#طوبى "جنة طوبى"
#جمان_فريد
#الجزء_الثامن_والثمانين "سجن يوسف/صبر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 وإنني أبذل جهدًا ذهنيًا هائلاً كل يوم، حتى أمنع نفسي من الانهيار وإفساد كل شيء 🍃
__________________________________________
مقعمزه ع الصالون وهي منهاره..تبكي بحرقه وتقول..
/حي عليا كان تصير فيه حاجه..والله ماني مسامحه روحي لين نموت..
قالتلها صفاء ودموعها في عيونها..
/ابله سميره ادعيله ماديريش..
عواطف بنرفزة؛بري جيبيلها ميه وسكر تحركي..
صفاء انفجعت من الاسلوب بس مع هذا مشت بسرعه طلعت من حداهم بش دير ماقالت عواطف..
عواطف بقلق:ان شاء الله مافيش عليه خطر ياسميره..
سميرة ببكي:مشي وهو زعلان مني ياعواطف..ووك عليا ماقسى قلبي جايه مش مسلمه عليه هو اللي ناداني بش يسلم عليا..حطت ايديها الزوز ع وجهها وهي تقول..مااقساني مااقسى قلبي...
وعواطف واقفه تشوفلها بحزن وقلق بالغ...
🍃وهدا كله صاير ونجمه مع شيبانيها رافعها مراجعه في وحده من العيادات...🍃
☘☘☘☘☘
"حظ اختك الاسود"
:ماتقوليش هكي مرات مافيه شي..
ابتسام بقلق واستياء؛خوك قال حادث قوي السيارة انقلبت اكثر من مرة..عليك بخت عليك بخت..
اختها تنهدت بضيق وقالت..
/لاحول ولاقوة الا بالله..
🍃🍃🍃🍃🍃
"قالوا السيارة اللي ماشي فيها لتونس دارت حادث تقربعت كلها"
مغليه:ووك عليك يانجمه..كان صارت فيه حاجه عرم الفروخ اللي جايبه لمن بيخليه..
"ان شاء الله مايصيرله شي مسكين ويقعد لصغاره"
مغليه؛نجمه روحت!؟؟
"لا يام لتوا لا"
مغليه؛لوطا انتي؟!
"ايه"
مغليه؛باهي باهي شويه وجايه..
"نراجي فيك"..
نهت مغليه المكالمه ومشت طلعت من الكوجينه لدارها وهي تقول..
"لاحول ولاقوة الابالله"
🍃🍃🍃🍃🍃
وولدها الجالي في مكتبه يتصل بمرته ويعاود وهي ماتردش عليه..
حط التليفون ع الطاوله بقوة من العصبيه ..
ع خشت نجاة للمكتب وفي يدها مخطط..
قام عيونه فيها وهو يشوفلها بحده..
نجاه وهي مبتسمه سخريه قالت..
/خيرها مديرنا لاوي السمرا ع الحمرا..
الجالي:دايره حاجه بتليفوني انتي!!؟
نجاه؛اممم بكري في حجرة الاجتماعات نقلت منه رقم الزبون اللي قتلي عليه..
الجالي ؛تو مش قلت اني نعطيهولك!؟
نجاة:ماسمعتكش..
الجالي هز راسه بعدين قال..
/تعرفي لو تطلعي مدايره حاجه تانيه..رفع سبابته وحركها بتهديد وقال..ياويلك..
هي بتهكم؛من شني خايف!؟ حتى لو كلمتها منه مش حدور اخر همها..انت ماتفرقش معاها..
غمض عيونه بنفاد صبر وقال..
/اطلعي..
تنهدت بتهكم وحطت المخطط ع الطاوله بعدين مشت طلعت وهي مبتسمه بمكر..وخلاته يفور يغلي من الغضب والغيره..
🍃🍃🍃
وطوبى في هالوقت كانت مقعمزه تراجي في ابله زينب..
اللي جتها وسلمت عليها وقعمزت جنبها تسأل عن حالها..
طوبى:الحمد لله ع كل حال..
زينب:عسى ان تكرهوا شيئا ويجعل الله فيه خيرا كثيرا..
طوبى:واني هدا اللي مطمني..يعلم الله قداش ضايقه بيا مرات نحس في روحي مش قادره نتنفس لولا عون ربي ليا ماقعدتش واقفه ع رجليا هكي..
زينب:نعم المولى ونعم النصير اقعدي ديما متمسكع بحبل الله وثقتك بيه لازم تكون قويه وحطي ديما في بالك مهما صار معاك ان اللي يستعين بيه مستحيل يضيعه..
ابتسمت طوبى ابتسامه خفيفه..
زينب:شن حال جنونه؟
طوبى بإبتسامه؛قليبي هديكا ربي خلاها في حياتي بش تزيد تقويني.
زينب:الله يحفظهالك ويبارك فيها..
طوبى:آمين..اسفه حكاية المشروع اللي قلتيلي معاش يصير منها
زينب بإبتسامه؛مش مشكله فيها خيره..
طوبى ابتسمت وقالت..
/لقيتي خدمه؟
زينب:قاعده ندور وهالتعيين ماباش يطلع..يفرجها ربك..توا شاغله نفسي بحلقة تحفيظ دايرتها ع الواتساب مدخله فيها مجموعه بنات..
طوبى لما سمعتها شن قالت حس بنبض قلبها تقوا فجأه خلاها تحس بشعور اندفع بقوة خلاها تقول..
/دخليني معاهم..
زينب بضحكه؛ياسلام...توا توا ندخلك..
ضحكت طوبى وقلبها مازال يدق بقوة..
وزينب طلعت تليفونها وقالت:خل نحفظ رقمك الجديد قبل..
وحفظت رقم طوبى بإسمها وضمت للقروب..بعدين قالت..ترا شوفي..
طوبى رفعت تليفونها..
وعيون زينب عليها مررت نظرها عليها من تحت الخمار بعدين قالت..
/الله يبارك ع ايديك حلوات هلبه..
استغربت طوبى وهي مبتسمه بعدين قالت..
/تسلمي..ونزلت نظرها لإيدين زينب اللي كانوا مدرقات بالقفازات..غيرت نظرها ليدها اللي شاد بيها التليفون وهي تنزل فيها..بعدين شافت لزينب وقالت بإبتسامه.. جزاك الله خير..
زينب بإبتسامه؛واياك..
تنهدت طوبى بعدين قالت..
/معليشي نطلب منك تليفونك شويه غير اني رصيدي تم بعد ماكلمتك..
عطتها التليفون وهي تقول..
/خودي حبيبتي..
خداته طوبى وناضت من حداه وخلت شنطتها مكانها..
وزينب تبع في عيونها وهي تتخيل في شكل الحياة اللي عايشتها طوبى حاليا مع راجلها...
🍃كتبت طوبى رقم اريج واتصلت بيها..
حطت التليفون ع وذنها وقعدت تراجي..
طوبى بتوتر:يارب ترد يارب..
وينفتح الخط .
طوبى:روجه..
"طوبى!!"
دمعوا عيونها وقالت..
/حبيبتي شن حالكم..
"ياروحي انتي..انتي اللي شن حالك شن دايره مع هداكا المتخلف!؟"
مسحت دموعها وقالت..
/حالي باهي..ماتخافوش عليا..
"هدا رقمك الجديد!؟"
طوبى:لالا هدا رقم ابله زينب..
"كيف!؟ قصدك انتي طالعه!؟"
طوبى:ايه..المهم توا اني حالي باهي طمنيهم كلهم بالذات جدي بالله عليك..
"حاضر حاضر..باهي قوليلي الحق مادرالك شي"
مسحت دموعها وهي تضحك قالت..
/والله كويسه ياروجه صدقيني..خلاص توا حبيبتي بنسكر..ايه اسمعي نبهي عليهم مايوصلوش لنسرين اني كلمتك..
"علاش!!"
طوبى خدت نفس وقالت..
/مايبنيش نكلمكم..
"الحقير الله يعطيه ماينزعه"
طوبى:آمين..اسمعي اريج..قوليلهم يخدموا في المحل زي قبل مايخمموش فيا..قولي لآلاء كان عزيز يبي يلبس دبله ولايدير بيان ماتوقفي شي بالله عليكم عيشوا حياتكم طبيعي..اني كويسه راهو والله كويسه وجنونه تهبل..
اريج قعدت تبكي.
طوبى وهي شاده روحها بقوة..
/اريج اشحطي روحك مانعرفكش مرخيه وتتبكي اللي وصيتك عليه وصليه ياروجه..في امان الله..ونهت المكالمه ودموعها نزلوا..
شافت للتليفون التاني اللي كانت شاشته تضوي..عقدت حواجبها بكره..بعدين مسحت دموعها كويس..وخدت نفس ولفت ومشت لزينب...
🍃ومن باب الكليه يخش الجالي متوجه للباحه..
وصل فيها وقعد يدور بعيونه لين جو عليها ويشوفها مقعمزة مع مراة منقبه..
عقله جابله اختها غرفه.. ربع ايديه وقعد واقف في مكانه يشوفلها بغضب من ورا نظاراته...
شويه وناضت هي وزينب..تصافحوا..بعدين زينب مشت..
وطوبى قعدت واقفه في مكانها تبع فيها بعيونه لعند مادرقت عنهم ..وين جت بتلتفت تاخد شنطتها جو عيونها عليه..
قلبتهم..والتفتت بتاخد شنطتها وهو مشالها طول..
وقف جنبها وقال..
/من هي اللي كانت معاك؟
طوبى وقفت ع حيلها وهي تمرر في نظرها حواليها وقالت..
/ابله كانت معاي في المدرسه..
الجالي:شن اسمها..
حطت عيونها في عيونه وقالت..
/مش من حقك تعرف اسمها..
نزلت نظره لتليفونها جبده..
بدت ع وجهها ملامح الحده وهي تشوف حواليها وتقول..
/شن الحركات التافهه هادي!
الجالي:زينب..اها زبطتها قبل ماكانتش تلبس في نقاب..
جبدت منه التليفون وهي تشوفله بحده..
الجالي:اتصلت بيك الف مره علاش ماردتيش..
ابتسمت سخريه وهي تقول..
/اسأل شحرورتك..
الجالي:قصدك كلماتك من رقمي..
طوبى بضحكه متهكمه..
/المسكينه تحسابني زيها..
الجالي قعد يشوفلها برفعة حاجب وهو ساكت..
وهي قالت:قتلك امس نكمل الساعه 2.
الجالي:واني بنقعد هني نراجيك للساعه 2..
طوبى:اقعد..ايه حقه عطيني رقم المراة اللي قاعده مع جنه..
خدي منها التليفون وقعد يسجل فيه..
وهي تشوف حواليها..
شافلها وقعد يتأمل في عيونها لونهم كان حلو بالمرة..
شافتله بيهم..
هو قال؛تعرفي..جنه لون عيونها مش حيكون زي لون عيونك.
عيونها بيولوا زرق..
هي قعدت تفكر في كلامه..فعلا..لون عيون جنه تغير هلبه..
خدي يدها وهو شادها بقوة وحط فيها التليفون..
هي خدت التليفون وجبدت يدها بقوة ومشت وخلاته..
قعد معاها بعيونها لين اختفت..تنهد بعدين مشي قعمز وين ماكانت مقعمزة..
🍃🍃🍃🍃🍃
وفي ارض الكنانه...
ودع الناس اللي اجتمع بيهم خلال تلاته ايام وعلمهم شي يحبه...
وهو طالع بش يلحق ع موعد الرحله شداته اللي كانت سبب في جيته بش تودعه..
سلافه بإبتسامه ودموعها في عيونها..
/من قلبي بتشكرك لأنك قبلت تكون معنا..
هو ابتسم وقال..
/انا اللي مفروض نشكرك غيرتي فكره عششت في راسي سنين طويله وكانت غلط في غلط..شغفي بالخط زاد لما عطيته مساحة كبيره في حياتي وشاركته غيري..
قلبها قعد يدق بقوة وخدودها احمروا وقالت بإبتسامه فرح..
/كتير حلو..
هو قال:مشكورة واجد وموفقه في حياتك..
حست بشي بيطلع منها ويمشي معاه كانت تتمنى لو تقدر توقفه..بس اللي تقدر عليه توا انها تودعه وهي تقول..
/الله معك توصل بالسلامه..
مشي من قدامها وهو مبتسم..وهي مابتش تلحقه بعيونها ماكانتش تبي تشوفه وهو ماشي..
لفت بتولي لمكان الورشه..
وقفت في مكانها فجأه لما سمعت صوته المميز ينادي فيها..
"سلافه"
التفتت طول..
هو بإبتسامه جاده قال..
/لو جي يوم واحتجتي كلميني..
من وسط قلبها ابتسمت بإمتنان وقالت..
/شكرا كتير..
هز راسه بعدين لف ومشي..
وهي قعدت معاه بنظراتها اللي كلها فرح لين ادرق من قدامها..ضحكت..بعدين ولت خشت داخل...
🍃🍃🍃🍃🍃
"ياناري عليا ولدي ياناري كدرته ووجعته هلبه..كله منها حسبي الله فيها.."
خديجه شافت لسميره لقتها مش معاهم وكأنها في عالم تاني..
مغليه:استهدي بالله بالله ياوخيتي استهدي بالله..
نجمه ببكي:كيف تبيني نهدا يامغليه..نار تاكل فيا نار..هدا ولدي ..ولدي الكبير..
وجهوا نظرهم لسميره لما ولت تبكي بشده مرة تانيه.
خديجه بأسف؛لاحول ولاقوة الا بالله..
وعواطف معاش قعد فيها عزم قعدت تبكي حتى هي..
وبيناتهم صفاء اللي كانت تتمعن بالنظر في حال سميرة فكرها بحال امها بعد موت بوها..وحست ان سميره تحب راجلها حب كبير...
وفجأه تخش عليهم راما تجري وهي تقول بلهفه..
/بابا جي ومعاه عمو عبد الفتاح..
نجمه:ريتيه بعيونك!!
راما بفرحه:اني فتحتلهم الباب عمو مافيه شي بكل..
كل الموجودات فرحوا..بس فرحة سميره كانت قويه عليها لدرجة افقدتها الوعي...
🍃🍃🍃🍃🍃
في المربوعه..
عبد الفتاح؛كلمني الراجل واني طالع قالي مش لازم تجي نظمت الامور بروحي سكرت منه وجيت بنروح كلمني ابراهيم الككلي تعرفه يامحي كان يبيني ف موضوع مشيتله حوشه وخدتنا الهدرزه والتليفون نسيته في السيارة..
الصيد:لاحول ولاقوة الا بالله..انفجعنا فجعه وصارت فينا حوسه امك قريب راحت فيها..
عبد الفتاح بإستياء؛خل نخش نشوفها..
الصيد؛برا برا..
ناض عبد الفتاح وطلع من حداهم..
الصيد حط يده ع راسه وقال..
/نحس في الضغط قاعد راقي..
واحد من ولاده؛ترا الجهاز من حداك يامحي..
محي الدين:هيا هي..
🍃عند النساوين..
كانت عواطف مقعمزه جنب سميره تمسحلها في وجهها بالميه..
وسميره اللي فاقت كانت تبكي..
"راما"
قلبها انتفض..رفعت عيونها في الباب شافت راما طالعه بسرعه..
نجمه بلهفه؛شكله يبي يخشلي..
ع جية راما؛عمو بيخش..
لبسوا خديجه وصفاء حجابهم..
ونجمه قالت؛خش ولدي خش..
شويه وخش عبد الفتاح وهو يقول..
/السلام عليكم..ومشي لأمه طول..
نجمه:وليدي..
وطبس عليها وحضنها..
نجمه؛سامحيني يما..
هو ضحك وقال..
/تي غير خيرك يام بس..
وسميره تشوفله بحب ودموعها ينزلوا..
وعيون خديجه وصفاء معاها..
قعدت نجمه ضاماته بقوة..بعدين فكاته وقالت..
قعمز حداي..
وعبد الفتاح يضحك ويقول..
/تي غير علاش هدا كله اني حتى السيارة اللي صارلها الحادث ماكنتش فيها..
مغليه؛ربي نجاك ولطف بيك ولدي..
شافلها وقال:الحمد لله..
عواطف؛اللي بخ الخبر تقول فرحان بيه ماخلا وين نشره..
هو لما بيشوفلها..جو عيونه ع سميره تفاجئ لماشافها..وشاف حالتها..غير نظره عنها لاخته وقال..
/يحسابوني فيها..
خديجه؛كلمت ابتسام..
نجمه وعواطف وصفاء شافوا لخديجه بحده..
هو قال لخديجه؛ايه لقيتها متصله بيا كلمتها..
خديجه؛نقولوا الحمد لله ع سلامتك..
مجاملة قال:الله يسلمك..بعدين ناض وهو يقول..
/سامحيني يام رعشتك..
نجمه؛المهم عندي حالك باهي ومافيك سو..
ابتسم وقال..
/الحمد لله..السلام عليكم..
ومشي طلع...وسميره ناضت طول وطلعت وراه..وعيون خديجه معاها..
🍃برا..
"عبد الفتاح"
وقف والتفتلها..
لقاها جاياته طول ولما وصلت فيه ضماته هو ضحك..
سميره ببكي:اسفه سامحني..وبعدت عنه..
هو شد رسغ يدها ومسح دموعها بيده التانيه وقال..
/تخيلي صار فيا شي وانتي مزعلتيني راك خشيتي النار طول..
ضحكت وضرباته ع كتفه..
هو ابتسم وقال:اللي بخ الخبر ع قولة عواطف بناخدله هديه مليحه..
هي بإبتسامه خجل:باهي برا في حالك وانت ماصدقت..
هو قال:بعد الغدي نروحوا!؟
نزلت عيونها وهي تهز في راسها بإيجاب..
بعدين جبدت يدها ومشت بسرعه خشت لدار المعيشه وخلاته يضحك عليها...
🍃🍃🍃🍃🍃
ودقت الساعه 2مزبوطه وكملت طوبى محاضراتها وطلعت لقضاها المستعجل..
طلع بيها من الكليه وهو شاد يدها بقوة..
وصلوا في السياره..فتحلها الباب..
ركبت..
بعدين مشي طول ركب وسكر بيبان السيارة كلهم..
شغلها وتحرك بعدين قال..
/افتحي الدرج..
فتحاته..
الجالي:شفتي المصحف اللي قدامك..طلعيه واحلفي عليه اني ماكلمت حد من عيلتك بتليفون تاني..
هي بلعت ريقها..بعدين سكرت الدرج وقالت..
/كلمت اريج..
زاد السرعه..
وهي خافت..
الجالي بحده؛اني شن قلت!؟ مش قلت مانبيك تكلمي حد منهم!
طوبى خافت بس كعادتها حاولت تخفي خوفها وهي تقول..
/طمنتهم عليا بس..
الجالي بعصبيه..معاش تكلميهم..معااش تكلميهم..
طوبى:لأمتى!
الجالي؛لأمتى مايقولي عقلي..
قعدت ساكته وهي شاده دموعها بقوة..
وهو قال:هادي اخر مرة تعاوديها ياطوبى ماتلومي الا نفسك..
قعدت طوبى ملتزمه الصمت وفي داخلها تدعي عليه..
هو علا صوته يقول..
/سمعتيني..
هي قالت بحده وانفعال..
/ايه سمعتك..سمعت..
سكت ومازال معصب..زاد في السرعه..
وهي زادت خافت..
وهو زاد في السرعه اكثر..
طوبى:هدي شويه..
ماباش يعدل عليها..وزاد اكثر..
هي من الخوف شدت يده وقالت بخوف..
/هدي ارجوك..
هو شد يدها بقوة وقعد يهدي في السرعه..
حاولت تجبد يدها منه لكن هو تمسك بيها اكثر..
خلتها خوفا من جنونه..
وكمل وهو يسوق..وين يبدل بين ايديه ع الدومان يشد يدها باليد التانيه..وطوبى تزيد تخاف..
طوبى:جالي اطلق يدي وركز في الطريق..
هو قال: بشرط..
قلبت عيونها وشافت للطريق..
شافلها وقال؛غنيلي..غني لفيروز..
بلعت ريقها وقعدت ساكته..
هو زاد السرعه..
هي بخوف قالت:باهي خلاص باهي..
هدى السرعه وقال..
/هيا ابدي..
بلعت ريقها تاني وهي تشوف للطريق وبدت تغني..
تسأل علي كتير وبتحبني.. تسأل علي كتير وبتحبني..
بعرف هالحكي..حافظه هالحكي..
كل الحكي حلو..ومع انو حلو..
ليش بيضلوا احساسي يقلي لا..
في شي بدو يصير..في شي عم بيصير..
🍃كانت تغني بصوت حلو تتخله رعشة الخوف والالم وبين عيونها يفوت شريط اللي عاشاته معاه من اول زواجهم لليوم..
وهو نفس الشي..تفكر الايام الحلوة اللي عاشوها مع بعض بعدين تفكر اليوم اللي انكشف فيه كل شي وانكتبت فيه نهايه علاقته بطوبى..هالنهايه اللي يبي يغيرها بأي طريقه...
سكتت طوبى وهي شاده دموعها بقوة..
وهو التزم الصمت ومعاش تكلم ولادار اي تصرف مخيف او مزعج..
غيرت عيونها للطريق ونظرها يتنقل من محل لمحل..
لعند مالمحت اسم محل للحجاب...
شافتله وقالت:ترا اوقف عند محل هداكا..واشر بصبعها عليه..
هوزبط اي محل تقصد..نفد طول..ووقف بالسيارة قدامه..
طوبى:بناخد خمسه دقايق مش معطله..
هز راسه وهو يشوف القدام..
هي فتحت الباب ونزلت سكراته وخشت للمحل وعيونها المليانات دموع معاها..
🍃قعد يستنى وهو يهز في رجله..معاش متحمل بعدها حتى شويه في مكان مايكونش ليه ..يقعد في حاله خوف من انها تهرب منه..
طلعت..قعد مركز معاها كانت شاده في يدها كيس صغير الحجم نوعا ما..
وصلت في السياره فتحت الباب وركبت...سكراته..بعدين حطت الشنطه متاعها جنب الدوسيه..
وطلعت من الكيسه الحاجه اللي شرتها..كانوا قفازات سود..
طلعتهم من الغلاف وفكتهم من بعض..بعدين لبستهم..
وهو يتأمل فيها بإبتسامه..
بعد مالبستهم حطت ايديها ع بعض..
تفكرت شن قالتلها زينب..ابتسمت..بعدين تنهدت براحه وشافت القدام..لاحظت انهم ماتحركوش..
شافتله..لقاته يشوفلها بنظرات ضايقوها عقدت حواجبها وغيرت عيونها عنه وهي تقول..
/هيا عطلنا ع جنه..
سمعت تنهيدته اللي كانت عميقه..وبعدها شغل السيارة وتحرك..
وهالمرة شغل المنظومه ع اغنية فنانه المفضل..
"زيديني عشقا."وغنى معاه كالعاده..وطوبى مجبورة تسمع...
🍃🍃🍃🍃🍃
واريج حدا امها وباقي العيله تحكيلهم عن مكالمة طوبى..
كلهم كانوا موجوعين وخايفين عليها..بس فردوس انهارت مرة وحده..من الصبح وهي تخفي عنهم في دموعها بس توا عزمها انهد..
🍃🍃🍃🍃🍃
الساعه 4:30عصرا..
خش عليها دار جنه لقاها طارحه شيتاتها ع السرير وتقرا..
الجالي:ممكن تأجلي القرايه شويه..
تأففت وقالت..
/والله ماوقته وراي قرايه الاسبوع الجاي امتحاناتي..
هو قال:تمام عارف..بس اليوم مميز هلبه عندك انتي..قصدي عندنا..جنه اليوم تسكر 4شهور تخش الخمسه واني نعرف انك ديما تحتفلي باليوم هدا..
شافتله وهي ساكته..
اتكى بظهره ع الباب وايديه وراه وهو يقول..
/حجزت في مطعم قنين ودرت هكي شويه ترتيبات حلوة ع خاطرها..
طوبى:ماعنديش وقت..
الجالي:ارجوك..هادي اول مرة نكون مع بنتي في يوم زي هدا..
غيرت نظرها لجنة قعدت تشوفلها للحظات بعدين غيرت نظرها ليه وقالت..باهي..
هو وقف ع حيله وقال..
/هيا نوضي وتي روحك وجهزيها..نبيك طلعيها اميره..
طوبى:بنتها من يومها اميره..
الجالي برفعة حاجب:بنت الجالي شنيبه حتى هي..
غيرت نظرها عنه للشيت بدون ماتبدي اي ردة فعل حتى بملامحها..
هو كان يبيها تناقره..لأن المناقرة بين الزوجين تزيد تقرب بينهم..
بس الواضح والجلي واللي هو مايبيش يشوفه انه بالنسبه ليها معاش يعني ولاحاجه..
تنهد وطلع من حداها...
وهي ناضت لدولاب بنتها بش طلع منه حاجه تلبسها...
🍃في نفس الوقت..
وبعد عناء ومشقه..حط التارقي رجليها في مطار بلاده..
هدا وين تنفس وحس بوجوده..ماارتاحش الا لما روح للمكان اللي هي قاعده فيه..
واستقبله صديقه المقرب ربيع بالاحضان..وطلع بيه من المطار..
ربيع:كان اسبوع غادي ياراجل..
عبد القيوم:تي وين اسبوع راني واخد اجازات واجد..رصيدي قريب يكمل..
ربيع:باهي قولي عجبك الجو؟
عبد القيوم؛نوعاما..
ربيع بابتسامه خبيثه؛والسوريه!
عبد القيوم؛انت بالذات مفروض ماتبصرش معاي في الحاجه هذي..
ابتسم ربيع وقعد ساكت..
وهو كان يبي يسأله عنها بس في الف مانع ومانع يمنعه...
شويه ربيع قال..
/بنخطموا ع مطعم مليح مالاش هلبه فاتح نتعشوا فيه ونروح بيك..
عبد القيوم:والله تاعب ومتبهدل ونبي نرقد..
ربيع بإبتسامه:لاحق ع النوم..
تنهد عبد القيوم بإستسلام..
وربيع كملها هدرزة لين وصلوا في المطعم..
درس في الباحه متاعه اللي كانت حلوة بالمرة..ارضيتها معشبه..وفي طاولات وكراسي خشب..
نزلوا من السيارة..
ربيع لعبد القيوم شده من ذراعه بيد والتانيه اشر بيها فوق ع اليافطه ..
شاف عبد القيوم لليافطه بدت ع وجهه ملامح المفاجاه بعدين ضحك وقال..
/امتى صار!!؟
ربيع بضحكه:من فتره..تشاركت اني وولد عمي وفتحانه ليه اسبوعين لتوا بسبب الظروف اللي صارت ماقدرتش نخبرك..
عبد القيوم بضحكه..
/المهم انك درتها..حضنه وقال..ربي يباركلك فيه ويفتح عليك...
ربيع بإبتسامه؛امين..تسلم ياغالي..
تباعدوا عن بعض وعبد القيوم..
/هك تغير الكلام مادام العشا ع حسابك. معناها لاحق ع النوم..ومشي خش وربيع لحقه وهو يقول..
/تي من قالك بلاش تعالى هني..
☘وقعمزوا ع وحده من طاولات المطعم اللي كان كل شي فيه حلو وراقي..ومعبي زباين..
عبد القيوم؛لاقوة الا بالله..الله يبارك..شغل صح..
ربيع:الحمد لله..الامور ماشيه كويس لتوا..بس طبعا ياباشا نبوا لوحه في كلام متكم بخطك هونا دايرلها مكان غادي..واشرله عليه..
عبد القيوم؛تمام..بس الدراهم اولا ياصاحبي..
ربيع بصدمه مصطنعه؛الغربه غيراتك هلبه ياصاحبي!
عبد القيوم:اها معاش في شي عندي يمشي بلاش..
ربيع وهو يغني..مافي حاجه تيجي كده اهدا حبيبي كده وارجع زي زمان..
وعبد القيوم يضحك...
🍃وبرا...
درست سيارة الجالي في الباحه..
نزل هو الاول ومشي للباب الخلفي..
وطوبى نزلت بعده وسكرت الباب..ومشت وقفت قريبه عليه..
هو نزل كروسة جنه..
وامها طلعتها من الكرسي متاعها وركبتها الكروسه...
الجالي:تمام!؟
طوبى:تمام..
مشي الجالي وهو يدف في الكروسه وخدي يد طوبى وخشوا مع بعض..
🍃عبد القيوم:مزاط بكل ياراجل ودوشه يخلوك تكره السفر..
ربيع؛الله غالب هدا الموجود..ناض وقال..خل نخش نشوف عشاك بروحي..
عبد القيوم؛دلال ياسي..
ربيع ضحك ومشي من حداه..
وهو بعد مامشي مرر نظره ع المكان..ويثبته بصدمه ع منظره وين شافه معاش حس بشي وكأنه ولى عدم..
شافهم وكأنهم عيله حلوة سعيده خاشين وهما يهدرزوا لين وصلوا للطاوله متاعهم..
مشي الجالي وخر كرسي لطوبى وهي قعمزت..وجت مقابلاته..
والجالي قعمز مقابلها وكان عاطيه بالظهر..بعدين قرب كروسة جنه ليه وهو يلاعب فيها..
وطوبى تشوف لبنتها كيف تضحك بإبتسامه..
🍃الجالي:معاش عرفت من الاحلى انتي ولاماما..الزوز خديتوا قلبي وعقلي..
هي ابتسمت بملل وغيرت نظرها عنهم..ويجوا عيونها في عيون عبد القيوم..
انصدمت..
وهو اللي كان تحت تأثير الموقف قعد يشوفلها بالنظرة نفسها اللي شافتها منه قبل..
بدت ع وجهها ملامح الضيق والحزن..غيرت نظرها عنه للجالي وجنه ومش عارفه علاش وقتها حست روحها تبي تبكي..
🍃نفس الرغبه اللي كان يحس بيها وتحقيقها بالنسبه ليه شبه مستحيل..
ع جية ربيع اللي شاف حالته وركز انه يشوف لجهة معينه..
التفت شاف لوين مايشوف فتح عيونه ع وسعهم من الصدمه..
رجع شاف لصاحبه ومشاله طول قعمز قدامه وقاله..
/والله ماعندي بالله..
شافله عبد القيوم وقال..
/نبي نغير الطاوله..
ربيع:حاضر..ناض وهو يشوف حواليه..
طوبى رجعت شافت جيهتهم..لقتهم ناضوا وتباعدوا..
ردت نظرها للجالي اللي قاللها..
/في شن خاطرك؟ شن تبي تتعشي..
طوبى:اطلب انت مانفرقش عندي..
هو خدي قائمة الاكل وقال..
/Ok..فتحها وقعد يشوف فيها..
وطوبى جابت كروسة جنة ليها..
🍃عبد القيوم اللي كان عاطي بالظهر قال بضيق..
/تبان مش مرتاحه..
ربيع؛اكيد مش حتكون مرتاحه ولت غصب عنها..
عبد القيوم؛هلك شن يحكولك عن وضعها..
ربيع:يقولوا عاديين مع بعض..يخي هي عزمت بوه وخوته الخميس اللي فات ع الغدي..
عبد القيوم قعد ساكت وهو يفكر..
🍃الجالي:عندك علم ان المطعم هدا لنسيبي ربيع..
طوبى بلعت ريقها وقالت:قصدك سكره اللي في شارع القهوة؟
الجالي:لا..هدا متشارك فيه هو وقريبه..
هزت طوبى راسها وهي ساكته..
الجالي مرر نظره ع المكان وقال..
/غريبه ماجاش لتوا...
ويجوا عيونه عليه..رفع حاجبه لما شاف اللي مقعمز مقابله..
وخر بظهره ع الكرسي..وميل راسه للخلف شويه وهو يشوف لعبد القيوم بنظرات كره وكبر..
وطوبى مركزة عليه وهي خايفه...
ربيع شافه يشبح جيهتهم..ابتسمله ورفع يده وحياه..
والجالي ردله التحيه وعيونه ع التارقي..
ربيع؛شويه وجاي..ناض ومشي ناحيتهم..
وعبد القيوم ماباش يشوف جيهتهم نهائي..
وصل فيهم ربيع ناضله الجالي وسلموا ع بعض بالخد..
طوبى غيرت نظرها لعبد القيوم..
هو هالمره وجه نظره جيهتهم لقاها تشوفله..
تفكرت طوبى لما اجتمع بيهم بوها قبل موته بأيام..تفكرت كيف وصاه عليهم..جت بين عيونها نظرة الثقه اللي كان يشوفله بيها وقتها..وتوا بس تسائلت..
شن اللي شافه منه بوها خلاه يوصيه عليهم وحتى رابط دم بينهم مافيش..
تلقائيا نظرة عيونها تبدلت لنظرة استنجاد..
غير نظره عنها وهو مش مستوعب هي تشوفله بنفس النظره اللي شافها منها هديكا الليله ولايتخيل!..
رجع شافلها لقاها لاهيه مع بنتها..كذب شن شافوا عيونه قبل شويه وغيرهم عنها...
🍃الجالي:اني لما حجزت قلتلهم ربيع نسيبي توصوا بينا..
ربيع بإبتسامه مجامله:من غير ماتوصي حني نطولوا نخدموا هالسمحه..وشاف لجنه..وبنظره سريعه شاف لطوبى بعدين رجع نظره للجالي..
الجالي:تسلم يا بونسيب..
ربيع:مالا نخليكم ع راحتكم..
الجالي هز راسه وقعمز..وربيع مشي ولى للتارقي..
الجالي وهو يشوف لعبد القيوم بكبر..
/مش عارف علاش ديما عاطيينه اكبر من حجمه ومكبرين راسه هالتارقي هدا..
طوبى:شن دخلنا بيهم..!؟
الجالي شافلها بإبتسامه وقال..
/عندك الحق ياعمري ينحرقوا مع بعضهم حني خلينا فينا وبس..
طوبى غيرت نظرها لبنتها..والجالي يتأمل فيها..
🍃ربيع وهو مقعمز مقابل التارقي شافه شاد الموس بقوة وهو يشوفله بنظرات غضب..
ربيع بريبه:في شن تفكر!؟
شافله عبد القيوم وقال..
/مش حلال قتله حيوان كيف هالحيوان!!..حدهن 4شهور وعشر ايام وتفتك منه للأبد..
ربيع بضحكه؛الغيره بتخليك مجرم!..
عبد القيوم بقهر..
/تي انا منقهر قهر...مكتف مش لاقي ماندير بش نخلصها من اللي هي فيه..انا والله مانفكر في روحي ولاهمني شي في الدنيا غيرها..خايف عليها ياربيع..خايف عليها من واحد متأكد مليون في الميه انه مش طبيعي..ياراجل راهو مهددها بسلاح ..
ربيع بصدمه؛كيف!
عبد القيوم بقلق..
/لازم حد من هلها يكون وراها لازم ما يخلوه يحس انها وحدها...حد يخاف منه ويديرله حساب..حسين مدابيا يكون بعيد وضعه حساس وغير هك عصبي ومتهور ومايعرفش يتصرف..مافيش غير عبدالرؤوف بس في نفس الوقت ينخاف عليه من مكايد خوها اللي متأكد مليون في الميه انه ورا اللي صار كله..
ربيع بضيق:حتى المهدي قالها.
عبدالقيوم بأسف وحسره..
/وهذي اللي تكسرها قدامه خوها اللي مفروض يقعد مصبي وراها يسندها يحمي ظهرها هو اللي طعنها وهد حيلها..هالكلب توا ولابعدين يعايرها بيها ويزيد يتقوى عليها..
ربيع بأسف:خسارة والله خسارة..
تنهد عبد القيوم وقال..
/شور عليا..نعدي لعبد الرؤوف ونحكي معاه..
ربيع؛شن بتقوله؟
عبد القيوم بخوف:نزيد نوعيه لحقيقه وضع نسيبته..هي توا وسط الخطر راهي..طبعها عنيد وصعبه شوي مرات تستفزه ويدير فيها حاجه..
ربيع؛ماتزعلش مني في اللي بنقوله حتى لو زي ماقلت هددها يقعد مجرد تخويف..هو مادار هدا كله الا لأنه يحبها مستحيل يضرها..
عبد القيوم بشي من الانفعال..
/حب !اين حب اللي تحكي عنه! اللي كيف هالشكل يعرف يحب اصلا..! بعدين انت هذى الحب في نظرك!؟
ربيع شاف جيتهم لقاهم باديين بتعشوا..ركز ع طوبى كانت باينه تاكل بالغصب..
عبد القيوم عقد حواجبه وقال..
/شن تشوف!؟
شافله وقال:والله ماني عارف شن نقولك..بس الموضوع معقد هلبه...انت حاول تدوي مع عبدالرؤوف وشوفه في شن يفكر مرات يكون مداير في باله شي..وبعدين هو يعرفك كويس ويعرف قداش كان لطفي الواعر الله يرحمه يعزك..مش حينسى الموقف اللي صار قدام المدرسه قريب رحت فيها ع خاطرها..
تنهد وقال بألم..
/ندفع عمري وتعيش حياتها سعيده ومرتاحه اللي كيفها هي بس يستاهلوا يعيشوا مرتاحين..
ابتسم ربيع وقال..مانقول كان يابختها بقلبك وخلاص..
ابتسم بحسره وقعد ساكت..بعدين غمض عيونه وقال..
/استغفر الله العظيم..فتح عيونه وقال..وين عشاكم..
ربيع بإبتسامه؛اهو جاك...
🍃وجابولهم العشي اللي كان من اصناف متنوعه..
عبد القيوم جامل مجامله..كلي وهو مش متبنن شي..
يبي ينوض يطلع وفي نفس الوقت مش قادر وهي نفسه حديث كان يدور..
"ليش ياربي تجيب فيها قدامي بس..تختبر فيا!! بس ياربي انت ادرى ان امتحان كيف هذى مانقدره..قلبي مش قادر نحكم فيه ياربي وانت اللي عالم..ااه يارب هالقلب ارحمه واجبره ياربي..."
🍃وتعشوا الجالي وطوبى..
وبعد العشي جابولهم التورته..
طلع الجالي جنه من كروستها وخلاها في حضنه وغنالها الاغنيه المعروفه لأعياد الميلاد..
ضحك وقال؛مانعرفش غيرها...بعدين قال..نقصوا حني وماما الطورطه!..هيا نوضوا..
وناض بيها ومشي جنب طوبى اللي ناضت وقفت وهي مبتسمه..
خدي الجالي الموس عطاه لطوبى..خداته وقرباته للتورته..
هو حط يد جنه ع يدها وحط يده فوقهم..
طوبى قصت التورته....
الجالي بصوت منخفض؛هييه..
وطوبى حطت الموس وصفقت ع الخفيف وهي تشوف لبنتها بإبتسامه..
جنه كانت تراقب في امها..فجأه قلدتها وهي تصفق..
اندهشوا بوها وامها وقعدوا يضحكوا الزوز..
قربت طوبى منها باستها ع خدها..وبوها باس راسها في نفس الوقت ..
واللقطه هادي تجي في عيون التارقي..
غير نظره عنهم وبلع ريقه اللي كان زي الحنظل..بعدين ناض وقال..مروح..ومشي طول طلع من المطعم..
وربيع خش وصى الشباب اللي يخدموا عنده بعدين طلع بس يروح بصاحبه...
🍃🍃🍃🍃🍃
هالليله خلت الجالي يتأمل في ذوبان جبل الجليد اللي بينه وبين مرته..
لكن اماله كلها تقعد ع الفاضي لأنها ماغيرت شي عن طوبى ولاخلتها تتراجع ع اللي تبي توصله...
🍀🍀🍀🍀🍀
بعد مرور تلاته ايام....
#سجن_يوسف
#طوبى
...يتبع....
