#طوبى "جنة طوبى"
#جمان_فريد
#الجزء_112"نضال2"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"وحين يهيلون على قبري التراب، انثر فوقه فتات الخبز، فتتهافت عليه العصافير، فأسمع صوتها، و لا أشعر أني وحيد"
دوستويفسكي|🍃
_________________________________________
🍀🍀🍀🍀🍀🍀
🍂ويعدوا عشرة ايام ع وفاة عبد الرؤوف..
غرفه فيهم كانت شبه صايمه عن الكلام يدوب ترد ع الناس اللي يعزوها وطول ماهي مقعمزه تذكر في الله..
لو الحوش فضي من المعزين تحبس روحها في دار النوم تقعد بين بنتها وبين الصلاه وقراءة القرآن...
وولادها اواب ومهاب تحت رعايه صفيه اللي كانت مسخره اغلب وقتها ليهم..ولو انجبرت تنشغل عنهم تخليهم تحت عيون مروة وتاله اللي كانوا مهتمين بالصغار للغايه..
🍀وطول العشرة ايام اللي فاتت كانوا طوبى وسدرة هما اكثر من تحمل مسؤولية اقامة عزاء عبد الرؤوف برغم تذمر طوبى وعدم رضاها عن الأمور اللي تصير في كل عزي من اكل وشرب وغيره...
وكانوا معاهم باقي نساوين العيله والاصحاب والجيران متعاونين في كل شي...
🍃ولأن شبح الكورونا بدي يطوف حوالينا بعد ماانتشرت في تونس ومصر اغلب الناس بدوا ياخدوا في امرها بجديه ويحاولوا يتبعوا اجراءات الوقايه لهالسبب خف تردد المعزين ع حوش عبد الرؤوف..
🍃🍃🍃🍃🍃
6مارس..سنة 2020..
الساعه 11:00صباحا..
كان المهدي ماشي في ممر القسم اللي قاعد فيه نضال..
وين قرب لحجرته..
شاف ممرضه جايه لزميلتها وهي تقول..
/معاش نبي نخش للحجرة هادي..
خفف من سرعة مشيته وهو يسمع فيهم...
زميلتها قالت..
/اني مرة خشتيلها وقلتلهم معاش بنخش مرة تانيه الراجل ملتزم مايبيش ممرضات يخشوا عليه..
:والله لين نتحشم منه مسكين يقعد لاف وجهه عني لين رقبته قريب تنكسر ولما نكلم فيه يرد عليا بالسيف..
: خلاص اهو غدوة بيطلع..
ومشوا الزوز فاتوا من جنبه وهما يهدرزوا في مواضيع تانيه..
وهو قدم للحجرة وخشلها..
لقاه متكي وحاط السماعات في وذانه وعيونه ع الشباك..
ابتسم ابتسامه خفيفه وقربله..طبطب ع كتفه..
غير نضال نظره ليه ابتسم..حول السماعات بيده اليمين وسكر MP3 بعدين قال..
/اووو شيخ مهدي..
قرب المهدي كرسي وقعمز وهو يقول..
/شن داير اليوم!؟
نضال؛نعد في الدقايق والساعات واني نراجي امتى يجي غدوة ونطلع..
هز المهدي راسه وقال..
/خلاص هانت..وبما انك بتطلع غدوة ان شاء الله في حاجه هكي لازم نحكيهالك..
نضال:عارف عارف..عارفكم مدرقين حاجه باينه في وجوهكم..احكيها احكي..
المهدي:تمام لكن خليك زي ماعرفتك راجل مؤمن وراضي بقضاء الله وقدره..
عقد حواجبه وقال..
/إن شاء الله..فوت المقدمات وخش في الموضوع طول..
🍃🍃🍃🍃🍃
واللي بيحكي عنه المهدي..او بالأحرى بيحكي عنها..
رافعها ولدها عمر للمراجعه ومعاه اخته خديجه..
وهما ماشيين بيها للقسم اللي فيه الطبيبه المسؤوله عن حالتها
اول ما خشوا الممر شافوا اميمه واسامه جايين من بعيد شويه.. كانوا لابسين يونيفورم لونه ازرق...
لكن تميزت عنه اميمه ببالطو ابيض لابساته علي اليونيفورم وكانت شاده في يدها شيشه ميه ولابسه كمامه واسامه منزل الكمامه لذقنه وهو لابس نظاراته الطبيه...
مد يده هي عطاته الشيشه وكانت تضحك وهو خداها منها ووقف فتحها وبدي يشرب..
التلاته كانوا يشوفولهم...
بس نظرات عمر ليهم كانت نظرات صدمه والدموع غرقوهم..حتى من لون وجهه تغير..
خديجه سرقتله النظر ولاحظت صدمته وغيرته اللي بانت في عيونه..
اما امه فكانت تشوف لأميمه بنظرات كره..
فاتوا من حداهم وهما يسمعوا في اسامه يقول..
"مش مشكله نستنى عمري كله المهم وليتي حرمي"
واميمه تضحك ع كلامه وهي تقول..
"وطي صوتك"..
ومن كثر ماكانوا منسجمين مع بعض ماحسوش بيهم نهائي لين تباعدوا عنهم..
واميمه واسامه رجعوا كملوا طريقهم مع بعض...
🍃🍃🍃🍃🍃
"هيا جنونتي السمحه هادي بس"
كلت جنه من امها كسرة خبزة فيها "تن"..
طوبى:هييه بنتي الحلوة كملت فطورها هي قولي الحمد لله..
جنه عاودت كلام امها بطريقتها العسليه..
صفاء وهي توكل في ولدها مهروس التفاح قالت بإبتسامه
/سلمها ياربي..
رفعت طوبى السفرة وهي تقول بإبتسامه..
/سلمك وسلم حمودي العسل..جنونه ماما هي نوضي نمشوا نغسلوا ايدينا..
ناضت جنه ومشت طلعت هي وامها من الدار..
وهما ماشييات بطريقهم للكوجينه نادتها نبيله..
/طوبى..
وقفت طوبى وجنه وقفت جنبها والزوز يشوفوا لنبيله اللي كانت لابسه بدله سودا ووشاح ازرق غامق وشاده في يدها شنطه ناحيتهم..
وصلت في طوبى وقالت..
/اني ماشيه للمحكمه توا خليتلك عمتي امانه عندك معليشي مرة مرة شوفيها شن تبي..
طوبى:كوني هانيه حبيبتي..
نبيله بإبتسامه باهته..
/ربي يحفظك..السلام عليكم..ولفت ومشت..
وطوبى معاها بعيونها وهي تقول..
/وعليكم السلام..
غيرت نظرها لجنه لقتها واقفه مزهريه كبيره تتلمس في الزخارف متاعها..
طوبى:شن ديري لبزتيها بزيت الطن..جنونه..
التفتت وقالت..
"اعم"..نعم..
طوبى:تعالي نغسلوا ايدينا..
جنه..
"به"
ومشت معاها للكوجينه..
🍃وفي الكوجينه اريج تغسل في الماعين ومطيرة توتي في الغدي...
خشت عليهم طوبى وهي تقول..
/نبيله مافيش منها رغم الظرف اللي هي فيه ماقدرتش ترخي بموكله عندها..
اريج بإبتسامه..
/قالت الجلسه اليوم مهمه والمراة عابيه عليا.
مطيرة؛قداش كبرت في عيني مراة عاقله ورزينه..
رفعت طوبى جنه ومشت بيها للحوض وهي تقول..
/ربي يصبر قلبها وقلوبنا ع اللي راح..
اريج ومطيره بحزن..
"الله يرحمه..الله يرحمه ويغفرله"..
🍃وغسلت طوبى لجنه ايديها وفمها..بعدين غسلت الماعين ولما كملتهم طلعت للمزهريه بش تنظفها..
وهي تنظف فيها شافت لميس ماشيه بإتجاه الحمام تبعتها بعيونها لين درقت من قدامها..
🍃ولميس ماكانتش ماشيه للحمام بل لدار النوم وصلت فيها ودقت الباب..
لحظات وفتحت غرفه الباب..
لميس برفعة حاجب..
/امي تبي تشوف مئاب هاتيها..
غرفه بدون ماترد بكلمه ردت الباب وخلت لميس تستناها لين طلعت وبنتها في حضنها..
مدت لميس ايديها وقالت..
/هاتي..
غرفه؛اني نرفعهالها..
لميس؛ماتبيش تشوف وجهك..
تنهدت غرفه وهي تقول..
/استغفر الله العظيم..مانقدرش نعطي بنتي لحد..
لميس:حني مش حد حبيبتي حني ماليها وبعدين افهمي امي مش طايقاتك تعرفي علاش!؟ لأن مبروك الله يرحمه اخر مرة جانا فيها شكي منك وقال مش مرتاح معاك..
"خير شن في"
قلبت لميس عيونها .
وغرفه قالت وهي تحاول تخفي ضيقها..
/مافي شي..
طوبى قدمتلهم وقالت لميس..
/الموت ليه هيبه حبيبتي والميت ليه قدره عندنا مانبوش نخلوا عزاه مهزله لو يعز عليك حق احترمي عزاه..
لميس برفعة حاجب..
/امي تبي تشوف مئاب وماتبيش تشوف هادي مش طايقتها..
شافت طوبى للميس من فوق لتحت بعدين ردت نظرها لغرفه وقالت..
/عطيهالي اني نرفعها..
لميس:وعلاش مانرفعهاش اني!؟
خدت طوبى البنت من امها وقالت..
/تعوذي من الشيطان حبيبتي وتعالي..
ومشت طوبى بمئاب ولميس بعد ماشافت لغرفه بكره لحقت طوبى..
مااهتزتش شعره وحده لغرفه من الكلام اللي قالاته لميس مش فارق معاها كان حق ولاكذب لاعاد يقدم ولايأخر..
مشت خشت دارها وسكرت عليها..
🍃واضطرت طوبى تقعمز معاهم وهما يلاعبوا في مئاب وتسمع تلقيح الدوة وضرب المعاني وهي بالعة موس وساكته زي مايقولوا..ادركت ان ناس زي هادي ماينفعش معاهم شي الا التجاهل...
🍃🍃🍃
وع قد ماحاول عمر يتجاهل مشاعره اللي تحركت بعد اللي شافه ماقدرش..
خلا خديجه خشت بأمها لحجرة الطبيبه ومشي طول يدور ع اميمه..ماكانش يبي يسببلها مشاكل كان يبي يزيد يشوف مايحفزه يطلعها من حياته بالمرة ومايقعدلهاش اي اثر...
🍃واستمر في البحث لين لقاهم مقعمزين في الكافتيريا جنب بعض..
اسامه شاد كتاب فاتحه بينه وبينها..
يبان يشرحلها في شي وأميمه مركزه معاه ونظرات عيونها ليه كانت حلوة ومعبرة..
حس بضيق في صدره خلاه يولي من وين ماجي وشبح الذكريات الحلوة يطوف حواليه..
صعب مراة زي اميمه تنتسى بالساهل..اللي يخسر مراة زي اميمه لازم تقعد حسرة في قلبه غالبا عمره كله..
🍃ومع ذلك لابد من التخطي ياعمر بش تقدر تكمل حياتك مازال الحياة مستمرة ولعل القادم من ايامها جايب معاه العوض الجميل🍃
🌼العوض الجميل..
العوض الجميل في شريك الحياة مش ديما يكون بصورة وحده..
احيانا الله سبحانه وتعالى يبعد الشريك اللي فيه بعض السيئات والعيوب بش يصلحه ويساعده يتغير للأفضل ويرده مرة تانيه ويكون هوالعوض الجميل..
زي ماصار مع المهدي وسدرة المنتهى وممكن حيصير نفس الشي مع غيرهم مستقبلا..
☘الساعه 5:00عصرا..
في حوش عبد الرؤوف...
تحديدا الصالون...
اللي كان لازم نساوين العيله ومعاهم ابله زينب واختها ايمان هادي تالت جيه ليهم وزوز نساوين من الجيران ونسرين..
ع يمين الصالون طوبى كانت مقعمزة بين زينب وايمان..
وع يساره سدرة مقعمزه بين نسرين واريج..
🍃اريج اللي كانت بسمعها وقلبها مع حديث خالتها ونسرين..
سدرة بحزن:قال المهدي لما خبرته قعد يبكي ويلوم في روحه..
نسرين بألم:غير شن ذنبه ياروحي بس امي الله يسامحها جنت عليه وعلى روحها..
تنهدت سدرة وقالت..
/ربي يسامحها ويسامحنا كلنا..
نزلوا دموع نسرين مسحتهم وهي تقول..
/ربي مايخلي شي الحاجه هادي ديما نغفلوا عليها ومانستاقظوش الا بعد يفوت الفوت..
سدرة بألم:صدقتي..الغلط يقعد غلط عند ربي مالاش تبرير يحاسب عليه مهما كانت النيه..
اريج قعدت تشوف لخالتها بإستغراب..
اما نسرين مادققتش هلبه في اللي قالاته سدره عقلها مع خوها تفكر لما بيروح غدوة ويشوف حالة امه شن يصير فيه!؟
🍃"اسلوبك حلو ويخش القلب ياريت تخشيلها تهدرزي عليها"
زينب؛مرات تبي تقعد بروحها الفترة هادي..
طوبى بقلق..
/خايفتها تخش في حالة نفسيه..
ايمان؛كلام طوبى مزبوط العزله بالشكل هدا لدرجة انها مش مدورة ولادها ممكن تسببلها مشكله نفسيه بعدين انتي الادرى بالحزن لما يستفرد بالبني آدم شن يدير فيه..
زينب هزت راسها وقالت..
/باهي ارفعيني ليها طوبى..
ناضت طوبى وهي تقول..
/هي تعالي..
ناضت زينب معاها ومشوا مع بعض طلعوا من الصالون والعيون معاهم..
نسرين غيرت نظرها عنهم بعد ماطلعوا ورداته لإيمان..
قربت لسدرة وقالت..
/مواليد كم البنيه هادي!؟
سدرة:85..86حاجه هكي..علاش تسألي!؟
نسرين؛الحق قداش ليها عاجبتني جميله وراكزة نفكر فيها لواحد من اصحاب ربيع قداش ليه يدور..
سدرة:باهي بري هدرزي عليها وجسي نبضها.
نسرين؛هدا اللي بيصير..
وتمشي نسرين لإيمان تقعمز جنبها..
اريج؛ايمان صعبه شويه ورافعه خشمها مش اي حد يعجبها هدا علاش قاعده لتوا..
سدرة:مرات نصيبها فيه..
ع جية فايزة قعمزت جنب سدرة وهي تشوف لنسرين قالت..
/شن عندها نانسي!؟
سدرة:تبي توفق راسين بالحلال..
فايزة؛لمني!؟
سدرة؛قالت صاحب ربيع...
🍃وتخش طوبى للصالون وهي رافعه جنه لحضنها قعمزت جنب اريج..
اريج وهي تشوف لجنة بإبتسامه قالت..
/ ناضت
طوبى:ماما ماما عنكشت فيها..
اريج؛نجيها ياربي..
شافت طوبى لإيمان ونسرين قالت..
/شن جاب نسرين لإيمان؟!
اريج:جايبتلها موضوع..
عقدت طوبى حواجبها بإستغراب ومازال عيونها عليهم..
🍃وفي جهة تانيه من الصالون..
ريسه؛خلاص هداكا هو يابنتي..
نبيله ودموعها في عيونها..
/كان مضايقين هني اركبوا للشقه اقعدوا فيها..
ريسه؛لالا يابنتي بالله ماتخليني ندوي مانبيش ندير مشاكل..
تنهدت نبيله وقالت..
/ع راحتكم..
لميس وامها ماعجبهمش رد نبيله كانوا يبوها دير مشكله وتفرض وجودهم ع الكل..
ونبيله كانت فاهمه هالشي كويس لهدا قطعت الطريق عليهم وماخلتهمش يوصلوا للي يبوه..
🍃اساسا هالحوش كان ملك عبد الرؤوف يعني هو حاليا لصغاره وامهم..ومش هدا بس اللي خلاه عبد الرؤوف لصغاره..🍃
"محلاته اللي في***** وارض في ****** وعنده حوازه في الخمس هو وحسين ولد عمك شروا حوازتين قراب ع بعض في نفس الفترة..وعنده في تركيا مبنى ثلاثه ادوار مأجره لشركه وياخد منهم بالدولار..واخر شي مشروع معرض سيارات هني في****** مشارك فيه واحد اسمه**** ** جايين بيفتحوه بدايه العام اللي فات لكن جت الحرب ووقفت كل شي"
مختار:معروف دماغه مليح ف التجارة وبعد2011 ولى عنده هالهيل والهيلمان..ع العموم اللي قلته كله نعرفه مافيش جديد..تقدر تمشي..
ويطلع الاقجم ويخلي مختار في خلوة مع عقله والمليسا..
🍃🍃🍃🍃🍃
"هيا دور اواب توا..اواب"
ضرب حسين الكورة لأواب واواب ردهاله برجله ماكانتش الضربه طويله بش توصل في حسين قدملها وضربها لمهاب وهو يقول..
/هيا مهاب..
وعيون صفيه تشوفلهم بإبتسامه وهي طالعه بكوب عصير ليمون لحسين..
قبل لتوصل فيهم قاللها مهاب..
"نينه نينه" وحدفلها الكورة..
هي ارتبكت لما شافاته حذفلها الكورة تلقائيا ضربتها بيدها التانيه جت ع راس حسين..
وتعالت اصوات الولاد بضحكاتهم الحلوة اللي خلت حسين يبتسم من قلبه وهو يشوفلهم..
جاته امه وقالت وهي شاده ضحكتها..
/سامحني ولدي خفت تبزع الطاسه..
هو خدي منها الطاسه وقال..
/هردتيلي بطني بالليم العصري..
صفيه:يعطيك فيتامين سي يقوي مناعتك الكورونا جايتنا في الطريق..
بدي يشرب من العصير بدون مايعلق وعيونه ع الولاد وهما يلعبوا بالكرة..
بدت ع وجه امه ملامح الضيق وهي تقول..
/ضروريه مشيتك غدوة؟
نزل الطاسه وقال..
/يام افهمي اني عسكري نظامي وهادي خدمتي وهدا وقتها..
نزلوا دموع صفيه وغيرت عيونها عنه..
هو بضيق قال..
/يام بالله عليك ماديريش هكي..ضمها وقال..انتي ادعيلي بس اني حافظني ربي بدعاك يام..
صفيه بنبرة باكيه: ربي يحفظك ويسلمك وليدي..
حسين وهو يشوف للتوأم..
/مانوصيكش ع الصغار يام راهو هادم ولوا امانه في رقبتي..
صفيه؛من غير ماتوصي من غير ماتوصي...
🍃🍃🍃🍃🍃
"هادم توا امانه في رقبتك لازم تكوني قويه بش تقويهم الصغار ياخدوا قوتهم وشعورهم بالأمان من الام اكثر شي.
صغارك توا بأمس الحاجه ليك ياغرفه ماتخليهمش يحسوا بغيابك حتى انتي"
غرفه كانت تسمع في كلامها ودموعها تنزل زي السيل تتفكر في علاقاتهم مع بوهم كيف كانت وفي فترة غيابه عنهم كانوا فاقدينه..
زينب:ارضي بقضاء الله وقدره واستعيني بيه لتجاوز هالابتلاء والزمي دعاء ام سلمه رضي الله اللي قاللها عليه الرسول صلى الله عليه وسلم لما لقاها تبكي حدا قبر راجلها..
"اللهم اجرني في مصيبتي واخلفني خيرا منها"
🍃ليلة هداكا اليوم رقدت غرفة ولادها في حضنها وسرير بنتها حداها..
كانت اول ليلة من بعد موت عبد الرؤوف ترقد فيها بعمق وراحه...
🍃🍃🍃
(قداش هالحرب دارت ارامل وايتام...
قداش عيله ولى مكانهم الشارع بعد ماتسوت حياشهم بالأرض...
وقداش كتيب عائله تسكر اصحابه راحوا ضحايا قذائف عشوائيه..
وشن يجي من ورا الحرب غير الموت وخراب الديار!؟
بس لتوا مش عارفه ايهم اشد وانكي الحرب هادي ولا الصراعات اللي عشناها قبلها!؟.
صراعاتنا مع الحياة وبين بعض..تنافسنا ع الدنيا ومافيها ومن فيها من حطام في عيونا يبان جنة..
النتيجه الوحيده اللي قدرت نوصلها ان صراعاتنا هادي هي اللي جابتلنا هالحروب وهالدمار والأوبئه..قاعدين نحصدوا في نتيجة افعالنا في بعض وياريت نتعظوا...)
وقفت كتابه وشافت لوجه بنتها الجميل وهي راقده..
ابتسمت بألم بعدين ردت نظرها للمذكرة وكملت كتابه..
(زعمة اتعظت مغليه من اللي صار فيها!!؟..ولايجي يوم وتتعظ بنتها خرابة الحياش من قبل ماتعمر اصلا؟!..الله اعلم..
لكن الباين ان عمة عبد الرؤوف الله يرحمه وبناتها لاهم من النوع اللي يتعظ ولايحس من اصله..بجديات غرفه كانت تستاهل يعطوها وسام اللي قدرت تتحملهم عشرة ايام ع بعض..الله يرحمك ويسامحك ياعبد الرؤوف وخلاص)..
🍃🍃🍃🍃🍃
تاني يوم...
7مارس..سنة 2020..
في وقت الانصراف من المدرسه..
كانوا مناسك ومروة متوجهات مع بعض لبوابة المدرسه وهما يحكوا ويتحاكوا..
☘مناسك بإبتسامه؛بجديات ماتوقعتاش يطلع راجل هكي..
مروة بضحكه:حسني اسلوبك يابلوة.
مناسك بضحكه..
/المهم فهمتي قصدي.. تصدقي فرحانه فرحانه هلبه..
مروة بإبتسامه:ربي يكمل ع خير..
مناسك ؛لكن تعرفي عمري ماتوقعت ننخطب واني قاعده نقرا في المدرسه..
مروة:اختي صفاء كانت مخطوبه وهي تقرا ف المدرسه وتزوجت وهي تقرا في المدرسه..
مناسك؛الحمد لله الزواج بعد مانطلع من الثانوي..
مروة:وهو وقتها يكون في السنه الاخيره ولا!؟
مناسك؛لامازاله سنه..
مروة؛حي عليك بيمد وجهه معاك في الجامعه..
وصلوا في الباب وهما يدوروا بعيونهم في الطريق ومناسك تقول..
/بالعكس والله احلى حاجه راجلي يقرا معاي في الجامعه..
ضحكت مروة وهي تحرك في راسها يمين ويسار..
لكن في لحظه ثبت وضحكتها اختفت لما جو عيونها ع صاحب السيارة السودا..
طول هربت بعيونها عنه ووجهها احمر خجلا..
مناسك؛البدي قارد جي ياحنه..
مروة بشي من التوتر..
/تعالي نخشوا لما يجي الباص يقولونا البنات..
وخدتها من يدها وخشوا داخل..
ابتسم معين ابتسامه خفيفه وغيرنظره للطريق شاف باصهم جاي رد نظره الباب وقعد يراجي لين شافهم طالعات يجروا وركبوا في الباص طول..
ويتحرك الباص وهو وراه طول...
🍃لكن ماكانش معين بس الحارس الامين ع باب مروة..
حتى محمد المهدي كان حارس امين لكن مش ع باب مروة...ايوه..ع باب بنت عمته راما...
ليه فترة لابأس بيها وقت مرواحها يدرس بسيارة عمه عمر قدام مدرستها ويراجيها لين تطلع لباصها ويلحقه..
الا فهاليوم الباصات ماجوش..لاباص اخته ولاباص راما..
🍃محمد؛بري قوليلها تجي تركب..
سدرة بعدم رضا:حاضر..
ومشت وتاله معاها وهي تمتم لين وصلوا في راما..
سدرة برفعة حاجب..
/قالك محمد تعالي روحي معانا..
راما:لالا قريب تجيني عمتي..
سدرة؛احسن..هيا تاله..
عطتها تاله حاده ومشت مع سدرة..
تنهدت راما بملل وغيرت نظرها للطريق...
محمد لما شافهم جايات برواحهم..فتح الباب ونزل ومشي بإتجاهها..
سدرة بصدمه:خيره هدا!؟
تاله؛شكله خوك ولى يحبها بالحقه!؟
سدرة:يحب عينه هدا اللي ناقص..
جاهم وقال..
/تحركوا للسيارة..وكمل طريقه لراما..
سدرة بعصبيه مشت للسيارة وتاله لحقتها..
☘وصل محمد في راما وقال..
/اني لما نقول تعالي معناها تجي...
راما بإرتباك؛عمتي بتجي..
محمد؛كلميها وقوليلها مش لازم تجي ولد خالي بيروح بيا..
راما؛لويشوفني عمي اشرف يقتلني..
محمد؛مادخلكش بيه اشرف بيني وبينه كلميها هيا ماعنديش وقت..
هي بتوتر واحراج قالت..
/حاضر...
🍃واتصلت راما بعمتها وعطتها علم وعواطف ماكانش عندها مشكله..
وناضت راما ومشت مع ولد خالها للسياره وركبت من الخلف..
ركب محمد وقال لسدرة..
/اركبي لتالي بنخطم ع يزن توا..
سدرة نزلت وهي معصبه ومع هدا حرصت تسكر باب السيارة بهدوء خوفا منه وركبت من الخلف جنب صاحبتها..
الزوز كانت باديه ع وجوههم ملامح الازدراء لأن راما مقعمزة جنبهم..وهي اخر همها..فتحت شنطتها وطلعت منه كتاب دراسي ولهت روحها بيه..
🍃ويتحرك محمد بإتجاه مدرسة يزن لقاه ماشي مع صاحبه ع رجليه..دارله صوت المنبه شافه ودع صاحبه ومشي ركب..لما شاف راما في السيارة وجهه انقلب..
تحرك محمد وهو يقول..
/معاش نشوف فيك مع الاشتر..
يزن؛ بدي يخش في جو مش ليه فته بكل..
محمد:خسارة والله..
يزن:طلع خفيف فيسع مايطيح..
سمع صوت تقرميشه التفت لقي سدرة وتاله ياكلوا في البطاطا..
يزن؛اعزموا حتى بالكذب..
خدت تاله طرف وقالت..
/هاك..
يزن:لاعلاش هدا كله شن خليتوا..
تاله:بتاخدها ولاناكلها..
خداها وقال..
/خير من بلاش..
والتفت القدام اتكى براسه ع الكرسي وكلي الطرف في مرة وحده..
تاله كانت تاكل وتشوفله بإبتسامه..
سدره:محمحم..
قلبت تاله عيونها وهي شاده ابتسامتها وقعدت تاكل..
وسدرة تشوفلها وهي شاده ضحكتها..
محمد؛العشيه يطلع عمي نضال..
راما:حمد لله ع سلامته..
محمد:مش جايه تشوفيه!؟
يزن وتاله وسدرة شافوله بإستغراب..
راما:نحاول..
محمد؛لاتعالي شوفيه وشوفي امك..حتى كان مادورش فيك دوريها مهما دير تقعد امك..
راما بضيق وهي تشوف للكتاب..
/حاضر..
يزن قعد يشوف لمحمد بغضب ومحمد كان حاس بنظراته لكن تجاهلها..
سدرة من الغضب معاش كلت وغيرت وجهها للروشن وتاله تشوفلها بأسف..
🍃🍃🍃🍃🍃
بعد العصر..
خديجه بتهكم..
/باهي اللي تفكرتي ان عندك ام ياللا..
راما بضيق..
/انتي نستينا..
بعصبيه قالت..
/اني امك مش انتي امي..انتي اللي مفروض تتصلي ودوري مش اني لكن شن بنقول غير البنت لعمتها لو جابت من كعبتها..
راما فضلت السكوت وكانت مضايقه لأبعد حد..
خديجه:شن حال خوتك؟
راما:تيم حاله باهي عمتي عواطف حطاته في عيونها لكن محمد مع بابا مانندريش عليه..
خديجه بحقد؛وبيه إن شاء الله..والعزوز الشمطاء ونساوين عمامك الحلوفات مايقرموش فيا!؟
راما؛اكثر الوقت شاده داري مانقعمز مع حد..
قالتلها:باهي هديكا اللي اسمها ابتسام ماتشوفيش فيها!؟
راما؛ماتطلعش من شقتها بكل الصغار بس يجوا..
خديجه برفعة حاجب:اممم..وسميره معاش تتصل وولادها معاش جو؟
راما:الولاد يجوا خميس جمعه وخالتي سميره قريب كل يوم تتصل بحناي..
خديجه؛تبي تحافظ ع مكانتها مالا شنو..
راما:مكانة شني يام!؟عمي مات خلاص..
خديجه:هدا خبث اناثي مازال ماتعرفيشي..
🍃هالحديث كان يدور في دار مغليه اللي كانت متمدده ع سريرها وتسمع فيهم..
☘وفي هالوقت..
خش نضال للحوش وهو يمشي ع مهل وبوه وخوته وولاد خوته معاه..
اغلبهم كانوا يشوفوا ليده بنظرات الم مع هدا حاولوا مايخلوشي يحس بيهم..
محمد المهدي..
/كان مظلم من غيرك..
يزن:توه مانور البيت يابعد طوايف اهلي..
الجالي بضحكه..
/خليتوا الواحد خاطره يدير حادث بش تستقبلوه هكي..
نضال:تعوذ من الشيطان معاش تعاودها الدوة هادي..
عمر بضحكه:الجالي يحسدك ع دم وجهك..
ضربه الجالي ع قفاه واللي حواليهم يضحكوا..
المهدي:خلوه يمشي براحته ..
نضال:تي خليني عايش اللحظه بين الحشود..
ع طلعة سميره من جناحها جاته وهي بطير من الفرحه وقالت..
/لولا العيب راني زغرطت..
نضال بضحكه..
/اعتبريني سمعتها..
وصلت فيه سلمت عليه باليد وقالت .
/حمد لله ع سلامتك وليدي..
كلهم كانوا يشوفلهم بنظرات ود ماعدا الجالي ماكانش طايق شبح وجه سميرة..
نضال:الله يسلمك..
"نضوله"
سميره في نفسها..
"عطك تالوله"
وتجيه خديجه تجري دفت سميرة وضمت خوها..
بوها شاف للموقف بصدمه والمهدي وعمر يشوفوله..
ماعدا الجالي اللي كان يشوف لسميرة بنظرات مكر..
وسميرة اكتفت بإبتسامه متهكمه وهي تحرك في راسها يمين ويسار..
خديجه ببكي..
/وخيي الغالي حمد لله ع سلامتك ياحبيبي..
بوها بعدها عنه وهو يقول..
/بالشويه وجعتيه..
نضال ودموعه في عيونه..
/نبي نشوف امي..
خديجه بدموع:تعالى معاي حبيبي تعالى..
مشي معاها وهي تقول..
/ياناري ع ايديتك..ربي يشفيها وخيي ربي يشفيها..
خبط محمد شنبيه كفوفه في بعض وهو يقول..
/مافيش فايده..
المهدي:هادي خديجه..
الجالي:خيرها شن دارت !؟حرام يوجعها خوها!؟
شاف المهدي للجالي وقال..
/واجعنا كلنا لكن الوجع هدا لازم يقعد مدسوس في القلب نحكوا عنه بينات بعض مش قدامه هو..
عمر:عنده الحق ياجالي..
الجالي تهكما:غير شن قلنا ياودي..ياكلمتي وليلي..
ولف ومشي بيطلع من الحوش ونظراتهم لحقانه لين فتح الباب وطلع..
محمد شنيبه بأسف..
/لاحول ولاقوة الابالله..
🍃🍃
في دار مغليه..
فتحت خديجه الباب وهي تقول..
/خش وخيي..
خش نضال وهو متألم..
شاف كرسي متحرك قريب ع سرير امه بعدين شافها هي..
انصدم في منظر وجهها قلبه تفتت..
كانت تشوفله بحسرة ودموعها ينزلوا..
نسي نفسه ومشالها بسرعه..
وصل فيها نزل عليها وقعد يبوس في راسها وهو يقول..
/سامحيني يام سامحيني..
هي مكانتش قادرة تتكلم..رفعت يدها وحطتها ع يده المصابه..غمضت عيونها بشده وهي تبكي..
نزل باس عيونها وهو يقول..
/تو يولي حالها باهي يام وحتى انتي بإذن الله تو تولي خيرمن قبل...وقعد يغنيلها..والله مانك خير من امي لو دمك يجري في دمي .
يدوب قدرت تضحك..
وهو نزل باس ع راسها وضمها بيد وحده وقال..
/ربي مايحرمني منك..
راما شافت لأمها اللي كانت تبكي حاولت تقربلها وضمها لكن في شي منعها..ممكن الحاجز اللي بناته خديجه بينها وبينهم لما فرطت فيهم بالساهل..المهم ان قلب راما ناحية امها بدي يقسى...
🍃🍃🍃🍃🍃
"نبي نصرفه كله"
طوبى بإستغراب..
/علاش!؟
تنهدت غرفه وقالت..
/امس تفكرت سدرة بعد موت الفاندي شن دارتله..طلعت عنه صدقات وياما دارت من اعمال خيريه بنيته واني نبي ندير زيها..
طوبى بإبتسامه...
/خلاص تو نكلم خالي يشوف الموضوع..
غرفه:باهي انتي في رايك شن لازم ندير..
طوبى:اكثر من حاجه لما تصريفهم ونشوفوا قداش بجيبوا نقولك..
غرفه:خلاص الليله نكلمه عنهم ونخليه غدوة ان شاء الله يصرفهم..
طوبى وهي مبتسمه قالت..
/بإذن الله..
🌼 "الحمدُ للهِ حمداً كثيراً
ما انطفأتْ همةٌ إلا وأحياها
وما انكسر خاطرٌ إلا وجبره
وما وهن عزمٌ إلا وقوّاه
وما ضلّ قلبٌ إلا بصّره" 🌼
#نضال2
#طوبى
....يتبع....
