#طوبى "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ﷺ: “لا يزال لسانُك رطبًا من ذكر الله”🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الله اكبر..الله اكبر..ولاأكبر من الله 🍃
__________________________________________
ايام شهر نوفمبر لما بدت عدت عاديه ع اغلب الناس في بلادنا الحلوة..
لكن في شارعنا المميز كانت ايام جميله..الافراح في الشارع ولت ورا بعض..
ومن عرس عيت الساحلي لعرس عيت الصيد واحمد المحجوب...
أحمد...
بدي عرس بنته الكبيره صفاء..
اول عرس...اول فرحه..لو كان حي اكيد مش حيكون في حد اسعد منه...
بس ارادة الله خلاته يكون الحاضر الغايب...
من لما خش اسبوع العرس وفايزة في الخفاء تبكي..
مش لأن بنتها حتبعد عنها..صفاء حتقعد قريب عليها وحتسكن مقابلها...
تبكي لأن اهم شي في مناسبه هادي مش موجود..
اكثر شي ارق تفكير فايزة من لما تحدد موعد العرس حكاية الوكيل في الفاتحه..لازم يكون اقرب المقربين..
العمام قلتهم خير وبعد اللي داروه مستحيل دق بابهم..
مالقتش قدامها غير انها تمشي لخوتها..
قصدت خوها الكبير اللي مركباته جميل عظيم في رقبته..
لما طلبت منه وافق بدون تردد....
صح قابلها بجفاء وبرود..لكن هدا كله ماكانش هامها مادام وافق يكون وكيل بنتها في اهم يوم في حياتها...
🍃في الطريق وهي مروحه للحوش
فايزة ودموعها في عيونها..
/يااه يااحمد قداش فاقداتك فاقداتك هلبه حبيبي..ضحكت وقالت..بس زعمه كنت حترضى تعطي صفاء!؟ كانت اقربلك من روحك وتموت عليها...رجعت تبكي وهي تقول..ااه ياأحمد سامحني انجبرت نعطيها في هالعمر بش نحميها نحميها من دمها ولحمها اللي ولوا عدوين بدال مايكونوا سند..تعرف احمد خايفه وهلبه..بخت بناتي نحس فيه زي بختي..تنهدت من قلبها بخوف وهي تقول..ربي يخيب احساسي يارب يارب...
🍃🍃🍃🍃🍃
وصفاء في هالوقت..
مسترخيه وحاطه قناع طوبى خلطت مكوناته بإيديها..
اساسا حتى هي حطت منه وقاعده متمدده جنبها...
ع جية فردوس بجنة اللي كيف فاقت وين شافت وضع طوبى ضحكت ووخرت ومشت دير مرضعه لجنة بش تسكت جوعها..
مر الوقت المحدد لقناع الوجه وناضوا الزوز حولوه وغسلوا وجوههم بعدين خشوا للدار..
بخت طوبى من بخاخ فيه مية رقيه ع وجهها ومداته لصفاء بش تبخ منه..
بعدين خدت بخاخ فيه مية ورد وبخاته ع وجهه وبعد كملت عطت لصفاء تبخ حتى هي..
صفاء؛حاسه وجهي تنفس..
ضحكت طوبى..
خطت صفاء البخاخ وقالت..
/بيبو..مش ناويه تصبغي..
طوبى بحيره:مش عارفه نصبغ ولانحني..شدت شعرها وقالت..نحس فيه تحسن هلبه نخاف نصبغه يضرر..
صفاء؛ماما قبل حكت ع حنة بالألوان تقدري تحني باللون اللي تبيه..
طوبى لمت شعرها وقالت..
/نفكر فيها..اني العشيه ماشيه للعطريه بناخد شويه حاجات توصي ع شي..
صفاء:زيت جنين القمح..
طوبى:مليح بكل الزيت هدا..خلاص زيت جنين القمح..
ع خشة فردوس بجنة..
طوبى ابتسمت من قلبها وقالت..
/فاقت عيون امها..
جتها مدتهالها وقالت؛بنطلعوا توا بنمشوا للصاله متاع الكسوة اني وعمتك نتمموا علي الامور غادي..
طوبى:بترفعكم سميره؟
فردوس:ايه..شافت لصفاء قرصتها من خدها وقالت..نجيها..
ومشت طلعت بسرعه وخلت صفاء تضحك..
طوبى ابتسمت وشافت لبنتها وقالت بلغة طفوليه..
/تو تشوفي عميمه صفو كيف بنطلع في عرسك بنغطي عليك بكل.. صفاء بضحكه؛ع قلبي زي العسل حتى كان نبي تاخدي اشرف خوديه..
بدت ع وجه جنه ابتسامه حلوة..
ضحكوا بصدمه وقالت..
/ريتيها!!؟
صفاء بضحكه خوف مصطنعه..
/لاماصارليش ماتجيبوهاش بكل..
وطوبى تضحك...
🍃🍃🍃🍃🍃
وفي كلية الاقتصاد..
كانت اريج تسلم ع صاحبتها لأنها الايام الجايه مش حتكون غايبه..
اريج؛ماتنسيش صوريلي معاك الشيتات كلهم وسجلي اول بأول..
:تي باهي يادراه انسي القرايه وخليك في العرس وهياجته..
ضحكت وقالت..
/ياناري ماعندهاش عراس..
صاحبتها بضحكه:تفي..
هي ضحكت وقالت..
/يللا سلام..نتلاقوا..
:سلام..
ولفت اريج مشت بسرعه..وهي ماشيه تلاقت مع نضال واقف ع بنت الشرقاويه..اول مرة تشوفه معاها في الكليه حست بقلبها انتخص بقوة..
شدت دمعتها وتماسكت ولبست قناع التجاهل وكملت طريقها...
وهو شافها ووين فاتت من جنبهم حس بيها وبرغم انه كان مضايق من نفسه بس في الوقت نفسه كان قلبه محروق منها ع الآخر...
🍃🍃🍃🍃
وبعيد عنهم..
في وحده من مكاتب الراديو..
كانوا مهند ومرته آرام يستعدوا لاول حلقه من برنامجهم بعد الزواج..
هو جنبه تشرب في القهوة وتقرا في التعليقات ع الفيس..
وهو كان يدير في نفس الشي..
شويه طلع من المنشور متاع البرنامج وقعد يقلب في مناشير صفحة القناة..
ثبت ع منشور فيه صورة لعزيز مع واحد من زملائه في الاذاعه المنشور كان اعلان عن حلقه حتكون مع عزيز وهالبرنامج مهتم بالشخصيات الناجحه من الشباب وتستضيف فيهم بش يحكوا عن قصتهم وتجربتهم..
هو لما شافه ولعت في قلبه النار...
شاف تاق بإسمه في المنشور..
بدون مايحس ضغط عليه وخش لصفحة عزيز وقعد يقلب فيها..
ويجي قدامه منشور وين شافه انصعق ...
كان المنشور بخاصية "تمت خطبته"..وكان فيه تاق لآلاء اللي كان اسمها ع الفيس صريح وباللغة الانجليزيه..
آلاء التاجوري..
هو وقتها من صدمة قلبه ماباش يصدق..عارفها تحبه وعارف عزيز يجري في جرتها وهي رافضاته لأنها قاعده تحبه..
خش ع المنشور يبي يقرا التعليقات بش يتأكد..
ويشوف تعليق لأريج اختها اللي يعرف اسم حسابها المشهور..
"معدنوسة الشتاء" وتحته تعليق لخالتها غرفه اللي كان يعرف اسم حسابها حتى هي..حس روحه مخنوق...
سكر اللاب توب بقوة..
شافتله آرام بفجعه وقالت..
/خيرك..
هو ناض طول وقال..
/قدمي بروحك..ومشي طلع من الاستديو وخلاها مصدومه..
بعدين طول ناضت لحقاته..
🍃🍃🍃🍃🍃
"احلى مفاجأة والاحلى انها جتني في الكليه حرقت بيها الحساد"
عزيز وهو مقعمز ورا مكتبه ضحك وقال..
/احرقي من تبي واللي يجي في خاطرك نديره انتي قولي ياعزيز نبي هديكا الحاجه بس تلقيها قدامك.
"لا ردبالك خليني قنوعه راهو كان بديت في الدلع بتتبهدل"
عزيز بضحكه:اني نبيك تدلعي لين تفسدي..
قعدت تضحك..
هو ابتسم وقال..
/توا عندي اجتماع بعدين نحكوا تمام..
"لالا حني متفقين ع مكالمات للضرورة بس.."
هو قال:بتستفزيني بش نعقد عليك مع بنت جيرانكم..
ضحكت آلاء..
هو قال بإبتسامه..
/ماسنجر تمام!؟
تنهدت وقالت..
"باهي ماسنجر...برا لاجتماعك..باي.."
وسكرت عليه..
وهو نزل التليفون وقعد يضحك بعدين تنهد من قلبه وناض خدي ملف ع الطاوله وطلع من المكتب...
🍃🍃🍃🍃🍃🍃
مقعمزة ورا مكتبها تشوف في اللاب توب وترتب في اسماء الناس اللي جت دارت في معملهم تحاليل..
قطع عليها شغلها الاتصال اللي جاها..
شافت للتليفون وابتسمت بعدين ناضت حولت اليونيفورم وعلقاته ساوت حوايجها وشعرها كويس..
بعدين خدت تليفونها وشنطتها وطلعت من المكتب..
وصت وحده من الفنيات اللي يخدموا عندها ع المعمل بعدين مشت طلعت منه..
وين شافت السيارة زادت كبرت ابتسامتها ومشت طول للباب..
انفتح الباب السحاب تلقائي..
ركبت..وهو تسكر..
شافت يمينها بدت ع وجهها ملامح التعجب المصطنعه وقالت..
/حتى اليوم لقيت وردة في السيارة..
هو اللي كان يشوفلها من ورا نظاراته قال..
/كان نعرف من هي اللي تحطلي فيهم بس..
وتحرك بالسياره..
هي شمت الوردة وقالت..
/معقوله لتوا ماعرفتش الحاجه هادي ساهله عليك.
هو قال..
/مانبيش نعرف..
ضحكت ..
وهو قال:تقريبا في حاجه تانيه غير الورده صح؟
شافت يمينها مرة تانيه وتصنعت الدهشة هالمرة وقالت..
/حي شكلاطه! والنوع اللي نحبه!
خدتها وقالت..لاهادي لازم تعرفها وتعطيها فرصه
هو قال:علاش!؟
صابرين حولت غلاف الشوكلاته وقالت..
/لأنها تشبهني في هلبه حاجات معناها زيي يابختك بيها..
وكلت من الشكولاته..
هو قال:لالالا..مستحيل يولي زوز منك في حياتي سادتني شعشبونه وحده..
قعدت تاكل وهي تشوف للروشن وتضحك..
هو قال..
/من قالك كوليها!!؟ ليا وليك!؟
صابرين بضحكه:اني لقيتها في مكاني وحاجة الوطا ماتنعطا..
هو بضحكه:يامتخلفه غلط مش هكي..
وصابرين تاكل وتضحك..
حرك راسه يمين ويسار وهو يضحك بعدين تنهد من قلبه..
سكتوا شويه..وهو شغل المنظومه...
وبدي فنانه المفضل يغني هالمرة اغنيه قديمه اسمها..
"سألوني"
هي ماحولتش عيونها عن الروشن تسمع فيها وتاكل في الشكولاته وفي يدها التانيه شاده الوردة بقوة وكأنها خايفتها تريح..
وهو يسرقلها في النظر و قلبه يرفرف بين ضلوعه..
اختار يكون صديق ظاهريا بش يقرب لقلبها ويكسبه وبعد يتأكد انه كسبه مستعد يحارب ع خاطرها حتى نفسه..
مش بيده قلبه حبها ومااختارش يحب غيرها ع كل مافيها من عيوب وع قد مادايره من غلط في حياتها هو معاش شاف من هدا كله ولاحاجه..
عيون قلبه يشوفوا في صابرين الطفله اللي ناقصه احتواء وحنان الفاقده للأمان..المحرومه من كل شيء...
يشوف في عيونها الحلوات..وضحكتها الحلوة..ويسمع في صوتها المميز في نظره وبس..
معاش مدور معاهم شيء..
اما هي..فكانت فرحانه باللي عايشاته معاه..
عايشه حالة ومشاعر عمرها ماحستهم..
ع قد ماعرفت في حياتها مافي حد خلاها تحس اللي حساته مع رضا..شي طالع من داخل من وسط القلب من داخل...
هي ماتبيش تفسره ولاتعرف شن هو مكتفيه انها تعيشه وبس مش طامعه بأكثر من هكي..
🍃وصلوا للعمارة..
خش بالسيارة ودرسها في مكانها..
هي نزلت بالوردة ومشت طول بتخش..
وهو وراها يقول..
/حتى هادي بتاخديها..
صابرين بإبتسامه:قتلك حاجه الوطا ماتنعطى..
قعد يضحك..
وصلوا في الشقه..
وخرت وهو فتح الباب بعدين وخر وقال..
/Ladys frist
ابتسمت وقالت..
/Thanks...
وخشت..وهو خش بعدها وسكر الباب..
توجه للمكتب..
وهي مشت للكوجينه خشت ع اميمه وقالت..
/شن الغدي..
امينه بإبتسامه..
/كسكسي بالبصله ياورد انت ياورد..
ضحكت صابرين وقالت..
/محلاها كيف قلتيها..
امينه بضحكه:اخبار الورد ايه؟.
صابرين:المعجبه المجهوله حطت معاه شكلاطه اليوم وكالعاده اني خديتهم الزوز..
ضحكت امينه..
اما صابرين:نبدل ونازله..ومشت طول طلعت..
امينه تنهدت بإبتسامه وقالت..
/يارب انت الرحيم..
🍃🍃🍃🍃🍃🍃
"حطتني في الامر الواقع قدام خوك وبوك"
عواطف:شيطانه من يومها..
نجاح بنرفزة:والله قريب نحلف ماقصاته خطوة..
نجمة بضيق:الله غالب شن بنديروا بوك خلاهم يشدونا من رقابينا..المهم ماتقولوش لأشرف..
نجاح:ماعندنا علاش نقولوله..
سكتوا شويه بعدين نجمه قالت لعواطف..
/متاعينك بيجوا نهار الفاتحه..
حاولت عواطف تخفي ارتباكها لما قالت..
/لانهار الدخول بس..
نجمه:راك تقولي بتروحي معاهم من تاني يوم؟
عواطف؛مالا شنو يام..
نجاح:حني نهنوا يام..
نجمه سكتت وكمدت هلبه كلام في قلبها من لما شافت بنتها امس وين خشت عليها وهي مقهورة..
شافتها كيف ضاعفه وباين في وجهها الهم وكعادتها تمثل في دور المراة العايشه والمتهنيه..
وحتى نجاح لاحظت هالشي وسألتها..وعواطف لما تحاصرت من اختها قالتلها نخمم في حكاية الصغار ونجاح صدقت طول لأنها تعرف اختها اكبر سبب كانت تبي تتزوج ع خاطره الصغار...
وعواطف كانت حاسه بقبضة في قلبها..حاسه ان في شي حيصير بعد العرس..لكن حاولت تطرد هالاحساس من قلبها وتعيش اجواء العرس وتنسى بيهم شويه من همها...
☘☘☘☘☘
وفي حوش جيرانهم...
كان الولد البار المرضي عند امه اللي فاجئها ببدله مناسبه غاليه موصي عليها توصيه بش تحضر بيها الحفله..
وطلع من عندها ومعاها دعواتها وكأنه فاتح القدس ومحرر فلسطين..
وهو منها ركب لمرته وكانت حتى هي ليها مفاجأة بروحها..
فستان كبير لونه احمر قاني وكله لماع معاه تاكم الماس خفيف..
وين شافتهم نجاة قريب قلبها وقف من المفاجأة.
نجاه بدهشه:قداش حطيت فيهم هادم!؟
الجالي شدها من شعرها وقال..
/معاش تسألي الاسئله هادي..بعدين ضمها لقلبه وقال..انتي قاعده عروسه ومرت الجالي شنيبه لازم تطلعي خير من الكل حتى العروسه نفسها..
ضحكت وشدت فيه وهي فرحانه بطير..
وماهيش عارفه ان الراجل اللي محاوطهابإهتمامه المزيف قلبه محروق من المراة اللي يحبها ويبي يحرقها زي ماحرقاته....
🍃🍃🍃🍃🍃
"يعطيك الصحة يامنمن تقول ليبيه مطيباته"
امينه:ياحبيبتي الحاجه اللي احط فيها ايدي تحلى اكثر..
صابرين بضحكه؛ياجتكور انت ياجكتور..
ضحكت امينه.
ع خشته هو كان يقول بسرعه..
/غداي هيا فيسع غداي..سقدي بسرعه..
وقعمز ع الكرسي..
وصابرين تشوفله بإبتسامه..
هو اللي كان يشوف لأمينه بعقدة حواجب؛
/شن هو حقه!؟
صابرين بالمصري:كسكسي بالبصله..
ضحك ضحكه خفيفه..
وامينه جابتله غداه وهي تضحك وحطاته قدامه وقالت..
/بالهنا..
هو قال:تسلمي..
وبدي ياكل..
هي قعدت تسرقله في النظر وهو لاهي ياكل..
شويه رفع عيونه نزلت عيونها طول لصونيتها..
رضا وهو يشوف لصونية السلاطه متاعها..
/زيدي الشعشبونه سلاطه قريب تكملها..
صابرين وهي شاده ضحكتها..
/خليك في غداك..
رضا رفع حاجبه وقال..
/الحق مش فيك..وقعد ياكل.
وهي تضحك..
وامينه جت بالسلاطه لصابرين..
صابرين؛تسلميلي ياقلبي اللي ديما قلبك عليا..
ابتسم وهو يشوف للصونيه متاعه.
امينه بضحكه؛وهو انا قلبك ع حد تاني غير عليك انت ياورد انت ياورد..
ضحكت صابرين بخجل..
وهو كان داير روحه لاهي بغداه والدوة مش عليه لامن قريب ولامن بعيد..
ولت امينه وين ماكانت وهي تسرقله في النظر..
وصابرين ولت تاكل..
شويه وحطت الكاشيك وقالت..
/بناخد رايكم في حاجه..
الزوز شافولها..
صابرين:نفكر نكمل ماجستير..
هو قعد يشوفلها وخلاص..
وامينه قالت:فكرة حلوة قوي..
ابتسمت بعدين شافتله وقالت:وانت؟
هو قال:هني!؟
صابرين:اكيد..
غير نظره عنها للصونيه وهو يفكر..
وهي وامينه يشبحوله..
صابرين:شني!؟
هو رجع بياكل وقال..
/لو متحمسه للفكرة ديريها مافيش داعي تاخدي راي حد..
هي قالت؛رايكم يهمني..انتم عيلتي..
رفع عيونه في عيونها وقعد يشوفلهم وخلاص..
امينه وهي متأثره بكلامها قالت..
/ربنا يوفقك ياحبيبتي..
صابرين:تسلمي منمن..شافتله وقالت..شني؟!
هز راسه وقال:بالتوفيق..
صابرين فرحت من قلبها وقالت..
/خلاص مالا اجريلي ع الاجراءات..
هو قال؛تمام تو نكلم ناس نعرفهم..
امينه؛لازم تاخدي رأي الاستاذ كمان..
هي قالت:كلمته وقال انتي حرة..
رضا حس بضيق شديد لما عرفها كلماته..
قعد ياكل بعصبيه..
وهي لاحظاته..بس تجاهلت كالعاده تفسر هالتصرف بالذات..
امينه:كده كويس..
هو حط الكاشيك وقال..
/قوليله هو يجريلك ع الموضوع..
وناض ومشي طلع من حداهم وهما معاه بعيونهم..
بعد ماطلع غيرت امينه نظرها لصابرين اللي ابتسمت بلامبالاة مصطنعه وقالت..
/هبلات رضا..ورجعت تاكل مرة تانيه ودموعها في عيونها..
🍃🍃🍃🍃🍃
الساعه 5:30عصرا..
طالعه لباب الحوش وهي تقول بصوت عالي..
/اني طلعت..
جاها صوت اختها وهي تقول..
"باهي باهي"
وصلت في الباب قعمزت ع كرسي موجود غادي..
لبست شخشيرها الاسود..بعدين ناضت ولبست السبيدرو الخفيف الحاطي..
ومشت بطريقها للباب..
وصلت فيه فتحاته وطلعت..سكراته وراها ومشت بطريقها للعطريه..
وين فاتت من قدام المطحن قلبها وجعها كتمت الوجع وشدت الدمعه وقعدت تمشي لين وصلت في العطريه وخشت وهي تقول..
/السلام عليكم..
ردوا عليها الموجودين داخل السلام..
مشت طول جهة الاعشاب دور ع حنة الورق..
وكانت محتاره..تشري حنة طيبعيه ولاحنة صبغه..
"طوبى"
شافت جنبها ابتسمت وقالت..
/حنونه ياهلا..
وسلموا ع بعض بالخد بعدين قالت حنان..
/عاش من شافك..
طوبى:تسلمي حبيبتي شن اخبارك؟
حنان:لاجديد زي مااني..
ابتسمت طوبى وقالت؛شن حال امك وباقي العيله..
حنان:كلنا في خيار الخير الحمد لله..انتي شن حالك وحال بنتك؟
طوبى:الحمد لله في نعمة من ربي..
حنان؛الحمد لله..واقفه قدام الحنه تبي حنه لشعرك..
طوبى؛ايه..بس الحق ماخاطريش في لون الحنه.نبي لون تاني..
حنان:وعلاش ماتصبغيش..
طوبى:تهلك الشعر..
حنان؛خودي صبغه صحيه لشعرك في هلبه راهو..
طوبى:سمعت بيهم بس مش متأكده انهم صحيات حق..
حنان؛لاصحيات هما مش بقوة الصبغه العاديه ومايطولوش زيها لكن كويسات للشعر وتعطيك اللون اللي تبيه عن تجربه..تو في العرس نوريك شعري وتشوفي بعينك كيف كويسه..
طوبى اقتنعت بكلامها وقالت..
/باهي شن هي الماركه متاعهم..
عطتها حنان اسم احسن ماركه وكملت تقول..
/وخودي شامبو للشعر المصبوغ وبلسم في نوعيه كويسه..
وسمتلها اسمها..
ابتسمت طوبى وقالت..
/صحيتي حنو..
حنان؛ماعنديش فيه جميل..
طوبى:انتي شن جاية تاخدي؟.
حنان:كركم طبيعي وزيت الحية..
وكملت طوبى هدرزتها مع حنان وخدوا اللي يبوه وطلعوا مع بعض من العطريه وهما يهدرزوا..
🍃في الوقت اللي كان فيه التارقي واقف ع ربيع وسامي حدا المقهى متاع نضال..
حنان كانت منسجمه مع طوبى في الهدرزة بس وين شافاته معاش حست بوجودها من اصله..
تتأمل فيه وهو لابس قميص ابيض ع سروال جينز لونه اقرب للرمادي وع يده محطوطه ماليه لونها رمادي..
ومدرقات عيونه بالنظارات البنيه الهافته..
ويتكلم بيده اللي فيهم الخاتم والساعه نزلت عيونها لرجليه لقاته لابس مايشبه البوت الرجالي لونه اسود..
بس اللي ركزت عليه اكثر انه حول الجبس..
لااراديا وكعادتها حنان ماتعرفش تسيطر ع نفسها قالت بفرحه..
/حول الجبس..
طوبى سكتت بإستغراب والتفتت جنبها وشافت وين تشبح..
عرفت قصدها رجعت شافتلها لقت عيون البنت تتناثر منها قلوب الحب هني وهني..وع وجهها ابتسامه حب واضحه..
شدت ضحكتها بعدين قالت..
/من قصدك؟
حنان تلقائيا:التارقي..
ابتسمت طوبى..
حنان استاقظت وغيرت عيونها بإحراج ووجهها ولى احمر..
طوبى مابتش تحرجها وماسألتها عن شي..
وقعدت حنان ساكته وهي محرجه..
لين وصلوا في حوش لطفي..
طوبى:نتلاقوا ان شاء الله..
حنان بإبتسامة احراج؛ان شاء الله..
ومشت طول وهي مازال محرجه..
طوبى ابتسمت ومشت بتفتح الباب وهي تتفكر في عبير وهبالها ع التارقي ضحكت..
فتحت الباب وخشت وسكراته وراها..
وهو وقتها ولأول مرة مايحسش بوجودها ولاينتبه ليه...
🍃🍃🍃🍃🍃
"فايزة عزماتك امي معقوله ماتمشيش؟!"
صفيه؛ماقلتش مش ماشيه..بنمشي لكن في الصاله بس..
اميمه بضيق؛زي البرانيه..
صفيه:هما يبونا برانيه يابنتي..
اميمه:لامش هكي بكل يام انتي اللي خديتي موقف ومعاش تبي تتنازلي عنه..
صفيه بحده؛وهديكا طوبى تنازلت عن الموقف اللي خداته!؟
اميمه ؛حني اللي غلطنا فيها يام..
صفيه سكتت وهي مضايقه..
اميمه:طوبى زمان كانت اقربلك حتى من سدره كانت بنتك مش بنت سلفك كيف تغيرتي عليها هكي؟!
صفيه ودموعها في عيونها..
/مش مني يااميمه من اللي صارمع خوك في جرتها..
صفيه:يام حسين خلاص حول طوبى من راسه ولت عنده بنت عمه وبس..
صفيه؛بعد شني بالله اميمه:اللي يسمعك يقول عمره في 70 حسين مازال في عز عز شبابه يام سيوره يتزوج ويدير عيله وتفرحي بيه..
صفيه بضيق:يارب..ربي يهديه ويتزوج قبل لبوه ياخد الرابعه..
اميمه بضحكه:غير ياخد التانيه قبل..
صفيه بإزدراء:فكينا من سيرته..
اميمه بضحكه:غير من اللي جابها بس..
صفيه قلبت عيونها بملل...واميمه تضحك عليها..
🍃🍃🍃🍃🍃
طلعت وفي يدها سفرة لوح صغيره فيها فنجان قهوة..
لقاته مقعمز في مكانه المعتاد ولاهي باللاب توب يبعت في ايميلات..
قدمتله لين وصلت فيه وحطت السفرة قدامه..
هو قال بحده..
/ماطلبتش قهوة..
صابرين؛هدا وقتها قهوتك..
هو قال؛ارفعيها..
صابرين:اني دايرتها وتاعبه فيها حتشربها تبي ولاماتبيش..
هو سكر اللاب توب وناض بيمشي..
بسرعه وقفت قدامه وقالت..
/علاش هدا كله؟
قعد يشوفلها بحده وهو ساكت..
صابرين وهي عاقده حواجبها بضيق قالت..
/علاش!؟
هو رد بشي من الانفعال..
/علاش انتي تاخدي رايي في حاجه حاسمتيها معاه..علاش تقوليلي اجريلي ومش عارف شني وهو عندك مدام خديتي رايه اكيد هو اللي حيتكفل بكل شي...ولا هو قالك قولي لرضا يمشيلك في الموضوع! ضحك سخريه وقال..اني مرات يضربني الغباء عقلي يوقف ومعاش يعرف يفكر..
صابرين ودموعها في عيونها قالت..
/لو انت ماتبيش مايصير شي..
هو قعد يشوفلها بإنفعال بعدين قال..
/علاش!؟
صابرين؛لأنك اهم عندي منه..
فتح عيونه ع وسعهم وهو يشوف لعيونها وقلبه انجن بدقاته..
هي داركت نفسها وقالت..
/انت وامينه اقربلي منه لو عارضتوا مش حندير شي..
ضم شفايفه لداخل وضيق عيونه وهو يشوفلها..
وهي نزلت عيونها لوطا هربا من نظراته وقالت..
/هاه شنو؟!
رخي شفايفه..ووزع نظره ع المكان..التفت للطاوله..خدي فنجان القهوة وشربه في مره وحده..
وهي تشوفله بضيق..
هو شافلها وقال؛همم..شربتها..بري خشي..
تنهدت بضيق بعدين مشت خدت السفره وخشت داخل..
وهو معاها بعيونه لين خشت..
غمض عيونه محاولة منه لتهدئة نفسه بعدين تنهد..فتح عيونه وشاف للاب توب..خداه ومشي بيه للسياره..
ركب بيه وحطه في الكرسي اللي جنبه وشغلها وطلع من العمارة..
🍃🍃🍃🍃🍃
سويسرا..
في احد مراكز العلاج والتأهيل..
اللي كانت فيه سدرة راقده في نومها العميق اللي طال أمده..
كان اياد واقف ع الشباك اللي يطل ع حجرتها ومعاه الدكتورة الليبية جهينه..
☘جهينه بضيق؛يوسف سيطر عليه الاحباط ليه مده ماخشش عليها يجي يشوفها من هني ويروح..
اياد يسمع فيها وهو يشوف لسدرة بضيق..
جهينه؛قبل كان متفائل هلبه بس بعد طالت المده بدي ييأس كل يوم اكثر من اللي قبله..
هو قاطعها وقال..
/نبي نخشلها..
قعدت تشوفله وهي تفكر بعدين قالت..
/حقك انت خطيبها في النهايه..
🍃ويخش إياد لسدره..
ويقعمز قريب عليها..وقعد يشوف لملامحها وهو مبتسم..
مر قدام عيونه شريط الماضي اول مرة شافها فيها..
كيف عجباته بجمالها وقوتها ولقي روحه مع الوقت طايح في حبها ومن بعدها معاش قدر يشوف لغيرها...
صعب اللي يحب وحده سدرة الواعر يقدر قلبه يشوف لغيرها..
المراة اللي ماتكررش ومايكونش ليها بديل تنحب لأخر لحظه من العمر...
ابتسم وعقد حواجبه وهو يقول..
/سدرة..متأكد انك تسمعي فيا توا..الكلام اللي بنقوله توا ممكن لو كنتي واعيه مانقدرش نقوله..ليا قريب عشرة شهور نراجي فيك..نجي بين الفترة والتانيه ونشوفك واني متأمل تصير حاجه تفرح قلبي..نكلم في يوسف يوميا نسأل عليك ونراجي نسمع شي يعطيني امل..هو اني اساسا متأمل من غير شي..ضحك وقال..احساسي يقول انك حتفيقي ونكملوا مع بعض من وين ماوقفنا..سدرة مهند تزوج وقعدت بروحي..بس في كل مكان في الحوش كنت نشوف فيك ونتخيل فيك معاي..اني وياك لهكي كنا مخططين..نزوج مهند ونتزوجوا..لاكنت مخطط نتزوجوا قبله بش يطمن عليا يطمن على بوه اللي عايش مع المراة اللي يحبها..ياااه ياسدره لو تعرفي شن ديري في اللي يحبك..يشوفك ومعاش يشوف معاك ولابعدك حد...
🍃وسدرة تسمع فيه وفي عالمها الخاص شافت صورة من ذكرى بعيده..لما كانت واقفه معاه في الكليه لما طلبها اول مرة للزواج...هني سدرة ماشافتش اياد بس..شافت صورة حد تاني...🍃
اياد غير نظره للشباك وهو يتكلم بعدين رجع شافلها..
سكت وهو متفاجئ بقوة...
شاف حواجبها معقودات...وهما ماكانوش هكي بكل..
معناها استاجبت بقوة لكلامه..اياد هني من لهفته ناض بسرعه وطلع يجري للدكاترة بش يبلغهم..
وفعلا جو معاه الدكتور المسؤول عن حالتها ومعاه جهينه..
ووين خشوا للحجره شافوها لقوا ملامح وجهها زي ماهي الملامح اللي هما يعرفوها..
انصدم اياد وقعد يقسم للدكتور ان اللي شافه كان حقيقه مش وهم...
وهما بدورهم داروا بعض الفحوصات بس يعرفوا شن اللي صار بالزبط...
وللأسف النتيجه ماكانش فيها أي جديد..
اياد ماباش يستسلم نهائي لدرجة انه حكي ليوسف بحماس وتفاؤل عن اللي صار..بس رد فعل يوسف البارده اللي حسساته انه مش مصدقه او يساير فيه خلاته يفقد الامل من يوسف لكن من رجوع سدرة للعالم الحقيقي مافقدش ولو شويه من امله بالعكس زاد اكثر من قبل..
🍃"هاه شني بوي شن تحس توا"
المهدي هو حاط يده ع مكان قلبه ويدلك فيه قال..
/كويس يابوي كويس..
محمود بقلق:روح بيه للحوش يامحمد..
محمد المهدي بقلق:نوض معاي بوي نوض..
المهدي كان حاس روحه فاشل صحيا ويبي يرتاح..
ناض مع ولده اللي شده من ذراعه..
ومشوا طلعوا مع بعض..
والعمال يقولوا بأصوات متقطعه..
"لاباس..لاباس ياعرفي"
المهدي بشي من التعب لايوريكم باس..محمد بوي نقدر نمشي بروحي..
طلقه محمد وقعد ماشي وراه..
طلع المهدي من المطحن..جو عيونه ع مطحن جنة..
عيونه وقتها شافوها واقفة قدامه وقفتها المعروفه..
حاطه ايديه ورا ظهرها وتكلم في العمال متاع مطحنهم...
وتخيلها بوقفتها التانيه اللي لما تكون في حالة غضب توقفها..
يد في نصها واليد التانيه فاردتها لتحت وهي عاقده حواجبها..
ارتسمت ع وجهه ابتسامه خفيفه لاتكاد ترى..بعدين غير نظره عن المطحن ومشي كمل طريقه للحوش وولده محمد اللي كان كله خوف عليه وراه..
🍃فهالوقت سدرة بنته كانت في حوش عمتها يهدرزوا ع ولدها محمد..
سدرة:مولي يتحشم هلبه وماياكلش الا مع يزن في المربوعه وراهو شاطر هكي قال يزن..
نسرين بإبتسامه:باهي كويس هدا اللي نبيه..
سدرة:تو لما يتعود ع عمو ربيع يجي يعيش هني..
نسرين:ان شاء الله..
سدرة:عمتي بتحضري عرس صفاء؟
نسرين:ايه حبيبتي يوم الكسوة والحفله..
سدرة:خفت ماتحضريش ع خاطر اللي صاير..
تنهدت نسرين بضيق وقعدت ساكته..
سدرة:بنقولك حاجه قالتهالي جوري بكري..
نسرين:شن هي؟
سدرة:قالت عمي الجالي شري لأمها قفطان حفله كبير هلبه...
رفعت نسرين حاجبها وضيقت عيونها..
سدرة؛تو هو مش حتى ابله طوبى مرته علاش يشري لنجاة بس!؟ وعلاش يشري في حوايج لجوري وخوتها وجنة بنته لا!؟ امها ولاخالاتها هما اللي ياخدولها في الحوايج وحاجات تانيه وكأن ماعندهاش بو..
نسرين ضايقها ووجعها الكلام اللي تقول فيه سدره..
سدره بضيق:ابله نجاة خدت عمي من مرته وبنته وخلاته ينساهم..
نسرين:من يقولك في الكلام هدا!؟
سدرة؛عمتي اني مش صغيره راهو نشوف ونفهم بروحي..
هزت نسرين راسها وتنهدت بألم وقالت..
/شن تبيني نقولك يابنتي..حسبنا الله ونعم الوكيل وخلاص...
وسدره قعدت تشوفلها بنظرات حزن وبتفكيرها البريئ كان عقلها مع بنت عمها...
🍃🍃🍃🍃🍃
ويامساء الخريف واجوائه اللي تكون خليط بين الفصول..
فهاليوم كان حاضر الشتي..الجو بارد بزياده...
وحوش لطفي الواعر دافي باللمه والزحمه اللي فيه..
زحمة فرح ويامحلى زحمة الفرح لما تكون القلوب متوالفه وتود بعضها..
سالمين جت وهالمرة معاها وحده من كناينها..
وسميره ناويه تبات من الليله..ونبيله بحكم شغلها ماتقدرش تبات بس كانت سهرانه معاهم..
مع بنات لطفي وحفيداته واخته وفايزة وبناتها حتى اميمه كانت حاضره ومنسجمه هلبه مع الاجواء الحلوة..
هي كانت وسطهم تمرر في نظرها عليهم..
تشوف في فردوس اللي تهدرز بحماس ع قصة مضحكه صارت معاهم في الصاله..
وجنبها فايزة تضحك من قلبها..قريبه من فايزة اريج اللي كانت تعلق ع القصه وهما يضحكوا ع تعليقاتها وترد عليها سميره ولازم تلقح عليها كم كلمه...
ونبيله جنبها تهدرز مع اميمه والزوز منسجمات ومرة مرة يسمعوا في قصة فردوس..
في نصهم مطيره ومعاها سالمين يخيطوا في منادير ناويين يفرشوهم في الخيمه يوم السهريه الكبيره والزوز كانوا مرة مرة يشاركوا في الحديث..
وبعيده عنهم غرفه والاء قارنات الروس ع التليفون والزوز يبانوا يقروا في شي ويضحكوا..
جنبهم تاله راقده..ومروة حداها مستمعه بحماس للهدرزة..
اما العروس فكانت لاهيه بتليفونها والباين عليها تقرا في شي مهم مركزه معاها..
وهالجلسه الاطفال بعاد عنها كلهم راقدين في دار المعيشه..
هي وسط هدا كله..كانت تستنى في خشة سدرة بسفرة قهوة وهي تقول..
"وسعولي وسعوا وعاودوا شن كنتوا تحكوا"
تلقائيا ابتسمت ودموعها في عيونها..
قامت تليفونها وشافت التاريخ..حست بضيق شديد وخوف..
معاش عندها قدرة تفارق غالي تاني من غواليها هي عايشه واملها كبير في الله ان سدرة حتفيق..
بس طول المده احيانا يجيب اليأس وهي ماتبيش اليأس يعرفلها طريق..قبل لتنزل تليفونها ركزت في التاريخ مرة تانيه...
والذاكرة اللي مصرة توجعها..فكرتها زي هاليوم شن كان في قبل سنه..
زي اليوم كان يوم حمامها هي واميمه..غيرت نظرها لأميمه لقتها مبتسمه وجوها حلو وكأنها ناسيه كل شي ومعاش في شي يهمها من الماضي...هالشي كان واضح في عيون اميمه..
عندها حق..كله ولى ماضي وراح معاش في شي يربطها بيه عايشه حياتها وكأنها مامرتش بهالمرحله نهائي..
بس هي وين واميمه وين..
هي اللي عاشاته قاعد حاضر قائم وعنده بيه رابط قوي لدرجة تجعله من المستحيل يولي ماضي وراح لحاله مهما صار..
ناضت وانسحبت من حداهم..ومشت طلعت للجنان من الكوجينه..
وقفت فيه وريح الخريف تضرب فيها..
وهي تتفكر في تفاصيل عرسها..تفصيل تفصيل...
مشت قعمزت تحت شجرة الياسيمين وقعدت تفكر..
كيف بتواجه الناس في هالعرس..كيف حتواجه نظراتهم وممكن همزمهم ولمزهم اللي حتما حتشوف او تسمع منه شي..
ضرتها اكيد حتحضر....ياااه ياطوبى من بعيد ساهل تقولي نقدر نقاوم ونواجه..و..و..و...
ولما جي وقت الجد اكتشفتي انك اضعف من المواجهة...
غمضت عيونها وخدت نفس وطلعاته بقوة..بعدين فتحتهم وتعلقوا في السمي بنبرة الم قالت...
"يارب"
نزلت عيونها للفراغ وقعدت تفكر..ومش عارفه كيف لسانها تلقائيا قعد يردد في الصلاة الابراهيميه بصوت مسموع ليها هي..
تلقائيا كان لسانها يتحرك..وهي تردد وتفكر علاش هدا اللي طلع مني توا!؟ علاش هالذكر تحديدا!؟.
وفيسع جتها الاجابه..من سرعة الاستجابه نادت وهو سبحانه لبى على طول وعطاها اللي هي بأمس الحاجه ليه حاليا..
هدت نفسها شويه..وضمت ايديها لبعض وقعد تردد فيها مرات ومرات....
🍃إذا تكفى همك🍃
🍃🍃🍃🍃🍃🍃
ماشيه بطريقها للكوجينه اللي تحب تقعمز فيها..
لابسه سروال اسود واسع وفوقه بلوزة بيضا قصيره وطالقه شعرها..
وصلت في الكوجينه وخشت لقاته مقعمز ورا الطاوله وقدامه صونيه فيها شرايح فواكه ياكل ويتفرج ع اللاب توب..
وامينه مقعمزة تسمع في الراديو..
قعمزت ع كرسي البار وهي تشوفله بربع عين..
كيف منسجم ومرة مرة ياكل حاجه..
امينه وهي لاهيه مع البرنامج قالت..
/ياختي كفايه بقا من الصبح وانتي ماسكه التليفون وبترغي لسانك مابيعياش..
ضحكت صابرين وهي عاقده حواجبها..
لكن رضا مش معاهم بكل..
شافلته بربع عين مرة تانيه لقاته متشنج قريب يخش في الشاشه من الانسجام..
شويه قال بأسف..
/تمتله...
تنهدت بملل وهي تمرر في نظرها بيناتهم..
امينه بضحكه؛المذيع دمه خفيف ولذيذ قوي..
ابتسمت صابرين..
التفتت امينه وقالت..
/اما اقوم اعمل عشا صابرين لغاية ماتخلص الاغنيه..
وتشوف صابرين وتنفجع وهي تقول..
/يالهوي!
صابرين بضحكه:شفتي غوله!
هو شاف لصابرين بطرف بعينه..
امينه بضحكه:من امتى انتي هنى!؟
صابرين بضحكه:من لما كنتي نازله في الوليه الرغايه..
امينه بضحكه؛دي في كل برنامج لازم تتصل الصبح الظهر بالليل وكأن ماعندهاش حاجة تانيه تعملها في حياتها وتفضل ترغي ساعه لغاية مايطردوها طردة محترمه..
ضحكت صابرين.
امينه بإبتسامه:ثواني ويكون العشا جاهز..
هزت صابرين راسها وقعدت تسمع في البرنامج..
شويه المذيع قال..
"نخليكم توا مع النغم اللي طلباته ودة ودودة...شو واثق بحالو"
صابرين:علي منمن ترا ..
مشت امينه طول علت الصوت..
وبدت الاغنيه..
اتكت صابرين بمرفقها ع رخام البار وحطت يدها تحت خدها وقعدت دندن مع الاغنيه..
وتشوف لرضا بطرف عينها..
وهو مع الفيلم اللي يتفرج عليه..
غيرت نظرها عنه وانسجمت مع الاغنيه بعدين نزلت يدها للرخام وقعدت تضرب بصوابعها عليها وهي دندن في الاغنيه..
وامينه حطت قدامها سفرة عشاها..
هي خدت الموس والشوكه وقعدت تضرب فيهم ببعض من كثر ماكانت منسجمه وامينه تضحك عليها..
هو شافلها برفعة حاجب...
نزلت الموس الشوكه وهي تشوف لأمينه وتغني..
وانا اسأل حالي شو خصوا عم يسألني بصفتو مين
فكرتوا مجنون ماتوقعتوا يكون
حبيبي ونصي التاني اللي رح حبو بجنون..
وامينه تحمست وقعدت تصفقلها..
وهو يتفرج عليها وخلاص...
شويه رجع البرنامج..
هي قالت:الله اسكالوب جي خاطري فيه ودرتيه من غير مانقولك منمن اني معاش نقدر نعيش من غيرك من الاخير..
امينه بضحكه:بالهنا والشفا ياحبيبتي القلوب عند بعضها..
صابرين وهي تاكل؛ياروحي انتي..
رضا:نقصي الراديو امينه..
امينه:حاضر..ومشت نقصاته..
هو قال لأمينه؛الليله بنسافر..
وقفت صابرين ماكله وشافتله بصدمه وفيسع دموعها عبوا عيونها..
امينه:فين؟
رضا وهو يشوف للاب توب:لتونس ومنها لسويسرا..
امينه:تروح وترجع بالسلامه..
صابرين بنبرة مخنوقه شويه..
/واني كيف يصير فيا..
شافلها وقال..
/شن كيف يصير فيك!؟ تبي تمشيله قصدك!؟
صابرين هالمرة عصبت ع الآخر..
من الغضب حدفت الصونيه اللي قدامها وطيحتها وجت لوطا كل جزء في جهة باللي فيها..
ومشت طول طلعت وهي معصبه ودموعها نزلوا وهي تقول.
/التافه..الحقير..
🍃في الكوجينه..
امينه:والله مانا عارفه اقول ايه ولا ايه..
رضا وهو عاقد حواجبه:شن مبرر التصرف التافه هدا في نظرك..
امينه بحده:تلميحك السخيف..
رضا بمكابره:هي قالت واني شن بيصير فيا شن قصدها من سؤالها هدا معناها تبي تسافرله..
امينه:يالهوي ع الغباء..هي قصدها حتعمل ايه من غيرك تعودت عليك تاخدها وتجيبها وتفسحنا انت بقيت معاها في تفاصيل يومها كله..من الاخر مش عايزاك تبعد عنها...
رضا وهو عاقد حواجبه بغضب وارتباك..
/لالا مش هكي..مش هكي بكل..
وناض ومشي طلع من الكوجينه وحتى اللاب توب خلاه..
امينه بضيق..
/ربنا يرحمكم برحمته....
🍃🍃🍃🍃🍃
وقعدت صابرين تبكي طول الليل لعند ماتعبت..كانت متمدده ع سريرها وهي سرحانه ودموعها تنزل..
تفكير رضا فيها حيكون زي تفكير اي راجل تجاه وحده زيها..
مهما كان اللي يحسه اتجاهها قوي لايمكن ينسى هي شن كانت...
في هاللحظه صابرين تفكرت كيف كانت عايشه علاقات ياعلاقات ايام كانت في الجامعه وكلهم رجاله كبار في العمر كانت تضحك عليهم بكلامها الحلو وجمالها وصغر سنها بش تخليهم يصرفوا عليها..
وكيف وصل بيها الحال انها وبكل سهوله فرطت في اعز ماتملك بش تكون مع راجل صاحب قوة ونفوذ ومال..
وعلاقتها بيه من بدايتها كانت ع عين رضا..
دفنت وجهها في المخده وقعدت تبكي بألم..وخزي شديد..
قداش كرهت نفسها وقتها..وحست بمعنى الكلمه انها وحده رخيصه زي ماقال رضا بالزبط...
ليلتها من البكي تحساب روحها تطلع...
ومن كثر مااجهدها البكي رقدت..لكن حتى وهي في نومها كانوا دموعها ينزلوا ودارو ع مخدتها اثر كبير...
لليوم التاني قعدت راقده ورضا قبل مايسافر وصى عليها امينه وخلى قلبه عندها...
🍃🍃🍃🍃
هي بعد مافاقت...خدت دوش سخون واسترخت..
وقعمزت مع نفسها وقعدت تفكر هلبه لين وصلت لقرار..
وقرارها كان انها تباعد عن رضا وتخلي علاقتها بيه رسميه وسطحيه جدا اكثر من قبل..وتعيش حياتها في حوش مختار ع حالها لين ربي يديرلها طريق....
بعد ماخدت هالقرار وعزمت ع تنفيده ارتاحت..
ونزلت من دارها بش تقعد امينه وتغير جوها وامينه مابتش تحكي معاها في أي شي ممكن يضايقها نهائي...
🍃🍃🍃🍃🍃
7من نوفمبر...سنة 2018..
الساعه 5:40فجرا...
خش محمد ع بوه بش بينوضه يوتي روحه لصلاة الفجر..
وين وقف حدا سريره..
لقاه راقد ع ظهره وحاط رجل ع التانيه وهما مفرودات وذراعه ع جبهته..
نومة شخص مالاش هلبه راقد..
ركز في ملامح وجهه كان باين انه يحلم..
☄وفعلا المهدي كان يحلم..او ممكن يشوف في رؤيه..
في مكان كله خضرة..
كان راقد نفس الرقدة بالزبط لكن ذراعها ماكانتش ع جبهته..
كانت في يد تمسح ع جبهته وشعره..
لما حس بيها فتح عيونه..ويبان عليه وجه جميل جدا..
وجه يعشقه عشق...وجهها هي..حبيبة القلب والروح..
كانت تشوفله بإبتسامه حنونه..وهي تمسح ع راسه...
وعيونه المغرمات يتأملوا فيها بشوق..
رفع يده لوجهها يبي يتحسسه ويتأكد انها هي فعلا مش خيال..
شدت يده ونزلتها وكانت حاطه اصابعه ع خاتم الفضه اللي كان لابسه وشاده عليه بقوة..
وهو يشوفلها وبس...كانوا الزوز تحت شجرة ياسمين حلوة هلبه زهورها كلها نظره..
سمعها قالت..
"مهدي"
ابتسم ...
☄وابتسامته بانت ع وجهه وهو راقد وولده شافها..وابتسم حتى هو...
🍃في نفس الوقت..
كان نسرين راقده تحلم..وربيع اللي كان يوتي في روحه للصلاة ركز عليها قعمز حداها وهو يشوفلها كيف تبان مضايقه..
☄كانت تشوف في فايزة وسدرة مقعمزات في مكانهم المعهود مكان صديقات عمر...
فايزة حاطه راسها ع كتف سدره وسدره حاطه راسها ع راس فايزة..
وهي واقفه بعيده تشوفلهم ..
شافتها سدره..ابتسمت وقالت .
"تعالي"
هي طول مشتلها..
اشرتلها تقعمز جنبها..
قعمزت نسرين..وسدره قربتها منها وخلت راسها ع كتفها..
ونسرين ابتسمت بفرح..
☄نفس الابتسامه اللي شافها ربيع...
فاقوا هي وخوها...
المهدي شاف محمد ابتسم وقاله..
"صباح الياسمين"
محمد رد بضحكه..
"صباح الفل"
☘اما نسرين وين شافت ربيع ابتسمت من قلبها وقالت..
/ربيعي..
هو ضحك وقال..
/دوم تنوض رايق ياسمح..
ضحكت ورجعت غمضت عيونها...
🍃🍃🍃🍃🍃
اليوم كان اربعاء..يوم الفاتحه والحمام طبعا مجرد تسميه لاأكثر..
لليوم..مافيش مظاهر فرح لافي من دربك ولاشغلوا منظومه..
لكن في الحوش الصيد المنظومه من اليوم اللي قبله شغاله..
🍃هما في حوش لطفي ماكان في حد قادر يفرح بمعنى الكلمه فايزة نفسها كانت في داخلها غصة قويه..
بس اكيد حيجبروا بخاطر صفاء اليوم ويفرحوها...
🍃طوبى في هاليوم كانت مجبورة تمشي الكليه ع خاطر مشروعها تخرجها المشرفه متاعها الزمتها تجي في هاليوم..
وهي من 8الصبح كانت في الكليه...
🍃🍃🍃🍃🍃
الساعه 10:30صباحا..
المهدي كان في حوش نسرين عزم روحها ع فطور عندها..
فطروا وهدرزوا ولعب ع يحيى شويه..
ووين جي طالع..
وقف في الباب..التفت لأخته وقال..
/نسرين..
هي وكأنها كانت تراجي فيه قالت بلهفه..
/نعم؟
المهدي؛حلمت بسدره..
هي بانفعال ودموعها نزلوا..
/والله حتى اني..
هو شد روحه بقوة وقال بقلق..
/شن شفتي ؟
خدت نفس وحكتله الحلم ودموعها سيل...
نسرين بنبرة باكيه..
/ماتمنيتش نفيق تصدق!
هو بلع ريقه وقال..
/اني شفتها في مكان زي الجنة كنا..غير نظره عن اخته حرجا وقال..مقعمزين تحت شجرة ياسمين كبيره..
هي كانت لابسه ابيض واني نفس الشي..شن تفسيره؟
نسرين:مش عارفه بس حاسه تفسيره حلو..
بلع ريقه تاني وقال..
/ان شاء الله..ان شاء الله..وطلع بسرعه وكان واضح عليه انه خايف من تفسير الحلم..
وخلا اخته تخاف زيه..
🍃🍃🍃🍃🍃
وفي سويسرا ..
وين ماكانت راقده الياسمينه..
ماشي خوها الكبير ومعاه ذراعه اليمين
توجهوا طول لحجرتها
رضا مشي وقف في الروشن..
اما مختار فتح باب الحجره وسكره وراها.
قعد واقف في الباب يشوفلها
ورضا مركز في نظراته ليها..شويه شافه قدملها..
قرب الكرسي وقعمز عليه..نزل راسه وقرب من وذنها وهو يقول..
/بنت لطفي الواعر شن جو..طولتيها وبيختيها راهو..حتى الدكاترة قالوا لو فاتت العام عليها السلام...يعني تبي معجزة خارقه بش تنوضي..واني والله مانبيك تنوضي...لأنك كان نضتي حتولي تحرميني من كل شي..عيلتي وكل شي يخصها..
حوشنا والمطحن..وحتى ذكرياتي...تعرفي بعد ماطلعتي من حياتهم اني خشيتها وتعرفي من ساعدني نخشها..حبيبة قلبك وبنتك زي مايقولوا...طوبى..مش هكي وبس خلتني ناخد مكانك في حياتها...يعني خلاص انتي وليتي ماضي وعدا زي ماعدوا غيرك وكلها مسألة وقت بس ياسدرة وصدقيني حتولي نسيا منسيا..المجد اللي قعدتي تبني فيه لروحك سنين راح كله في شهور ومافي حد تفكر منه شي..
هدا العدل..العدل بعينه يابنت لطفي..وفي النهايه مايصح الاالصحيح..
🍃ورضا يتفرج ويبي يعرف شن قاعد يقوللها!؟
منظره كان مخيف وهو يكلم فيها..
زاد قرب من وذنها وقال..الا حقه قوليلي..معقوله يوصل بيك حبك للبطوله انك تاخدي السحر مكان طوبى!
ماهو هو هدا التفسير الوحيد..لو سلمنا جدلا ان كلام صابرين صح..الحاله اللي كنتي فيها قبل الطيحه وصلتني لهالنتيجه!
بس كيف الله اعلم..امم ماعلينا..اللي يهم توا ان الحال تغير وكل شي رجع لمكانه الطبيعي...قرب من وذنها اكثر وقال..
"سلمي ع بوك وامك"
ووخر عنها وهو يشوفلها بإبتسامه كره..
بعدين ناض ومشي فتح الباب وطلع...ورضا بعد ماالقى نظره ريبه ع سدره مشي لحقه حتى هو ..
وهما ماشيين تلاقوا مع جهينه حياها مختار بحركة الراس
وكمل طريقه..
وهي قعدت معاهم بنظراتها المرتابه...
🍃طلعوا الزوز من المركز..
لاقاهم اياد..وين شاف مختار انصدم وخاف..
ومشي بسرعه خش داخل
وتوجه لدار سدره..بس لاقاته جهينه ووقفاته..
جهينه:دكتور صباح الخير.
اياد بتوتر:في واحد توا طلع من هني كان لابس بدله لونها ازرق غامق..
جهينه:ايه اخ سدره..جي من ساعه وقعمز مع الدكتور المسؤول عن حالتها تكلموا شويه وبعدين مشي شاف اخته..
اياد؛من برا ولاخشلها..
جهينه:خشلها..
طول اياد مشي بسرعه لحجرة سدره..
☄☄☄☄
فهالوقت..
من بعد ماطلع مختار من حجرة سدره..
في العالم متاعها كانت تسمع فيه وتشوف قدامها في صور ليه..هالصور شافت معاهم صور لبوها وامها..وفي الاخير صورة لطوبى بس في عمر كبير هالمرة..
فجأه اختفوا الصور..
والفضاء الاسود بدي يتبدد..وشافت روحها وسط ارض لاهي خضرا ولاقاحله وفيها شجره وحده
كانت امها تحتها شاده بنيه صغيره ترقد فيها..
شويه شافتها امها..طلقت البنت ووقفتها وقالت..
/هديكا اختك بريلها..
وقعدت البنية تمشي لسدرة..
وسدرة تشوفلها بحزن وخوف..
سمعت امها تقول..
"طوبى ياسدرة طوبى"
هي قدمتلها تجري وين وصلت فيها طاحت ع ركابها وضمتها بقوه لين قريب دخلتها داخلها..حضن حب وخوف وحمايه....
🌿وتطلع سدرة من العالم متاعها وترجع للعالم الواقعي الحقيقي...
فتحت عيونها لتاني مرة بعد الغيبوبه..
بس هالمرة مش زي هديكا المرة..
قعدت تفتح فيهم وتسكر والرؤيه ماكانتش واضحه قدامها..
لين توضحت وشافت سقف الحجره..
ضيقت عيونها بإستغراب..بعدين قعدت ترمش فيهم بشي من البطء..
فجأه..
تسمع صوت قوي..يدوب حركت عيونها جيهته..
شافت شخص..عقدت حواجبها بإستغراب وين شافاته..
اما هو..
🍃اياد بصدمه شديده..
/سدرة!.. ويلتفت زي المجنون ويطلع للدكتورة ويجبدها من يدها ويدخلها وهو يقول بنبرة مرتعشه..
/شوفي!!
الدكتورة بدهشه..
/فاقت..!!
ولفت تجري طلعت من الحجره..
هو جي بيلحقها بس تراجع والتفت شاف لسدره..
لقاها مازال تشوفله..
رجليه اللي حسهم مش حاملينه قربوه منها..
ولما وصل فيها قال..
/سدرة!
بدت ع وجهها ملامح ابتسامه خفيفه..
الراجل معاش قدر يتمالك نفسه حط يده ع عيونه وقعد يبكي
وهي رجعت عقدت حواجبها بإستغراب وهي تشوفله..
🍃🍃🍃🍃🍃🍃
"شن تقولي ياجهينه!....خلاص خلاص جاي"
هدا يوسف اللي لما وصله الخبر قريب انجن طلع يجري من الشركه اللي يخدم فيها..وقف تاكسي لأنه مش حيقدر يسوق وهو في هالحاله..
وطول الطريق وهو يرجف ومش طايقه صبر بش يوصل..
وصلت التاكسي..حط لصاحبه فلوسه كلهم..
ونزل يجري وخلا الباب المفتوح وخش للمركز...
🍃🍃🍃🍃🍃
"ياربي نجي البنيات السمحات محلاهم"
هادي فردوس بعد مالبست جنة لبسه لونها وردي وفتلكتها زي مانقولوا..
فردوس:هي خل نقرا عليك بعدين نطلعك..
وبدت تقرا عليها...
بعد كملت قالت..
/هي تعالي نطلعوا..
وفتحت باب الدار وطلعت..
وتسمع صوت زغروده غريب..زغروده فيها نبرة بكي..
قعدت تمشي بسرعه..لين وصلت في الصاله اللي كانوا فيها الكل يفطروا ماعدا مطيره اللي كانت رافعه الفطور للحاج علي..
مطيره اللي خشت عليهم وهي تزغرد وتبكي وتليفونها في يدها..
فردوس طول دموعها نزلوا وهي تقول..
/عمتي!
مطيره بفرحة ودموع ونبرة بكي وعياط في نفس الوقت...
"سدرة ناضت..سدرة ناضت"
عيطت اريج وحطت ايديها ع فمها..وكل اللي حواليها ردات فعلهم كانت مختلفه..
اللي الصدمه جمدتها..واللي حطت ايديها ع قلبها..
واللي قعدت تضحك ودموعها تنزل .
بس سميره ناضت وقفت وعطتهم زغرودة فيقتهم كلهم..
كلهم عيطوا وضحكوا وبدوا يحضنوا في بعض وكأنه يوم عيد...
مطيرة رفعت راسها وايديها فوق وهي تقول..
/الحمد والشكر ليك ياربي الحمد والشكر ليك يامولاي الحمد والشكر ليك..
غرفه جتها تجري حضنتها بقوة وهي تضحك وتبكي وقالت..
/من خبرك!؟
مطيره بعياط من قوة فرحتها..
/يوسف خبرني يوسف...
وفي الشارع صوت الزغاريد ماكانش غريب..
بس الغريب..
هو جية سيارة حسين مسرعه وكأنها صاروخ..
طلع المهدي من المطحن ووراه محمود والزوز يشوفوله بقلق..
شويه شافوا الحاج علي طالع من حوشه..
ع جية سيارة المحجوب..
نزل حسين بسرعه ومشي لجده وحضنوا بعض بقوة..
المهدي قلبه التعبان اللي هلكه الحب قعد يدق بقوة..
تبع بنظره المحجوب اللي مشي للحاج علي وقعد يحضن فيه..
فرحة علي الضحكه اللي ع وجهه اللي ليها وقت مختفيه مالهاش الا سبب واحد..سبب واحد مافيش غيره..
رجليه رفعوه ليهم..ولا دار حساب لحاجه..
وقف عليهم وقال..
/ان شاء الله خير..!
قعدوا يشوفوله حسين وعلي..
علي الواعر اللي كان مركز بنظره في عيون المهدي..
المحجوب بإبتسامة فرح رد عليه..
"سدرة المنتهى فاقت من الغيبوبه..."
🍃🍃🍃🍃🍃🍃
وهالخبر كان رافعه رضا لمختار وهو فرحان ومذهول في نفس الوقت..
وصل في المكان اللي كان فيه مختار مجتمع بناس ليه معاهم شغل..
قرب منه ونزل لوذنه وقال..
/امر ضروري..
ووخر..
مختار استأذن من اللي معاه..
وناض ومشي ورا رضا اللي كان واضح عليه انه يبي يبعده..
وقعدوا يمشوا لين وصلوا في مكان فاضي وبعيد عن الزحمه..
مختار:شن في!؟
رضا:اخت حضرتك..فاقت من الغيبوبه..
🍃مختار وقتها حس ان الدنيا وقفت خلاص...
رضا؛بعد ماطلعت من عندها مباشرة..
رفع يده وسكته..بعدين تباعد عنه وقعد يفتح في يده ويسكر فيها...
فجأه..طلعت منه صرخة غيظ قويه..
بعدين لف ومشي بغضب فات من قدام رضا زي الريح..
ورضا ابتسم بتهكم ولحقه...
#الحرب_البارده
#طوبى
....يتبع.... 🍃🍃🍃🍃🍃🍃
