وكمل طريقه..
هي لاحظت نظراته ليها لكن مااهتمتش..
همها كله نضال اللي طلع موجوع من امه والدمعه في عينه..
خشت قعمزت في الكوجينه ورا الطاوله وقعدت تبكي بصمت..
ونجاة اللي كانت واقفه جنب الباب من داخل تسمع في النقاش الحاد اللي صار..
طلعت وهي مروقه من الكوجينه وتوجهت لدار المعيشه..
قبل لتخشلها لبست قناع الاسف والالم وخشت عليهم وهي تقول..
/لاحول ولاقوة الا بالله هدا اللي كنت خايفه منه..
خديجه وهي تبكي في حضن امها قالت..
/كلامه يحرق يام يحرق..
مغليه وهي طبطب عليها.
/احرق قلوب بنات الواعر والكلبه مرت بوك ياربي..
نجاه:كلامه كلام واحد مشحون شحنة صح..
مغليه بحقد؛من غيرها الزوفريه هادي..وينها هالكلبه..
نجاة:لالا عمتي ردي بالك تعلقي معاها هي مدايرة روحها خالية قضيه بش كان صار ماصار تطلع بريئة قدام عمي..
خديجه تباعدت عن امها وقالت..
/كلامها صح ماتخليهاش طيحك في حفرتها..
مغليه مسحت ع وجهها ورفعت عيونها فوق وهي تدعي..
/وريني فيهم يوم...
🍃🍃🍃🍃🍃🍃
تاني يوم...
الساعه 5:25عصرا..
في حوش طوبى الواعر..
تحديدا الصاله...
🍃سميرة بغضب وألم..
/مش كل من حملت وجابت يقولوا عليها ام..سحيقة الامهات اللي هكي..
طوبى بأستياء..
/هادوا مايشعفوش ولايتعلموا..
صفيه؛ساد اللي صار بين عمر وبنت خاله مازال بيعاودوا نفس البلي مرة تانيه..
طوبى:بعد ماخدي مهدي سدرة خافوا قالوا خل نسبقوا ونحطوه في الامر الواقع ..
سميرة:عارفينه ياروحي متكدر من القطيعه بينه وبين امه استغلوها..خبطت كفوفها في بعض وقالت..اني ماحرقلي دمي كان الحقيره اللي ينقاللها خديجه لما قاللها انتي سبب الخراب هالكلوفيه دارت جو التخبيط والعياط بش تقلب عليه الطاوله...
طوبى؛لعبتهم هادي..
هاديه؛اني شفتها مريرات خديجه الشر باين في وجهها..
سميره؛مالا البوبريصة اللي تنفخ في النار نجاة ابليسة ابالسة راهو
صفيه؛ابليسه وبس..خليني ساكته..
سميرة؛لكن شكلها هي وهداكا المتخوخم مش في الابيض امس شفتها نازله من جناحه وهي تبكي اشبح شن صار بيناتهم..
صفيه:ان شاء الله معاد يولوا سحيقه..
طوبى تسمع فيهم وهي ملتزمه الصمت من لما جت سيرة نجاة اللي مش طايقه تسمعها..
اما اريج وغرفه اللي ماشاركوش في الحديث..
وحده فيهم كانت سرحانه تفكر في حالها..
والتانيه تسمع فيهم وهي مضايقه وقلبها واجعها..
صفيه:باهي نضال وين قاعد توا!؟
سميرة بقلق..
/هداكا الجالي قال ماشي لحوش صاحبه اشبح حق ولاكذب..
هاديه بأسف..
/لاحول ولاقوة الا بالله...
🍀🍀🍀🍀🍀
ويعدوا خمسة ايام..
🍃ونضال قاعد في حوش صديقه وع قد ماحاولوا معاه بوه وخوته رفض يروح..
اما بوه فضل مايتصادمش هو ومغليه ويعطيها فرصة تكبر المشكله وطلب من سميرة تقعد بعيده عليهم هي وخديجه قدر الإمكان..
🍃سدرة والمهدي مازالو في الخمس مرة وحده فقط تواصلت فيها سدرة مع عيلتها وسألت عنهم عن طريق طوبى وطوبى فضلت ماتكلمهاش نهائي وتخليهم هي وراجلها ياخدوا راحتهم...
🍃واهتمام عبد القيوم بعيلة نبيه اصبح من بعيد كان يكلم في معز شبه يوميا ويسأل فيه عن احوالهم واحتياجتهم وفي نفس الوقت خدي اجازة لسلافه من الأماكن اللي تخدم فيها ع اعتباره يعرف اصحابهم..
لكن وسط هدا كله ماغفلش لحظه عن التفكير حبيبة القلب وكان في داخله قلق وتخوف من أي شي يصير فجأة يكون صادم بالنسبه ليه..
🍃صادم..قرار صادم خداه عبد الرؤوف حيكون وقعه قوي احبابه وكل من يعرفه..الالتحاق واخيرا بجبهات قتال..
وقبل ليمشي كان يخبر شخصين بقراره..
ولما جي اليوم اللي بيمشي فيه خبر الشخص الاول ووصاه مايطلع شي لبعد مايمشي..
اما الشخص التاني...
🍂🍂🍂🍂🍂🍂
16فبراير...2020..
يوم الأحد..
الساعه 11:30صباحا...
طلعت طوبى للجنان متوجه للباب..
وقفت وراه وفتحاته..
خش وهو يقول..
/السلام عليكم..
سكرت طوبى الباب وهي تقول..
/وعليكم السلام..
عبد الرؤوف بإبتسامه..
/كيف الحال..
طوبى:الحمد لله..تفضل للمربوعه..
هو قال:يزيد فضلك..ومشي للمربوعه الخارجيه..
قبل ليخش قال لطوبى..
/قولي لغرفه تجيني بالصغار..
طوبى هزت راسها وهي تقول..
/حاضر..ومشت من حداه وهي حاسه بقبضة في قلبها..
وهو قبل ليخش شاف جهة شجرة الفل ابتسم..بعدين غير نظره عنها وخش للمربوعه..
🍃قعمز وقعد يستنى بشوق وألم..
وتعدي دقايق الانتظار..ويخشوا عليه ولاده لما شافوه نادوا..
"بابا"..
ومشوله جري..وهو ضمهم ورفعهم حطهم ع رجليه ويسأل فيهم بضحكه عن احوالهم..
بعدين قام عيونه وشافها..كانت بحجابها ورافعه في حضنها شنطة فيها بنتهم..
ابتسم وقال:جيبيها..
قدمتله غرفه وحطت شنطة مئاب جنبه ووخرت كم خطوة بعدين وقفت وربعت ايديها..
وهو بنظراته اللي كلهم حب وشوق معاها وهي تتجنب تشوفله..
غير نظره لبنته..كانت راقده في شنطتها..
نزل ولاده وهو يقول..
/شويه بابا..خدي الشنطه حطها ع رجليه وفتحها..
وطلع منها مئاب ضمها بلطف وقعد يشم في ريحتها..
وولاده يتفرجوا عليه..لكن امهم عيونها قاعدات في الارض..
بعد ماطبع ع خد بنته قبله لطيفه وردها للشنطه وسكر عليها وحطها جنبه..
رجع شاف لغرفه وقال..
/بنخش الحرب..
قامت عيونها فيه وقالت..
/اكثر حاجه كنت تبيها الفترة اللي فاتت وهاك وصلتلها..
تمعن فيها بالنظر ..تمعن في عيونها..كان يدور عن الخوف اللي ياما شافه فيهم لما كان يلمح مجرد التلميح عن المشاركه في الحرب..مالقاشي..عيون غرفه كانت نظرتهم باردة خاليه من أي شعور..
وهالشي كان يذبح فيه من الوريد للوريد...
ابتسم بألم وقالت..
/قبل كنتي تبكي لما نقول نبي نشارك فيها وتوا نقولك بنخش الحرب وانتي استقبلتي اللي سمعتيه بكل برود لهالدرجه ياغرفه هنت عليك..طلعت من قلبك وخاطرك خلاص!؟
نزلت عيونها وقالت..
/انت اللي اخترت تطلع اني ماطلعتكش..لما قتلك بنمشي رديت عليا بحركة ايدك بدون ماتشبحلي..كنت عارف ومتأكد اني حنمشي ومش حنولي ومع هدا بكل برود..قلدت حركت يده وهي تقول..كان هدا ردك..
نزل عيونه للأرض وهو مضايق لأبعد حد..
غرفه:اني وقتها سكرت باب قلبي وراك خلاص...
"مبروك"
قام عيونه وشافلها بنظرة الم..
غرفه؛مانبيش نظلمك عارفه اللي درته مش شويه وحاولت ع قد مانقدر نسيك فيه لكن بلافايده..مانبيش نزيد نظلمك ونظلم نفسي معاك اكثر من هكي خلينا ننهوها وحني قاعدين محافظين ع شويه الاحترام اللي قاعده بيناتنا..
ناض وقف وهو يقول بشي من الرجاء..
/باهي معاك حق..واني نعترف اني غلطت فيك هلبه ومستعد نصلح كل شي بالله عليك حولي فكرة الطلاق من راسك "فراقك مانقدرش عليه ياغرفه"
غرفه كانت تسمع فيه وهي تمرر في نظرها ع صغارها..
وجعها قلبها عليهم..قلبها اللي مش حاس بأي شي اتجاه بوهم كل الكلام اللي قاله ماأثرش فيه نهائي..
عبد الرؤوف؛خلينا هالفترة بعاد عن بعض نراجعوا ارواحنا نتفكروا كل شي حلو صار بينا حاولي ياغرفه ارجوك..
قامت عيونها فيه وهي تقول..
/نحاول..لكن ماتتأملش هلبه..
بدت ع وجهه ابتسامة أمل وهو يقول..
/تمام خليها للوقت..
غرفه:نرجع نقولك ماتتأملش هلبه نعاود نفكر فيك بش ماتقولش ضحكت عليا مرة تانيه..
حافظ ع ابتسامته بقوة اللي اخفى بيها الألم بعدين قال..
/باهي..حاضر..توا نبي نطلب منك طلب..
غرفه تسألت بملامح وجهها"شن هو"
هو قال بإبتسامه..
/اقطفيلي ورد فل من شجرتكم
تنهدت بعدين هزت راسها بالموافقه ومشت طلعت من المربوعه..
🍃توجهت للشجرة وهي في مستغربه في نفسها..
كيف هي بارده هكي!!؟
علاش ماتحركش في داخلها ولاشعور اتجاهه!.
علاش ماخافتش لما قال بيمشي للحرب!؟
بعد ماقعدت دور في اجوبه ع اسئلتها وصلت لنتيجه مفادها..
ان عبد الرؤوف بالنسبه انتهى تماما..
وصلت للشجرة وقطفت منها الفل..بعدين مشت للمربوعه وهي حاملاته بين ايديها..
خشت للمربوعه لقاته يهدرز مع الولاد..
قدمتله وقالت..
/مد ايديك..
راجاها لين توصل فيه..بعد ماوصلت فيه حط ايديه تحت ايديها ونزل راسه ليهم وقعد يشم في الفل..
حست غرفه هني بشي من الضيق لما تفكرت مشهد يشبه لهدا صار من سنين طويله..
قالتله..
"سامحني"
ابتسم بألم وخدي منها ورد الفل وحطه وسط منديل ولفه عليه وحطه في جيب كبوطه الدخلاني..
شافلها وقال..
/مسامحك وحتى انتي سامحيني..
وياخدها في حضنه ويضمها بقوة..
نزلوا دموعها اسفا ع الحال وصلوله..
وهو شد دموعه بقوة وقلبه يدق بسرعه حبا وشوقا..
وولادهم يتفرجوا عليهم برغم انهم مش فاهمين شي لكن بدوا يحسوا بالحزن اللي مسيطر ع بوهم وامهم..
تباعد عبد الرؤوف بالغصب عنها وقال..
/زي ماقتلك زيدي فكري..طبس ع ولاده باس كل واحد فيهم ع راسه بعدين مشي وهو يقول..
"ردوا بالكم ع ارواحكم"
وطلع من المربوعه..
الولاد شدوا في عباية امهم لما شافوا دموعها..
سمعت باب الحوش انفتح وتسكر قالت بنبرة باكيه..
/ربي يسامحك دنيا وآخرة..
🍂🍂🍂🍂🍂🍂
عرجون فل منــين فاح خداني
خطر عليا عمــــــرنا الـحقاني
****
خطر عليا زينك يا عـــــــيني
وليل صابغ وســط نني عينك
خطر عليا هــلال فوق جبينك
ورموش قيل تحتهـــم وجداني
****
عرجون فل عشـــــــــــــــــيه
شميت فيه ايام حلوة هــــــنية
منين كان بدلة مزينه المنشيه
بيني و بينك كان ليه مــعاني
****
وين نهديهولك ياعيــــــني
عرجون يحمل شوق نبعتهولك
بالسر يجمع بين قولــي وقولك
بالسر يحكيلك علي الوحــداني
****
عرجون فل منين فاح خـداني
خطر عليا عمرنا الحــــــقاني
#عرجون_الفل
#طوبى
...يتبع....
