#طوبى "جنة طوبى"
#جمان_فريد
#الجزء_106"الاوراق المتساقطة/ورقة ذهاب بلاعوده"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إذا أراد الله أن يعاقب أحدا جرده من عقله أولا ...!"
.➖ دوستويفسكي 🍃
_______________________________________
طلع من الصبح عادي..سقداته عادي زي ماتعودت دير وين يكون عنده شغل برا العاصمه..
وين طلعت سيارته من الحوش ماكانش خاطر في بالها ولو حتى تخيلت ان المشيه هادي معاش في بعدها مرواح..
🍃عدوا الساعات الوضع كان عادي..والامور بالنسبه ليها ماشيه والأمن مستتب..
لعند ماتعدت الساعه تلاته بعد الظهر..كانت تراجي اتصاله بش يخبرها اذا كان بيبات ولابيروح في نفس اليوم..
وعبد الفتاح مااتصلش..اتصلت بيه عبد الفتاح مايردش..
مرة..تنين..تلاته..عشره..وبرضو ماردش..
هني الامن تحول لخوف..والتوتر والقلق بدوا يسيطروا عليها
قعدت مقعمزه في الكوجينه وهي حابسه دموعها..
ماتبيش تفاول عليه فال شر..ماتبيش تستسلم لأفكارها السودا..
خشت عليها حماتها..شافتها سرحانه وملامح وجهها باين فيهم القلق..
سألتها..
"سميرة خيرك مقعمزة هكي!؟"
شافتلها بخوف وقالت..
/عبد الفتاح ياعواطف من لما طلع لتوا ماكلمنيش بكل نتصل بيه مايردش عليا.
عواطف بقلق تحاول تخفيه..
/بالك مشغول ومافضاش بكل..
سميرة برجاء..
/يارب يكون هكي يارب..
مسحت عواطف بيدها ع عينها بعدين قالت..
/نكلم اشرف ولامحي يشوفوه..
سميرة بلهفه خوف..
/ايه كلميهم كلمي..
مشت عواطف طلعت من حداها لدارها بش تجيب التليفون..
🍃وفي جنب دار عواطف كانت دار ابتسام..مقيله هي وصغارها بالها الفاضي خلاها ترقد براحه..
🍃وسلفتها خديجه قالبتها بكي وعياط في حوش اهلها وهي تحكي لبوها وتشكي..
هو كأب من الطبيعي توجعه بنته لكن هالمرة محمد شنيبه ماحسش تجاهها غير بشعور الغضب والاشمئزاز..
وخوتها الجالي وعمر وجعهم حالها وماتحملوش في اختهم الاهانه..
الجالي بغضب:هدا يبي من يمشيله يتفاهم معاه يوريه حجمه..
محمد شنيبه:انت بالذات اطلع منها..
وجهوا انظارهم ليه وهو غير نظره للشاشه وكان واضح عليه عدم رضاه ع كلام بوه..
خديجه ببكي؛كيف يابوي مش حتاخدولي حقي منه!؟
شافلها بنظرة فهمتها نزلت عيونها وهي مقهورة ومعصبه..
محمد:هالمرة بتتحملي نتيجه افعالك ساد مارقعنالك وخشينا بيناتكم ساد..نعرف حاجه وحده بس صغاره ماليش علاقه بيهم..
خديجه بحقد:بالك بنخليهم معاي ونقعد نعاني بروحي يحلم..
عمر بغضب.:تقعدي في حوش بوك معززه مكرمه وحقك الشرعي من مؤخر وغيره يعطيه غصبا عنه.
محمد؛مانبي حد يدخل فيكم غير المهدي..المهدي بس انتم اطلعوا منها..
ناض عمر وطلع وهو معصب والجالي ناض بعده ولحقه..
بوهم بعد ماكان بعيونه معاهم غير نظره لخديجه وقال..
/بتقعدي هني تحترمي نفسك وديري عقل..يجيب ربي ياخديجه وتغلطي غلطه وحده ورب الجلاله نبعتك لزليطن تقعدي مع كامله..
مغليه شافتله بصدمه..اما خديجه ماقدرتش دير اي ردة فعل غير انها تنوض وتطلع من حداهم حتى هي..
مغليه بصدمه:معقوله هكي ياحاج!!؟ بعد اللي حكيتهولك دير هكي!!؟ لاوترضى بطلاقها بعد هالعمر ومش مدور الناس شن بتقول علينا وعليها!!؟
محمد؛يقولوا مطلقه خير مايقولوا حاجه تانيه..
هي بإستغراب:حاجه زي تانيه زي شني!؟
محمد بإنزعاج:يامغليه انتي مش غابيه في بنتك وتعرفيها كويس وتعرفي الكواين اللي دارتهم ماخلاها تتمادى وتوصل لهني الا ترقيعنا وراها ومسايرتها..
نزلوا دموع مغليه وهي موجوعه ع حال بنتها..
محمد؛اني نقولهالك مرة تانيه لو صار وغلطت مرة تانيه ساكوها وزليطن طول...
بدت مغليه تبكي وتقول..
/حسبي الله ونعم الوكيل..حسبي الله ونعم الوكيل..
🍃وسميره في جناحها تسمع في بكي خديجه وحسبنتها حتى هي وتقول بضيق..
/وااك ياربي ناقصني اني ناقصني!!استغفر الله العظيم وخلاص..
🍃🍃🍃🍃
وراما بعد ماروحت من المدرسه عرفت من عمتها عواطف اللي صار بين بوها وامها..كانت ردة فعلها لامباليه او هكي بانت..راما حاليا ماتفكر في شي غير مصيبتها اي مصيبه تاني عندها اهون من اللي هي طايحه فيه..
وتوا قاعده حابسه روحها في دارها تبكي بشدة...
🍃🍃🍃🍃
"عاودها ياتارقي حكاويك ماينملش منهم"
عبد القيوم:لا بعدين انت اللي بتجي مش خاطرك تشرب شاهينا..
ضحك ومختار وقال:صح صح..
ابتسم وقاله؛بارك الله فيك ع كل شي...
مختار:ولو اقل من واجبك..
عبد القيوم:تسلم..السلام عليكم ..
مختار:وعليكم السلام..
مشي التارقي ومختار قعد واقف في الباب يشوف فيه لين طلع مع الاقجم بعدين خش داخل
🍃برا الفيلا..
الاقجم:قالوا تارقي واني عندي منهم اصحاب نعم الناس..
عبد القيوم:بارك الله فيك..وانت من وين..
الاقجم:ترهوني من *****
عبد القيوم:اها من قبيله وحده انت وعيلة الواعر..
الاقجم بإبتسامه..
/ايه بن عمين..شاف للطريق اشر لسيارة اجرة جايه..
وقفتهم..قال الأقجم..تفضل..
التارقي قال:يزيد فضلك وفرصه سعيده يااقجم..
بإبتسامه قاله؛اني اسعد..
فتح عبد القيوم وركب وهو يقول..
/السلام عليكم..
رد عليه الاقجم وسكرله الباب وتحرك صاحب السيارة..
تنهد الاقجم بعدين لف ومشي بيولي للفيلا وهو يغني..
دمعك غير زايد..
ما يقضي فوائد
لا حاجة يجيب"....
واصبر ع الشدايد .
.هك الله رايد ؛ ما تعلم بغيب..
🍃🍃🍃🍃🍃
"خودي ماما...ايه كملي ابله شروق"..
بعد ماعطت بنتها تفاحه قعمزت مقابلتها وكملت مكالمتها..
"بإذن الله الاسبوع الجاي بالكثير يوصلوا"
طوبى:باهي الحمد لله هكي نكونوا سادينا حاجات كل العائلات..
"ايه الحمد لله..ابله طوبى"
طوبى وهي تشوف لجنه كيف تاكل قالت..
/نعم..
"اليوم كانت عندنا سلافة السوريه تعرفيها ولا؟"
بدت ع وجه طوبى ملامح الضيق وهي تقول..
/ايه..
"تمام هادي امها بتفتح مشروع حلويات شاميه وقالت تبي تعطي لمحل يبيعهم واني دليتهم ع محل جنه"
عقدت طوبى حواجبها وقالت..
/شن يديروا بالزبط؟
"ع حسب مافهمت حلويات شاميه قديمه منهم المعمول جابت عينه معاها الحق البنه الله يبارك"
طوبى سكتت وهي تفكر بعدين قالت..
/خل نشوف الوضع ونرد عليك..
"باهي..مانعطلش عليك استاذة نشوفك ع خير ان شاء الله سلمي ع استاذة سدرة"
طوبى:يوصل..السلام عليكم..
"وعليكم السلام"
نهت طوبى المكالمه وهي مضايقه..شافت لبنتها لقتها قاعده منشغله بالتفاحه..ابتسمت وبدت تغني..
/حان الدرس..دق الجرس اسمعوه..اسمعوه..
صوته جميل..ليس له مثيل..وسكتت..
جنه كملت عنها بلغتها الحلوة..
"تيق تاك توق"
ضحكت طوبى..
🍃ومن دار المعيشه للصاله كانوا سدرة واريج يكلموا في فردوس فيديو..
سدرة:مشت تعسل في تونس ياحنه..
"ياالله عليك عمتي..ربي يهنيها والفال ليكم"
سدرة:اياه بتبديلنا فيه حتى انتي مش سادنا نق رتيله..
ضحكوا وقالت فردوس..
"وينها هالرتيله وين استاحشتها هي ورتيلتها"
سدرة بصوت عالي:طوبى..
اريج:الفيله هديكا وين..
"راقده"
اريج؛عاد هي من قبل ناشطه يابال حامل..
"اسكتي ياقردة"
ع جية طوبى وجنه في حضنها..
/دوسه..
"طويبتي وجنويتي سلمهم ياربي"
🍃🍃🍃🍃🍃
طلعت من حجرة الاطباء بإتجاه الكافتيريا وقت استراحتها..
"كنارية عدلي عليا"
ضحكت والتفتت وهي تقول..
/استراحه..
جي جنبها وقال..
/ايه توا بس قدرت تنتفس مانحكيلكش من الصبح عمليتين ورا مع بعض..
اميمه؛ربي يعطيكم الصحه..
ابتسم وهو يقول..
/اجمعين..نزل عيونه ليدها اللي فيها الدبله..
شدها ورفعها وهو يقول..
/جايبلك هديه لما تجي مروحه نعطيهالك..
جبدت يدها وقالت بإحراج..
/باهي هني روحك..
حط ايديه في جيوب البالطو وقعد يضحك..
☘وكملوا طريقهم وهما يهدرزوا ويتناقروا لين وصلوا للكافتيريا...
🍃🍃🍃🍃🍃
ويروح عبد القيوم لشقته بعد ماصلى العصر في جامع المنطقه..
كان ينعزل في دار الخط متاعه لكن اللي ضرب جرس الشقه توا خلاها يأجلها لوقت تاني..
مشي للباب وفتحه طول..
ويشوف قدامه ربيع مع نبيه والد سلافه..
تفاجى عبد القيوم لما شافه وطول رحب بيه ترحيب حار ودخله لوسط الشقه ومعاه ربيع..
********
نبيه:لالايابني ريح حالك اني جاي شق عليك وبنفس الوقت..
ناض من مكانه وطلع ظرف ابيض من جيب كبوطه "معطف" ومشي حطه في حجر عبد القيوم..
استغرب وقال..
/شن هذى!؟
قعمز نبيه في مكانه وقال..
/مصاريك ياابني الدين اللي الك علي..
عبد القيوم؛تي غير من قالك نبيهن ولامحتاجهن بس..
نبيه:شو عم تحكي ابني انا اخدتن منك على انهن دين!
عبدالقيوم؛تمام تقدر تردهن ليا بعدين..بعد ربك يفرج وينهي الحرب وتردوا لشقتكم...
نبيه:ماحدا بيعرف امتى بتخلص الحرب وانا مابتحمل يكون برقبتي دين لحدا لك ابني..
ابتسم ربيع..
عبد القيوم هز راسه وقال
/براحتك..
نبيه بضحكه:خالتك شاديه بتسلم عليك وبعتتلك حلو اشكال الوان..خلص فتحت مشروعها..
عبد القيوم بإبتسامه:ربي يرزقها من واسع فضله..قوللها قالك عبد القيوم مازال عند وعدي بنديرلها دعاية سمحه.
ربيع:بالمرة تشوف المحل اللي عندنا في الشارع متاع الحلويات بالك يتعاملوا معاها..
ضايق عبد القيوم اقتراح ربيع..وحس روحه انحط في موقف محرج..
نبيه:ياريت والله احسن من قصة التوصيل من والى البيت..
يدوب ابتسم وقال..
/خلاص بإذن الله نفتح معاهم الموضوع..
نبيه:الله يخليك ويحفظك..
عبد القيوم بإبتسامه مجامله:تسلم بارك الله فيك..
وربيع يسرقله في النظر..
🍃🍃🍃🍃🍃🍃
طلعت من الحمام وهي مغلفه راسها بعد ماحناته بحنة البابونج..مشت طول للصاله وين مافي نساوين العيله ملتمات ومعاهم سميره..
خشت وجت لسميرة طقت في يدها وهي تقول..
/شن جو..
سدرة:مقربع تقربيعه ماصارتش..
قعمزت جنب اريج وقالت..
/شن في!؟
سميره:استقبلي خديجه اطلقت..
تلقائيا بدت ع وجهها ابتسامة دهشه وهي تقول.
/لالا!
ضحكوا ع ردة فعلها..
سميرة بضيق...
/قايله سودا دارتها وهي تعيط وتخبط وتدعي تتدعا ع عيلة الصيد كلها..
طوبى بفضول..
/علاش !؟
سميره؛مانعرفش الحق..
صفيه:فجيوة فيك ياوخيتي كيف بتعيشي معاها هادي!
سميرة:قلت لبوها لو دارت هكي ولاهكي يطلعني لحوش بروحي وخلاص..
سدرة:ماتراجيش لين ديرلك الشي اطلعي في اقرب فرصه..
سميرة بإستياء.
/الحق ياربي مش هاين عليا نخلي الحوش والولاد..مهدي مسكين امه مرة دوره وعشرة لا يخدم طول اليوم يروح تاعب يبي من يديرله ماكلته ويهتم بيه مانكم غابيين في وضعه..
شافوا اريج وطوبى لسدرة لقوها تشوف لسميره ودموعها في عيونها..
وسميرة مكمله تقول..
/ولا نضال اللي خدي عليا وخديت عليه هو بالذات اكثر واحد تعودت عليه وحسيته ولدي حق..
نزلت اريج عيونها لأصابع ايديها وهي تفرك فيهم ببعض وطوبى تشوفلها..
سميرة بضيق شديد..
/ولا عمر ولاصغار المهدي وطاهر لالا والله مانقدر..
صفيه:انتي خليك ديما كاسبه راجلك في صفك ومادوري شي تاني..
طوبى:زي ماقالت خالتي صفيه وماتخليهم يشدوا عليك شي..
تنهدت وقالت..
/يستر الله..ايه طوبى قوليلي شن صار في حوا!؟
🍃🍃🍃
"شن بيصير ياغبارتي السودا رقمه ولى مقفل ياصفاء"
صفاء بخوف:يارب سترك..
عواطف بقلق..
/امي من بكري تنشد فيا عليه واني نكذب عليها..
سميرة ببكي:قلبها حاس قلب ام هدا..ياربي بنهبل بنهبل الراجل وينه!..
وخبطت بإيديها ع الطاوله..
مشت صفاء بسرعه سكرت باب الكوجينه..
🍃وفي دار ابتسام ..
اللي كانت تكلم في نجاة هاتفيا..
ابتسام بضيق:متوقعتها قداش ليا..خليني منها توا مش رايقتلها..الراجل وين مشي ياأيامي الغبر..
"انتي مش قلتي قداش ليه يلمح يبي يمشي يشوف حوشه الل في*****..شكله مشاله"
ابتسام بخوف:يانهاري الاسود يابختي المايل اني وخلاص..
🍃🍃🍃🍃
"مش باين بكل يامهدي هدا ماشي ل**** واضحه"
المهدي بأنزعاج:ربي يسامحه وخلاص المنطقه غادي معبيه قناصه اللي يشوفوه خاش يقنصوه مايفرقوش..
محي الدين بعصبيه..
/العناد العناد..هدا اللي مودره العناد وتسكير راس..
اشرف بضيق؛مافيهاش كيف حد يشوف الوضع غادي؟
المهدي:كلمت جماعه نعرفهم قالوا الموضوع مش ساهل بتراجوا شويه..
تنفس محي الدين بعصبيه واشرف قعد يمرر في نظره ع الشارع وهو في قمة القلق والضيق..
🍃🍃🍃🍃🍃
بعد صلاة المغرب..
في صالة حوش طوبى..
جدها كان مقعمز ع كرسي وحفيداته حواليه..
علي:الراجل وجهه مايتفسرش..
طوبى بضيق؛مش عارفه علاش يجازف هكي ع خاطر رزق الدنيا!
سدرة:كله يتعوض الا الصحة والروح كان رقت معاش تنزل..
شد علي عكازه بإيديه الزوز وقال..
/ايه والله..ان شاء الله عقابها خير..
اريج بضيق:يارب مش متحمله نسمع بحد تاني مات خلاص..
سدرة شافتلها بحزن وطوبى قالت..
/لاحول ولاقوة الابالله..
🍃🍃🍃🍃🍃
"اللهم لاشماته لكن هادي نيتي ونية اختك"
الجالي:الحق وجعني الراجل مايستاهلش..
مغليه:اني كان بندعيله ع خاطر صغاره مسيبهم عرم ياناري..
نجاة:عنده 6صغار تلاته من الاولى وتلاته من التانيه شن مصيرهم هادم كان صار فيه شي!؟
الجالي:حتى هو مش عارف كيف يفكر..في ناس عندهم حياش زي القصور تساوت بالأرض ولاعدلوا عليها..
مغليه:حتى هو شقا عمره حطه فيه قعد10سنين يبني فيه..
الجالي:وكان صارت فيه حاجه شن بينفعه يام!
نجاة بضيق:هالحرب الغبرة الله لايسامحهم..
مغليه:إيه والله..
🍃ومن الصاله للكوجينه اللي كانوا فيها نضال وسميره ومعاهم جوري وسدرة..
سميرة:قالت تبي مقابلة شرعيه عندها ماتقوله..
نضال:ايه مالاشنو ضروري منها بش تنحط النقاط ع الحروف..
سميرة:ربي يسخرلها الحال ويصير منه ويطلع ولد حلال ويخاف ربي فيها وفي صغارها..
نضال:ع ضمانتي ليا وقت نعرفه..
سميرة هزت راسها بعدين ابتسمت وقالت..
/عقبالك..
ابتسم بأسف..
سدرة المهدي بضحكه..
/هيا عمو اخطبلنا رجيوة نبوا نديروا عرس حتى حني..
ضحكت سميرة وهو قال..
/اشي الفرخه! اسكتي خيرلك..
جوري:حقه عمو نبوا عرس..
سدرة:ها شفت كلنا نبوا عرس..عمو صح رجيوه مش حلوة لكن شعرها برتقالي زي الاجنبيات..
فنص فيها وقال .
/سكري فمك سكريه..
سميرة بضحكه:لاياكبدي عمك ماناقصه شي بش ياخد ام الشعر الليمي عمك مايمشيش معاه كان النقش العربي..
دق قلبه بقوة وهو يشوفلها..
وهي ابتسمت ابتسامه ليها معنى..
حاول يهرب من فهمه خايف يفهمه زي مايتمنى ويطلع موهوم..
غير نظره عنها وقال...
/راكب فوق..ومشي طول طلع من حداهم..
سدرة شافت لسميرة وقالت..
/قصدك اريج ولا!؟
سميرة بضحكه:اشربي الكاكاو واسكتي ياأم لسان..
ع خشة خديجه وهي قالبه وجهها وعاصبه راسها بالوشاح..
جت للثلاجه فتحتها بقوة طلعت منها شريط بنادول وسكرتها بقوة..
بعدين مشت للدولاب فتحاته بقوة حتى هو خدت منه شيشة ميه وخبطاته بقوة وهي تسكر فيه وطلعت..
وهما كانوا يراقبوا فيها بنظرات ضيق واستياء بالذات سميرة اللي كانت متأكده ان خديجه مش حتريحها..
🍃🍃🍃🍃🍃
جبدت شعرها بالاستشوار"مجغف الشعر" خدت شويه من الزيت متاعها دهنت ايديها ومشت بيه ع شعرها..
بعدين رفعت ايديها ع فمها وبدت تقرا في الرقيه..كملت نفثثت فيهم ومسحت ع شعرها..
ع خشة سدرة ابتسمت لما شافتها تفرد في شعرها ع ظهرها..قالت..
/اللهم بارك كل ماله يكثر ويزيد في الطول..
طوبى بإبتسامه؛تبيني نديرلك البرنامج متاعي بش يولي شعرك زي ايام زمان..
سدرة:لالالا معاش نحبه طويل بكل..
قربتلها طوبى وهي تقول .
/تي انت ياسمح شن مادرت يطلع عليك..وقرصتها من خدها..
ضحكت سدرة بعدين قالت..
/بكري كلمتي شروق شن خبراتك؟
تعكرت ابتسامة طوبى وهي تقول..
/قالت المساعدات اللي طلبانهم لباقي العائلات يوصلوا الاسبوع الجاي..
سدرة:باهي كويس الحمد لله..
ع خشت اريج بجلابيتها بش تكويها..التفتت لطوبى لما سمعتها قالت..
"وكلمتني ع حاجه بخصوص المحل"
سدرة بإستغراب:المحل!؟
طوبى وهي تحاول تخفي ضيقها..
/ايه..السوريه اللي يبيها جارنا التارقي امها مدايرة مشروع حلويات وتبينا نبيعولها..
اريج حست بالضيق وهي تشوف الحزن في عيونها..
اما سدرة مابتش تحسسها بشي وقالت..
/وين المشكله اصلا المحل متاعنا يدعم في اصحاب المشاريع الجديده..
طوبى:يعني ماعندكمش مشكله؟
سدرة:وليش بيكون في مشاكل!؟
اريج:باهي هي شن تبي تبيع ؟
طوبى:حلويات سوريه قالت جابتلها عينة معمول عجبتها..
اريج بضحكه ساخره.
/قصدك بينافس المعمول متاعك!؟والله مايوصل في ربعه..
ضحكت سدرة..
طوبى بإبتسامه..
/ماتبيش كلام اللي نديره اني مايقدر حد يجيب ربعه..
اريج:اقواا عليهم هو ده الكلام..
سدرة بضحكه:سلمها ياربي اللي عارفه روحها..
مسحت طوبى ع شعرها وفرداته بعدين قالت..
/حلو اللون ولا؟
الزوز مع بعض قالوا..
"يخوخم..يهوس"
"حلاهااا"
ضحكوا وشافوا لجنه اللي كيف ناضت من النوم وعيونها الزرق ع شعر امها ..
مشتلها امها وهي تقول..
/انتي اللي محلاك ياعيوني انتي..
وخدتها وضمتها وهي تبوس فيها وجنه تمسح ع شعرها..
اريج كانت تتأمل فيهم بحب..لكن سدرة نظراتها كانت كلها حسرة..
🍃🍃🍃🍃🍃
"حاضر نشوف اصحاب المحل ونرد عليك"
عبد القيوم هز راسه بعدين قال..
/باهي نشوفك بكرا ان شاء الله..
علي:ايوه برا شد شقتك ياسرك من الدوران طول بالجبس كان قعدت هكي..
ضحك وقال:حاضر..تصبح ع خير..
علي الواعر؛قدامك كل خير..
وكل واحد فيهم مشي بإتجاه حوشه..
لكن عبد القيوم قبل ليخش شاف جهة مطعم ربيع لقاه واقف ع المهدي وعبد الرؤوف لاحظ من ملامح وجوههم ان في شي صاير..
قدملهم..ولما وصل فيهم سلم وهما ردوا السلام..
عبد القيوم بقلق:في خبر جديد عن عبد الفتاح!؟
عبد الرؤوف بضيق..
/في واحد من الجماعه غادي قال في ناس شافوه خاش ل*****
عقد عبد القيوم حواجبه بضيق..
المهدي مسح بيده ع وجهه وقال..
/الوضع ولى واضح..
ربيع:ماتخبروا حد لين تتأكدوا..
المهدي:هو هدا..
حرك عبد القيوم راسه يمين ويسار وهو يقول..
/لاحول ولاقوة الا بالله..
🍃وعيلة الصيد كلهم عايشين في حالة ترقب وخوف شديد..
كلهم عارفين بإختفاء عبد الفتاح ماعدا نجمه اللي قاعدين يكذبوا عليها وهي حاسه بيهم وقلبها كان مقبوض وصدرها مغموم طول اليوم...
🍃🍃🍃🍃🍃
الساعه11:00ليلا..
في صالة حوش طوبى....
☘"توا كلمت غرفه قالت عبد الرؤوف دور عليه وقال ان في من شافه خاش ل******"
الحاج علي حط طاسة اللبن وقال..
/لاخلاص كان شافوه خش غادي معناها الله يرحمه..
هاديه بحزن؛كان حق مات ان شاء الله يخلوهم يطلعوا جثته من غادي..
حطت طوبى يدها ع صدرها لما ضاق بعد اللي سمعاته من هاديه..
سدرة بأسف؛لا حول ولاقوة الا بالله والله الواحد ماعارف شن يقول..
صفيه بضيق..
/ياربي نجي وليدي يارب..
كلهم بأصوات متقطعه قالوا..
"آمين"
بعدين تنهد الحاج علي وقال..
/ايه ياطوبى قبل لننسى..بكري كلمني التارقي قال الراجل السوري اللي يعرفه عياله دير في حلويات وتبيع قال كان فيها كيف تبيعولها في المحل متاعكم..
زاد الضيق اللي تحس بيه طوبى وهي تقول..
/بنته كلمت وحده من الابلات في المدرسه عن نفس الموضوع واليوم كلمتني ماعندناش مشكله..
علي:بنته تجي غادي!؟
سدرة؛ايه تجي مع التارقي..
صفيه؛بالك يطلع خاطبها ومايبيش يقول..
هاديه؛عمته اخر مرة جت هني لمحت بحاجه زي هادي..
علي:يقول ولامايقولش حاجه ماتخصناش..ناض بعكازه وهو يقول..اني مروح..
☘وناضوا معاه هاديه وصفيه سقدتهم كلهم سدرة وسكرت الباب بالمفتاح..ولما ولت للصاله مالقتش طوبى..
مشت للدار خشتلها..لقت اريج وجنة راقدات فيها...
ردت الباب وشافت جهة الحمام لقت ضيه شاعل عرفتها داخل تنهدت بضيق ومشت لدار المعيشه..
بعد ماخشت بلحظات طلعت طوبى من الحمام وهي متوضيه وتوجهت للدار خدت ملايتها وتوجهت للصاله...
فرشت الصلايه ووقف عليها وهي تلبس في الملايه..
بعد كملت رفعت ايديها وخلتهم بموازة وذانها..كبرت..
بعدين حطتهم ع بعض اعلى صدرها اليمين ع اليسار وبدت الصلاة..
☘"واستعينوا بالصَّبر والصَّلاة وإنّها لكبيرةٌ إلا على الخاشعين"
وإنها لكبيرة إلا على الخاشعين..الخاشعين بقلوبهم لله في كل لحظه داخل الصلاه وبرا منها..القلوب اللي تعبت بحب الله وتعلقت بيه وين تحس بالضعف والألم والوجع تتوجه لخالقها ع طول..
هنيئا لهالقلوب واصحابها مايقدرش يتمكن من قلوبهم حزن ولاعذاب..تعلقهم بالله مخليهم ديما في حالة رضا وراحه مهما شافوا ومهما مر بيهم☘
وهدا اللي صار مع طوبى ماطلعتش من الصلاة الا وهي مرتاحه وراضيه بكل شي صار وقاعد يصير معاها..
ولما رفعت ايديها وبدت تدعي..
سألت الله حاجتين..
"اللهم اني اسألك حبك وحب من يحبك وحب كل عمل يقربني إلى حبك...
يارب وانت الأعلم بكل شي والمحيط بكل شي لو خديت امانتك من جارنا عبد الفتاح خليهم يلقوه بسرعه ويسرلهم بش يطلعوه ويديروا عزاه..ونتمنى من قلبي ياربي لو يكون حي وتطمن قلوب احبابه عليه"
🍃🍃🍃🍃🍃
تاني يوم..
الساعه 8:00صباحا..
كانوا سلافه وامها واختها مجتمعين ع الفطور..
نبيه طلع قبلهم عنده خدمه في سوق ملابس..
☘شاديه:ماارتاح باله الا لما دفع الدين اللي عليه..
لبانه:اكيد مافي حدا مديون بيكون مرتاح..
شاديه:معك حق..ابتسمت وقالت..قلي انه حكى لعبد القيوم عن شغلي بالحلو وهو اقترح عليه يحكي مع ناس عندن محل حلو بالشارع تبعن مشان نبيع فيه..
سلافه بدهشه:عنجد!!؟
شاديه بضحكه:خليني كفي..اتصل فيه اليوم صبح وقلوا انهن وافقوا وعطاه رقم تليفون المحل مشان نحكي مع صحابه ونتفق معهن..
ضحكت سلافه بفرح واندهاش واختها تراقب في ردة فعلها.
شاديه:والله هالرجال عمل معنا جمايل بدنا عمر لنكافيه عليها..
لبانه:يكثر خيره هو حدا محترم وابن اصول..
خدت سلافه طاسة العصير وشربت منها وهي تفكر..
شاديه؛هاتي الجبنه من عندك لبون...
خدت لبانه صونيه الجبنه ومدتها لأمها وهي تسرق في النظر لسلافه..
🍃وع سفرة فطور بنات الواعر..
كانت سدرة تشوف لصور بعتتهم مطيره وحواليها اريج وطوبى يتفرجوا..
سدرة:العب يا..لقطات وحركات وين شكشوكه مش معاها..
اريج بضحكه؛واضحه هو اللي يصور..
طوبى وهي تضحك:غير شوفي اللقطه هادي زعميتها سرحانه في البحر..
ضحكوا بعدين قالت سدرة..
/ربي يهنيها دوم..
الزوز قالوا ورا دعائها..
"آمين.."
شويه جتهم جنه دخلت راسها معاهم بش تتفرج وهي تقول..
"شوف"
ضحكوا عليها وسدره ضمتها وهي تقول..
/شن بتشوفي ياجرنونه شني..
طوبى:ماتخليهاش تشد التليفون مانبيش نعودها عليه..
حطاته سدرة ورا ظهرها وخدت يد جنه وهي تقول..
/هي نلعبوا..طباخ..
ناضت اريج وقالت..
/اني خلاص وقت عليا..
ومشت تجري للدار بش تجهز نفسها..
🍃وبعيد عن هالصباح الرايق..كانوا عيلة الصيد عايشين اسوأ الساعات اللي تمر عليهم في حياتهم...
الحاج ادريس ماباش يخش ع مرته بكل قعد شاد المربوعه وهو عايش في حالة قلق بالغ..
والولاد من بعد الفجر طلعوا مع عبد الرؤوف..
اما النساوين..عواطف كانت بين امها اللي قاعده ماتندري ع شي وبين نساوين خوتها اللي مابطلوش بكي ع راجلهم..
وحده تبكي من حسرتها عليه..والتانيه تبكي من حسرتها ع نفسها..
وسلفتهم صفاء مقعمزه حداهم تعاني في ولدها وولد ابتسام اللي هملاته الليل بطوله..
🍃لكن مافيش حد تعرض للإهمال زي راما اللي مادورها حد..
لااب لاام لااخ..ولافي من عبرها من اهل امها ولامن اهل بوها..
البنت كانت مدمرة بكل معنى الكلمه وفوق هكي الندم ياكل فيها من داخل..قداش تمنت لو يرجع بيها الوقت بش تصلح كل شي فسداته في حقها نفسها وفي حق غيرها اللي الله قاعده ينتقملهم..
☘الدنيا خلاصها فيها مهما طال الوقت..يلي يأذي الخلق بظلم او افتراء او قهر او شن ماكان نوع الآذيه..الله مش حيخليه يطلع من هالدنيا قبل ليدفع الثمن..ولازم يخاف يخاف هلبه اللي ظلم هلبه ناس حواليه وشايف ان الحياة ماشيه معاه حلوة لدرجة اصبح فيها يشوف انه ع حق في أي شي داره،او لدرجة انه مش حاس انه غلط في حق أي حد او آذى حد..هدا لازم يخاف هلبه لأنه قاعد يتعرض للإستدراج الإلهى والاستدراج الإلهي مرعب..يرفعك فوق فوق فوق يخليك تحس انك مستحيل طيح..وفي لحظه وبدون سابق انذار يخليك تهوي في الارض..مش عليها لا..بل في باطنها وقوع وخسف...ردوا بالكم...راجعوا انفسكم...ولحقوا قبل فوات الأوان☘
🍃🍃🍃🍃🍃
الساعه 12:30قبل الظهر..
خش للفيلا ومشي للدروج..باين عليه الاستعجال..ركب الدروج بسرعه..وتوجه لدار النوم..
خشلها..كانت مظلمه فتح الضي..ومشي طول للدولاب"الخزانة"..سحب الباب وحول جاكيته اللي لوثه بالقهوة وخدي في مكانه جاكيت تاني..
سحب باب الدولاب ومشي جهة السرير..حط عليه الجاكيت اللي حوله..وبدي يلبس في التاني..
بنظرة عابرة شاف للسرير..بعدين رد نظره بإستغراب وثبته ع شي معين كان فوقه..
كمل لبس وقعد يساوي في اكمامه وهو يقرب من هالشي لين وصل فيه..
كان صندوق هديه..غطاه في جنبه..هو شاف اللي في وسطه..
عقد حواجبه وبدت ع وجهه ملامح التجهم..
شاف ملاية صلاة..ومصحف مغلف بغلاف من لون الملايه وجنبهم خاتم ذكر من نفس اللون..
مرر نظره عليهم مرة تانيه..وفي لحظه..
سرح في ذكرى بعيده..بعيده هلبه..كان واحد من اصعب الايام اللي يمروا عليه في حياته كلها..
🔺️🔺️🔺️في وقت سابق🔺️🔺️🔺️
واقف قدامها في المكان اللي تعودوا يتلاقوا فيه..
يمرر في نظره عليها وهو متفاجئ..
وهي اللي كانت مبتسمه بفرح وتتكلم بنبرة كلها بهجة وحماس..
/عارفه اني فاجئتك وممكن صدمتك ومتأكده اني فرحتك قوي..صح؟
هو هز راسه بعدين بلع ريقه وقال..
/ايه..لكن..انتي متأكده من اللي درتيه مارييت فكرتي كويس!؟
بإبتسامه قالت..
/عمري ماكنت متأكده من حاجه زي ماانا متأكده من قراري ده..مختار انا بقالي فترة طويله بفكر في الحاجه دي..الناس اللي بشتغل عندهم خلوني احب دينهم قوي..الست اللي انا بخدمها خلت قلبي يلهف للإسلام..تعلمت منها رغم انها مش بتتكلم..وتعلمت من كل حد في العيله كلهم اخلاقهم كانت عاليه وبيخافوا ربنا بطريقه عمري ماشفتها في حياتي..وانت وحبي ليك شجعوني اكثر اخد الخطوة دي..
مختار بشي من الضيق..
/اني خايف تكوني استعجلتي وبعدين تندمي يامارييت..
قالتله بثقه؛بالعكس انا اتأخرت قوي وصدقني هكمل عمري كله وانا مسلمه بإذن الله وبعدين انسى اسم مارييت ده خلاص قريب قوي حغيروا..
مختار:لكن مارييت حلو هلبه..
بإبتسامه قالت:واللي هختاروا حيكون احلى..تنهدت وقالت..قولي انت دلوقتي ايه هي مفاجئتك..
نزل عيونه لإيديه اللي ضمهم لبعض بعدين شافلها وقال..
/تتفكري قبل لما قتلك في بالي شي ناوي نديره..
بحماس:فاكرة كويس اي حاجه تخصك مستحيل انساها..
ابتسم بألم وقال..
/اني قررت نهاجر..
تلاشت ابتسامتها وقالت..
/تهاجر ازاي يعني مش فاهمه!!؟
مختار بشي من التوتر..
/بنهاجر يعني بنسيب البلاد هادي وبنسافر لأوروبا ونبدا حياة جديده غادي نوصل فيها للي نبيه..
ضحكت بعدم استيعاب وقالت .
/انت بتقول ايه!؟ عايز تسيب ليبيا وتروح اوروبا تسيب اهلك وناسك وتسبني وتروح هناك وماترجعش تاني!؟
مختار بلهفه وخوف..
/نسيب الدنيا كلها ولانسيبك نبي نرفعك معاي يامارييت نبيك معاي...
🍃وكان رد مارييت صادم بالنسبه ليه..رفضت عرضه رفض تام وخدت موقف اهله منه وعاتباته لأنه بيخليهم وهما في امس الحاجه ليه لكن الاقسى من هدا كله عليه كان رأيها فيه اللي كان متفق مع رأيي كل اللي حواليه انه مايقدرش ع الغربه..مايعرفش يتحمل المسؤولية..🍃
🔺️🔺️🔺️الوقت الحاضر🔺️🔺️🔺️
قام عيونه لما سمع باب الحمام انفتح..
شويه وبانت عليه..لما شافاته اتفاجئت وقالت بشي من التوتر..
/امتى روحت؟
مختار:جيت نغير دجاكه متاعي تبزعت عليها قهوة..اشر بيده ع الصندوق وحرك راسه تساؤلا بمعنى.."هدا شني!؟"
استجمعت شجاعتها وقربت من السرير..مدت يدها وجبدت الصندوق وهي تقول..
/هذا شي يخصني..
رفع حواجبه وقال..
/هديه ولا...؟!
فاتن؛هديه..
مختار:من مني!؟
فاتن؛ولو ان مش من حقك تدخل في خصوصياتي لكن بنقولك من مني..من طوبى..
رفع حاجبه وقال..
/طوبى..!
هزت راسها ايجابا بصمت..
مختار:على اي اساس تهديك حاجه زي هادي!؟
فاتن؛مختار لو سمحت..من البدايه متفقين ماحد فينا يدخل في حياة تاني ولا؟
مختار:تمام متفقين..لكن بنشوفك ديري شي ممكن يهدد زواجنا لازم ندخل بش ننقده..
رفعت حواجبها تعجبا وقال..
/يهدد زواجنا! علاش هدا كله!؟..هادي قناعات شخصيه مايحقلكش تهددني بحاجه زي هادي ع خاطر شي يخصني واني حرة فيه..
غير نظره عنها وهو يحك اسفل شفه التحتاني بعدين حط يده في جيبه وقال..
/تمام..اني اسف..ديري.اللي يعجبك..ومشي بيطلع لكن وقفاته لما سمعها قالت...
"ماتفكرش تمنعني من مواصلة اهلك"
قعد يشوفلها بصمت..
فاتن؛لو درت حاجه زي هادي حنمشيلهم تبي ولاماتبيش..
ضحك بعدين قال..خل نعطيك اول درسين مهمين في الدين..
رفع سبابته وقال...
/اولهم ان المراة ماتقدرش تتحرك سانتي واحد برا الحوش من غير اذن راجلها..
ضم الوسطى للسبابه وهو يقول..
/تانيهم..ان مافيش بين المراة والراجل خصوصيات يعني نقدر نتحكم في لبسك في مشيك وجيك..حتى في قصة شعرك..هدا الحق اللي عطاهولي الدين..وانتي ماعطاكش حق الاعتراض حتى بملامح الوجه..غير توا مستعجل لما نفضى نكملك الباقي..طبعا لو حبيتي..وابتسم ابتسامه واسعه بعدين مشي طلع وخلاها ترجع تغرق في دوامة الحيرة مرة تانيه..
☘من قبل لتوا موجودين امثال مختار في حياتنا بالذات لو سافروا برا وذابو في مجتمع غريب عن مجتمعهم..نزعوا هويتهم الدينيه والثقافيه ولبسوا هوية الغرب اللي تفصل الدين عن الحياة كلها..هادوا قلوبهم تنطمس تماما وايمانهم يكاد ينعدم ومعاش يأثر شي..ولو صار وتأثروا بشي فحيكون هالتأثير لحظي فيسع يختفي☘
لكن فاتن من الناس اللي ماكانتش تعرف شي عن دينها الا القليل..ولأن فطرتها سليمه وقلبها نظيف مالك للحق..بس مازال شوائب الحياة اللي كانت عايشتها مأثرة فيها وتبي وقت بش تتخلص منها..
🍃🍃🍃🍃🍃
بعد العصر..
في شارع القهوة..
خشت سيارة ربيع اللي كان جايب نسرين ومعاها يحيى لحوش اهلها بش تشوف اختها..
خطمت السيارة قدام قهوة نضال اللي كانوا مقعمزين فيها عمر والجالي وقعدوا يتبعوا فيها بعيونهم لين درقت..
غير الجالي نظره يمينه لعبد القيوم اللي كان مقعمز مع سامي نزل عيونه لرجله بعدين غيرهم عنه لحوش طوبى..
عمر:الجو ماتعرفاش كيف مرة ضاغط مرة مصقع..
كيف جي الجالي بيكلمه..شاف سيارة غريبه ع الشارع جايه للمحل..
🍃درست السيارة ونزلت منها مراة في اواخر الاربيعينات محجبه..
وبعدها نزلت وحده غير محجبه..جمالها وطلتها المميزات جدا خلت العيون تتوجه ليها..
عمر بإعجاب:اوبااا..
الجالي كان يشوفلها بلامبالاة مازهتش في عينه نهائي في نظره مافيش مراة اجمل من طوبى ع وجه الأرض..
🍃وربيع فات من وراهم بعد ماسلم ومشي لطاوله عبد القيوم وسامي قعمز معاهم وقال..
/عيت الكسابكجي جو..
سامي بضحكه؛شفناهم شفنا..
ربيع بإبتسامه:مش غير انتم بس..
عبد القيوم بعدم رضا..
/تحشموا شويه..
ربيع بمزح مقصود..
/كنك حمقت!غيرة هادي ولا شني!؟
سامي شاف لربيع بإستغراب..
عبد القيوم بهدوء عكس اللي صاير في داخله..
/قاعد موسع بالي معاك..
ضحك وقاله..
/بصارة بصارة..شافلهم شن طلبوا التفت وكلم واحد من العاملين..
غير عبد القيوم نظره عنه للمحل وهو مضايق ع الاخر...
🍃في المحل..
الى جانب العاملات كانوا موجودات سدرة وهاديه واريج..
من اول ماخشت سلافة والعيون عليها..العاملات انبهروا بجمالها ولما سمعوا لهجتها زال استغرابهم في هيئتها..
استقبلتهم سدرة استقبال كويس وبدت تتكلم مع شاديه عن الخدمه...
اما سلافه كانت دور في طوبى لما مالقتهاش قعدت تدهور في المحل وتتفرج عليه..
هاديه كانت تتفحص فيها بنظرها..
لبسها محتشم وانيق بالمرة لابسه اكسسوارات ناعمه..
شاده شويه من شعرها والباقي فارداته ومغطي ظهرها..
عيونها كبار وجميلات ونقشها كله جميل..
☘شاديه بإبتسامه:عبد القيوم دلنا عليكن ولما عرفت اسم المحل ودورت عليه بالفيس طلعت بعرفوا مافي حدا مابيمدح فيكن..
سدرة:وان شاء الله حتى انتي يمشي شغلك معانا وتزيدي الزباين..
شاديه بضحكه:يارب..جبت حوالي 40 علبه من كل نوع عشرة كتجربه..
سدرة:باهي جايبه ذواقه..
بإبتسامه قالت:اكيد..شافت لبنتها وقالت..
/سلافه..
التفتت لأمها..
شاديه:تعالي جيبي معي علب الحلو..
سدرة:لاخليك تو تطلع معاها وحده من البنات..هنادي..
:حاضر..
مشت سلافه بتطلع والبنت معاها..
🍃اول ماطلعوا البنت شافت عبد القيوم لقاته يشوف للمحل شافت لسلافه لقتها تشوفله وهي شاده ابتسامتها بعدين نزلت عيونها وجت للباب فتحاته..
عبد القيوم غير نظره طول وعقله يفكر بقلق لو طوبى داخل شن شعورها!؟ وبشن تفكر توا!؟
🍃وطوبى فهالوقت موجوده في صاله حوشها مع نبيله وغرفه وحداهم الصغار يلعبوا..
طوبى:اعتبري روحك جايتيني اني يانبيله..
نبيله بضيق:صعب الحق ماقدرتش انتي تعرفي كويس ان عمتك مطيره معاش زي قبل معاي وزادتها سدرة..اني ياطوبى تعودت نكون منكم وفيكم مانبيش من يعاملني زي الغريبه ولاغير مرغوب فيا..
غرفه كانت تسمع بصمت وهي تتفرج ع الصغار ماتبيش تدخل..
طوبى:الوضع توا تغير يانبيله..
نبيله بإبتسامه؛ باهي وينها سدرة!؟
طوبى بضحكه:والله في حاجه ضروريه في المحل بديرها وتجي..اصلا انتي بتقعدي تتعشي مافيش اعتراض..
ضحكت وقالت..
/ع خاطرك بس..
طوبى بإبتسامه:يسلم خاطرك..
وغرفه حداهم تشوف للصغار بإبتسامه وبنتها جنبها راقده...
🍃🍃🍃🍃🍃
ويروحوا سلافه وامها بعد مااتفقوا مع سدرة ع كل شي يخص شغلهم مع بعض..
وماان قرب آذان المغرب خشوا كلهم للحوش وقعدوا العاملات وع راسهم حواء يكملوا خدمه في المحل..
🍃🍃🍃🍃
واجتمعوا كلهم في الصاله..
طوبى ونبيله وغرفه وهاديه وصفيه وسدرة واريج واميمه وحتى فايزة جتهم...
فايزة بفضول:شفتوها!؟
هاديه:شفناها ياكبدي شفناها آية من الجمال ولما تتكلم قريب تاكليها..
اريج بشي من الحمق..
/بالغتي شويه هويديه..
هاديه بضحكه؛بالله ياسدرة كلامي فيه مبالغه..
سدرة:الحق زي هي زي امها الله يبارك..
فايزة بضحكه:خطرت عليا اللي قالوا يبيها ولما خطبها رداته لو منه ندورها وين ماهي ونقهرها بيها..
اميمه شافت لطوبى لقتها لاهيه مع بنت غرفه وجنه واقفه حداها تتفرج عليها..
غيرت نظرها لنبيله لقتها تشوفلها الزوز شافوا لبعض بأسف بعدين شافوا لسدرة لما قالت..
/هو يستاهل كل خير..وفي النهايه كل حد ياخد نصيبه..
فايزة:ع قولتك..
صفيه بضيق:مافيش اخبار ع سلف بنتك..
طوبى شافت لفايزة..
فايزة بحزن:لالا لتوا مالقوشي ولتوا امه ماتندري ع شي..
بدت ع وجوههم ملامح الاسف والحزن وفي اللي حوقلت..واللي استرجعت...واللي تحسبت..
🍃🍃🍃🍃🍃
"ان شاء الله غير فهمتها"
يزن بضحكه:عيب عاد ياباشا وهي طايرة..
المهدي:وهي عينك ريقي شاط واني نشرح نص ساعه..تعرف ماتجيبهاش مسكره نعلقلك في هيا..واشرله ع الثريا..
ناض وقال بضحكه:كان تبي فوق المسكرة ماعندكش مشكله
بوه قعد يشوفله بأمتعاض..
هو ضحك وبدي يغنيله..
"ننجحلك و نجيب الغالي و الغالي ما يغلا عليك راجل و انت راس مالي و نتبع فخطاويك و معاك انت عرفت دلالي و البوسة لي ترضيك و مهما نكبر يا غالي ما نلوي عصى في ايديك
انت بابا و يا بابا بابا و يا بابا انت سيد و انا شبلك و حاميني في غابة"
☘سمعه خوه محمد اللي كان في داره ضحك وطلعلهم..
وصل في الصالون وخش عليهم وهو يشوف لخوه ويغني..
انشوف فيك تفيڨ فجاري و الدنيا برد عليك مخلي مصروف للميمة و على وليدي ما نوصيك انت تقري وانت توري و انت لي في العيد كسيت انت شاڨي تعبت علينا عمرك ما تڨول عييت..
وصل في خوه وحاوطه من كتفه وقعدوا يغنوا مع بعض وهما يأشروا ع بوهم..
"انتي بابا ويابابا بابا ويابابا انتي سيد وانا شبلك الحاميني في غابه"
والمهدي يتفرج عليهم وهو مبتسم ابتسامه جانبيه..
قربوله وهما يكملوا غني..
"ان شاءالله نكبر و نعطيك نكبر و ما نخليك ان شاءلله نكبر و نعطيك نكبر و ما نخليك و مشينا بكلام المولا الله و رضاية والديك..
جبدهم من ايديهم وقعزمهم حواليه وخدي روسهم وخبطها في بعض وهما يضحكوا...
فجأه..رن تليفون..تباعدوا عنه وهما يتحسسوا في جبهاتهم..
وهو خدي تليفونه من ع الطاوله لما شاف المتصل تبدلت ابتسامته لملامح القلق..
فتح الخط ورد وهو يقول..
/ايوه؟
ولاده ركزوا ع ملامحه وحسوا بالخوف..زاد خوفهم لما ناض بوهم بسرعه ومشي طلع من الشقه..
يزن؛شن في!؟
محمد بأسف:شكله الاتصال ليه علاقه بعمي عبد الفتاح..
يزن بضيق؛وجعوني الولاد اليوم كيف خايفين ويراجوا يسمعوا حاجه تفرحهم..تعرف يامحمد واني نشوف في حالهم شن خطر علياا؟..خطر عليا اللي داراته امي الله يرحمها امي ماكانتش تبي تعذبنا معاها...الله يرحمها مافيش زي حنها في الدنيا..شد دموعه بقوة..
ومحمد قاله؛يزن في موضوع نبي ندوي فيه معاك...
عقد يزن حواجبه بأستغراب..
/ان شاء الله خير!..
هز راسه وقاله..خير ان شاء الله..خير..
🍃🍃🍃🍃🍃
الساعه 4:45بعد منتصف الليل...
طلعت راما من دارها وملامح وجهها كلها خوف وبكي ودموعها ينزلوا..كانت ترجف..شفتها السفلي كان يرجف من البكي والخوف..
توجهت للكوجينه..
خشتلها بخطوات ثقيله وخايفه..
مشت للدولاب اللي تحت الحوش..
فتحاته..وعيونها جو ع شيشه الاشيدو"اسيد" غمضت بعيونها بشده ومدت يدها وخدتها...
🍃🍃🍃🍃
في هالوقت كانت طوبى في الصاله مقعمزه ع صلايتها تحت الروشن وفي يدها تليفونها.
كانت تكتب في منشور بتنزله ع صفحتها بدايته كانت بإقتباس لإبن القيم...
"فاعلم أن حاجة العبد إلى أن يعبد الله وحده لا يشرك به شيئًا في محبته ولا في خوفه ولا في رجائه ولا في التوكل عليه ولا في العمل له ولا في الحلف به ولا في النذر له ولا في الخضوع له ولا في التذلل والتعظيم والسجود والتقرب أعظم من حاجة الجسدإلى روحه والعين إلى نورها بل ليس لهذه الحاجة نظير تقاس به فإن حقيقة العبد روحه وقلبه ولا صلاح لها إلا بإلاهِهَا الذي لا إله إلا هو."
📚[طريق الهجرتين (صـ٩٩)].
تكلمت بعدها بالعاميه عن شكل العلاقه مع الله سبحانه وتعالى..علاقه حب وتقديس وتعظيم وخضوع...
الحب في احلى حالاته..والخضوع في احلى حالاته..
والتقديس والتعظيم اللي مايليقش بغير الله سبحانه وتعالى..
تكلمت باللي حست بيه وعاشاته تكلمت ع ادق تفاصيل شعورها في علاقتها مع الله..
منشورها كان مؤثر هلبه..واغلب اللي قروه داروله مشاركه ومنهم صفيه اللي كتبت فوق المنشور..
"طوبى لمن سماك طوبى"
🍃وعيون عبد القيوم تشوف المشاركه متاعها..
كان متكي..ساوا جلسته...وخش ع الماسنجر وبعت لصفيه..
(ليها الصفحه اللي درتيلها مشاركه توا؟!)
ردت..
(ايه)
طول رجع خش ع الفيس ومنه للصفحه متاعها وبدي يقرا بلهفه وقلبه من سرعة دقاته خلاه يتنفس بشي من السرعه..
🍃🍃🍃🍃
هي طلعت من الفيس وحطت تليفونها ع تركينه..
حطت راسها ع الفراش وبدت تستغفر وهي تعد ع اصابعها...
🍃ومحمد المهدي اللي كان راقد في الصالون بعد ماغلبه النوم وهو يراجي في بوه..
كان يشوف في نومه اكثر انسانه يحبها في الدنيا..
أمه...
☄يشوف فيها مقعمزه لابسه ابيض في ابيض وشاده مصحف وتقرا..
كانت تقرا في آيه وحده وتكرر فيها..
"ووصينا الانسان بوالديه حسنا"
شويه وشافها قامت عيونها فيه..ابتسمت ومدتله حاجه تبان زي العبايه وهي تقول..
"لبسها لراما"..
☄فتح عيونه..مرر نظره حواليه بعدين ناض قعمز وهو يقول..
"يارب..شن معناه هدا!؟"
🍃🍃🍃🍃
"ياربي سامحني ياربي ماتخلنيش بروحي ياربي ارجوك ساعدني واستر عليا ياربي ياربي"
هادي راما اللي تراجعت في اخر لحظه عن فكرة الانتحار لما سمعت لشي في داخلها يقوللها بري صلي وادعي ربي وتو يساعدك..
وهي طول نفدت...
وتوا هي في سجودها..طايحه قدام باب الله بضعفها وقلة حيلتها وندمها..ماتبي منه شي غير انه يغفرلها ويسترها
"ووك عليا ووك..ووك عليا ياناس ووك"
ناضت قعمزت وهي مفزوعه لما سمعت عياط مرت عمها ابتسام..
حطت يدها ع قلبها وناضت من مكانها مشت تجري طلعت من دارها ومنها من الشقه كلها..
🍃عياط ابتسام ونواحها فيق سكان شارع القهوة اللي شبه كلهم عارفين على مني...🍃
#الاوراق_المتساقطه
#طوبى
...يتبع...
