#طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦ 🌿🌿🌿🌿🌿🌿🌿🌿🌿🌿🌿🌿🌿🌿
🍃انا لا اغآر
انا فقط لا اتحمل قرب احداً منكٰ🍃
________________________________________
"حرقلي دمي حرقه حتى العشي مابيتش نديره"
مطيره؛عليك مهبوله ماديريش الحركات هادي يامهبوله تكرهي الراجل فيك..معقوله تبيه يخلي عمته وبنتها في الشارع..!
غرفه بنرفزة؛عندهم وين يقعدوا ياعمتي عندهم وين يقعدوا لكن هادي عمته مايتحملها حد..
فردوس:انتي ماتبيش بنتها..
غرفه؛لاهي ولابنتها..
طوبى كانت توكل في الصغار الموز وتسمع فيهم وهي تضحك بصمت ع غرفه بعدين قالت..
/باهي عبدالرؤوف توا وين مشي؟
غرفه بعصبيه :وين نندري علي دعوته حطني وانتلف..
مطيره:واااك منك..
فردوس بفزع؛معاش تقولي هكي..الدنيا خايضه ماتندريش شن يصير..
طوبى؛ماتكدريش الراجل اكثر ماهو متكدر ع خاطركم انتم شد روحه وماخشش الحرب وانتي اللي تعرفي راجلك كويس ياغرفه..
سكتت وهي مضايقه ع الآخر..بعدين ناضت وهي تقول..
/ردوا بالكم ع الصغار..
ومشت طلعت من حداهم..
مطيره؛ربي يهديها هالمراة..
فردوس؛غارت عليه من بنت عمته وبيني بينكم عندها الحق الفرخه تكسر الرقبه وماتتحشمش..
مطيره:مالا عبد الرؤوف بيشبحلها ولايعبرها! كانهدا خداها هي..
طوبى:اللي هو..تكبر عقلها وتوسع بالها راجلها راجل كويس مايصير شي لو سايرت ع خاطره شويه..هي كول اوبا حبيبي..اممم..
🍃🍃🍃🍃🍃
وعبد الرؤوف اللي يحكوا عنه لامشي هني لاغادي..حطها في حوش اهلها ومشي للتارقي اللي لقي عنده ربيع وسامي..
🍃ربيع:طلعوا ع حوش خوي..
عبد القيوم؛باهي الحمد لله ع سلامتهم..
سامي؛الخله اكثر منطقه فيها دق..دق مش طبيعي..
عبدالقيوم؛راهي حرب ياقاتل يامقتول..وفي النهايه مافي حد يطلع من حرب كيف هذي رابح..
ربيع مسح ع ركبته وقال:صدقت الكل خاسرين..
سامي بأسف:الخاسر الحقاني هما الناس اللي نزحت وتشردت..والله نعرف ناس بايتين في الشوارع ماعندهم وين مايمشوا..
ربيع:مش غير هكي وبس..واحد صاحبي خوه عريس جديد مافاتش اسبوع..قعد خاطب قريب 3سنوات بش يكمل بني..كمل بني واثث الحوش كله من بابه لمحرابه..ماقعدش فيه يومين بعد تزوج..اليوم سمع بيه ولى ركام..
باصوات متقطعه اطلقوا تعابير الاستياء والاسف..
وربيع مكمل يقول.
/مسكين قريب تبلغم..
عبد الرؤوف بشي من الغضب..
/استغفر الله العظيم..استغفر الله..والله الواحد ماعارف شن يطلع من فمه..
عبد القيوم:ماهي ديما جايه ع روس الناس اللي لاليها ناقه ولاجمل..
سامي بضيق:هدا وليها سته ايام هكي دارت مالا كان طولت اكثر من هكي شن يصير..
عبد القيوم بتجهم:كان طولت ساعتها الموت مش حيتم عند اللي في الجبهة بس..
ويجي اتصال لعبد الرؤوف..
خدي تليفونه من جنبه وهو مضايق شاف المتصل فصل الخط...
🍃🍃
غرفه نزلت التليفون وقالت بعصبيه..
/الحق مش فيك..
ومشت طلعت من دار المعيشه بإتجاه الصاله..
☘☘☘
خشت عليهم وقعمزت في مكانها وهي ساكته وباديه ع وجهها العصبيه..
طوبى:حصلتيه؟
غرفه؛مايردش..اكيد توا ياعند حد من صحابه يافي حوش خالي..
سكتوا شويه بعدين فردوس قالت..
/مايقول في شي عن اسكندر؟
غرفه:كلمه قدامي امس الباين انه مش في وسط القتال..
طوبى:هو في الأصل آمر في الغالب يكونوا بعاد عن ساحة القتال..
فردوس تنهدت وقالت.
/ربي يستر وخلاص..
غرفه:وينها اريج؟
طوبى:راقده في الدار..
غرفه؛مع حوا وصغارها؟
طوبى:ايه..
مطيره:قداش يقطعوا القلب..مش عارفه الناس كيف ولوا! معقوله بوهم حي يرزق مايدورهمش بكل!! لاعمام لاعمات يسألوا عليهم!!..
طوبى وعيونها تراقب في الصغار كيف يلعبوا قالت..
/الوقت هدا معاش تستغربي فيه شي ياعمتي..
🍃🍃🍃🍃🍃
"قالتلي واني هزيت علي كلامها معقوله في ناس هكي عقلهم"
فايزة بحزن:واحرف من هكي يابنتي..واضحه عقلية اهلها من لما عطوها لراجل عنده سبعة صغار..
مروة ودموعها في عيونها قالت بغضب وصدمه..
/عليك جهل..اني ياماما اللي مش قادره نصدقه كيف خالتي فوزيه خلتهم نحسابها تحبهم وماتقدرش تعيش من غيرهم!
فايزة؛مرات ياماما خافت تخسر ماليها..وكان خسرتهم بعدين تقعد بروحها سيورهم مالك ومناسك بيشوفوا حياتهم..
مروة:معناها بعدين تتزوج راجل تاني عادي!
فايزة؛لو فرضوا عليها ياماما ماعندها مادير..
مروة:معقوله خالتي فوزيه شخصيتها ضعيفه هكي!..
فايزة بحزن:المراة مغلوبه ع امرها يابنتي..
مروة بألم؛ياروحي ع مناسك واجعني قلبي عليها هلبه..
فايزة؛سلامة قلبك حبيبتي..وهي ان شاء الله يفرج عليها...
🍃🍃🍃🍃🍃
"كرهتها يامالك كرهتها اكتر ماكرهت امي"
مالك:ماتظلميهاش..
مناسك بدموع؛كيف مانظلمهاش دارت زيها يامالك!
مالك؛لالا مش زيها..عمرك ماتساوي امي فوزيه بهديكا المراة..هديكا سيبتنا لأنها ماقدرتش تعيش حياة مش مرفهه سيبننا وراها سبعه وانتي وقتها كنتي بيبي ع خاطر نفسها بس..لكن امي فوزيه سيبتنا من الخوف..خافت ماليها يقطعوها وتقعد بروحها..شوفي خوتك وخواتك لما شافوا حياتهم معاش يجوا هني كان يوم واحد في الاسبوع..وحني نفس الشي كان لهينا بحياتنا هي تقعد بروحها بعدين..صعب عليها يامناسك صعب هلبه..
اقتنعت مناسك بكلام مالك بعد مافكرت فيه لكن يقعد من الصعب تتقبل حياة فوزيه مش فيها..فوزيه اللي كانتلها اكثر من امها كيف بتكمل حياتها من دونها!؟
مناسك بألم؛مش عارفه يامالك..لكن اني..اني وياك قعدنا بروحنا..لابو لاأم..كيف بنديروا قولي!؟
مالك فتح يده وقال..
/تعالي..
خشت في حضنه وهو حاوطها بذراعه وقال..
/اني وياك نولوا بو وام بعض شن رايك..
مناسك؛انت ماتتحملش تسمع مني كلمتين..
مالك؛نتعودوا ع النفخ الله غالب..
ضحكت من وسط الوجع اللي كانت تحس بيه..
وهو ابتسم بألم بعدين قال..
/حتى انتي لازم تعودي روحك ع طلباتي ونظامي اللي ماشي بيه..
مناسك:نتعودوا ع دراه الكبد الله غالب..
ريشها من شعرها..ضحكت..
🍃ووين ماكانوا مقعمزين ع الدروج اللي في مدخل الحوش..
كان خوهم مازن واقف في روشن الصاله يشوفلهم بنظرات حزن وقلبه مقسوم من وجعه ع حالهم...
🍃🍃🍃🍃🍃
فتحت عيونها شويه شويه..مررت نظرها حواليها..
بدت توعى..وتفكرت هي وين توا..تلقائيا ابتسمت..
غيرت نظرها لأمها واختها..
لقت اختها غارقه في النوم..وامها مقعمزة وهي لابسه المصليه وسرحانه..
سلافه بصوت ناعس..
/ماما..
استاقظت وشافتلها..
سلافه:عرفتي مكان القبله!؟
شاديه:بهدا التطبيق ع التليفون وان شاءالله تكون صح..
ناضت قعمزت وهي تقول..
/رح شفلك ياها بتليفوني بعدين..مااتصل بابا؟
شاديه:اتصل وطمنتوا قال يمكن بهالكم اليوم يجي..
سلافه:ماقال شي ع جيتنا لهون؟
شاديه:اكيد حكا..وقال انه ارتاح اللي الله حط بطريقنا المهندس..عمك وولادوا طلعوا برات طرابلس بالمرة..
سلافه بصدمه..
/ليش!؟
شاديه؛بيت عمك نزلت فيه قذيفه خلتن يهربوا من البيت حافيين ومااخدوا معهن شي..
سلافه:ياالله! وشو عملوا بعدين كيف طلعوا!!؟
شاديه:في حدا من الجيران ساعد ولاد عمك يفوتوا ع البيت اخدوا المهم وطلعوا برات العاصمه..
سلافه قعدت ساكته وهي تفكر في اللي صار لأهلها وقلبها موجوع..نفس المأساة تكررت..خسروا حياشهم..واستقرارهم..وامانهم في بلادهم..وبعد لقوهم في ليبيا رجعوا خسروهم من جديد..
شاديه بنبرة ألم..
/رائف المسكين تعب سنه من عمره راح بلحظه..
غمضت سلافه عيونها بشده من الألم..
شاديه مسح دموعها ورشفت وهي تشوف..
/اللهم لااعتراض..بس والله تعبنا وتبهدلنا كثير بدنا نرتاح ياربي دخيلك..
وحطت يدها ع عيونها وبدت تبكي..
ناضت سلافه ومشت قعمزت جنبها وضمتها وهي تبوس في راسها...
🍃وهادي الحرب..وهادم ضحايا الصراعات ع كرسي السلطه..اللي مافيها خاسر غيرهم🍃
🍃🍃🍃🍃🍃
وطيبت طوبى القهوة بعد رقدوا الصغار..
وقعمزوا شربوها مع بعض وهالمرة "حواء" معاهم..
☘حواء:قسما بالله من اول مابدي الضرب لليوم مارقدش ممكن كان 4ساعات..وين نغفل شويه طيح حاجه تفجعني..ولاالصغار ياروحي يرعشوا زي الجريدة يقعدوا مكبشين فيا ويقولوا ياماما مانبوش نموتوا..
يسمعوا فيها وع وجوههم باديه ملامح الاسف والحزن..
حواء ودموعها في عيونها..
/والله وصلت بيا استسلمت خلاص قلت هدا ماكاتب ربي نتبهدل اني وياهم ونموتوا جميع...
نزلوا دموع طوبى وهي تمسح فيهم..
حواء رشفت وقالت..
/وين عرفت بحكايه الهدنه لقيت روحي نتصل بيك ماخطرش ع بالي غيرك وانتي الله يربحك ماقصرتي..والله قعدت نقول في بالي واني جايه هني دعوة محصلتها شورني ربي يوقف في طريقي ولاد الحلال..
ابتسموا وهما يشوفوا لطوبى..
طوبى ابتسمت من بين دموعها وقالت..
/الناس بالناس والناس بالله...
مطيره؛ايه والله..مالينا غير بعض بالذات في وضع زي هالوضع..
غرفه:خطرتوا عليا..بكري رؤوف مشي مع التارقي يطلعوا عيله سوريه من *****..
طوبى تسمع فيها بإبنتباه..
فردوس:سوريه!؟.
غرفه بغيظ؛ايه..روحلي دايخ وهو يوصف في جمالهم صحيح الوجه..
ضحكوا..ماعدا طوبى اللي حست بضيق مفاجئ..
غرفه:المهم...قال التارقي عطاهم الشقه متاعه وولى لشقة المهدي شنيبه..
مطيره:سوريين! زعمه عيلة البنت نفسها!؟
غرفه؛هكي فهمت من رؤوف قال واضح في شي وهو مايبيش يطلعه هدا علاش نكر لما جدي حكاله علي قصة الخطوبه..
فردوس:وعلاش بيدرق!؟
غرفه؛مش عارفه الحق..لكن وين تجي تفكري فيها تحسيها هكي حق..عاد لدرجة يعطيهم شقته!
مطيره:صح..في النهايه هادي حياته وهو حر فيها مادخلناش فيه..
☘وكملوا هدرزتهم..وطوبى معاش قدرت تنسجم معاها..كانت حاسه روحها مضايقه هلبه..وحاولت تتجاهل هالإحساس ع قد ماتقدر...
🍃🍃🍃🍃🍃
وهما نزلوا للجنان..
قعمزوا ع كراسي نايلو..ومقابلهم التارقي يدير في خبزة فرن..
ريحتها كانت طالعه برا..ووصلت لأنف المهدي اللي كان كيف واصل لحوش اهله..
ريحتها رداته لأيام..الذكريات متاعها نوضت عليه المواجع..
نزل من سيارته ومشي لحوشه..
وقف في الباب اللي كان مفتوح..دق عليه ونادى بصوت عالي.
"تارقي"
"تعال يامهدي تعال"
خش المهدي..وشافهم من بعيد وهما مقعمزين ع الكراسي..
لما قرب منهم..بان عليه التارقي وهو يرمي في الفرن ابتسم وقال..
/يعطيك الصحه..
عبد القيوم؛الله يسلمك..
غير نظره ليهم وقال..
/كيف الحال..
ردوا عليه بأصوات متقطعه..
"الحمد لله"..
سامي وهو يأشر بسبابته؛هونا الكرسي..
شافه المهدي..جبده وقعمز قريب ع ربيع..
ربيع:وينك لتوا؟
المهدي:كنت في العمارة اللي ف******..والله ياراجل مآسي قسما بالله..
سامي؛ليكم العمارة؟
المهدي حك لحيته وقال..
/ايه..الوالد فتحها للنازحين..فيه لتوا اربعه عائلات والله وين تشوف حالهم..يقهروك..مش قصة انهم سيبوا حياشهم وتشردوا بس..الكسره اللي في عيونهم ..الفجعه اللي في وجوه صغارهم..والله شي ماريته ولافات عليا قبل..
عبد الرؤوف:قبل في حرب المطار ياما شفنا من هالحالات..
المهدي:صح..بس الحرب هادي مازال اعنف واقوى..
سامي بضيق؛صح..
عبد الرؤوف:اللي يوجع اكثر الناس اللي في وضع هدا ماتحركش ضميرهم..اليوم نسيبتي بعتتني نجيب مراة تعرفها..المراة هادي راجلها مطلقها وناسي صغاره بكل..ليهم قريب سته ايام تحت القصف ولادورهم ولاسأل عليهم لدرجة المراة تكلم نسيبتي تستنجد بيها..
عبد القيوم وهو يسمع فيه تفكر اللحظه اللي شاف فيها طوبى..حرارة الفرن اللي واقف عليه..ماتساوي شويه قدام الحراره اللي حس بيها من النار الوالعه ع يسار صدره..
المهدي؛لاحول ولاقوة الا بالله..وينهم توا؟
عبد الرؤوف؛في حوش نسيبتي الصغيره تبيهم يقعدوا عندها فتره لين يتفرش الدور الاول في حوش اختها..
سامي وربيع شافوا لعبد القيوم..
والمهدي قال؛كان تبوا اي مساعده بالله تكلمني..
عبد الرؤوف:لامقدور عليه بعون الله..
غير عبد القيوم نظره للفرن..قعد يتأمل في النار اللي طيب في الخبزة..وكأنه يشوف في نار عشقه اللي طيبت قلبه وذوباته...
قاعده تكبر في داخله..مع كل شي حلو ديره...كل خير تعطي فيه من قلبها بلامقابل... اصلا هي انزرعت في قلبه من اول لحظه شافها فيها تعطي بكل حب...
خدي نفس..بعدين طبس ع الخبزه شافها لقاها طايبه..
وخر وخدي موس "سكين" من جنبه وبدي يخلص فيها..
وهما حواليه مازال قاعدين يحكوا عن الحرب ومآسيها..
🍃🍃🍃🍃🍃
وزي ماقال عبد الرؤوف في ناس حتى الحرب ماقدرتش تصحي ضميرهم..ولاتغير في طباعهم السيئة حتى شويه..
🍃مغليه:كلهم هني!؟
خديجه؛فرج وكريم بقجقجهم كله لوطا واكيد نجاح بتلحقهم..
مغليه؛قاعده مسكره راسها ماتبيش تطلع الا مع شيابينها..
خديجه؛قاعده مسكره راسها ماتطلع الا لما هما يطلعوا..
مغليه بحسرة؛اهي الكنه المقومه..
خديجه؛سعد الناس يام..
مغليه؛باهي وسلفك عبد الفتاح حتى هو مسكر راسه مايبيش يطلع..
خديجه؛هداكا قال نموت ولانطلع من حوشي وسميرة وولاده مابوش يخلوه..
مغليه؛وضرتها!؟
خديجه؛هديكا من اول رصاصه رفعوها خوتها...
مغليه:هديكا ماعليها كان في روحها..
خديجه ابتسمت بتهكم بعدين رفعت فنجان القهوة ورشفت منه...
🍃وفي حوش اهل راجلها...
كانت نجمه عايشه في حالة قلق دائم ع ولدها وبنتها اللي ساكنين في مناطق الاشتباك..
نجمه بقلق:علاش العناد علاش تسكير الراس!؟بيودر مرته وصغاره في جرة عناده
الصيد بضيق؛شن بديريله ولدك هدا ديما هكي ع العناد يموت
اشرف:مش قصة عناد يابوي هو مايبيش يخلي حوشه ليهم يسرحوا ويمرحوا فيه..
عواطف:ريتهم الصور اللي ينزلوا فيهم وهما في حياش الناس وجعوني صحابهم شن يحسوا وهما يتفرجوا عليهم..
نجمه بشي من الانفعال..
/في المال ولافي الارواح كله سيوره يتعوض لكن روح البنادم كان راحت شن يردها!..
سكتهم كلام امهم اللي زاد خوفهم ع خوتهم..اما راجلها قال باستسلام..
/إنا لله وإنا إليه راجعون...
🍃🍃🍃🍃🍃
"ياروحي عليهم"
مروة بحزن:مش قادره نفكر في شي غير مناسك خايفه يصيرلها شي ولادير في روحها حاجه..
طوبى بغضب وألم..
/هالمجتمع الاغبر حتى شرع ربي مش عاجبهم!!
مروة بضيق:كل شي ع المراة..المراة لازم تتحمل كل شي..لازم تعيش حياتها زي ماهما يبوا بش يخلوها في حالها حكمهم هما لازم يكون فوق حكم حتى ربي استغفر الله..
طوبى وهي تشوفلها بإبتسامه اسف
/كلامك اكبر منك هلبه يامروة..
مروة:مش مني من اللي شفته واللي مريت بيه كله اكبر مني ياطوبى..
سكتت طوبى وهي تفكر في كلامها بأسف..جيلهم والاجيال اللي بعدهم ظروف الوقت كبرتهم قبل وقتهم...
🍃وبعيد عن الكوجينه..
في الصاله..كانت فايزه تحكي عن اللي صار مع فوزيه...
كلهم تأسفوا لحالها..وفي منهم شاف ان هدا الأفضل ليها..
☘حواء؛والله هكي خيرلها حتى كان انذلت تنذل لأهلها خير مايذلها البراني..
فايزة:اني فكرت حتى في طليقه راجلها الله يرحمه اكيد بتحاربها بالصغار..
مطيره؛ديرها..توا الراجل مات مافيش من يديرلها حد..
فردوس ببغض:اعوذ بالله منهم الامهات اللي هكي..
🍃🍃🍃
وفي جنان الحوش..
كانت اريج مقعمزة مع الصغار..
فاتحتلهم اللاب توب متاعها ع رسوم متحركه..
وعاطيه الولد الكبير تليفونها يلعب بيه..
وحداهم كيسه معبيه غلافات شكولاته..وكياس شيبس كانوا يتسلوا بيهم..
كانت تتأمل فيهم كيف انسجموا مع الاجواء الحلوة المتهيئه ليهم ولاكأنهم كانوا عايشين في رعب وخوف شديد من الموت المتربص بيهم قبل ساعات..
تمنت لوكانت قاعده في عمرهم تقدر في لحظه تنسى همومها...
غيرت نظرها عنهم للفراغ وعقلها راح لراجلها..تفكر في حاله في كل وقت..وتتمنى من الله يدخله عليها في أي لحظه..
وقتها حتما مش حتخليه يرجع لو شن يصير...
🍃🍃🍃🍃🍃
ويروح نضال للحوش بعد مامر ع القهوة..
اول ماخش توجه طول للصاله لقي بوه وسميره فيها يتفرجوا ع الأخبار..
اطلق السلام وهما ردوا عليه..
قعد واقف يتفرج ويقرا في الشريط بعيونه...
غير نظره عمه لما سمع بوه قال..
/البضاعه سدتهم كلهم؟
نضال:ايه الحمد لله..لكن في واحد كلمني قال يبي يخدم اي شي..نقول يجيك للمحل!؟
محمد؛كلم عليه المهدي ليه فتره يدور في عامل..
نضال؛تكلم قدامنا اني والمهدي ماقاله شي..
هز راسه وقال:خلاص قوله يجيني..
سميرة؛ربي يكتب اجركم ويبارك في رزقكم..نحطلكم العشي؟
نضال:اني جعان..
محمد؛تعشوا صغار الطاهر؟
سميره:ايه عشيتهم ورقدت معاذ وحمزة وجوري يتفرجوا ع التلفزيون..
ابتسم نضال وهو يشوفلها..
محمد؛خلاص حطيلنا عشانا وابعتي لعيلة المهدي..
ناضت وهي تقول بإبتسامه..
/حتى يتعشوا فيه..ومشت طلعت من حداهم وخلتهم مبتسمين..
بعدين مشي نضال قعمز قريب ع بوه وقال..
/حسيتها تقيدت حتى كان تبي تطلع هني ولاهني ماتقدرش ع خاطر الصغار..
محمد بضيق:الله غالب..
نضال:في بالي غدوة العشيه نطلعهم ندير بيهم دورة وهي تمشي وين ماتبي..
محمد بإبتسامه؛باهي..
ناض نضال وهو يقول..
/نركب نبدل وجاي..ومشي طلع من حداه...
تنهد محمد ورد نظره للتلفزيون..عقد حواجبه بضيق وهو يفكر في الاضرار الاقتصاديه اللي حترجع ع البلاد بسبب الحرب وممكن توقف حالهم...
🍃🍃🍃🍃🍃
تعشت غرفه عند اهلها وجاها راجلها روح بيها وماجتش بينه وبينها ولاكلمه..
☘☘
وهي ترقد في صغارها كانت تفكر في كلام عمتها وخواتها بعمق..
بعد مارقدت الصغار..مشت طلعت من الدار للصالون..
لقاته راقد ع الكنبه ع الجنب وهو مربع ايديه..
تنهدت ومشت قعمزت قريبه عليه ع الأرض..
مدت اطراف اصابعها ليده وقعدت تضرب عليها بش يفيق..
عبدالرؤوف وهو مغمض عيونه..
/شن تبي..
غرفه وهي تعني..
/قوم اوقف وانت بتكلمني..
عبد الرؤوف بنفس الوضعيه..
/بري ارقدي..
غرفه..
/قوم اوقف بصلي وفهمني..
عبد الرؤوف..
/تعرفي كان مانضتيش ماتلومي الا نفسك..
غرفه..
/ولاتتكلم وانا بتكلم وان غلطت ابقى امشي وسبني.
هو فتح عيونه وناض وقف..
هي طول ناضت وقفت قدامه وتغني..
/حبيبي قرب بص وبص بص..
زعلان ازعل..ازعل نص نص..
عبد الرؤوف:كف راهو..
ضحكت وقالت..
/باهي اسفه..
قلدها وهي تضحك ولما قالت..باهي اسفه بعدين قال..
/ساهله هكي هي..تحسابيني بنفوتلك طولة لسانك عليا وكلامك التافه ع عمتي وبنتها..
شدت ذراعه بقوة وقالت بحده..
/بنتها..بنتها هادي معاش تجيب سيرتها ع لسانك خيرلك..
رفع يده لحاجبه ونزله وهو يقول..
/وهدا معاش ترفعيه في وجهي مرة تانيه خيرلك..
ابتسمت وقالت..
/حاضر..اسفه..
بدت ع وجهه ملامح الامتعاض ومشي وخلاها..وهي ضحكت ولحقاته...
☘ قالو له : وهي !
"قال: وما بها هي ! هي بسيئاتها، بخصالها، بطباعها، بكل قبيح فيها تخصّني، فلا شأن لكم بِها☘
🍃🍃🍃🍃🍃🍃🍃
في كوجينة الشقه..
كانت تسكتشف في عالمه الخاص عن قرب..
شافت طريقة ترتيبه..للطواسي"الاكواب..والفناجين..والصواني "صحون"..
ترتيب دقيق وحلو..
حاملة الكواشيك"الملاعق" السواقم"المغارف..
حتى من مواد التنظيف كانوا مرتبات بدقه..
غيرت نظرها لأمها لما سمعتها قالت..
/والله هيك مطبخ حرام الوحده تشتغل فيه...بخاف خربطلوا الدنيا..
سلافه بضحكه:شوفوا مين بيحكي هالحكي! شاديه خانوم اللي مافي متلا بالنظافه والترتيب..
وامها تمرر في نظرها حواليها ردت تقول..
/والله يابنتي بعد هاليوم اكتشفت اني لابعرف في النظافه ولافي الترتيب..
ع خشة لبانه وهي لافه شعرها بالفوطه"المنشف"..
/دخليك ماما فوتي نظفي الحمام مرة تانيه..مو معقول شو مستفز قد ماكان مرتب ونظيف شو هاد!..
شاديه؛ياريتنا ضلينا تحت الصواريخ..
ضحكوا..
ويجي اتصال لتليفون سلافه..
مشت طلعت وهي تقول..
/اكيد ميار..
تنهدت شاديه وقالت..
/انا رح بلش اطبخ والله يستر...وبدت في شغلها
شافتلها لبانه بإبتسامه..بعدين طلعت لدار المعيشه..
وقفت في الباب وهي تسمع في اختها تتكلم هاتفيا..
سلافه:طلعنا الصبح من هونيك..
"الحمد لله ياربي..طيب فيكم حبيبتي والله مارقدت زين من التخميم فيكم وماما كل شوي تنشد فيا شن صار في سلافه وماليها"
سلافه:ااه لو بحكيلك ياميار..العالم كلن طلعوا من البنايه ماظل غيرنا..وعم نسمع كل شوي يعطونا انذارات بمكبر الصوت حتى نطلع قبل ماترجع الاشتباكات اتصلت بعمي وولاده ماعلق معهن الخط..مالقيت قدامي حدا بعرفه وبوثق فيه غيره..
"لالا! قصدك كلمتي عبد القيوم!؟"
سلافه بإبتسامه؛ايه..هو اكثر حدا عرفتوا ووثقت فيه وغير هبك بيعرف رائف ورائف بيعرفوا...
"جاك يعني"
سلافه:ع طول..وبعد ماطلعنا اخدنا ع بيته..
"كيف!!؟"..
سلافه بضحكه..
/عطانا الشقه تبعه لنضل فيها فترة لوقت مايرجع البابا..
"وهو وين مشي!؟"
سلافه بإحراج..
/والله مابعرف..حاسه حالي محروجه كتير منه..
"شوفي تصرفه مش غريب علينا حني كليبين وهو بزايد..بس حاسه صار هكي بش تقربوا من بعض اكثر وتزيد تقوا علاقتكم بيه..'
سلافه بإبتسامه أمل..
/هيك بتقولي!؟
"ومافيش غير هيك ياقلبي واضحه"
ضحكت وقالت:يارب..المهم هلأ طمنينا عن عمو فتحي عملا للعمليه!؟
"ايه الحمد لله وكانت ناجحه"
سلافه:الحمد لله..بس اكيد مافيكن ترجعوا هلأ!؟
"صعب شويه..بس مجنون لبانه روح راهو"
سلافه بصدمه..
/اخوكي المتخلف!
"عشقان ع قولتكم عشقان ياروحي عليه"
شافت سلافه للباب جو عيونها في عيون اخته اللي كانت باينه فيهم لفهة السؤال..
/طيب هو وينه بطرابلس!؟"
"لالا مازال ماوصلش هو مروح مع مجموعه يعرفوا طريق أمنه"
سلافه:والله مجنون..معقول يعمل هيك لك هي حرب حرب..
"شن بنديروله ياسلافه والله من لما سمع اللي صار فيكم وهو ع نار قريب يهبل..يقول كيف تلاته نساوين قاعدات برواحهم"
سكتت سلافه وهي مضايقه..
"يللا اني مش خايفه عليه عارفه خوي الموت يهرب منه"
سلافه بضحكه..
/يخرب بيتك..ع العموم طمنيني عنه هالمجنون لما يطمنكم .
"وانتي رد بالك ضيعي فرصه جاتك من ربي"
سلافه بضحكه..
/طيب روحي يللا باي..
"بايات..سلمي ع خالتي شاديه ولبون.."
سلافه:بيوصل..وانتي سلمي ع امك وقولي لعمو فتحي..حمد لله ع سلامتك...
"تمام..باي.."
سلافه:بايات..ونهت المكالمه..
بعدين قامت عيونها في اختها..
لبانه بقلق..
/خيره خوها؟..
سلافه؛رجع لحاله لهون..
لبانه بإستياء..
/متخلف..
ومشت وخلتها تضحك عليها وهي تحرك في راسها يمين ويسار..
🍃🍃🍃🍃🍃
حطت جنه في سريرها بعد مارقدتها ووصت عليها اريج وطلعت من الدار وسكرتها وراها..
مشت لدار المعيشه وقفت قدامها دارت طلة ع المراة وصغارها اللي كانوا راقدين بعمق وراحه..غيرت نظرها لفردوس لقتها راقده حتى هي..
مشت من قدام الباب للكوجينه لقت عمتها فيها..
طوبى:عمتي راكبه السطح شويه..
مطيره؛علاش!؟
طوبى:بنشوف البساط اللي قتلك عليه بكري وبنكسد ع رسماتي..
مطيره:ماتعطليش..
طوبى:حاضر..ومشت بإتجاه الشماعه..
خدت البشت لبساته بعدين لبست شاربتها ومشت طلعت برا الحوش...
☘☘☘
ركبت الدروج وهي تردد في التسبيح لين وصلت فوق..
بانت عليها السمي كيف كانت اقرب والنجوم فيها مش واضحات هلبه لأن ضي القمر مغطي عليهم..
وجهت نظره ليه..بعدين بدت تقرا في آيه..
"ومن شر غاسق اذا وقب"..وكملت تقول في نفسها...
صح انت المقصود بالآيه هادي..بس وين نشوفك نتفكر في كلام الرسول لما قال حنشوفوا ربي في الجنه زي مانشوفوا فيك توا..."
ابتسمت ووفقت ع السياج وهي تتأمل فيه...
🍃مقابلها ع اليسار..وين ماقاعد الاسمر..كان الشباك الطويل بو فردة وحده مفتوح..هو جي بش يسكره قبل ليرقد..
ووين جو عيونه ع سطوح حوشها..جمد في مكانه..
ضي القمر مه اضواء الشارع خلوها واضحه للعين..
وعيونه وين شافوها..خلوا قلبه ينسيه في نفسه..
ماكانش متمني يرمش...
هو مايشوفش في جمالها الظاهري..المرحله هادي متعديها من الزمان...
هو توا يشوف في اكثر شي يحبه في حياته...اكبر سبب مخليه متعلق بالحياه..يشوف في عمره الجاي..واغلي امنياته..يشوف في سر رعشه قلبه وذهاب عقله...يشوف في روحه المتجسده ع هيئه انسان..
ابتسامتها اللي يشوف فيها توا..فكراته بيها اول مرة شافها..
قداش كانت ابتسامه لطيفه وبريئه..حلاوة الدنيا كلها فيها..
غير نظره عنها مرغما يبي يعرف من لما خدي اهتمام عيونها الحايرة..
وكان القمر..ابتسم..ورجع شافلها وفي نفسه بني ابيات شعر وقعد يردد فيها...
🌼كيف القمر ونجومه
وكيف مالدليل يحتاجله معلومة
لاجل الطريق التايهة المعدومة
في عز صحراء والرياح شمالي
نكتب عليك الشعر بسطر البومة
وانت الفرح ياعيد تبان هلالي
وانت حنين الروح بك مغرومة
محتاجلك والود تبقي حلالي
والقلب منك رايته مهمومه
والعقل سارح بطيفكم علالي
وبحب غيرك ماقدرت انرومه
والحال منك حاطه في ملالي..🌼
خفت ابتسامته وين شافها تباعدت واختفت من قدام عيونه..
حس بصدره ضاق وكأنه ضلوعه طبقوا ع قلبه..
من عمقه نادى خفيا..
"يارب"..
بعدين سكر الروشن..
🍃🍃🍃🍃🍃
وعدت الليله..عليهم هما بهدوء..بس ع غيرهم كان نهار..اصوات القذائف والصواريخ حرمتهم النوم ونستهم الهدوء ومايجي منه..
🍃عواطف بخوف:حسبنا الله ونعم الوكيل..
ام عبد الحفيظ بخوف شديد..
/كيف قلنا هداهم ربي وبيخلونا نرقدوا..
:فرقة الحال يام هادم ياخدوا في راحه ويولوا..شافت للتليفون وهي تقول...ووك قالوا قذيفه طاحت ع حوش في *****..
ويسمعوا صوت رزمه قريب جدا خلا عواطف وعزوزتها يصرخوا ع طول حسهم..
جوهم الرجاله يجروا..
"خيركم!!؟ شن في!؟"
اختهم بإرتباك:شي خافوا بس..
ويسمعوا رزمه تانيه كانت اقرب من اللي قبلها فيقت الصغار..
واحد قعد يبكي والتاني كان مذعور..
؛هادي قريبه هلبه!
عبد الحفيظ بقلق بالغ..
/شكلها طاحت في الشارع. امهم بدت تبكي وهي تقول..
/اني معاش نقدر نتحمل خلاص والله معاد نقدر..
بنتها ناضت وهي تقول.
/خل نوض نلبس ملايتي ع الاقل نموت واني مستورة..
امها قالت ببكي..
/ياحليلي هييه..
عبد الحفيظ قال لأخته بعصبيه..
/سكري فمك خلاص..
ويسمعوا صوت صاروخ جاي..
شافوا كلهم للروشن لما لمحوا نار طايره فاتت من جنبه..
وبعد لحظات سمعوه لما طاح وانفجر ودار زلزال...
ويتبعه بعده صوت عياط...
حماة عواطف..
/اشهد ان لاإله إلا الله..واشهد ان محمد رسول الله..
وامها قالت ببكي..
/خلاص معاد بنعيشوا اكثر ماعشنا..
عواطف ودموعها في عيونها..
/الاعمار بيد الله ياعمتي والحافظ الله..بإذن الله مش حيضرنا شي..غير رددوا معاي هالدعاء...
ويسمعوا صوت صاروخ تاني طاح بعيد شويه هالمرة..
رددت عواطف الدعاء بصوت عالي وهي ضامه ربيبها وولدها لحضنها..
واللي حواليها يسمعوا في الدعاء والخوف متملكهم..
ماعدا راجلها اللي خدي قرار في حالة توقف الاشتباكات يطلعهم كلهم...
🍃لكن هالقرار ماكانش مفكر فيه عبد الفتاح وهو يسمع في اصوات الاشتباكات بالاسلحه الثقيله..
🍃عبد الفتاح؛نطلعكم انتم ونولي بعدين..
سميره بشي من الانفعال والخوف..
/لالا مالا مانيش طالعه..
عبد الفتاح بضيق:يامراة ماتزيدهاش عليا..
سميرة بعصبيه ودموعها في عيونها...
/انت اللي ماتزيدهاش عليا..لااني ولا ولادك نقدروا نخلوك بروحك في هالوضع..خلينا نقعدوا مع بعض يابيها ننجوا مع بعض يانموتوا مع بعض..
وتسمع صوت الهاوزر تضرب تعيط ونجيه تجري تتمسك بيه وهي ترعش..
وهو بضيق يقول..
/لاحول ولاقوة الا بالله...
🍃وقعدوا لآذان الفجر وهما ع هالحال..وبعده حل بعض الهدوء اللي خلاهم يستعيدوا انفاسهم..وخلا عيون البعض تنام...
🍃🍃🍃🍃🍃
الساعة 11:00صباحا..
طلعت طوبى وهي ترفع في كروسه جنه برا الحوش..
سكرت الباب..ومشت بالكروسه بإتجاه حوش سدره..
وصلت فيه...وقفت قدامه..
كان بابه مفتوح ع مصرعيه وفيه عاملات من دوله افريقيه داخل يسيقوا فيه...
ع جية جدها من حوشه..كان يقدملها بعكوزه اللي يضرب فيه ع الأرض..
لين وصل فيها..وقف قدام الكروسه..وطبس عليها وهو يقول يإبتسامه..
/صباح الخير ياجرينه..
جنه ابتسمت وحركت الشكشاكه وهي تهدرز..
ضحكت امها..
علي؛غير شن تقولي بس.
طوبى:قالتلك صباج الورد ياجدو..
وقف ع حيله وقال..
/تو خديتي اذن اختك؟
طوبى:هو من غير ماناخد اذنها نعرفها مستحيل ترفض..لكن كلمتها وقالت...قلت اسلوبها وهي تقول..
"وهدا سؤال تسأليه يارتيله!"
ضحك علي الواعر وقال..
/نعرفها نعرفها..لكن قلت هكي بش نرفع عنك الحرج..
طوبى بإبتسامه..
/فاهمه عليك..
ع طلعة عبد الرؤوف من حوشه..لبس نظاراته ومشي جيهتهم..
عبد الرؤوف:صباح الخير..
الزوز ردوا عليه..
"صباح االخير"
عبد الرؤوف؛هاه القائمه واتيه..
طوبى ضيقت عيونها وقالت..
/نسيت نجيبها..بالله حداكم جنونه..
ومشت بسرعه بإتجاه حوشها..
عبد الرؤوف لفت الكروسه ليه وطبس ع جنة وقعد يلاعب فيها...
🍃ويطلع عبد القيوم من حوش المهدي..جي بيتوجه لسيارته..بس لما شافهم غير طريقه ومشالهم..
وصل فيهم...وبانت عليه جنه ابتسم من قلبه وقال.
/ياصباح السماحه..والعسل والحاجات الحلوة كلهن..
وقربلها وطبس عليها وهما يشوفولها بإبتسامه..
عبد القيوم:شن ياسمحه..شن..
رفعت الشكشاكه وحركتها..
هو لما شافها في يدها فرح من قلبه وقعد يضحك..
ووين وقف ع حيله..جنه رفعت ايديها.
عبد الرؤوف بإبتسامه..
/تبيك ترفعها شكلها خدت عليك..
علي:هيا طبها يادودو..
ضحكوا الزوز من جدهم..
والحاج علي يشوف لجنه بإبتسامه وهو عاقد حواجبه..
هدا عبد القيوم ضحك وقال..
/تشيلها عادي..
طبس عبد الرؤوف فك الحزام وقال..
/شيل ياعم..
ضحك وخداها ورفعها في حضنه..
🌼ع طلعة امها بورقة القائمه..وين جت بتمشيلهم..
شافت منظر حسسها ان قلبها حيطلع من مكانه..
معاش قدرت تقدم خطوه..قعدت تتفرج عليهم وخلاص..
شعور مش عارفه تفسره حاساته اجتاحها..وسيطر ع كل شي فيها...
منظره وهو يلاعب في جنه كان حلو بالمرة..وجنه متجاوبه معاه وتضحك من قلبها..
تجمعوا الدموع في عيونها وقعدوا في محجرهم..
مش دموع حزن..ولادموع فرح..دموع ليها اسم ومعنى مبهم ومش واضح...
شافها عبد الرؤوف واللي جي في باله وقتها انها تحشمت تقرب وهو معاهم..
قدملها هو...
التفت جدها وشافها واقفه بعيد..وشاف عبد الرؤوف وهو ماشي ناحيتها لعند ماوصل فيها..
☘عبد القيوم:لاقوة الا بالله ربي يبارك..ونزلها وردها في مكانها وشد عليها الحزام..وين التفت بيكلم جدها..جو عيونه عليها وهي تكلم في عبد الرؤوف..
وقف ع حيله..وعقد حواجبه تلقائيا ونظرات عيونه ليهم كانت كلها غيره..
🌼طوبى:هو هدا بس..
عبد الرؤوف:تمام اليوم يكونوا عندك..
طوبى:ان شاء الله..بالله عبد الرؤوف جيبلي كروسة جنه..
عبد الرؤوف هز راسه ولف ومشي..
هي غيرت نظرها لعبد القيوم لقاته يهدرز مع جدها..
🍃وصل فيهم عبد الرؤوف وخدي كروسه جنه لأمها تبعوه عيون عبد القيوم لين شافها..لقاها تشوف للكروسه بإبتسامه..
تنهد وشاف لجدها وهو يقول..
بالله كان احتجتوا شي كلموني..
علي:بارك الله فيك..
غير نظره ليها من جديد لقاها خشت للحوش هي وبنتها..
تنهد وقال لجدها..
/السلام عليكم..
علي:وعليكم السلام..
عبد الرؤوف وهو ماشي لسيارته..
/السلام عليكم..
الزوز ردوا عليه..
بعدين ركبوا سيارتهم..تحرك عبد القيوم هو الاول وعبد الرؤوف طلع وراه...
#خريف
#طوبى
...يتبع..../
