طوبى "جنة طوبى"
#جمان_فريد
#الجزء_الحادب_والثمانين "اساروف2 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لاتتكى ع أحد كل الناس إعوجاج بالله الاستقامة🍃
________________________________________
في جنان حوش محمد شنيبة..
كان مختار مقعمز ع كرسي ورا طاوله حاط عليها ايديه الزوز وهو يخبط بأطراف اصابعه عليها ويستنى..
🍃يستنى في جنة اللي كان حاملها عمها في حضنه ومتوجهين بيها هو وخوته وولده لبوها..
بوها اللي كان راقد ع رجل امه وهي تمسح ع راسه وتقرا عليه..
لعند ماسمع خوه يقول..
"جالي"
هو وامه وجهوا نظرهم للشنطه اللي شادها مهدي في حضنه..
فز من مكانه ووقف شويه..بعدين مشالها طول وانفاسه تتسارع مع سرعة دقات قلبه..
وصل في خوه وقال..
/جييها..
مدهاله المهدي..
ونسرين ونضال ومحمد يشوفوا لرده فعله لما خداها في حضنه..
امه قدمت وهي تمسح في دموعها لين وصلت فيه وشافت بنته..
اللي لما جو عيونه عليها حس بشعور عمره في حياته ماحس بأحلى منه شعور..
ضحك ودموعه ينزلوا منه بعدين قال..
/بنتي!..هادي بنتي اني..
بدت ع وجوههم ابتسامه شفقه ماعدا المهدي اللي كانت نظراته ليه نظرات عتاب..
لف ومشي قعمز بيها وهو يقول..
/بابا...
وهما تبعوه والتموا حواليهم..
نضال بضحكه:طلعوها خل نشوفوها زين..
الجالي قام عيونه فنسرين وقال..
/طلعيها..
نسرين:شويه بس..ونزلت باقي السوسته..
وسمت بالله وطلعت بنت خوها من الشنطه..
مغليه بلهفه:هاتيها هاتي..
ابتسمت نسرين ومدتها لأمها..
والجالي عيونه ع بنته ما غيرش نظراته الملهوفه عنها..
مغليه بعد ماخدت جنة لحضنها..
/الله يبارك الله يبارك..
الجالي:تعالي قعمزي جنبي يام..
مغليه بإبتسامه تعاطف:حاضر..
ومشت قعمزت جنب ولدها..
نضال قربلها وهو يشوف لبنت خوه قال..
/الله يبارك حنطوشه..
الجالي:باين عليها صحتها كويسه..
نسرين:ايه الحمد لله...
والمهدي قعد واقف في مكانه وهو يشوفلهم بعدين قال..
/ اني طالع للراجل..نسرين ديري قهوة
ومشي طلع من حداهم..
الجالي شافلها وقال..
/مني جي معاكم..
نسرين وهي طالعه..
/مختار
وطلعت من الصاله..
مغليه وهي مندهشه:مختار!
والجالي غير نظره ليها بعد ماسمعها وقعد يفكر بإستغراب..
🍃برا..
دخل المهدي مختار للمربوعه الخارجيه..
ع خشة خديجه للحوش ومعاها راما جايين يشوفوا جنة حتى هما..
🍃وماكانش عندها علم بجية سلفتها ابتسام..
اساسا ماكان حد يعرف بجيتها من حوش الصيد كله..
☘لما خشوا للحوش..
كانت ابتسام في قمة التوتر والقلق..
اما صغارها كان مستغربين المكان ويستكشفوا فيه بنظراتهم..
لعند ماتقابلوا مع اشرف اللي كان بيطلع من الحوش..
لما شافهم اتفاجئ..
والصغار جو طول يجروا وهما ينادوا..
/عمو..
اشرف سلم عليهم وهو يقول..
/يامرحبا يامرحبا..بعدين قام عيونه في خوه وهو يسأل فيه بعيونه..
"شن هدا؟"
حمحمت ابتسام وقالت..
/كيف حالك اشرف..
هو بدون مايشوفلها قال..
/الحمد لله..
عبد الفتاح؛امي وين؟
اشرف:في الصالون وين مافي المكيف..
عبد الفتاح هز راسه وشاف لمرته وصغاره وقال..
/هي تعالي..هيا بابا تعالوا..ندى تعالي بابا..
ومشوا معاه وهما متوجهين للصاله..
واشرف اللي كان ناوي يطلع تراجع ومشي
قعمز ع كرسي قريب من مدخل الحوش وهو يترقب...
🍃في الصالون..
كانت نجمه مقعمزة تتفرج ع مسلسل فالتلفزيون ومنسجمة معاه..
انقطع هالانسجام..لما سمعت صوت عبد الفتاح يلقي فالسلام..
وجهت نظرها للباب..
شافتهم...ماتفاجئتش ولاانصدمت..كانت متوقعه يجي هاليوم...
ردت السلام وهي تشوف لولدها بملامح جديه تماما..
عبد الفتاح اللي كان باين عليه الارتباك..
/كيف حالك يما..
نجمه غيرت نظرها للصغار وقالت..
/الحمد لله من ربي في خيار الخير...
حط عبد الفتاح يده ع ظهر مرته..
هي قالت بتوتر:كيف حالك عمتي..
هزت نجمه راسها وغيرت نظرها للتلفزيون ومن فوق نفسها ردت..
/الحمد لله..
عبد الفتاح؛ندى..ادريس بروا سلموا ع حناكم..
الصغار رفعوا عيونهم في أمهم..
هي هزت راسها بالموافقه..
رجعوا نظرهم لجدتهم..بعدين مشولها..
وابتسام معاهم بعيونها وهي خايفه لدير عزوزتها ردة فعل لصغارهم تجرحهم وتكسر بخاطرهم..
وهما لماجو وقفوا قدامها...
البنت خدت يدها وباستها..وبعدين خوها دار نفس الشي..
ابتسمت بحب ودموعها في عيونها..
بعدين خدت البنت وباستها من خدها ودارت مع الولد نفس الشي وقالتلهم
/قعمزوا..
قعمزوا الصغار جنبها..وبوهم يشوفلهم بإبتسامه وهو متأمل انها تكون اقل حده مع ابتسام وتقبلها...
خدت نجمة ريموت التلفزيون وقعدت دور بيه ع قنوات الاطفال اللي كانت حافظتهم بالارقام وتحط فيهم لباقي صغار ولادها..
لما لقتهم حطت قناة معينه ..وردت الريموت لمكانه..
بعدين ناضت ومشت للباب..تخطتهم وطلعت بدون ماتشوفلهم...
عبد الفتاح لإبتسام؛تعالي..
ابتسام لصغارها:ندى ماما اقعدوا عاقلين وردي بالك من خوك..
ندى:حاضر..
ومشت ابتسام طلعت مع راجلها وكل ماله التوتر اللي هي فيه يزيد..
🍃لحقوا نجمة اللي خشت لدار المعيشه..
خشوا وراها لقوها واقفه تستنى فيهم..
نجمه:من غير كثرة دوة ربع ساعه وتطلعوا تروحوا..
عبد الفتاح:صلي ع النبي يام..
قاطعاته وقالت..
/اللهم صل عليه..اني قبل قتلك كلمه وماتوليش تنين مانبيهاش مانقبلهاش في حوشي..الصغار مانيش مانعتهم عن حوش جدهم لكن هي لا ياعبدالفتاح..
ابتسام بضيق:اسمعيني قبل بعدين احكمي..
نجمه بعصبيه:لانسمعك ولاتسمعيني مش سادك خديته من مرته وصغاره توا جايه بصحة وجه تبيني نقبلك وندير سعرك من سعرها!
عبد الفتاح بضيق..
/يام مش هكي..
نجمه بغضب:لاهكي ونص..ماتخلنيش نلزك حتى انت ونحرم عليك تخش للحوش واني فيه..
ابتسام بخوف:خلاص عبد الفتاح..
هي قالت: اخر كلام...ربع ساعه واطلعوا..
ومشت طلعت وخلتهم...
ابتسام شافت لراجلها اللي كان باين عليه القهر وقالت..
/ماضايقش روحك اصلا كنت متوقع هكي بيصير..
هو تنهد بضيق بعدين قال..
/تعالي..
ومشي طلع وهي طلعت معاه وتوجهوا للصالون...وخدوا صغارهم وطلعوا بيروحوا..
تلاقوا مع اشرف اللي كان عارف نتيجة اللقاء وقاللهم...
/خلوها للوقت..
هز عبد الفتاح راسه وقال:سلم ع بوي...
ومشوا هو ومرته وصغاره طلعوا من الحوش واشرف معاهم بعيونه اللي كانت نظراتها كلها اسف...
🍃🍃🍃🍃🍃
"لو عليا مانبيش للبنت تتربى في شتات وفي بيئه كلها مشاكل بين بوها وامها لكن اللي صار للأسف ماخلاش للصلح مكان"
المهدي:للأسف..
مختار:ومع ذلك خل نتأملوا ونقولوا بالك تصير معجزة وتغير الحال..بالك هالطفله تكون اكبر سبب يرد امها وبوها لبعض..
المهدي:نقولوا ان شاء الله..
مختار هز راسه ورفع الفنجان ورشف منه بعدين قال..
/شن حال ربيع؟
المهدي:حتى هو اموره تفركست
مختار بإستغراب مصطنع..
/شن صار فيه؟!
🍃وداخل الحوش في الصاله..
كان الكل ملموم حوالين جنة وبوها اللي كان يلبس فيها في انسيال الاسم اللي كان من ذهب..
بعدين حطلها بروش ذهب عليه اسمها..
خديجه:سلم وبيها ياربي يعيش ويجيبلها..
ابتسم الجالي وهو يتأمل في وجه بنته..
نضال حط مبلغ في شنطتها وقال..
/مانعرفش ناخد حاجات صغار...
مغليه:سلم عمها..
خديجه حطت علبة مجوهرات وقالت..
/حاجه بسيطة ماتستاهلش بنت خوي قدرها اكبر من هكي..
الجالي:بارك الله فيك..ورفع بنته في حضنه بحذر..وقربها ليه وقعد يشم في ريحتها ويطبع ع راسها في قبلات لطيفة جدا..
امه وخوته كانت نظراتهم ليه كلها شفقه وجعهم حاله...
🍃زي ماكان حال طوبى اللي كانت مقعمزه في جنان حوشهم وتراجي ع نار واجع خواتها وعمتها وبنات اختها..
ع قد ماداروا فيها بش تخش داخل رفضت وطلبت منهم يخلوها بروحها...
وماقعد معاها حد كان جدها اللي ماحاولش يقنعها بأي شي ولايكلمها..قعد حاضر معاها بصمت المهم مايخليهاش بروحها..
🍃🍃🍃🍃
شاف الساعه في تليفونه وقال..
/معليشي مهدي تخش تجيب البنت ليها ساعه بالزبط لتوا..
ناض المهدي وقال:استناني شويه..
ومشي طلع من حداه..
وقعد مختار يستنى وهو يهز في رجله اليسار..
~~~~~~
طوبى التفتت لجدها وقالت بخوف:فاتت الساعه..
علي الواعر؛اكيد مروحين بيها توا..
التفتت للباب وهي تشوفله بقلق وخوف ودموعها رجعوا ينزلوا...
~~~~~~
ويخش المهدي للصاله وهو يقول..
/هيا خلاص..
كلهم وجهوا نظرهم ليه..
والجالي اللي كانت بنته في حضنه قعد يشوفلها
بضيق وألم..
قدمله المهدي وقال..
/هي حط البنت في الشنطه..
مادارش اي ردة فعل..
وهما بأنظارهم معاه وملامح وجوههم كلها ضيق وحزن..
نسرين بحزن:جالي..
المهدي:حط البنت في الشنطه خالها يراجي برا..
رفع عيونه فيه بنظرة حاده وقال..
/اني بوها..
المهدي:حط البنت في الشنطه..
الجالي:لا..
نسرين بخوف:جالي صل ع النبي وحط البنت فالشنطه..
الجالي بحده؛هادي بنتي اني ع اسمي اني اني بس اللي يحقلي نحدد وين تقعد ومع مني..
المهدي اللي كاد يفقد اعصابه قال..
/يام تصرفي..
مغليه بقلق:ولدي حني ع شني تفاهمنا!
نضال:خليهم توا يروحوا بيها وبعدين فكر دير حل لهالوضع..
خديجه؛وكلنا معاك وتو نساعدوك غير خليهم توا يرفعوها..
نسرين؛هيا سلم وخيي.
نزل عيونه ليها..بعدين غمضهم بشده من الألم والغضب..
خدي نفس وطلعه..بعدين فتح عيونه وناض وجي للشنطه..وطبس حطها فيها وهو يقوللها بهمس..
/تو ناخدك يابابا تو ناخدك..
تباعد عنها وسكر السوسته وهو يشوفلها بحسرة وغضب..
المهدي:حول..
بعد الجالي وعيونه قاعدات عليها..
وياخدها عمها ويمشي يطلع بيها من الصاله...
كلهم كانوا يشوفوا بشفقه للجالي ويترقبوا في أي ردة فعل منه..
هو مشي لين وصل لأخر الصاله..ووقف ع الروشن..
حول الستار وشاف مختار واخد شنطتها من المهدي والزوز مشوا باتجاه الباب..
بقهر وغضب الدنيا كلها...طلعت منه صرخة فجعتهم ووجعت قلوبهم...
تباعد عن الروشن وجي بيمشي يطلع من الصاله قابلاته مزهريه كبيره..فش غله فيها..وضربها برجله طاحت انكسرت وزاد فجعة امه وخواته..
وطلع من الصاله وهو يقول بوعيد..
/تو نوريها هالكلبه...تو نوريهم كلهم...
🍃🍃🍃🍃🍃
خبطت بيدها ع رجلها وناضت وهي تقول بخوف..
/ساعه وربع ياهمي ساعه وربع..
ومشت بإتجاه الباب بعدين ولت وهي تقول بحسرة ونبره باكيه..
/اني الغبيه اللي صدقتهم وخليتهم يرفعوها..
علي ناض وقال..
/بنتي وسعي بالك ..
هي بإنفعال ونبره مرتعشه..
/نوسع بالي شني! خلاص ياجدي خداها..ومعاش يخليني نشوفها خلاص..
ويدق باب الحوش..
وهي زي المجنونه مشت تجري وفتحت الباب..
لقت مختار واقف وفي حضنه بنتها قالتله بلهفه..
/خش خش.
هو خش طول وقعد مركز ع حالتها..
وهي بعد ماخش..
سكرت الباب وقالتلها..
/هاتها..
مدلها الشنطه وقال..
/زي ماخديتها رديتها..
خدت الشنطه وشافت وجه بنتها اللي كانت فايقه..ابتسمت من وسط قلبها روحها رجعتلها..
/ياروحي..ماعيطتش؟
مختار:ع الاغلب لا..
تنهدت براحه بعدين ابتسمت تاني بفرح وهي تتأمل في وجهها..
مختار شبحلها شويه بعدين قال..
/مافيش كلمه شكر..
جمله قالها وكأنها رجعتها لوعيها رفعت عيونها فيه بعد ماتبدلت ملامح وجهها للإمتعاض..
بعدين انسحبت ومشت خشت داخل..
هو قعد يتبع فيها بعيونه بنظرات فيهم حده..
قرب منه جده وقال..
/ماتهزاش عليها وتقول صغيره..راهي حادقه وتربت ع ايدين سدرة..واللي صار فيها علمها هلبه..
شبح لجده بعدين ابتسم وقال..
/ليا زيارة تانيه ان شاء الله..هي اودعناكم..
ولف ومشي طلع من الحوش..
علي ببعض:وان شاء الله معاش تعبتها...
بعدين مشي بطريقه للباب الفاصل..
🍃داخل...
كلهم متجمعين حوالين جنه وشنطتها..
مطيره:ايااه حديده اسم ورشقه..
الاء:حاطين فلوس نتوقعهم الف جني..
اريج بتهكم:ماشاء الله عليك!..
قلبت الاء عيونها..
غرفه وهي شاده علبة المجوهرات الصغيره وفاتحتها قالت..
/خراص ذهب..
طوبى وهي حاطه بنتها في حضنها كانت تشوف للحاجات والفلوس بعين الازدراء..
مطيره:اشبح توا يديرلها عقيقه ولايفوت..
طوبى؛نديرها اني..
غرفه:مش ع كيفك بوها هو اللي يديرها..
تنهدت طوبى بضيق بعدين شافت لبنتها..ورفعتها ليها بتبوسها...
تخترق انفها ريحه زمان كانت تحبها هلبه..وتوا تكره حتى تسمع اسمها..جاها شعور بالغثيان لما شمتها..
نزلت البنت شويه بعدين ناضت بيها وقالت..
/ماشيه نغيرلها..
وطلعت من حداهم...
غرفه؛فيهم خير اللي تفكروها بهدايا نعرف ناس ينكروا في احفادهم من كرهم لأمهم..
فردوس بقلق:اني مش هامني شي من هدا كله..نبي نعرف شن بيصير بعدين شن بيدير مادام صار فيه ماصار بش يشوف بنته تتوقعوا بعد شافها يهمد ويهنينا!
مطيره:والله حتى اني فكرت فيها...
غرفه:من لما جابت وهدا اللي متوقعينه يصير..
مطيره برجاء:ياربي فرجها وحلها من عندك ..
كلهم بأصوات متقطعه قالوا..
/آمين..
آلاء:بعد ماشافوا خالي خاش في الموضوع تو يخافوا..
وجهوا نظراتهم الممتعضه ليها ..
وهي مركزه مع الحلق الهديه اللي جوا لجنه وقالت بعدم رضا..
/مش حاجه واو في احلى من هكي...
🍃🍃🍃🍃🍃
"امتى صار هدا كله!"
اميمه بنبرة حزن:بعد ماروح من صلاة العصر..
علي بعصبيه:مشي مشي وكسر كلمتي..
اميمه بألم؛تصدق ان اللي خنب فلوس بوي طليقة يوسف!
علي بصدمه:كيف!
ردت عليه تقول..
/حسين قال انها نصبت ع يوسف نصب..
علي بعدم استيعاب..
/ واضح..واضح هادي كانت مخططه من البدايه وخوك البهلول رخي بنت الناس اللي عطينا فيها كلمه ع خاطرها..ايييه..هدا ربك مايخلي شي..
سكتت اميمه وهي مضايقه ع الاخر..
هو قال:وامك شورها ماصدقت!..
رفعت عيونها فيه وقالت..
/تنلام ياجدي!؟
علي:اني عليك انتي..
اميمه يدوب ابتسمت وقالت..
/معاش صغيره خلاص نقدر ندبر امورنا..
علي:هلبه عليك الحوش والقرايه والخدمه ومعاناتي اني وبوك!
اميمه:باهي شن رايك نجيب وحده تعاوني!
علي:لاالا جو الخدم هدا مانحباش ولاتقبله..
بضحكه قالت؛خدم شني ياحاج اني قصدي نخطبلك..
علي فنص فيها بطريقه خوفتها وخلت ضحكتها تختفي وعيونها ينزلوا للارض..
بعدين قال:بري ديريلنا مانتعشوا ...وتوجه بطريقه لدار ولده عبد المطلب
اما اميمه بعد مامشي طلعت منها ضحكة ولفت ومشت للكوجينه...
🍃🍃🍃🍃🍃
ويآذن المغرب ع عواطف وراجلها وهما مروحين لشقتهم..
طول الطريق وعواطف تفكر وهي مهمومه ولما يهدرز عليها راجلها ترد بإقتضاب..
وقعد في نفسها داساته هلبه وغصب عنها طلع منها..
عواطف:شارف..
هو قال:نعم..
عواطف:مرتك هديكا مابتش تجي تحضر العيد في حوش ماليك ع خاطر اني موجوده!
لون وجهه تغير وبان فيه شوية ارتباك وهو يقول.
/تقدري تقولي هكي..يللا مش مشكله مع الوقت تتعود وتصفى بيناتكم..
هزت عواطف راسها وهي تشوف للطريق بتجهم وقالت..
/ان شاء الله..
🍃🍃🍃🍃🍃
"وكان تشوفها ياحاج تاخد قلبك"
محمد شنيبه:خسارة والله وياقهره اللي بنت ولدي مانشوفهاش الا بإذن..
مغليه بحزن:حسبي الله ونعم الوكيل..شن كان صارلها لو باعدت شيطان ولمت شمل عيتلها وربت بنيتها مع وبيها ع خاطر اوهام ودوة فاضيه خربت حوشها وشردت بنتها..
محمد؛فرق كبير بينها وبين بنات الاصول شوفي خديجه بنتك ع قد مادار معاها راجلها تغضب وتحرج لكن تولي ع خاطرها صغارها..وحتى نسرين ياما مشت وتحملت قبل لتطلق سنين وهي تمشي وتتحمل..ولاعيشه الله يرحمها اللي صبرت وتحملت وماقدرتش تخرب حوشها وتشرد صغارها..
حتى نجاة تحملت طاهر ولدي الله يرحمه هلبه..طلعها من الخدمه وقعمزها في الحوش وحبسها فيه حبس تي يوم اللي مات وكانت بتجيب عندك علم انها ماكانتش تبي تطلع من الشقه لأن حالفلها! شوفيهم وشوفي هادي اللي خلاها تكمل قرايتها وتخدم ودارلها سيارة ومخليها دير ماتبي شوفي شن دارت..
ومغليه تسمع فيه شن يقول بصمت..
تنهد بعدين قال..
/ربي يهديه ولدك هدا اللي مازال شاد فيها ربي يهديك لانفع معاه لز ولاتهديد قريب نصدق ان مديروله شي..
ومغليه اللي مازال محتفظه بصمتها قعدت تفكر في كلامه الأخير بجديه...
🍃🍃🍃🍃🍃
"عارف كلامي هدا مش وقته لكن ياما نصحتك وحذرتك"
الجالي بضيق؛خليك مني توا وقولي انت شن جوك؟
عمر بشي من الحزن:خير من قبل..
الجالي:ربي يعوضك خير..
عمر:ربي يعوض المظلوم المغلوب ع امر الظالم مايراجيش خير..
الجالي:شن الدوة اللي تقول فيها هادي! شن هو اللي درته ولامن اللي ظلمته!
عمر:غلطت وظلمت مانيش كاذب ع روحي ولاعاد نبرر لنفسي الغلط اللي نديره خلاص ماعنديش جهد نتحمل بيه عقاب ربي اكثر من هكي..
ناض الجالي وهو يقول..
/لاانت حالتك مستعصيه..ومشي من حداه للدروج وركب للدور التاني..
وقعد عمر يتفكر اللي صار معاه والحزن والندم مسيطرين عليه..
🍃🍃🍃🍃🍃
الساعه 12:00منتصف الليل..
حوش لطفي الواعر..
في دار البنات..
طوبى:بنطلع تقعمز برا شويه كان ناضت رني عليا..
الاء وهي تشوف لتليفونها...
/باهي..
ومشت طوبى للدولاب طلعت من مذكرتها..وبعدين طلعت بيها من الدار..ومنها للجنان..
قعمزت ورا الطاوله..
وفردت المذكرة وخدت البيرو اللي كان في وسطها وبدت تكتب..
حكت اللي صار فهاليوم لسدره ولما وصلت في الكلام عن مختار..
(خايفه تقري هالكلام وتزعل مني زي ماخفت نزعل بوي في قبره..لكن اني درت هكي بس نحسس عيلة شنيبه ان في حد قوي وراي..ايه شفت مختار قوي وقتها مش عارفه علاش..بالك من خوفي من عيله شنيبه..بس بعدين ندمت هلبه..ندمت ندم اللي يرتكب كبيرة من الكبائر ويعد ماتمشي سكرة الذنب تجي الفكرة اللي تخليه يتمنى يقتل روحه من الندم..
مانقدرش نحط فيه الثقه ولانأمله واحد ماهموشي بوه وامه وباع رضاهم بالرخيص كيف يجي منه الامان!!..
لاياسدرة اني مش درويشه ولاطيبه زيادة عن اللزوم صدقيني مش حنخليه يدير مافي راسه ويكسر بوي حي وميت...).
وقفت شويه وهي تتفكر في الموقف اللي صار وزادت ضايقت..
سكرت المذكره وحطت ايديها الزوز عليها وهي تفكر بضيق وحزن..
بعدين قالت من قلبها..
/يارب
"طوبى"
التفتت لباب الكوجينه ابتسمت وقالت..
/خالتي سالمين..
قدمتلها سالمين وهي مبتسمه بعدين قعمزت حداها وقالت..
/جنانكم فكرني بجناني في حوشي الاول ريحته فل وياسمين.
ابتسمت طوبى..
تنهدت ومررت نظرها ع طوبى وقالت..
/مش اخر الدنيا..
خفت ابتسامه طوبى وهي تشوفلها وتسمعلها..
سالمين:طحتي في واحد مايسوى ماقدرش قيمتك ولاقدر يحافظ عليه يعدي في داهيه تشيله..ماتخسريش نفسك وتقللي قيمتها بسبب واحد كيف هذى..
مرات تفكري وتقولي لو كنت سمحه وفيا ماينحب مايبحتش في غيري ويزوجني بش يغطي ع علاقته مع عشيقته الاكبر مني ومنه...لابنتي ردي بالك تفكري هكي..انتي كان حقيتي حد عنده صندوق ذهب ومجوهرات وخداه عزقه باللي فيه شن تقولي عنه!..مهبول..سفيه..مايعرفش قيمة اللي عزقه..ولابتقولي عنه حكيم وعاقل ودار الصح.!..اللي جي في بالك توا هو اللي لازم نحطيه في عقلك وتعرفي انك غاليه واجد ومامنهم اللي يتمنوا تبحتي فيهم وهو الخاسر الوحيد وكان مش هكي راهو مش قاعد يفرفش بش نرضي عنه وترديله...
طوبى وهي تسمع في كلامها كانت منزله نظرها لطاوله ودموع الحسره ع نفسها تنزل من عيونها الحايره وهي تمسح فيهم..
سالمين:اللي نبي نقوله..قاومي وانطلقي وعيشي حياتك..اهمتي بنفسك كيف ماكنتي قبل بشعرك بوجهك بجسمك بلبسك خليك ديما قويه وسمحه في عين روحك بس تزيد ثقتك في نفسك وترفعي معناوياتك وتقدري تواجهي الحياة واالناس وتقدري تربي بنتك..وخلي اللي خسرك ديما نادم ومتحسف عليك عمرك كله..
رفعت طوبى عيونها في سالمين وهي تشوفلها بنظرات حيره وحزن..
سالمين؛هك تقوا المراة صدقيني مادام عايشه صح وراضيه ربي حتكون مرتاحه والحرب تخشها مهما كانت صعبه تربح فيها.
طوبى بإمتنان:كلامك يهبل..
سالمين بضحكه؛انتي اللي تهبلي..بيبا انتي عندي كيف بنيتي واعز ومانتمنى نشوفك الا فرحانه ومرتاحه..
طوبى بحزن؛مش عارفه كيف بنخليك تروحي غدوة..
ناضت سالمين وقربتلها وضمتها وهي تقول..
/نجك ليا ياقلبي..ان شاء الله نطل عليكم من فترة لفترة..
طوبى:ماتغيبش..
سالمين وهي شاده دموعها بقوة قالت..
/مش حنغيب ان شاء الله...
🍃🍃🍃🍃🍃🍃
"الزهر لعب معاي دور يعني حتى في الخيال ماتوقعتش يصير موقف زي هدا يكون في صالحي لهالدرجه!"
رضا:باهي انت شفت نتيجه..
مختار:واهم نتيجه..انها امنتني اني ع بنتها وهادي حاجه مش بسيطه بكل..بس نبي شويه صبر..يقولك الطبخه تكون اطعم لما طيب ع نار هاديه..
رضا هز راسه موافقا لكلامه بصمت..
فجأة جي اتصال لمختار..
قام تليفونه وهو مستغرب شاف رقم اب فاتن حس بشي مم القلق ع فاتن لأن فكر ان بوها مش حيكلمه في هالوقت الا ع خاطرها..
رد ع اتصاله طول..
/ايوه..
"ايوه مختار سمعت بهشام توفى"
مختار بضيق..
/لالا مانقولهاش! العمليه مامشاش حالها..
"من البدايه عطوهم هالاحتمال..يللا الله يرحمه..اني بنحجز ع رحلة بعد الفجر.."
مختار:احجزلي معاك..
"تمام"
وسكر مختار...
ورضا سأله:مني مات؟.
تنهد مختار وقال:شريكي هشام****** بو الشبوب هداكا اللي خاش معاي شراكه في مشروع المول..
رضا؛ ايه زبطه عزيز..
مختار:ايه..ناض وقال..خل نمشي نجهز نفسي الرحله بعد الفجر..
ومشي بيطلع وقف لما سمع رضا يسأل..
/بتسافر بروحك!
التفت وشبحله شويه بعدين قال..
/تو نكلمه يحجز بدل وحده..ولف ومشي طلع...
وخلا رضا مستاء من التقارب اللي ماكانش مريحه نهائي بين مختار وصابرين....
#اساروف
#طوبى
...يتبع
.
