#طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لَيتُني فَراشةٍ لَـ أخِترتُ يدُِكَ غٌصنّاً لَي🍃
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "نَحْنُ لَمْ نَتَغَيَّرْ بَلْ إِسْتَوْعَبْنَا." 🍃
________________________________________
تجاوزت حالة الكآبه ورجعت للحياة زي قبل خدمه ومسح جوخ لحوش اهل راجلها..
مافيش قدامها غير هكي ماتبيش تطلع من تحت جناحهم مهما صار ماتبيش تقعد بروحها وضيع كل شي..
مازال عندها نفس وعندها امل انها تقعد في قلب راجلها هي الوحيده مايشاركها فيه حد..
لبست وتأنقت..ومشت لحوش شيابينها بش تطمن ع حال عزوزتها اللي تعبت بعد سفر ولدها الصغير لغير رجعه..
وين قربت توصل للباب..طلع ولد سلفها..
لما جو عيونها في عيونه..شافت في نظراته ليها كره واحتقار شديدين..فات من جنبها..سلمت عليه تجاهلها كالعاده وكمل طريقه..لكن في لحظه وقف لما سمعها قالت..
"قلة ادب"..
التفت وشافلها بحده..
نجاه برفعة حاجب..
/تصرفاتك معاي تصرفات واحد قليل ادب مايعرفش يحترم الأكبر منه..
ابتسم بتهكم وجي بيمشي..
رجعت وقفاته لما قالت..
/واقف في صف اخت المراة اللي حرقت قلب امك..
وقتها حس وكأن نجاه شاده قلبه بقبضة يدها وقاعده تعصر فيه..
نجاه؛لو صار وبوك خدي اختها ع امك مش حتشوف منها اللي داراته هدا كله ع خاطر عمك خداني قبلها وعليها..انت بالذات مفروض هديكا العيله ماتحب منهم حد من كبيرهم لصغيرهم ..
التفت وشافلها شويه بعدين قال..
/اللي قلتيه كله..ماحركش فيا شعره..اني مش عيل.
فاهم كل شي..ونعرف كل في حد فمكانه..ماتعبيش روحك معاي..ياريت هادي اخر مرة تكلميني فيها..
ولف ومشي طلع من الحوش وخلاها تغلي من داخل غضب وحقد عليه..
نجاه هزت راسها بوعيد وهي تقول..
/ورحمة امي ياولد عيشه ماني مفوتتهالك.. خدت نفس وزفرت...بعدين مشت خشت للحوش..
🍀🍀🍀🍀🍀🍀
وتعدي الأيام..
ويتحدد موعد عرس اريج وآلاء..يوم الدخول 20مارس...
ويبدوا في تجهيز "البتات" بسرعه ماقعدش ع العرس الاشهر واحد بس...
🍃في الوقت اللي بدي فيه العد التنازلي لتوديع حياة العزوبيه عند حنان اللي قاعده تراجي في اسبوع عرسها بفارغ الصبر..
عرسها اللي كل من في الشارع يراجي فيه معاها..الناس مشتاقه للأفراح والاجواء الحلوة بش تنفس شويه من ضعوطات الحياة وتنسى مشاكلها لساعات..
بس في من يراجي في المناسبه بش يدير مشاكل..
زي خديجه اللي لاتكل ولاتمل وهي قاعده تحرض في امها ومرت خوها ع الأخد بالثار..ومرت خوها اساسا مش محتاجه من يحرضها..
هما بعد الفضيحه اللي صارت مازال ليهم عين يقابلوا بيها الناس!!؟
ايه هادم اصحاب العين القويه اللي ماخلوا شر ماداروه يقابلوا الناس بثقه مفرطه في النفس وصحة وجه ليس لها مثيل..
🍃وطوبى..
كانت عايشه في حالة من السلام النفسي تحسد عليها..خصوصا بعد ماتخطت الثلث الاول من العده...كانت حاسه روحها واقفه ع خط فاصل بين الظلام والنور وتوا قاعد تعدي في الخط وحده وحده لين تطلع للنور بكل مافيها..
وفي نفس الوقت..قاعده تابع في خطتها لتأديب كل من آذاها وظلمها وذلها...
وجي يوم النتيجه...
🌿13فبراير....سنة 2019..
الساعه 5:30عصرا..
تخش سيارة شكري اخ هاديه لشارع القهوة..
كان جايب معاه الهاديه والطلب اللي وصاته عليه مطيره..
وين قربوا يوصلوا للمحل..
لقوا مطيره طالع من المحل وفي يدها كورة وسكين تورته كبير وقعدت تفلق بيه في الكورة..
هاديه بضحكه:يعطيك الهني يامطيره..
وشكري يضحك..
☘لوحت مطيره عقاب الكورة وقالت..
/وكان ماتنتلفوش من هني انت وياها بالشبشب ع ظهوركم..
الولاد هربوا يجروا بعد ماشافوها تهدد بالموس..
مدت هاديه يدها لمنبه الصوت وضغطت عليه..
سمعت مطيره الصوت التفتت..
شافت شكري يشوفلها ويضحك..هالمرة وع عكس طبعها الجريء والعفوي حست بشي من الخجل طول خشت داخل..
نزلت الهاديه وهي تضحك ومشت طول للمحل..
🍃هاديه بضحكه؛شن دارت الكورة؟
وحده من العاملات؛جت ع طلبيه شرقيات بنبعتوها لزبونه توا كلها طاحت..
هاديه:لايستاهلوا تفلقيهم حتى هما مش غير الكورة.
مطيره بإحراج؛ياعليك موقف ع قدام خوك!
هاديه بضحكه؛تي عادي..هو جي معاي وجايبلك اللي وصتيه عليه ومعاهم زي" بادين "زيت زيتون ليك ولسميرة..
مطيره بإبتسامه؛بارك الله فيكم..
دق ع باب المحل..
هاديه؛هو شكله..ومشت فتحت الباب وطلعت..
🍃شكري:ماتبي شي؟
هاديه؛لاسلامتك..
"خوي شكري صحيت وبارك الله فيك"
كلماته من ورا الباب..
هو ابتسم وقال..
/فيك بارك الله..وكان جي يوم ونقص عليكم شي قولوا للهاديه طول وان شاء الله مانقصرش..
ابتسمت هاديه..
"بارك الله فيك كفيت ووفيت"
شكري:السلام عليكم..
ومشي لسيارته..ركب وتحرك طول..
وتطلع مطيره دخل الحاجات وهاديه تعاون فيها...
🍃🍃🍃🍃
داخل في الحوش..
تحديدا الكوجينه..
☘آلاء:توا ركزي معاي كويس وشوفي كيف تنقص..
وطوبى جنبها تراقب بإنتباه كانت تبي تتعلم دير التورته بحشوات مختلفه...طلبت من الاء تعلمها بش بدير وحده بروحها لزينب اللي حاليا تكون معلمة القرآن متاعها..
وقعدت الاء توري فيها بالخطوة شن دير وطوبى تحفظ في عقلها..
وبعد ما فاتت ربع ساعه..
آلاء:وزينيها بعدين باللي تبيه..
طوبى بشي من الربكه..
/نحس صعب من الاول نجيبها هكي انتي فنانه الله يبارك..بس نحاول..المراة طلبتها مني اني..
آلاء؛عندها مناسبه!؟
طوبى بإبتسامه؛لامافيش مناسبه بس تبي دير ليلة رومانسيه ليها هي وراجلها..
الاء؛حي تطلع يوم الحب نخنقك..
طوبى:شن تخرفي المراة ملتزمه وتعلم في واصواتهم طالعه للمحل والعاملات يسمعوا وهما متشوقات..
وفي الشارع..
قدام مطحن الزعيم..
كانوا المهدي وبوه واقفين قدامه ويسمعوا..
المهدي كان يشوف لبوه بطرف عينه بان عليه فرحان تقول اول مرة بيتزوج في حياته..
قربله وطبس عند وذنه شويه وقال..
/حلال عليك والله..
شافله بوه وهو شاد ضحكته ويقول..
/تحشم..
المهدي عدل وقفته وهو مبتسم ع جنب..
🍃وفي حوشهم..
كانوا خواته عند امه ومعاهم الكنه يهدرزوا ع عرس حنان وشن بياخدوله..
ويسمعوا زي باقي اهل الشارع صوت الدربوكه اللي جاي من حوش الواعر..
خديجه؛عيلة دردنو..
نسرين؛عرسهم الشهر الجاي..
مغليه بحقد؛هججاته الله يهججها وتوا بتتزوج..
نسرين بنرفزة؛باهي فكونا من هالسيره وقولولي كسوة حنان في الحوش ولا الصاله!
خديجه؛لافي الحوش غير ان شاء الله يديروا طاولات وكراسي..
نجاة:ان شاء الله خل الواحد ياخد راحته فالتقعميز...
🍃🍃🍃🍃🍃
تاني يوم..
الخميس..
14فبراير...2019..
الساعه 11:15صباحا.
في باحة المدرسة اللي تقرا فيها راما..
كانت مقعمزه مع صديقة سوء من قروب اسماء اللي قاعده تعلم فيها كيف طيح ولد خالها في حبها..
:حوبه وهبله ياراما..وحده بجمالك طيح الاقوى منه ولد خالك هدا..تعلمي كيف تستخدمي انوثتك ياهمي ودلعي شويه صدقيني مافي واحد يقدر يصبر قدام الجو هدا..
راما بأرتباك..
/كيف يعني فهميني!؟
:اليوم عيد الحب اقوى فرصه تجيك..مش قلتي خديتله هديه خلاص اعرفي كيف تعطيهاله ووين،وديري اللي نقولك عليه..
🍃ومن مدرستها لمدرسة ولد خالها..
محمد المهدي بضحكه..
/ربي يثبت علينا العقل والدين..شن فيه من منظر الشال الاحمر اللي لابسه!.
مؤيد؛خليك في حالك لوسمحت..
محمد بضحكه؛قصدك بتخليها تشوفه ولاكيف!
مؤيد؛ايه بنمشي لمدرستها اليوم بعد المرواح بيرفعني عدنان..
محمد مرر نظره ع الساحه بتفكيره..بعدين شافله وقال..
/نسايرك!؟
ابتسم وقاله..
/سايرني..
🍃🍃🍃🍃🍃
وتعدي ساعه ونص..ويجي موعد الانصراف..
ويوصل واحد من معارف مؤيد الولاد لمدرسة مناسك ومروة..
نزلوا ومشوا وقفوا تحت شجرة مقابله المدرسه..
وكانوا الطالبات كيف باديات يطلعوا..
🍃داخل..
مروة بضحكه؛كان يشوفه مالك يشنقك بيه..
مناسك وهي مبتسمه بتوتر..
/فكينا من سيرته تربحي..
وطلعوا برا...وقعدت مناسك دور بعيونها في مؤيد لين لقاته..
والزوز قعدوا يتبادلوا في الابتسامات..
ومروة شاده ضحكتها..وعيون محمد مانزلوش عنها..
مررت نظرها لين ثبتوا ع سيارة جايه من بعيد..
بحركه سريعه جبدت الشال من رقبة مناسك ولبساته..
ومناسك تشوفلها بفجعه..
مروة بتوتر غير ملحوظ:مالك مالك..مالك..
مناسك شافت سيارته جايه شحب لونها من الخوف..
هو درس قدام المدرسه نزل المرش وأشرلهم يجوا..
مناسك:خيره!؟
ومشتله..
وقفت ع السيارة وقالت..
/شن في علاش جيت..
مالك من ورا نظاراته يشوف لمروة وهو يقول..
/السواق صارله ظرف بنروح بيكم اني..
التفتت مناسك شافت لمروة بعدين مشتلها...
وصلت فيها وقالت..
/السواق صارله ظرف بيروح بينا مالك..
مروة:نشوف امي قبل..
ومشت بتولي تخش المدرسه..
كلكس مالك..مشتله مناسك تجري..
فتحت الباب وركبت..
مالك؛خيرها مروة؟
مناسك؛قالت بتقول لأمها..
مالك بنرفزة:تي امها كلمت امي قالتلها عندي مشوار مانقدرش نروح بيها قولي لمالك يروح بيها هي واختها..
مناسك؛مفروض قتلي الدوة هادي كلها من الاول..
سكت وهو معصب ..مرر نظره حواليه ثبتوا عيونه ع محمد..
محمد كان يشوفله بإمتعاض..
وهو بادله بنظرات حاده وقال..
/هدا شن يدير هني!؟
مناسك بإرتباك؛من هو؟
مالك بعصبيه:الزفت هداكا ولد شارع مروة..
مناسك بلعت ريقها وقالت..
/مانعرفش ماشفتاش..
ع جية مروة..ركبت ورا مناسك وهي تقول..
/السلام عليكم..
مالك؛وعليكم السلام..مروة هدا شن يدير هني..
مروة بإستغراب:مني!؟
مناسك؛هداكا محمد ولد شارعكم..
مروة قعدت دور بعيونها برا لين شافاته تبدلت نظرات عيونها للغضب..غيرتهم عنه وقالت..
/مادخليش بيه..تحرك باالله..
تحرك مالك وهو يقول..
/مروة كان يضايق فيك قولي..
مروة بضيق:لا مايضايقش فيا فوته..
سكتوا ..وقعد فتره الصمت سائد..
لعند ماشغل مالك المنظومه ع أغنيه...
"صدقني خلاص"
مروة لما سمعتها..احمر وجهها وربعت ايديها خجلا وارتباكا وقلبها زادت دقاته وقعدت مركزة بنظرها للروشن..
ومناسك تسمع وتسرق في النظر لخوها..
وهو كان حاس كل كلمه فيها ويبيها توصل لمروة...
وهي فعلا وصلتها..بس يقعد هداكا الحاجز الغير مرئي بالنسبه ليه وهو اللي هو يشوف فيه اعلى واقوى من سور قلعه محصنه..
تنهد وشاف للطريق..لقي واحد يعرفه القى عليه التحيه..
ومالك ردها بنبرة مختلفه...
"مراد حبيبي.."
توسعوا عيونها بفزع..لما جاها الصوت يشبه لصوت واحد تتمنى لو تقدر تمسح شكله وصوته وكله شي يعنيه من ذاكرتها..
شافت لمالك طول وهي مركزه فيه..
هداكا ماعنداش لحيه وكان رقيق...ولبسه غير مقبول وايديه معبيات خواتم وحدايد وفي رقبته سلسله..
لكن مالك هيئته مقبوله ومهندم..مايلبسش في اكسكسورات غير الساعه..ملتحي..ومليان بعض الشي..
قالت في نفسها..
"وين مشي عقلي عليك هبال!..وبعدين الاصوات تتشابه عادي اغلب الاولاد يكلموا في بعض هكي"
غيرت نظرها عنه للروشن ومازال الخوف في قلبها..
وهو قاعد يسوق عادي مش مركز ع شي..
لين وصلوا لمدرسة تاله..
مروة نزلت المرش وقعدت تنادي في اختها..
من جهة تانيه كانوا راما وصاحباتها يراجو في الباص..
وحده منهم قالت..
/مش هادي مناسك اخت مالك اللي كان صاحب اسما!؟
:ايه هي نفسها!؟ حي كان مايكون مالك اللي جنبها!
راما بصدمه؛كيف مروة راكبه معاهم!!؟
:حي ع الجو!!؟
وركبت تاله جنب اختها وتحرك مالك طول لشارع القهوة..
🍃🍃🍃🍃🍃
وفي نفس الوقت كانت فايزة مع صفاء في وحده من العيادات..
دارت صفاء تحاليل معينه..وبعد ماطلعت النتيجه مشت مع امها لطبيبة نساء..وعرفوا منها ان صفاء حامل ليها مايقارب الشهرين...
☘في الطريق .
فايزة بضحكه؛معقوله ماحسيتي بشي!؟
صفاء بشي من الاحراج..
/ندوخ مرة مرة..تحسابه من تعب القرايه والسهر..
فايزة؛مافيش وحم..!؟
صفاء:لالا مش حاسه بشي تاني غير الدوخه ..
فايزة:ان شاء الله تفتكي من تعب الوحم بش تكملي السنه هادي ع خير..
🍃وبعد ماوصلوا للحوش..
ركبت صفاء مع امها لخواتها وبشروهم بالخبر..وتاله اكثر من فرح بيه..
بعدين روحت صفاء لحوش اهل راجلها..
واول ماخشت مشت طول لعزوزتها وبشرتها...
نجمه بفرح؛الله يبارك الله يبارك..حتى نجاح في العياده بتجيب..
صفاء:عواطف معاها؟
نجمه:ايه هي وسميره..
صفاء؛تحل عويناتها ع خير يارب..
نجمه بقلق:يارب..
🍃وعواطف وسميره في العياده قاعدات ع نار يراجو في خبر يفرحهم عن نجاح..
وجي هالخبر المفرح..جابت نجاح وليد..وهي وياه صحتهم ممتازة...
☘وقت خشوا الزوز ع نجاح فرحت من قلبها بشوفتهم..
هنوها ع مولود وتحمدولها بالسلامه..ولعند هني كانت عواطف حاسه بمشاعر فرح بس..
بس مجرد ماجابوا لنجاح ولدها وشافتها كيف ترضع فيها..
حست بشعور مؤلم تجمع في صدرها..كانت تبي تبكي بس قاومت دموعها بكل قوتها...
🍃🍃🍃
قعدت لقبل العصر بعدين كلمت خوها عبد الفتاح يروح بيها ودارت حجتها امها..وسميره قعدت مع نجاح....
☘سمعت بيها صفاء روحت مشت طول لدارها بش تبشرها بخبر حملها...بس مجرد ماوصلت لباب الدار سمعت صوت بكاها...قلبها وجعها عليها هلبه..بسرعه عرفت السبب من غير ماتفكر فيه..وتراجعت عن انها تخبرها...
ومشت طول لعزوزتها..
☘نجمه بحزن؛سيورها تعرف يابنتي..
صفاء ودموعها في عيونها..
/اني قصدي اليومين هادم بس بعديت نخبرها..
نجمه؛ماتخليهاش تعرف من غيرك..
صفاء هزت راسها بإيجاب والحزن مسيطر ع ملامح وجهها...
🍃🍃🍃🍃🍃
وفي حوش شنيبه..
خديجه دايره ميعاد مع امها وخالاتها..وماتندريش ع بنتها اللي قاعده شويه شويه تتخلى عن برائتها وحيائها وتمشي في طريق اخرها ندم...
وللأسف لازم يكون لطيش وضياع صغارها ضحيه بريئه مالهاش أي ذنب..
☘نزل محمد من الشقه بطريقه لباب الحوش ناوي يطلع..
جاته جوري تنادي..
/محمد..محمد..
وقف وشافلها..
جوري:تعالى شوف حمزة..
محمد؛وينه..
جوري:مقعمز جنب الشلال ويبكي..
عقد حواجبه بقلق ومشي طول..
وجوري مشت تجري خشت داخل..خدت تليفونه راما من ع المدخل وكتبت رقم خالتها صابرين واتصلت بيها..
🍃وكان هدا مقابل عرضاته عليها راما لو دارت اللي تبيه منها🍃
ويتوجه محمد لمكان الشلال..
ويوقف مصدوم في مكانه لما شاف راما مقعمزه عليها وهي لابسه سروال اسود ضابط محشي من تحت في بوت اسود..عليها بلوزه بيضا طول وفوقها قولف اسود مسكر وعليهم جاكيت احمر..وكانت طالقه شعرها وحاطه مكياج خفيف..
ماصدقش انها نفسها راما..تبان وحده تانيه اكبر من عمرها بهلبه..
ابتسمت لما شافاته كيف يتأمل فيها..وقفت ع حيلها وقالت.
/محمد..
هو استاقظ لنفسه..عقد حواجبه وقدملها وهو يقول..
/شن ديري هني..
راما:شي سمعت حمزه يبكي جيته هدرزت عليه شويه وغيرتله جوه وبعدين مشي لحوشكم..
هو مرر نظره عليها من فوق لتحت وقال..
/شن اللي دايرتيه في عمرك هدا!؟
راما:شي..عادي..دايراته في الحوش..
محمد:مازال صغيره ع الدوة الفاضيه هادي!
راما؛لامش صغيره..اني كبرت خلاص..وحتى في داخلي هلبه مشاعر كبرت ليك..
هو بصدمه قال:شن هي!!؟
طلعت من جيب بالطوها بوكس هديه صغير ومدتهوله وقالت..
/ماتردنيش..
محمد تنهد وقال..
/راما..اني نشوف فيك زي سدره تمام..نخاف عليك حتى من نفسي ومانرضاش فيك اللي مانرضاشي لأختي..
رفعت حاجبها وقالت..
/ومروة!!؟
محمد؛شن جاب سيرتها هادي!
راما بإنفعال..
/انت ديما تشوف لمروة بس حتى بعد اللي داراته مازال تجري في جرتها..راهو مروة هادي مافي حد يعرفها زيي اني وحده صايعه ومن تحت لتحت..حتى الولد اللي شدوها معاه وقال القصه اللي صارتلها مفبركه بش يشوهوها اليوم بس شفته مروح بيها شن معناه هدا قولي..!!؟
محمد بصدمه شديده..
/راما رد بالك تخليني نشوفك هكي مرة تانيه..
ومشي وخلاها وهو في حالة صدمه من اللي سمعه..معناها برائتها من الافتراء كانت كلها كذبه..وماطلعش ظالمها بحكمها عليها..!
🍃وماكانش عارف ان طاح في نفس الفخ اللي طاحت فيه مروة قبل وحيكون اكبر درس يتعلمه محمد في حياته...
🍃🍃🍃🍃🍃
الساعه 9:30ليلا.
ورا باب دار مناسك المسكره..
كانت مشغله اغنيه وهي تكلم في مؤيد هاتفيا..
"والله شن بنقولك خوك قبل كان يلحق في مروة وخواتها ويناشب فيهم ومحمد تعارك هو وياه ع خاطرهم"
مناسك بصدمه؛معقوله!
"هدا اللي صار..هي في قصة صايره لمروة نحس فيك ماعندكش بيها علم"
مناسك بخوف:هي قالتلي حولت من مدرستها بسبب مشكله لكن مابتش تحكيها..
"ايوه..هي هادي..مروة فصلوها من المدرسه لما شدوها واقفه ع ولد ورا المدرسه.."
مناسك بعدم تصديق..
/مروة!!؟ والله مانصدق لو نشوف بعيني..
"مناسك محمد اليوم عرف ان الولد اللي شدوها معاه نفسه خوك"
مناسك وقتها حست بصاعقه نزلت عليها..
جمدت ولسانها ارتبط وعقلها انشل عن التفكير..
ومؤيد كمل يقول..
"هما قبل قالوا ان القصه افتراء وفي من دبرلها اللي صار بش يشوه سمعتها..لكن مدام خوك لتوا علاقته بيها وبعيلتها كويسه معناها..."وسكت
مناسك بصوت مخنوق..
/بنسكر..ونهت المكالمه..طيحت تليفونها في حجرها وغطت وجهها وهي مزال في حالة صدمه وعدم استيعاب..
ياريتها تقدر تمشي لخوها وتتأكد من اللي عرفاته وتعرف باقي التفاصيل المبهمه بس خافت يسألها من وين عرفت وهي ماتقدرش تكذب عليه خوفا منه..
نزلت ايديها ع وجهها ودموعها ينزلوا ونظرها موجه للفراغ..
توا بس تأكدت من خسارة مروة الحتميه لو عرفت حقيقة مالك....
🍃🍃🍃🍃🍃
"هيا قنوشه ماما هيا اخر وحده هي...هممم"
وجنه مقعمزه ع الفراش تاكل في مهروس الخضرا وبعد كل كاشيك تصفق لروحها تقليدا لأمها..
طوبى؛نجيلي بنوته ماما..حطت الصونيه ع جنب ورقدت عند رجليها وهي تشوفلها وتقول..
/سموحتي غدوة بتخشي 7شهور ياقلبي..ربي يعطيك الوقت الطيب ياعيوني..
حطت جنه صبعها في فم امها..عضاته طوبى بخفه بعدين ناضت بنص جسمها وهي دير في روحها تاكل فيها وجنه تضحك..
طوبى بضحكه؛نجيلي هالعسل..خفت ضحكتها وضيقت عيونها وقعدت مركزه ع فمها..حطت صبعها في فمها وقعدت تتحسس في اللثه من فوق..ضحكت بمفاجأة وقالت..هدا علاش اللي تشديها تقعدي تقرقدي فيها..كيف راحت ع بالي حكاية السنون..
وقعمزت كويس وحطت بنتها في حضنها وهي تقول..
/اسفه ياماما مش عارفه كيف نسيت!..خل نتصلوا بخالتك غرفه نفهموا منها الوضع كويس..
وناضت بيها ومشوا مع بعض للدار..
🍃وغرفه في حوشها..
مقعمزه تبكي من ولادها..تعبوها بمشاغبتهم..وغير هكي بدت تحس بأعراض خايفه تعرف سببها..
سمعت تليفونها يرن تجاهلاته..نفسيتها كانت جدا تعبانه وماعندهاش رغبه تكلم حد..
☘خش عليها رؤوف بعد ماروح من برا.
لقاها مقعمزه جنبها واحد من الولاد راقد والتاني مرقداته ع رجليها وتهز بيه..
قربلها لقاها تبكي..
بخوف قال:خيرك!؟
غرفه وهي تمسح في دموعها..
/شي..
قعمز وقال..
/غرفه تكلمي شن في!؟
هي بحده..
/قتلك شي..خلاص..
عقد حواجبه وهو يشوفلها بعدين قال..
/تقولي بروحك ولانعرف بروحي!
هي بعصبيه وانفعال..
/تعبت تعبت من هالعيشه..حسيت روحي دفنت روحي بالحياة حوش وصغار وهم. معاش ملحقه على شي ونخمم في الف شي..كبدي درهت ومليت..
☘ولا كلمه..ماردش بكلمه..ناض وسيبها...لا..
زاد قربلها وجي جنبها وخداها في حضنه وضمها بقوة وهو يقول..
/عندك حق..عندك حق..وعاذرك..باهي شن رايك نخلوهم في حوش ماليك ونسافروا نغيروا جو..نمشوا لسابنجا..شن رايك..
زادت ضماته وقالت..
/نحبك..
ضحك وزاد ضمها وقعد يمسح ع شعرها بلطف وحب...
🍃🍃🍃🍃🍃
20فبراير...سنة 2019..
كان يوم عقد قران حنان..وفي نفس اليوم "الرشده"..
اغلب الجيران مشوا حضروها..ومنهم اللي ماحضرش زي عيلة شنيبه..
اما نساوين حوش الواعر كانوا غادي من بعد الظهر وعاونوهم في تجهيز رشده
ماعدا طوبى اللي روحت متأخر في هاليوم من الكليه.
درست السيارة فم الباب..ونزلت منها وخشت للحوش..
ع جية اللاند كروزر..درست قريب ع مطعم ربيع..
وينفتح الباب وينزل منها صاحبها..اللي لماشافوه صحابه ابتسموا بإعجاب..
ربيع:تانميرت..تانيمرت..
حط طرف الشاش "العمامه ع كتفه..ومشالهم وهو يضحك.
سامي بإبتسامه؛تعرف نبي نصورك حالا..
عبد القيوم؛بعد الفاتحه ان شاء الله..
سامي: بنرفعك لمكان مش عادي للتصوير وناخدلك لقطات العمر .
عبد القيوم:صورني مصور معروف قبل شايفيهن الصور ع صفحتي!
سامي:ايه..ابدع حقيقة..بس خليني اني نصورك وشوف شن يطلع معاي..
ربيع:وخيرنا حني مايجيش علينا! طارحلك بزبون ازرق ملكي حتى اني..
سامي بضحكه:حاضر ناخدله لقطات بروحه بعدين نصوركم مع بعض..
🍃وينفتح باب حوش لطفي الواعر..
وتطلع منه طوبى بعد ماغيرت وصلت متوجهه لحوش اهل حنان..
لما سكرت الباب..عيونها بنظرة عابره جو عبد القيوم..
غصب عنها ولت شافتله مرة تانيه...
هالمرة كان مختلف تماما...يبهر العين يخليها تخون صاحبها غصب عنه..
الزي التارقي يبرز في شخصية عبد القيوم اكثر من اي زي تاني..
كان يبان فيه جذاب اضعاف مضاعفه ع جاذبيته المعروفه.
هو ماكانش منتبه لوجودها لاهي بالهدرزة مع سامي وربيع..
وهي مركزه ع تفاصيله لما يتكلم..بالذات وين يجي يضحك وينزل نظره للأسفل..كان منظره هدا حلو بالمره..
وفجأه..قلبها..بدي يدق في دقات غريبه عليها...لاهي دقات خوف ولاانفعال...دقات سريعه ومحسوسه..بس كانت تعطي صاحبها شعور حلو..
🍃ربيع ركز عليها بس ماباش يتكلم قدام سامي..
هي استاقظت لنفسها..تعوذت من الشيطان واستغفرت مرات ومرات..مشت ركبت السيارة وشغلتها وتحركت لحوش اهل العرس..
عبد القيوم انتبه وشاف للسيارة وهي ماشيه ونبضات قلبه تسارعت وتحسر لأنه ماشافهاش ليه مدة طويله ماجاش لشارع القهوة بسبب ضغط الخدمه...وفي قلبه شوق كبير فوق شوقه لشوفتها..
☘سامي:ايه بنقولك..بنت الكسابكجي كلمتني..
ربيع ضحك..
عبد القيوم عقد حواجبه وقعد ساكت..
سامي:حطتني واسطه بش نقنعك بموضوع..
ربيع بضحكه:اكيد خطوبه..
شافله عبد القيوم بإمتعاض..
سامي بضحكه:لاهدا تفتحه معاه بروحها..
عبد القيوم:عدوا اركبوا للسيارة عدوا..وانتم ماعندكم ع قطاف وخلاص..ومشي بيركب لسيارته..
وهما لحقوه وكانوا يضحكوا عليه....
🍃🍃🍃🍃🍃
وتم عقد قران حنان وكانت الفرحه واضحه في عيونها..
وماقدرتش تكتمها لما داروا شوط دربوكه..خشت في نص النساوين وقعدت ترقص....
طوبى وهي تتفرج عليها..بدون سبب تخيلت لو كان اللي عاقد عليها عبد القيوم..جي بين عيونها..حست بالجو سخن فجأه...لدرجة انها رفعت ايديها وحطتهم ع خدودها تتحسس فيهم شويه ونزلتهم وولت تصفق وهي في قمة الارتباك والتوتر ..
🍃🍃🍃🍃🍃
"هلأ بدنا نبلش بمرحلة الكهربا ومايتبعها.."
هدا ولد عم سلافه جايهم زياره..كان يحكي ع حوشه اللي يبني فيه وعن المرحله اللي وصللها..
عمه اب سلافه قال..
/انجاز..وصلت لهالمرحلة بزمن قياسي..
:الحمد لله في مصاري..
سلافه بتفكير:في عندك مهندس كهربا عم يشتغل ببيتك؟!
؛لا والله المهندس اللي بحكي معو بيحكي ب اجر فلكي..
سلافه ابتسمت..
/شوف انا بعرف واحد كثير شاطر ومابتهموا المصاري بحكيلك معو وبردلك خبر..
بوها؛من وين بتعرفيه؟
سلافه بإبتسامه؛خطاط متلي..
هز بوها راسه بصمت..
ولدعمها ؛خلاص احكي معو ورديلي خبر بأسرع وقت..
سلافه وهي مبتسمه بحماس مخفي..
/إن شاء الله...
#نهوض
#طوبى
....يتبع....
