#طوبى "جنة طوبى"
#جمان_فريد
#الجزء_102"البوم ذكريات"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
(من اكثر الصلاة على رسول الله نور الله قلبه)
الإمام ابن الجوزي رحمه الله...
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 خداع الناس أسهل من إقناعهم أنه قد تم خداعهم."
مارك توين🍃
______________________________________
يوم الأحد....
صباح خريفي جديد..وكعادته الخريف فصل فيه كل المتناقضات..مرة جوه معتدل ومرة سخون ومرة بارد
ومرات يوم منه يجمع الأجواء هادي كلها..
هاليوم كان بارد..
لهدا كان فطورهم في دار المعيشه وحديثهم ع الفطور عن..
طوبى:اكيد لا..مش بالي الزواج بكل لامنه ولامن غيره..
صفيه:خسارتهم والله ناس كويسه ربك مش كاتبلنا نصيب معاهم..
فايزة؛اكثر حاجه عجبتني فيهم مش متحكمين في اختيارات ولادهم عزارة "عزابه" وعادي عندهم ياخدوا ارمله ولامطلقه..
سدرة حطت طاسة العصير وقالت..
/ناس مقومه عقولهم كبيره..
مطيره؛صدقتي حتى لما عزمناهم ع عرس يوسف قالوا بيجوا ودعوله بالهني..
ابتسمت صفيه..
غرفه ضحكت وهي تاكل هما انتبهولها..
بلعت لقمتها وقالت..
/نقوللكم حاجه داستها ليا شهور..ريتي عدي خو ابله زينب..
طوبى بإنزعاج؛ماتقوليهاش..
غرفه بضحكه:مكلم عبد الرؤوف عليك وملمح لخالي..
سدرة شافت لطوبى بإبتسامه..
طوبى بضيق؛مانبيش نخسر اخته..
مطيره؛وليش ياكبدي تخسريها كل شي بالسيف الا الزواج..
طوبى تنهدت وقالت..
/تو نسكر الموضوع بطريقه غير مباشره..
فاتن بإبتسامه؛مش حيكونوا اخر الخطابه ياما بيندق بابكم ياطوبى وتنطلبي الله يبارك عليك مراة ماتتفوتش..
ابتسموا وهما يشوفوا في الخجل كيف بان ع وجه طوبى وهي ترد ع فاتن..
/تسلمي حبيبتي..لكن اني خلاص سخرت حياتي لبنتي وحندير معاها زي مادارت فايزة مع بناتها ربتهم احسن تربيه وطلعوا الله يبارك عليهم كل وحده احسن من التانيه..
ابتسمت فايزة بإمتنان ودموعها في عيونها وسدره تشوفلها بإبتسامه فخر..
فاتن بإبتسامه..
/ربي يبعتلكم ايام حلوة زيكم يارب..رفعت تليفونها لما جاها اتصال..شافت المتصل لقاته الأقجم..ردت نظرها ليهم وهي توزع فيه عليهم بإبتسامه وتقول..
/خلاص بنروح توا..ناضت..
كيف جت سدرة بتنوض شافت لطوبى لما قالت..
/ارتاحي سديرتي تو نطلع معاها...
ابتسمت فاتن ومشت سلمت عليهم كلهم..بعدين طلعت مع طوبى..
🍃برا..
فاتن؛تعالوا للفيلا ارجوك..
طوبى بإبتسامه؛ع خاطرك حاضر..
ضحكت وقالت؛بيناتنا تليفون تو نكلمكم ونعطيكم موعد..
طوبى:إن شاء الله...
ومشت معاها لين وصلت في الباب فتحاته وطلعت..سكراته طوبى وراها وهي تفكر في عزومة فاتن لحوش مختار..
خدت نفس..ومشت خشت داخل ومازال عقلها مشغول بالتفكير..
🍃وعقل نبيله مشغول بالتفكير في حالة سدرة الغريبه اجلت الكلام عنها لليوم مع المحجوب تبيه يفسرلها تصرفات سدرة الغير مبررة بالنسبه ليها..
حطت قدامه فنجان القهوة وقعمزت مقابلاته..
حطت مرفقها ع الطاوله و يدها تحت خدها وقالت..
/محجوب..
رشف من القهوة ورد عليها يقول..
/امم..
عقدت حواجبها وقالت..
/مش ملاحظ في شي غريب في تصرفات سدرة اتجاهنا!؟
هز راسه بصمت..
قالتله بتساؤل:علاش في نظرك!؟
تنهد وقال..
/هداكا قالبلها عقلها ..
نبيله؛كيف!؟ شن بيكون قاللها بش مخليها واخده منا موقف ومش قابلتنا..بيكذب كذبه سهل تنكشف!؟مش حتسأل هي متلا ولا تحاول تفهم!؟
المحجوب؛الباين انها لاسألت ولاحاولت تفهم وهو مخليها دير هكي..عندي احساس انها حكالها الشي اللي صار بس بروايته هو..
نبيله بإستياء:مش معقول البني آدم هدا مش معقول..
المحجوب:حتى خوك تبان مش طايقاته..
نبيله؛واضح..هدا ومازال ماتعرف بتلبيزته..
المحجوب:الحاجه هادي بالذات لو يعرفها مختار حيستخدمها لصالحه..
نبيله بضيق..
/معاش تفرق..اهل غرفه خدوا موقف باين انه طويل الامد وغرفه نفسها تغيرت معاي حتى اني قبل كانت تعامل فيا زي اختها الكبيره لكن توا العلاقه بيناتنا ولت رسميه وتقليديه زي علاقه الكنه بمرت خوها..
تنهد المحجوب ورجع رشف من قهوته والتزم الصمت ونبيله كذلك اللي سرحت بتفكيرها وع وجهها باديه ملامح الضيق..
🍃🍃🍃🍃🍃
وفي شارع القهوة في وقت زوال الشمس..
كانت رقيه متوجهه بخطواته سريعه لحوش محمد شنيبه مش مصدقه امتى توصل بش طلع الاخبار اللي عندها...
وصلت..واستقبلتها مغليه ودخلتها للصاله..
🍃مغليه:عازمتها اخت الحاج محمد العشا امس هي صححت وجهها وباتت عندها..
رقيه:الحق استغربت لما ماريتهاش امس ع حسب مانعرف ولت تخش المناسبات عادي..
مغليه بإنزعاج:اخر همي فكينا من سيرتها وقوليلي من مشي من الجيران؟
رقيه:قريب الشارع كله غادي..الحق الصاله كبيره واللمه تقول حفلة عرس..
بدت ع وجه مطيره ملامح التهكم..
ورقيه متابعه تقول..
/وكل شي واقفه عليه طوبى..ماشاء الله عليها رايحة زي الغزاله والعيون عليها وبدوا يخطبوا فيها..
رفعت مغليه حاجبها..
رقيه؛تتفكري عيت الفاندي اللي ولدهم كان واخد سدرة وتوفى..واحد من ولادهم يبيها عزري ومن جماعة******
مغليه بكبر؛مليشاوي معناها..اصلا هدا اللي يمشي معاهم البلطجيه والمجارم..كانك عليا اني اخر همي تاخد ولاتنحرق المهم بنتنا تقعد عندنا وتتربي بيناتنا وبوها حداها..
ضيقت رقيه عيونها وقالت..
/قوليلي يامغليه حق الجالي يتعالج برا عند الطب النفسي!..
تصنعت الصدمه وهي تقول..
/شن هي!!! من قالها الدوة هادي!؟
رقيه:الناس كلها ماجبتها من عندي..
مغليه بحقد:مافيش غيرهم هالعيله الهبوطيه يديروا بلاهم ويرموه ع الغير..ولدي يخدم برا عنده مشروع كبير في****** وان شاء الله مروح قريب بمريته..بنت الاصول اللي ياما رت وصبرت وقعدت مع راجلها مابتش تفارقه..
هزت رقيه راسها بصمت ومن داخلها مش مقتنعه بولا كلمة من كلام مغليه...
🍀🍀🍀🍀🍀🍀
وتعدي ايام هالاسبوع..يوم ورا يوم..
وحال البلاد كما هو عليه نص تحت القصف والاشتباكات وشبح الموت يحوم عليه..ونص تاني عايش حياة هاديه لكن تبعات الحرب ولت عليه في معيشته...
🍃يوم الثلاثاء من هالأسبوع كانت الجلسه التانيه لسدرة مع الطبيبة النفسيه..الجلسه هالمرة كانت في شقة فايزة..طولت اكثر واستمرت لساعتين وربع الساعه..وكاسابقتها طلعت سدرة متعبه من هالجلسه حتى انها طلبت من فايزة تخليها تبات عندها وكلمت طوبى تجي تقعد حداها..
ولافايزة ولاطوبى سألوها عن شي بالعكس حاولوا يغيروا جوها ويرسموا الضحكه ع وجهها...
روحت تاني يوم..لكن رجعت لحالة الصمت والانعزال وبطلب من طوبى كلهم خلوها ع راحتها..
🍃وخوها الكبير طول هالاسبوع كان مع زوجته في مدينه من مدن الغرب الليبي عزايم ومجاملات ونفاق اجتماعي انجبرت عليه فاتن لأجل زوجها ومصالحه وهو لاحظ عليها التغيير والنفور من هالجو اللي كانت متعوده عليه والسبب عنده شبه معروف..
🍃لكن مش معروف سبب رفض طوبى لأيمن طلبه للزواج يوم الاربعاء رفع اخته سعاد بعد الحاح عليها للمدرسه بش يكلمها مباشرة وللأسف رجعوا بخفي حنين لأنهم مالقوش طوبى..
🍃طوبى اللي قعدت طول هالأسبوع في الحوش ماطلعتش منه حتى للمحل..خلت امر المدرسه لأميمه واريج والمحل لعمتها ومرت عمها هاديه...
وسدرة في عز همها وحاله الكدر اللي كانت عايشه فيها قعدت تخمم فيها وقررت تتكلم معاها..
☘☘☘☘
يوم الجمعه...
الساعه 12:30قبل الظهر..
طلعت سميرة بجنه ومعاها يزن ولد المهدي لحوش جده..
وطوبى بعد ماسقدتهم زادوا ضيق صدرها وحزنها..
خشت طول للحوش وتوجهت لدارها..خشتها وسكرت عليها وانفردت بصديقها الصدوق القرآن...
☘في الوقت اللي فيه كانت سدرة تقرا في سورة الكهف ودموعها ينهمروا من عيونها...
كملت قرايه..حطت المصحف في مكانه..ومشت طول للدار وهي تشم في ريحة كسكسي عمتها اللي فكرها بالأيام الخوالي..
وصلت للدار فتحت الباب وخشت..وشافت مازاد وجع قلبها..
طوبى شاده تليفونها..تقرا في القرآن بصوت منخفض وهي تبكي بالعبرة المكتومه..
سكرت الباب ومشت قعمزت جنبها وهي تقول بصوت مرتعش..
/طوبى بنتي..
طوبى لما سمعت نبرة صوتها..حطت التليفون ع جهة..هدت شويه وشافتلها..حضنت يدها بإيديها الزوز وقالت..
/ماتخافيش ياقلبي..بس اني هكي لما تمشي وتخليني مانتحملش..
جبدتها لحضنها وضمتها وهي تقول بنبرة ألم..
/حسبي الله ونعم الوكيل..ياريتني ماخليتك تتزوجي ياريتني خليتك قعدتي جنبي..مافيش راجل يستاهلك انتي مافيش..
طوبى تمالكت نفسها وحاولت تقوي روحها وهي تقول..
/نصيب ومقدر عليا ياسدرة لو مهما ديري مش حتقدري تمنعي عني شي ربي يبيه يصير..
بعدت عنها وشافت لعيونها وهي تقول بضحكه من بين دموعها..
/زمان كنتي تقوليلي انتي احلى حاجه في حياتي انتي نعمه عطهالي ربي بش يصبرني..واني توا ربي عطاني جنه بش تصبرني وتعيشني معاها احلى شعور تحسه المراة في الدنيا شوفة وجهها بس تنسيني همومي كلها..مانبي شي من الدنيا غير اني نشوفها احسن الناس وعايشه احلى عيشه..
سدرة وهي ترشف قالت..
/لاهادي حصتنا حني الزوز بنربيها معاك..
طوبى بضحكه؛يابختها اللي بتربيها سدرة يابختها..
ضمتها سدرة وغمضت عيونها بوجع بعدين فتحتهم وقالت..
/باهي توا خلينا من هدا كله واحكيلي..خيرك ياقلبي الايام هادي مهبيه وحابسه روحك في الحوش..ملاحظاتك من قبل لمة مئاب..قوليلي بنتي شن صاير معاك!؟
تنهدت بكتمان لكن سدرة حست التنهيده..
سدرة؛شن هالتنهيده طويبه! احكي تربحي..
بعدت عنها بشي من البطء وشافتلها وهي تقول..
/مافي شي مهم..عادي..
شافتلها سدرة بنظرة طويله شويه بعدين قالت..
/صارحيني بنتي..في بينك وبين ايمن حاجه..قصدي تحبيه؟
ضحكت وقالت..
/والله حتى شكله مانزبطه مسكين..
سدرة بحزن..
/باهي احكيلي ع اللي نشوف فيه فعيونك النظرات هادي وهالحاله نعرفهم كويس..
هي تتكلم وطوبى تسمع فيها وقلبها يزيد يوجعها شعور الوجع حساته عبى صدرها وكتم ع انفاسها..
الوجع اللي حساته كان لأكثر من شعور..
وجع حب ..وجع غيره..ووجع شوق...
وجع الشوق بالذات اصعبهم..الشوق لشوفة المحبوب ولو لمحه من بعيد..
☘وهدا كله طوبى خدت خلفيه عن مقاومته من كتاب ابن القيم"روضة المحبين" تمسكت بالذكر والقرآن زادت تقربت اكثر لله وقعدت تشكيله في الوجع اللي تحس فيه بكل أدب..
وسبحان من كان يقوي فيها ع المقاومه وخلا حبه في قلبها فوق كل حب..☘
ضحكت وقالت لأختها..
/يا والله عليك سدرة صار تعرفيهم كويس!
عقدت حواجبها وقالت..
/ماتهربيش من سؤالي..
طوبى بضحكه:انت اللي تهرب توا ياحلو..
فنصت فيها وهي تقول
/طوبى!
بنظرة من طرف العين مع ابتسامه شقاوة قالت..
/خيره وجهك ولى احمر!؟
سدرة بإنزعاج..
/الموضوع هدا مانبيشي ينفتح حتى بالتلميح..
طوبى بأستغباء..
/موضوع شنو؟!
سدرة بنرفزة:ايااه عاد ياطوبى..
ابتسمت بهدوء وقالت..
/تبي نحكيلك شن صار لما طحتي!!؟ شن صار فيه هو تحديدا..!؟
قلبت وجهها عنها وهي معصبه وشاده دموعها بالسيف..
فهمت انها تبي تسمع بعد ماشافتش منها رفض ولااعتراض..
طوبى؛كان حيموت ياسدرة،لولا ان ربي مازال كاتبله عمر راهوا توا تحت التراب..
نزلوا دموعها..
طوبى؛اني معاك انه غلطته كبيره وعيشه الله يرحمها دفعت ثمنها زي ماانتي دفعتي ثمنها..لكن حتى هو ياما صار فيه وقاعد يصير بسبب غلطة العمر هادي..المهدي ياسدره لو كان راجل تاني راهو فش غله كله في عيشه الله يرحمها راهو مادارلهاش قدر وقيمه مع حد لأنه مايحبهاش ماتهماش..راهو لما مرضت لقاها فرصه بش يخلص منها..لكن المهدي خلا عيشه تعيش معاه بكرامتها وقدرها..ماخلا مادار بش تتعالج وماخلا وين رفعها..هو واجبه اكيد..بس ياسدرة في وقتنا هدا ماتلقيش راجل يقدر مرته ويدير واجبه كله ناحيتها من طيب خاطر حتى لو كان يحبها..بتقولي يكفر عن ذنبه..بنقولك هدا راجل فيه الخير غيره مايشوفش اللي داره ذنب بش يكفر عنه..توفت عيشه وهي راضيه عنه ياسدرة والله راضيه ومسامحه واني اللي نعرفها لأني عشت معاها فترة وشفت علاقتها بيه كيف كانت..
شافت سدرة لطوبى ودموعها زي السيل..
/علاش تقوليلي في الدوة هادي توا!؟ تبي قلبي يحن عليه!؟لامش حيحن ولايلين ياطوبى..فوق اللي داره اللي صار معاك انتي..كيف مازال بنرضى بشي من هالعيله اني شربة الميه لو فيها نجاتي ماناخدها منهم..خلاص سلم بنتي خلاص ارجوك السيرة هادي سكري عليها ومعاش تفتحيها معاي بكل..
وخدت قيلتها وناضت ومشت طلعت من الدار..
تنهدت طوبى بألم..بعدين التفتت لتليفونها خداته ورجعت تقرا في القرآن...
🍃وفي حوش شنيبه..
كانت مغليه تغني لجنه من فرحتها بجيتها وفرحة جوري وسدرة ومعاذ بجيتها مش اقل من فرحة جدتهم..
☘في الكوجينه..
كانوا سميره ونسرين يتعاونوا ع الغدي..
سميره تجهز في القعاد..ونسرين حداها تتكلم بالهاتف..
بعد نهت المكالمه قالت..
/ماتحسبيش التارقي قال معزوم عند السوريين...
سميرة:اكيد بيخط في البازين ويمشي للكبه مش القلب غادي!
بضحكه قالت نسرين..
/شفتها مرة جايه للمطعم مع اهلها والتارقي كان غادي حتى هو ملكة جمال البنت..
سميرة بتعجب:قصدك قعد معاهم في المطعم!؟.
نسرين بضحكه؛لالا..سلم عليهم وطلع بعد مادفع حسابهم..
سميرة بضحكه:لاحسه عقل مرة وحده..
نسرين عقدت حواجبها وهي تقول بضحكه..
/االحق جمالها يسحر قعدت فتره خايفه منها ع ربيع ..
ضحكت سميرة وهي تقول..
/نتفكر مرة المهدي حكي عليهم وين جاب سيرتهم عيونه لمعوا زبطتهم طروف..
سمعوا باب الحوش الخارجي انفتح..
سميرة بإستعجال..
/روحوا روحوا..وتي السفر وتي...
🍃🍃
ويخشوا نضال ومحمد المهدي للصاله ويشوفوا جنه..
نضال بفرحه:اووو بطشة..
جنه لما شافاته ضحكت بفرح وقالت..
"ندوله"
ضحكوا عليها..
ونضال قدملها وهو يغني..
/جنه ياجنه ياجنه..وين نشوفك بالي يتهنى..
وخداها من امه اللي كانت تشوفله وتضحك..
ضمها وباسها من خدها..وهي تمسح ع لحيته وتقول بضم الشفايف..
"ندوله.."
نضال؛ياقلبي اني من ندوله..مد الواو وهو يقلد فيها وهما حداه يضحكوا..
ع خشة محمد شنيبه والمهدي...
محمد شنيبه؛جت الاميره..
جنه لما شافاته قالت بلغتها العسليه..
"دادو"..جدو..
نضال؛بناكلك انتي ودادو هدا..
ضربه بوه بالسبحه ع قفاه بعدين خدي منه جنه وهما يضحكوا عليه..
نضال وهو يتحسس في رقبته..
/لأمتى قاعده؟..
مغليه؛لبعد المغرب..
نضال قعمز وهو يقول..
/مليح..
قعمز محمد شنيبه وهو يشوف فيها كيف خدت سبحته تلعب بيها..
والمهدي يتأمل فيها بإبتسامه..
ع خشة يزن وحمزة ومحمد ولد نسرين.
محمد بضحكه:البطشه جت..
يزن بحده مصطنعه:هييه رد بالك ماتجيبش سيرة خطيبتي ع لسانك..
ضحكوا..
مغليه بإبتسامه؛وين تلقى زي يزونه ياحظها وهناها..
يزن بإبتسامه؛تسلمي ياقلبي..
ع خشة نسرين قالت..
/هيا بروا للمربوعه وحمودي ولدي تعالي ارفع..
مشت طلعت ومحمد ولدها ويزن وراها..
ناض محمد شنيبه وهو يقول..
/هي نوضوا..وقدم لمغليه عطاها جنه..خدتها منه وهي تشوفله كيف مشي وولاده وواحفاده وراه...
غيرت نظرها لسدرة لما سمعتها قالت..
/كخا جنه كخا..
حولت مغليه السبحه من فمها بلطف وهي تشوفلها بنظرات قلق..
🍃من لما حكتلها رقيه عن خطاب طوبى وهي مهمومه..خافت تنحرم منها وينحرم بوها منها..لو صار وطوبى تزوجت ولد الفاندي حتما بنفوذه يقدر يخلي البنت مع امها ومرات يمنعها عنهم..حاولت تفتح الموضوع مع راجلها لكن لاحظت انه في الفترة الاخيره مش طايق يشوف لوجهها مافكرتش تعرف السبب لان مصير جنه استحوذ ع كل تفكيرها🍃
🍃وبعيد عنهم في مكان تاني من العاصمه..
كانت مربوعه حوش وحده من العائلات الطرابلسيه المعروفه معبيه..كانوا دايرين غدي كبير ع سلامة ولدهم الصغير...
عبد المعين...
كان صديقه المقرب مالك حاضر بهدزرته وجوه وبصارته بان ع الموجودين رايق وايامه زاهيه...
لكن مالك شاف ماوراء هدا كله..شاف الوجع الكبير اللي قاعد صاحبه يخفي فيه ببراعه...
🍃بعد الغدي..وبعد مافضت الزحمة..
خدوا الصحاب تركينه في جنان الحوش وقعمزوا يحكوا مع بعض..
مالك بضحكه؛ياودي باهي مش مولي لين تولي لكن ان شاء الله تخليك خالتي فهيمه..
عبد المعين وهو يشوف القدام وحواجبه معقوده..
/تخليني ولاماتخلنيش بنولي..
تنهد مالك والتزم الصمت..
شافله معين وقال..
/حاول طق في اختك خليها تشوفك وتطمن عليك..
هو قال:هدا اللي نفكر فيه..في بالي نمشيلها للمدرسه..
غير معين نظره القدام لما حس بضيق في صدره من كلام مالك..تجاهل شعوره وهو يقوله..
/اها المدرسه..ماتبيش تشوفها بروحها..
ابتسم مالك وقال..
/صح..نبي نشوف صاحبتها ونطلب منها السماح..في كل مرة قابلت فيها الموت تجي بين عيوني خفت نموت وهي مش مسامحتني..نبيها تسامحني بس معاش نبي اكثر من هكي.. غيران شاء الله تكون من نصيب راجل يستاهلها يقدرها ويصونها بنت ناس ومربيه ربايه غاليه هدا ماتستاهل راجل حقاني..
حط معين يده ع كتف صاحبه وقال..
/وانت سيد التريس ياعشيري..
شافله مالك بإبتسامه وطبطب ع يده..
🍃واخته مقعمزه بروحها في سانيه حوش جدها..
في يدها البوم صور عائلي..
تتفرج ع صورها هي ومالك وتبكي..وقلبها يتوجع بقوة لما تشوف صور تجمعهم بأمها فوزيه وبوها..
ياااه ع هديكا الأيام من قال تولي ماضي حلو معاش يرجع..
من قال تجي بعدها هالأيام الصعبه..ايام فراق..وحزن..ووحشة..!
لهاللحظه مناسك مازال مش مستوعبه حال حياتها اللي انقلب 180درجة..لتوا حاسه روحها قاعده في كابوس تراجي امتى تفيق منه...
🍃نعوذ بالله من تغير الحال للأسوا..نعوذ بالله من زوال نعمته وتحول عافيته وفجأة نقمته وجميع سخطه🍃
🍃🍃🍃🍃🍃
بعد المغرب..
روحت سميرة بجنة لحوش امها وقعدت بش تتعشى مع العيله وتكمل سهريتها معاهم..
🍃وكالعاده مقر هدرزة سميره الكوجينه..
تعول مع مطيره وطوبى،وسدرة واريج مقعمزات حداهم...وع حكاوي وهداريز...
سميره:درته بازين مبدع طلبه المهدي..
اريج سرقت النظر لخالتها شافتها عقدت حواجبها لما جت سيرته..
مطيره؛شورها العنقروفه معاش تتحرك بكل..
سميره؛زي الحطبه..
طوبى بضحكه؛من قبل مسكسكه مش هديكا الفلاحه..
فجأه جي اتصال لمطيره..
مشت خداته من فوق حافظه الخبزه وهي تقول..
/وين تسمعيها كيف تحكي ع روحها لما ضم..رفعت الصالون نزلت الستارات..قلعت السيراميكا..
ضحكوا..
فتحت الخط وهي تقول..
/شكرانيه كذابه....هااه يابوي مش عليك نهدرز نهدرز..
سدرة؛كولي ع راسك..
وهما يسمعوا ويضحكوا..
مطيره بضحكه..
/حاضر حاضر..نزلت التليفون وهي تقول...كلمتين وطاف في وجهك..
طوبى بضحكه؛هدا حاله..
سدرة:شن يبي؟
مطيره حطت التليفون وقالت..
/قال احسبوا التارقي العشي..
طول اريج وجهت نظرها لطوبى..
وطوبى التفتت للنعناع وبدت تقرض فيه بتوتر وقلبها يدق بسرعه..لكن للحظه كاد يوقف لما سمعت سميره قالت..
/صار ماشدوشي السوريين ع العشي..
بدت ع وجه اريج ملامح الضيق..
مطيره؛كان عندهم؟
سميره:روح عليهم صلى الجمعه حداهم وتغدا غادي..
مطيره:اشيه..
سدرة:من هما؟
سميره:هدا التارقي ياحنه يبي بنيه سوريه متعرف ع عيلتها..
رفعت سدرة حواجبها وقالت..
/شكله فري!..
مطيره؛لا مش هكي قصتهم قصه مساكين نزحوا من بلادهم لهني وزادوا نزحوا في هالحرب وهو وقف معاهم..
سدرة:اها قصدك من هني عرف بنتهم..
سميره:لا من قبل يعرفها البنت معاهم في جمعيه خطاطين ماهو خطاط هو والبنت نفس الشي..
سدرة:اها..
اريج كانت تشوف لطوبى بحزن وقلق ..وطوبى تتحرك في الكوجينه بصمت..حركتها كانت عشوائيه اكثر من مرة نست شن تبي وشن بدير..
سميرة بضحكه:قالتلي نسرين شايفتها في المطعم متاع راجلها مش بوها يخدم غادي..قالت عزم عيلتها ع حسابه..
سدرة:شكله غارق لوذانه!
مطيره:سوريه ياماما تؤبرني ابن عمي..
سميره؛نسرين قالت شفتها آيه من الجمال قالت خفت ع ربيع منها
سدرة؛مدام طابسة في التارقي وهوطابس فيها ماعندها مادير بسنان
ضحكوا ع تعليقها..
واريج تلحق في طوبى بعيونها وهي تشوف فيها كيف حطت الطاجين في الكوشه بعدين طلعت طول من الكوجينه..
تنهدت بحزن ورجعت تسمع في هدرزتهم ومن كل قلبها كرهت سلافه ومايجي منها وكرهت عبد القيوم معاها..
🍃وعبد القيوم في المربوعه مع عبد الرؤوف ويوسف والحاج علي وعبد المطلب
معاهم بجسده لكن قلبه وعقله مع صاحبة المكان ميت من شوقه ليها..كان يلقى كيف يلمحها لمحه تخلي قلبه المتيم يهدا شويه..
🍃وهي كانت مقعمزة في دار المعيشه حدا الصغار..
هما لاهيين بألعابهم وهي تتفرج عليهم ودموعها تنزل..
🍃🍃🍃
طاب عشاهم..طلعوا للرجاله وجي دورهم..
خشت اريج ع طوبى الدار وقالت..
/تعالي تعيشي بيبو..
طوبى هي ترقد في جنه..
/ماخاطريش روجه تعشوا انتم..
مشت اريج وهي مضايقه على حالها..
ورجعت الدموع نزلت من عيون طوبى..مسحتهم وشافت لجنة لقتها راقده..
رفعتها ومشت بيها لدارهم..
🍃حطتها في سريرها وغطتها..بعدين غيرت نظرها للوحه المعلقه ع الحيط..
خدت نفس وبلعت ريقها..ومشت ركبت ع السرير خدت اللوحه ونزلت بيها ومشت خدت كرسي الزيانه قرباته للدولاب وركبت عليه وحطت اللوحه فوقه...
خدت نفس مرة تانيه ونزلت..ومشت طلعت من الدار...
🍃🍃🍃
بعد العشي..جهزت غرفه نفسها وطوبى عاونتها في تجهيز حوايج صغارها..
بعد السلام ع العيله طلعت معاها طوبى..
وقفوا في الباب وطوبى تقول..
/ردي بالك ع روحك ومعاش تحرقي دمك الهي بصغارك وبس روفتي..
غرفه:حتى انتي ياعيوني ردي بالك ع روحك..
هزت طوبى راسها بإبتسامه..
سلمت عليها غرفه بالخد بعدين قالت..
/تصبحي ع خير..
طوبى:قدامكم كل خير..
نزلت غرفه خمارها ومشت وعيون طوبى معاها شافتها وصلت لراجلها خشت وسكرت الباب..
🍃🍃🍃🍃🍃
"مولي عسول بزياده"
صفاء بإبتسامه؛خلاص كبر وبيبدا يبان..
فايزة بلهفه وضيق؛والله مانبيه يروح..
تاله؛قولي لأشرف يخليك تباتي مرة تانيه..
صفاء بضحكه:ان شاء الله ان شاء الله..هي تصبحوا ع خير..
ومشت طلعت وتاله لحقتها بشنطة احمد..
فايزة ومروة قعدوا واقفات في الباب وهما يردوا عليها..
بعدين تنهدت فايزة وقالت..
/كان نلقى تخليهولي نهارين وليت نستاحش فيه هلبه..
مروة بضحكه:تعرفي كيف اني كان تزوجت صغاري بنخليهم عندك بش نلهى بخدمتي..
فايزة بضحكه:ع قلبي زي العسل..
ع جية تاله شافتها وقالت..
/سكرتي الباب زين؟
تاله:زين زين..وخشت داخل ومروة لحقتها..
سكرت فايزة باب الحديد..بعدين باب اللوح بالمفتاح وخشت داخل...
🍃وفي الحوش الجيران..
تحديدا دار اميمه..كانت مقعمزة ورا ماكينة الخياطه تخيط في فستان لجنة بش تلبسه في عرس يوسف..
☘هالشي دير فيه بدون علم طوبى تبي تفاجئها..
كانت كل ماتخطي مرحلة من الخياطه يزيد شوقها تشوفه ع جنه وتشوف ردة فعل طوبى...همها كله تفرح طوبى وتجبر شويه من كسرها...☘
حست بشي من التعب..خدت تليفونها وخشت ع الفيس تشوف الأخبار..
فجأة جتها رساله ع الماسنجر كانت من اسامه..
ابتسمت من قلبها اللي ولى يدق بسرعه..
عدت في نفسها للعشره بعدين فتحتها..
(دكتورة مساء الخير)
ردت..
(مساء الخير)
بعتلها..
(اول شي اسف خشيت ع الخاص بس مسألة مستعجله)
بعتت..
(تفضل)
رد..
(في مجموعه ادويه ناقصه يبوها في المستوصف اني حصلت كيف ندبر فيها)
ضحكت بعدين بعتت..
(باهي كويس خبر دكتور عبد الرحمن)
(خبرته وقلت نخبرك انتي)
ضحكت وبعتت..
(تمام)
شافاته بعدين طول في الكتابه فكرت انه يكتب ويمسح قعدت تضحك..
شويه وبعتت..
(من الاخير نتسبل نبي نحكي معاك)
نزلت التليفون وهي مبتسمه بخجل وعيونها ع الماكينه..
بعدين قامت التليفون وبدت تكتب وبعتت..
(الوقت متأخر نهدرزوا في وقت تاني)
شويه وبعت..
(تمام تمام..تصبحي ع خير يادكتورة)
ضحكت..بعدين خدت صورة للمحادثه وبعتتها لطوبى..
🌼طوبى وقتها كانت تكتب في ايات من السورة اللي تحفظ فيها..
سمعت نغمة الماسنجر خدت التيلفون وفتحت الرساله..
لما شافت صورة المحادثه ضحكت وبعتت..
(صحة ليك)
ردت عليها اميمه..
(مالاشنو لازم يطيب ع نار هاديه)
ضحكت وردت عليها..
(ايوه انت يامطيبهم)
بعتت اميمه ملصق ضاحك..
ع خشة سدرة للدار شافت شاده التليفون وتضحك..
قعمزت حداها وقالت..
/وريني وري.. هدا واني عابيه عليك شيخه!
طوبى بضحكه:والله نحكي مع اميمه..
سدرة؛خيرها القطوسه ماجتش اليوم..
طوبى؛كانت تخدم اليوم..
سدرة:تخدم كل جمعه؟!
طوبى:لا اسبوع بأسبوع.
سدرة:ربي يفتح عليها..باهي وانتي امتى بتحكيلي شن صاير فيك..ماكلتك خافه وديما عقلك مش معاك بكري هربتي مني توا ماعندكش وين تهربي..
وتخش عليهم اريج وهي تقول...
/شن رايكم نقص شعري..
سدرة بنفاذ صبر..
/ وقته شعرك هدا..
طوبى:ديريه طروف..
قعمزت اريج جنبها وقالت..
/نصبغ ؟
طوبى:لالا فوتي..
وسدرة تمرر في نظرها بيناتهم بعدين قالت..
/سركم عند بعض ياوشواشات انتم..
مع بعض شافولها وقال اعتباطا..
/سر شنو؟!..
هزت راسها وقالت..
/تي باهي باهي..المهم توا غدوة بنمشوا لحوش مختار..
طوبى:امم عارفه بعتلي رساله..
قلدت صوته وهي تقول..
(تشرفينا بحضورك لحوشي المتواضع طوبى خانم)
ضحكوا اريج وسدرة..
طوبى:رديت عليه..نشرفك ونص..
فنصت سدرة..
طوبى بضحكه:نبصر خيرك!..رديت ان شاء الله وخلاص..
سدرة؛باهي خلينا منه وقوليلي..سؤال هو ونبيك تجاوبيني بصدق..غرفه مرتاحه في حياتها؟!..
طوبى:والله واني مانحلفش بالله كذب عايشه زي الملكه وراجلها راجل كويس هلبه..
اريج:الله يرحمه جدي كان يحبه هلبه..
تعبوا عيون سدرة بالدموع وهي تقول..
/باهي عمته وبناتها شن وضعهم ماارتحتلهمش تقول هاربات من فيلم رعب...
ضحكوا وطوبى قالت..
/كل حد في حاله ماتشوفش فيهم كان في المناسبات الكبيرة بس..
تنهدت سدرة بضيق..
طوبى حطت مذكرتها ع تركينه وقربت لسدرة وضمتها وهي تقول..
/عقبال مانزوجك ونطمن عليك حتى انتي..
سدرة:حولي يارتيله حولي..
وطوبى تزيد تشد فيها وهي تضحك..
اريج بضحكه؛حتى اني تقولي فيها..
طوبى وخرت عن سدره وهي شادتها بيد وحده وباليد التانيه جابت اريج لحضنها وهي تقول..
/بإذن الله حنطمن عليكم ونعطيكم للرجاله اللي يستاهلوكم ومايستاهلكم حد غيرهم..
اريج قامت عيونها في خالتها سدره..وسدرة شافتلها بنفس النظره..
طوبى بضحكه وهي تغني.
"غاليا وحبي غيره مانبي ســاكن في قلبـــي يايما والعيـــن تريده"
غمت سدرة وجه طوبى بيدها وهي تقول..
/ارقدي ارقدي..ورقدتها ع السرير..
واريج حطت عليها الشرشاف..
طوبى بصوت مكتوم..
"يمي الوديده حبي ونريده"
ضربتها اريج وسدرة تقول..
/خزي هدا غير دايرة روحك شيخه..
وطوبى ميته بالضحك تحت الغطا..
🍃تضحك بش تغلب الوجع🍃
🍃🍃🍃🍃🍃🍃
تاني يوم...
السبت...
16نوفمبر...سنة2019..
بعد الظهر...طلعوا من حوش طوبى وعلي الواعر سيارات طوبى ويوسف متوجهين لفيلا مختار...
🍃في الفيلا..
كانت امينه متشوقه تتعرف ع باقي العيله بالذات طوبى..
وقاتن تراجي في جيتهم ع نار..
اما مختار كان في مكتبه عنده مكالمه مهمه...
☘وبعد طول انتظار وصلت الضيوف طلعوا فاتن ومع بعض بش يستقبلوهم...
🍃وهما اللي ماشافش الفيلا قبل كان يتفحص بنظره..
نزلت طوبى من السيارة..شافت فاتن ابتسمت..
اميمه لما شافت ركزت في شكلها بعدين قال..
/شبهو قوي..
فاتن بضحكه؛ركزي ع نظراتها وتصرفاتها..شوفي تضييقة العيون نفسها بالزبط..
وصلت فيهم طوبى وقالت..
/تقرمي فيا!؟
فاتن بضحكه؛نورتي حماتي العزيزة..
طوبى:النور نورك مرت خوي الحبيبه..
سدرة:عليك برادة نزلت عليكم فم الباب..
ضحكوا..
وبدوا بالوحده يسلموا ع فاتن وهي عرفتهم ع امينه..
بعدين يوسف سلم من بعيد وقال..
/وين مختار!؟..
"Willkommen... Willkommen"
...اهلا وسهلا باللغة الالمانية...
شافوه جايهم وهو فاتح ايديه بإبتهاج...
طوبى:بالمهلي ياباشا..
ضحكوا..وسدرة تنخص فيها..
مختار برفعة حواجب..
/عرفتي معناها!؟
طوبى:ماتبيش ذكاء طالع فاتح ايديك وترحب شن بتقول يعني..ااه حفرتي جنبي..
وهما يضحكوا..
حرك راسه يمين ويسار وقدم ليوسف وهو مبتسم سلم عليه..
وفاتن وهي تضحك رحبت بيهم مرة تانيه ودخلتهم داخل...
🍃🍃🍃🍃🍃
وفي شارع القهوة..
طلعوا مروة وتاله متوجهات للسوبر ماركت بش بياخدوا مواد "السينابون" امهم كانت في حوش زبونه ليها في المنطقه...
🍃وصلوا في السوبر ماركت وخشوا وبدوا يدوروا ع الحاجات اللي يبوها...
مروة:جالاكسي احلى..
تاله؛غاليه خودي سعيد خير..
مروة؛قفاصه..
تاله؛قولي حريصه..
ضحكت مروة فجأه اختفت ضحكتها لما سمعت صوت تعرفه كويس ينادي فيها بصوت منخفض..
"مروة..مروة"..
شافت يسارها ومعاها تاله لما جت عيونهم ع اللي ينادي توسعت ع اخرها من الصدمه...
#ألبوم_ذكريات
#طوبى
....يتبع.....
