"جنة طوبى""راجعين ياهوى"☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆![]()
الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]"وَمَا كَانَ اللَّهُ لِيُعَذِّبَهُمْ وَأَنتَ فِيهِمْ ۚ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ"إستغفــروا الله 
بعد مرور شهرين
سرعة مرور الأيام السنين الأخيره مخيف..لكن في بلادنا للخوف اكثر من سبب وابرزها الحرب اللي زادت كبرت وتوسعت رقعتها في العاصمه وزادوا معاها اعداد النازحين..والضحايا...مشاهد تدمي القلب بين جثث متفحمه في جبهات القتال..احياء دمرت..مدنيين راحوا ضحايا القصف العشوائي..ومع هذا كان في طرف في العاصمه ناسه مازالوا في مأمن بعاد عن الحرب لدرجة انهم مش حاسين بيها واللي يشوف الحياة كيف ماشيه عاديه عندهم يكذب وجود الحرب من أساسه..هالناس عاشوا حروب من نوع اخر قتلت فيهم هلبه حاجات حلوه وخلفت دمار داخلي كبير...وهما توا يحاولوا ع قد مايقدروا يعيدوا البناء ويزرعوا فيهم حاجات احلى من اللي راحت منهم...
في هالشهرين ولدت صفاء "أحمد" سمية جده اللي دخل ع قلب جدته فايزة سعاده ليها عمر ماحست زيها..وخدي عقل وقلب عمته عواطف اللي قعدت تعاون في مرت خوها على رعايته..صفاء كان اكثر شي مفرحها هو حب عواطف لولدها ماحستش اتجاهها بالغيره ولاالإنزعاج بالعكس خلتها تحس معاه بشعور الأمومه اللي ياما تمنت تعيشه..داروا لأحمد عشي عقيقه لكن ماقدروش يديروا لمة كبيرة احتراما لجارهم الحاج جويده...ومن حوش الصيد لحوش شنيبه اللي ولت فيه سميره الكل في الكل لما سيطرت ع قلوب سكانه..الولاد يعزوها وداروها أم تانيه وصديقه..نسرين تحب رفقتها هلبه وبدت تحب الجيه لحوش ماليها بسبب الاجواء اللي حلوة اللي ملاته..لكن خديجه علاقتها بيها كانت عاديه مافيهاش ود لكن هاديه مافيهاش مشاكل عكس امها اللي لايمكن تتقبلها ولاتتحمل وجودها..اما الصغار فكانوا يعشقوها عشق ومعاش متخيلين حياتهم من غيرها..
سبحانه ربي خلا انتقام الاقحوانه نعمة عليهم خلاها تكسب اجرهم بدون ماتحس..وكأن مكتوب ع طوبى تكون مباركه خيره وين ماحلت وين ماتكون وشن مادير لكن في نفس الوقت كان يبيها تكون عقوبه لهلبه ناس ماردعهمش ولا رادع ولايبوا يتعظوا ولايخافوا...بس هالأقحوانه البيضا اللي ولت حامله ع كتافها مسؤوليات هلبه زادت عليهم مسؤوليه تانيه تحملتها من كل قلبها وبملئ ارداتها ماجبرهاش عليها شي...مسؤوليه النازحين اللي ماكانش ليهم مأوى ولاعندهم وين يمشوا...قررت تفتحلهم مدرسة اختها وخلت اهل الشارع يتشاركوا معاها في عمل هالخير وكل حد وفر ع قد استطاعته الاحتياجات اللازمه لهالناس المنكوبه..وطبعا ع راسهم ولد الصحراء الأصيل التارقي اللي قاعد يكبر في عينها وقلبها يوم عن يوم..قاعد يخلي فيها تحس بمشاعر عمرها ماحستها مشاعر حلوة بالمرة قاعده تهرب منها هروب.5نوفمبر...سنة 2019..في المدرسه...كانت موجوده مع اريج إلى جانب عضوة جمعيه خيريه ليها علاقه بمنظمة اليونسيف..جايبين مساعدات انسانيه للنازحين..كان في حديث يدور بيناتهم اغلبه اسئله واجوبه عن احتياجات الناس في المدرسه ووضعهم..
طوبى:ياريت والله لأن الشتي قريب يخش الوضع حيكون اصعب بعدين..الموظفه:بإذن الله نحاولوا ع قد مانقدروا نأمنوا اللي طلبتوه..اريج وطوبى:إن شاء الله...ومن قدام بوابه المدرسه يخش عبد القيوم اللي كان في الفترة الاخيره زايد اناقه وجاذبيه وكله كان مقصود للفت النظر..لفت نظر ام العيون الحايره اللي ماهمه ولاحيهمه في الدنيا نظره مراة غيرها ليه..لكن المشكله انه قاعد يلفت في الانظار ويجذب في القلوب بدون مايحس لدرجة ان في بنات من العائلات النازحة كانوا يراجو في جيته في تلاته ايام اللي تعود يجي فيهم...وين شافوا خش تبعوه بعيونهم لين وصل في اريج وطوبى والموظفه اللي واقفه معاهم..عبد القيوم بإبتسامه وهو يشوف لطوبى من ورا النظارات../السلام عليكم..ردوا عليهم وهما يشوفوله ماعداها../وعليكم السلام..الموظفه بإبتسامه:كيف حالك استاذ عبد القيوم..حاجب طوبى ارتفع تلقائيا وهي تشوفلها واريج بطرف عينها ركزت عليها وهي تحاول جاهده تشد ابتسامتها..عبد القيوم:الحمدلله..مررت نظره ع المساعدات اللي جابوها وقال../قدرتوا توفروا كل شي!؟قالت:ايه الحمد لله..عبد القيوم؛الوضع في الشتا حيكون اصعب..:توا كيف كنا نحكوا في الموضوع هدا نحاولوا ع قد مانقدروا نوفروا للناس احتياجتهم قبل ليخش الشتي..عبد القيوم هز راسه وهو مركز بنظره ع الصغار اللي يلعبوا..:حني نستأذنوا توا ..طوبى؛جزاك الله خير وجعل هالعمل في ميزان حسناتكم..ارتسمت ع وجه عبد القيوم ابتسامه حلوة اريج شافتها.:إن شاء الله..ومشوا اريج وطوبىمع الموظفه بش يسقدوها مع الناس اللي جايين معاها..هو بعد مالحقهم بنظره..غيره عنهم للصغار كان يبي يمشيلهم بس وجود بنات في عمر الصبا معاهم منعه..قعد يشوفلهم بعين الآسى والأسف ع الحال والوضع اللي وصلوله..كان قاهره لأبعد حد..مهما كان الوضع كويس في المدرسه هادي مش حيخليهم يحسوا بالاستقرار والراحة..من وين بتجيهم الراحه وهما في هالوضع الصعب المهين..غير نظره عنهم وتباعد لين وقف في مكان مايخليهمش يبانوا عليه..ع خشة اريج وطوبى..طوبى:حتى سكان المنطقه بارك الله فيهم مش مقصرين.اريج تنهدت وقالت../ربي يفرج عن قريب ويرجعوا هالناس لحياشهم والله وضعهم مانتمناه لعدوي..طوبى بأسف:قدر الله وماشاء فعل..اريج؛لا ياطوبى هاللي صاير بإيدين البشر ظهر الفساد في البر والبحر بما كسبت ايدي الناس..هزت راسها موافقة لكلامها وقالت../إنا لله وإنا إليه راجعون..اريج وهي تشوف لعبد القيوم كيف واقف بعيد قالت../طوبى التارقي..دقات قلب طوبى تسارعت وهي تشوف وين ماتشوف اريج..كان لاهي بتليفونه بعدين قام عيونه وشافهم نزل تليفونه..طوبى حمحمت وقالت../ماشيتله..قدمتله طوبى وهي تحاول تظاهر بالثبات بش تبان عاديه كانت تبي تخفي توترها وخجلها بش ماتنفضحش قدامه برغم انها لتوا مش عارفه شن هو اللي خايفه ينفضح قدامه او ماتبيش تعرف..وهو يشوف فيها جايه ناحيته وقلبه طاير وسط ضلوعه بس كان متبع نفس اسلوبها لسبب واحد مايبيش يتصرف تصرف مش محسوب ينقلب ضده خصوصا انه مازال مش متأكد اذا كانت تحس ناحيته شي..وصلت فيه بس كانت في بيناتهم مسافه كويسه..هو حط ايديه ورا ظهره وقال../كيف الحال..طوبى وهي مغيره نظرها عنه../الحمد لله..ياريت تجي معاي نوريك المكان وانت تشوف شن تبي دير فيه..ابتسم وقال../تمام..اشرت بيدها المغطيه بالقفازات السود القدام وهي تقول../تفضل..هو هز راسه وع وجهه ابتسامه مشي قدامها وهي جنبه..واريج معاهم بعيونها وهي مبتسمه وتقول في نفسها.."محلاهم مع بعض يارب اكتبهم لبعض تستاهل طوبى هالعوض الحلو يارب"خشوا داخل المبنى وقعدوا يمشوا والصمت مسيطر عليهم..لعند ماوصلوا للدروج..ركب وهي وراه..كانت تقاوم في رغبتها بسرقة النظر ليه بقوة..وهو قلبه ماباش يهدا كل نبضه ليه كانت تعترف بحبه الكبير ليها وقداش كان متمني تسمعه..وصلوا للدور التاني..شافوا زوزولاد صغار يجروا ورا بعض وجايين ناحيتهم..طوبى بضحكه؛بالشويه راكم طيحوا..وهو يشوفلها وقلبه بيطلع من صدره..وقفوا الزوز عليها وواحد فيهم يقول../قوليله ياابله يفوتني.طوبى بضحكه:فوته..التاني قال:غير اسمعي مني قبل امس انتي عطتيني طيارة ولاسيارة؟طوبى عقدت حواجبها وقالت../غير نتفكر عشاي البارح!..ضحك عبد القيوم ضحكه خفيفه بدون صوت..:تي غير راجي نفكرك لما قتلك اني نبي نولي طيار انتي عطتيني الطيارة وقتيلي اول رحله تطلع فيها ارفعني معاك..هي بضحكه:ايه صح تفكرت..شاف للولد اللي معاه وقال../هاه ريت!..الولد التاني بزعل قال../نبي طيارة حتى اني..عبد القيوم بإبتسامه؛ترا ياغالي بحت فيا..وجهوله انظارهم كلهم ..هو حول نظاراته وعقد حواجبه وهو يقول../عطيه طيارته وانا نجيبلك غيرها بعدين..اشر عليه وقال../كلمه؟..عبد القيوم؛كلمه ياغالي وانا ديما قد كلامي..طوبى ابتسمت وهي تشوفله وقلبها كعادته قدامه يفقد السيطره ع دقاته..كمل كلامه وهو يقول../شن اسمك؟:نسيم حميد عبدالباسط الزياني..ضحكت طوبى بدون صوت..وهو قال بضحكه وحواجبه معقوده../نسيم حميد..تمام..خلاص عطيه طيارته..شبح لخوه ومدله الطياره..:منور..ومشي يجري..ضحكوا طوبى وعبد القيوم..التاني قال:نراجي فيك يا..اسمك حقه؟..ابتسم وقاله:عبد القيوم..:تم ياعبد القيوم نراجي فيك راهو..ومشي يجري لحق خوه..لحقوه بعيونهم وهما مبتسمين بعدين غيروا عيونهم جو متقابلات..هي ارتبكت وجهها احمر نزلت عيونها وقالت بشي من الخجل../تفضل..هو ابتسم وكمل القدام بدون مايتكلم خاف لو تكلم يقول.."نحبك"هالاعتراف اللي قعد محبوس في صدره سنين وتوا ولى ع راس لسانه ومايقدرش يقوله..كملوا مع بعض ماشيين لين وصلوا لأخر الممر اللي كان فيه مجموعه شباب وشابات مكونين فريق تطوعي يجي كم يوم في الاسبوع يقعد مع النازحين من 9صباحا ل 11 ليلا..طوبى:السلام عليكم..كلهم ردوا عليها بأصوات متقطعه../وعليكم السلام..طوبى:ربي يعاونكم..ردوا عليها../اجمعين..بارك الله فيك..وعبد القيوم يشوفلهم لاحظ واحد فيهم نظراته لطوبى باينه نظرات اعجاب تبدلت ملامح وجهه لغضب ممزوج بالغيرة..غير نظره ليها لما سمعها قالت../هي هادي..كانت تأشرله ع الحجره من غير ماتشوفله..هو تنهد بكتمان وخشلها..وهي قعدت واقفة في الباب..كانت تشوفله كيف يتفرج ع الحجرة بعدين قالت../هادي كانت حجرة مدرسات اكبر من الفصول..هو وعيونه يدوروا في الحجره../واضح..تبي شوية شغل..طوبى التزمت الصمت..هو شافلها وقال../تخصصك..شافتله بطرف عينها لقاته يشوفلها بإبتسامه..غيرت نظرها عنه وقالت../يعني تبيني نتصرف فيها بروحي..رد عليها بنبرة صوت حلوة../ديري اللي يحلالك..وجهها زاد احمرار وحست بنبضات قلبها ينسمعوا بالصدى..هو كان يبي يتكلم يبي يطلع اللي في قلبه مايبيش يضيع هالفرصه اللي من امس يراجي فيها بس هي كالعاده لازم تقطع رقبتها..طوبى بجديه وحزم../خلاص استاذ تو نشوف شن نقدر نديرفيها وانت بعدين تشوفها وكان عندك ملاحظات حناخدوها بعين الاعتبار..شافتله وقالت../نستأذن لازم نروح..هو غير نظره عنها وقال../تمام..مانعطلكش اكثر من هكي..طلع من الحجره وهي اللي كانت بقوة كبيره تحاول تسيطر ع نفسها سكرت الباب..شافتله لقاته ماشي للدروج وهو يلبس في نظاراته حست بضيق شديد..هي كانت خايفه..خايفه ولخوفها اسباب لاتعد ولاتحصى يخلوهامعذورة..وأولهم انها تكون فاهمه اللي تشوف فيه منه كله غلط..في نظرها واحد زيه لو فعلا يكنلها مشاعر راهو اعترف بيهم طول ودار خطوة جديه..لهذا كانت ديما تفسر في اهتمامه بيها وبأي شي يخصها ع انه تنفيد لوصية بوها وتعاطف معاها بعد كل اللي مرت بيه..غاب عن عيونها الحايرة لما نزل من الدروج..نزل وهو معصب فعلا هالمرة مش منها بل من نفسه اللي مش قادر يتحكم فيها وتخليه يتصرف بطريقه تنفرها منه وتخليها تفهمه غلط..طلع من المدرسه ع عيون أريج اللي كانت ملاحظه انه طلع بوجه غير اللي خش بيه.."اريج"شافت لطوبى لما نادتها وهي جايه ناحيتها..طوبى:هي خلاص بنطلعوا..اريج تنهدت وقالت../هيا..ومشوا مع بعض وطلعوا في المدرسه اللي كان تحت حراسة مجموعه مسلحة ويتناوبوا عليها اهل شارع القهوة مع الفرق التطوعية.."ياربي نجي جنيواتي ياربي كبر جنيواتي هي تعالي هي تعالي"هادي مغليه تغني لجنه اللي حتقعد عندهم نهار كامل..كانت جنه اللي ولى عمرها توا عام وشهرين تمشي بإتجاهها وهي ترقص وع وجهها ابتسامه قمة في البراءة واللطف لين وصلت فيها..شدتها ورفعتها وحطتها ع رجلها وهي تقول../ياربي نجيلي حبيبة حنينه..جنه قالتلها بلغتها الطفوليه.."نينه..بيبي" يعني حنينه حبيبي..ضمتها مغليه وهي تقول../انتي حبيبتي..ترى تعالي سديرة صورينا بنقالي..مدتلها التليفون..ناضت سدرة وهي مبتسمه وخدت التليفون من حناها وصورتهم..ومن الصاله لدار المعيشه..اللي كانوا واقفين فيها نسرين وسميرة ع جوري اللي كانت تكلم في امها هاتفيا..جوري:باهي باهي.."خيرك جوري نحس فيك مااستاحشتنيش!؟"جوري:اني استاحشت خالتو صابرين وزعلانه منها هلبه..بدت ع وجوه نسرين وسميره ملامح الشفقه..جوري:بالله عليك قوليلها تتصل بينا..بصوت مخنوق ردت امها.."باهي حبيبتي تو نقوللها سلمي ع خوتك وبوسيهملي"..ونهت المكالمه..مدت جوري التليفون لعمتها نسرين وقالت../ماشيه لجنة..ومشت طلعت من حداهم...تنهدت سميرة وقالت../ماقالوش امتى مروحين!؟نسرين؛لما سألتها قالت مش واضح..وانتي ماتعرفيش امتى تروح سدرة؟سميره:قالوا نص 11 بيديروا عرس يوسف في أخره..نسرين ابتسمت وقالت../ربي يهنيه..باهي خالتي مطيره شن صار فيها.."خالتي سميرة"سميره بضحكه:الحوت جي..مشت طلعت ونسرين وراها وصلوا في الكوجينه لقوا المهدي ومعاه نضال في الكوجينه وهما يحطوا في قابيات الحوت ع الرخامات...سميره:سلمكم جيابين يحفظكم ربي من العين..ضحكوا..سميره وهي تشوف للقابيات قالت../الله يبارك..نسرين وعيونها يلمعوا../متسهفه للشوا..ع خشة مغليه وفي حضنها جنه../جيتوا!؟جاها نضال وقال../لا قاعدين نصطادوا..ضحكوا عليه والمهدي ابتسم..مغليه:لسان يبي القرض..تي هات البنت الجاي!خداها منها وقال../حتى حني عمامها عندنا فيها حق..جنه حطت يدها ع لحيته وقالت.."ندولة" نضوله...ضحكوا..مغليه بضحكه:سلم لسانها ياربي..نضال بضحكه:كان يخلوها تبات مانحصلش معاها في وقت..سميره:نهار تاني تقعد يوم كامل..المهدي:هي اني ماشي ماتبوا شي!؟مغليه وسميره:سلامتك وليدي..بعد ماقالوها شافوا لبعض من فوق لتحت..المهدي ضحك وانسحب طول..اما نسرين طول غيرت الجو وقالت../حق غرفه بدير اسبوع في الصاله..سميره؛ايه قالت في الاولاد مادرتش بندير في البنيه..نسرين:بتفوت فردوس..هني نضال اللي كان يلاعب في جنه مع امه ركز معاهم..سميره؛ايه غدوة مسافره وبترفع معاها معتز خلاص الولد بيكمل حياته غادي..تنهدت نسرين بحسرة وقالت../الله غالب..لكن زعمه يخلي امه تقعد معاه واريج تقعد بروحها هني!؟رفعت مغليه عيونها في ولدها لاحظت ملامح وجهه كيف تغيرت للضيق..سميرة؛وين قاعده بروحها؟! معاها خالاتها وخوالها وحداها جدودها وعمامها واني معاهم..نضال:خوديها يام طالع..خدت مغليه جنه وهي مركزه علي ملامح وجهه وقعدت ملاحقاته بعيونها لين طلع وهي طلعت بجنة وراه..تنهدت سميره وقالت../تصدقي نسرين..لويقولي نبيها والله اني نكلمهاله..بدت ع وجه نسرين ملامح المفاجأة..سميره بإبتسامه:ماتستغربيش اني عقلي مش صغير ونعرف نقيم الناس كويس بعد مانعاشرهم وحكمي عليهم ديما حقاني.ربي مش كاتبها لخوي الله يرحمه ونضال بعد عرفته كويس عرفت انه راجل قلبه كبير وطيب ويستاهل اريج تكون من نصيبه..نسرين بضيق:الموضوع معاش ينفع توا بعد اللي صار ياسميره لاهي ترضى توليله ولاخوي يبي يولي..مررت سميرة نظرها ع القابيات بعدين تنهدت وقال../اللي فيها الخيره يجيبها ربك..هي خلينا نبدوا فيهم معاش في وقت...خشت السياره وفي يدها كيسه فيها حنه ولصقة..حطتهم في الكرسي الخلفي..وتحركت خالتها بالسيارة وهي تقول..طوبى:تعرفي حاسه روحي رزينه هلبه من جهة جيبة غرفه ومن جهة مرواحة سدرة وبعدها عرس يوسف..اريج بضحكه؛كله يفوت صدقيني المهم افراح..طوبى بإبتسامه؛صدقتي..سكتوا شويه بعدين طوبى قالت../روجهاريج؛امممطوبى:مش خايفه امك تقعد مع خوك؟اريج :اني نبيها تقعد نبيها ترتاح سادها حرق دم وتخميم ومرض خليها تبعد المهم تكون مرتاحه وحالها باهي..ابتسمت طوبى..اريج بضحكه:اني نفكر في موضوع عمتي مطيرةطوبى بضحكه:اسكتي بالله..قعدت تضحك اريج..طوبى بإبتسامه:لكن تحسيها متقبله..اريج:هي تراجي في مرواحة خالتي سدرة تبي تاخد رايها..طوبى:في شن بتاخد رايها!؟ والله ماحتتقبله ولايعجبها لو شن يدير..قعدت تضحك اريج...وكملوا طريقهم لين وصلوا لشارع القهوة...لما درسوا قدام الحوش..نضال اللي كان في القهوة شافهم.نظره ثبت ع اريج اللي نزلت من السيارة..كانت لابسه عبايه واسعه وشاربه كبيره لونها بترولي وقفازات..من بعد ماطلعت من العدة ولت تلبس في الحجاب الشرعي بس فيها عادات مازال ماتبدلوش..زي انها تقيم العبايه شويه وهي ماشيه وسبيدروها يبان مع السروال من الاسفل..هو كان شاد ضحكته وفي نفسه يقول.."شمطاء.."لكن فيسع مابلع ضحكته وغير عيونه عنها وهو يستغفر..وطوبى وهي ماشيه وراها لحوش غرفه كانت تسرقله في النظر ومركزه ع نظراته ليها اللي ماتغيروش نهائي..وصلت في الباب وهي تقول../نزلي العبايه ياهمي..استاقظت وطلقتها وهي تضحك..حركت طوبى راسها يمين ويسار بعدين دقت الباب..وتفتحلهم نبيله وهي مبتسمه ببشاشه وتقول../ياهلا بالحلوات خشوا..خشوا الزوز وهما مبتسمات ويقولوا../السلام عليكم...••••••••••••••••"روعه القصه والصبغه مش عاديات"غرفه وهي تحرك في شعرها../بالله حق طوبى!؟طوبى وهي تشوف لشعر اختها../والله مناسبات لوجهك ولون بشرتك هلبه..ابتسمت غرفه..اريج حطت اللصقه قدامها وقالت../اختاري..خدتهم غرفه وقعدت تتفحص فيهم..طوبى شافت لنبيله وقالت../شن الاخبار بلبله؟غرفه:اخبار الفجايع..اريج وطوبى بخوف.."يالطيف!..فجايع شني!؟"نبيله بضحكه:اختكم هولتها..اليوم كانت عندي جلسه في ***** طاحت قذيفه قريبه عليهم التغت الجلسات كلها واللي هناك غادي هرب..طوبى بخوف:هدا كله ومش فجايع! حمد لله ع سلامتكم..نبيله بإبتسامه؛الحمد لله عدت ع خير..اريج بقلق:معاش في مكان آمن العشوائي ماخلاش تركينه آمنه..طوبى:يحفظنا الله بحفظه..غرفه بإنزعاج؛غيروا الموجه النكديه وركزوا معاي..نبي هادي..طوبى وهي تشوف للصقه../حلوه..نبيله؛حتى اني عجبتني..اريج؛اعتمدي..غرفه:خلاص..ناضت طوبى وهي تقول../خل نوض نعجنها..ترا الكيسه اريج..مدتلها كيسة الحنه خدتها ومشت وهي تقول../الخرابيش وين؟غرفه؛رفعهم بوهم يدير بيهم دورة بش نريح راسي شويه..من الكوجينه جاها صوت طوبى وهي تقول.."معاش تقولي هكي ياشنكه"ضحكوا وغرفه قالت../عرفتها بتقولها..سكتوا شويه بعدين قالت غرفه../ايه حقه شن صار في موضوع اميمه..اريج بضحكه؛سكره جدي قال اميمه معاش بنعطيها بنديرها مسير..ضحكوا..غرفه بضحكه:وعمي شن رايه؟اريج:اللي تبيه اميمه يصير..غرفه؛سبحانك ياربي كيف تغير معاها..اريج؛هو تغير فيه كل شي الا هديكا الخصله الزفته..نبيله؛.داء ليس له دواء... ماشيه هي وياه في ممر المصحه متعنقه ذراعه وهي تقوله بضحكه../انت تحسابني شاريه المصحه بابا !!؟عبد المطلب:انتي احسن دكتوره هني مفروض ع خاطرك انتي يعاينوني بلاش..اميمه بضحكه؛حتى النص باهي..عبد المطلب ع مضض:يللا..ضحكت وقعدت تمشي معاه لين وصلوا لمكتب الدكتور دخلاته ووصت الدكتور عليه بعدين مشت تشوف شغلها..تلاقت هي وهناء اللي قالتلها../رفعتي بوك للدكتور سليم؟اميمه:ايه..وماشيه لمكتب الدكتور ظافر نبي نحاول معاه لأخر مرةهناء:ضيعي في وقتك ظافر مادي مايدير شي بلاش..اميمه:نحاول وخلاصهناء:تمام نتلاقوا في البريك؟اميمه؛تماممشت هناء من جهة تانيه واميمه كملت طريقها لمكتب الدكتور..وصلت فيه وقالت بهمس.."يارب"..دقت دقتين..سمعت الاذن بالدخول فتحت الباب طول..اميمه بإبتسامه:دكتور..شافت قدام مكتبه واحد مقعمز عاطيها بالظهر قالت../خلاص نجي بعدين..الدكتور:لالاتعالي اني شويه وطالع..هي خشت وسكرت الباب..وين جت بتقدم وقفت جامده في مكانها لما التفتلها ضيف الدكتور اللي قال بإبتسامه../دكتورة اميمه..هي قعدت ع حالها مش مستوعبة ومتفاجئه هلبه في نفس الوقت حست بشعور حلو هلبه..فرحه..هو هدا اللي حساته...وقف وقال بإبتسامه../نستيني شكلك!؟الدكتور اللي كان يمرر في نظراته عليهم بإستغراب قال../شكلكم قريتوا مع بعض!؟شافله اسامه وقالت../ايه دفعه وحده..ابتسم الدكتور وقال../اها..هي استاقظت وقالت بشي من الارتباك./حمد لله ع السلامه..امتى روحت؟اسامه وهو مبتسم../اول امس..ابتسمت وجهها تبدل لونه للأحمر وهي تقول../حمد لله ع السلامه مرة تانيه..عن اذنك دكتور..ومشت بسرعه طلعت من المكتب ونست علاش جايه..اسامه استغرب حالتها هلبه بس فكراته بأميمه متاع زمان اللي كانت خجوله هلبه لدرجة الارتباك..الدكتور بضحكه../شكلها كانت اكثر من زماله..شافله بعدم فهم وقعمز وهو يقول../شن قصدك؟!غمزله وقال../حب قديم..ابتسم اسامه بدون مايعلق..وصاحبه ضحك بعدين قال../ع العموم هي وحده لحوحه بشكل مزعج..عقد حواجبه وقال../كيف يعني!؟تنهد وقال../ياسيدي في مدرسه لعيلتها مفتوحه للنازحين وهي متطوعه مع فريق اطباء يتناوبوا كل يوم ع مستوصف صغير دايرينه غادي وتبي من الدكاترة الكبار حتى هما يطوعوا للحالات الصعبه يعني نعاينوا ونعالجوا بالمجان زنت عليا زنين ياراجل تبيني نطوع بالسيف..رد عليه بإبتسامه وهو يقول../قاعده زي ماهي طيبه وبريئه كانهدا راهو ماحاولتش مع واحدمادي زيك كل شي عندك بثمنه مازال مش زابطتك..ضحك وقاله../لاهي زابطه بس عندها سوسة الحاح واصرار...اسامه ناض وقال../تمام خل نمشي نشوف مدير المصحه ونتلاقوا بعدين..ناض صافحه وهو يقول../انست وشرفت يامناضل..شافله بطرف عينه بعدين مشي وطلع من المكتب وخلاه يضحك..في الكوجينه..يجهزوا في الغدي وهما يهدرزوا...هاديه:يابنتي خوي كل يوم وهو يتصل ويسأل نفخلي راسي لين ندمني ع الساعه اللي فكرت فيها..عطيني قرارك وريحيني..مطيره بضحكه؛وااك ياربي..تو انتي يامنهوجه بديري روحك مش زابطه..هاديه:اني نبي ناخد كلمه واضحة وصريحة..تنهدت مطيره..شافتلها بنظرات طويله بعض الشيء خلت هاديه تقول بنفاد صبر:تي هيا عاد..مطيره بخجل وهي تحرك في يدها من الأمام للخلف قالت../خلاص موافقه..هاديه زغردت بصوت منخفض وبدت تصفق وتغني../يامبروك عليه شقيقي هدا وين زمطته ريقي..ومطيره تضحك وهي متحشمه..ع خشة فردوس اللي كانت تجهز في شناطيها قالت بضحكه فرح../وافقت!؟هاديه:ايه ياحنه ايه وتوا بنولي حماتها ونوريها الزنباع وين ينباع..تبدلت ملامح وجه مطيره للحده وخدت ساقم لوح وهي تقول.../توري مني ياشلولحه!!؟ وتطلع هاديه تجري وهي تضحك ومطيره في جرتها..وفردوس تضحك عليهم وهي تحرك في راسها يمين ويسار...الساعة 9:15ليلا..حطولها لصقة في رجليها وبدوا يحنوا فيها..وحماتها راده بالها من الصغار...طوبى:عجبني شغلهم راقي شركة تنسيق معروفه هادي..غرفه؛باهي الحمد لله مواويل اللمه كلهم خلصت منهم..اريج:شن رايك بيبو نقولولهم ينسقوا حفلة دخول خالي يوسف؟طوبى هي مركزه في رجل اختها وتحني../كلمتهم..اريج بضحكه؛ماتخلي حاجه..ضحكت غرفه..طوبى:ايه حقه غرفه استقريتوا ع اسم؟غرفه؛ايه اختاراته نبيله قالت ع وزن اواب ومهاب..مئاب..ابتسمت طوبى..اريج؛حلو..غرفه؛حتى اني عجبني..ع خشة نبيله وهي تقول../واخيرا رقدوا..وقعمزت حداهم..غرفه:سامحيني بلبله شقيتك..نبيله؛شن تقولي عمتهم راني!طوبى:سلم عمتهم..باهي جرانتي اني قاعده راقده؟نبيله بإبتسامه:ايه شكلها لعبت هلبه في حوش جدها..طوبى:تبي الصغار والدوشه..غرفه:سلمها ياربي..طوبى:اسكتي تبي سيارة زي اللي عندك ولادك البنت واخده ع جو الولاد يانهاري..ضحكوا..غرفه:تو تجيها بنت خالتها ويتصاحبوا..طوبى:كان ماخلتها زيها..ضحكوا..نبيله بإبتسامه؛ربي يحفظها ويفرحك بيها..شويه جي اتصال لنبيله قامت تليفونها وقالت./خالكم جي..ناضت وهي تقول...تصبحوا ع خير.طوبى:سلمي عليه..نبيله:يوصل..ومشت طلعت من حداهم..طلعت نبيله لقت راجلها يهدرز مع خوها برا..شويه وروحوا ورؤوف خش للمربوعه بش بيبات فيها.وقعدت مرته تهدرز مع اختها وبنت اختها وهما يحنوا لين كملولها..ضمت اريج حوسة الحنه بعدين خشت رقدت مع الصغار..اما طوبى ساوت لأختها مرقدها وساعدتها وفرشت حداها ورقدت..ومازال قاعدين يهدرزوا..غرفه:اني خايفه هلبه من بعدين ياطوبى اللي عرفاته سدره مايجي شي قدام المدرق عليها حتنصدم بهلبه حاجات..طوبى:وحده وحده نخلوها تعرف كل شي وحده وحده اهم شي توا تعاملنا مع مختار لازم يكون طبيعي قدامهاياغرفه..غرفه بضيق؛باهي..طوبى:معليشي تحملي..تنهدت وهي تهز في راسها بإيجاب..طوبى:وحاجه تانيه ماتخلي راجلك يعرف شي..غرفه؛مستحيل اي شي يخصنا معاش بديت نحكيله فيه نهائي..سكتت طوبى وهي تفكر..وغرفه كذلك..شويه قالت غرفه../طوبى..طوبى:امم..غرفه؛مافكرتيش بعد يروح الجالي شن يصير!؟طوبى:لافكرت وهلبه بس في نفس الوقت مسلمتها لله..غرفه؛ونعم بالله..وقعدوا يتبادلوا الحديث عن همومهم لين رقدت غرفه..بعدين ناضت طوبى ومشت للدار بش دير طلة عالصغار لقتهم مع اريج غارقين النوم...قربت لبنتها خدتها بهدوء وطلعت بيها للصاله رقدتها جنبها وكملت ليها وهي تستغفر بش يرتاح بالها شويه وماهي الا لحظات خداها النوم ورقدت..لكن شن يرقد ساهر ليلها اللي قربه منها زاد حبها في قلبه وكبر شوقه..الراجل معاش قادر يصبر..مش عارف كيف بيدير لو رفضاته..وحالته خلاته يخاف من نفسه يخاف يتصرف بتهور وتجي ع راسه...عبد القيوم بحيرة ورجاء:يارب وانت الادرى باللي فالقلب..واميمه مش عارفه شن صار معاها لما شافت اسامه حالها تبدل بالمرة..يومها كله وهي تفكر في اللقاء اللي صار بينهم..حست ان اسامه متغير هلبه مش بس ظاهريا حتى شخصيته..حتى نظرة عيونه ليها مش زي زمان..تنهدت بضيق وخشت ع الفيس بش تلهي نفسها بقراية اخبار الحرب..جي قدامها منشور خاص بصفحة المصحه اللي تخدم فيها كان فيه صورة اسامه ومكتوب فوقها انه انضم للطاقم الطبي في المصحة..هالخبر فاجئها بقوة...وزاد لخبط عقلها...خشت ع التعليقات..وبعد تفكير علقت..(موفق إن شاء الله)اميمه بإستغراب../شن هدا يااميمه!!؟عليك تعليق عبيط..تأففت واستغفرت وطلعت من الفيس وحطت تليفونها جنبها ..غمضت عيونها وبدت تقرا في الاذكار...وهو اللي كان يراقب في التعليقات ع المنشور اللي يخصه يراجي في تعليقها بفارغ الصبر لما شافه وقراه ضحك ضحكه خفيفه وقلبه يدق بقوة..تنهد بعدين رد عليها..(اجمعين بنت دفعتي) وكان تعليقها الوحيد اللي رد عليه...ويعدي باقي الليل ويآذن الفجر..وتنوض اميمه تتوضا وتصلي..بعدين تاخد تليفونها وتخش ع الفيس بش تنزل منشور صباحي..نزلت منشورها..وخشت ع الإشعارات وتتفاجئ لما تشوف اشعار رده ع تعليقها..خشت طول قراته..تلقائيا ضحكت ومر قدام عيونها شريط ذكريات هديكا الايام واكثر شي جي في بالها قفص الكناري اللي هداهولها وكان ناوي بعدها يعترفلها بحبه..ابتسمت بحسرة..بعدين طلعت من الفيس وحطت التليفون ع السرير وطلعت من دارها...الساعه 10:00صباحا..كان عزيز واصل بمعتز لحوش طوبى..جاي بياخد نسيبته..استقبلوه علي الواعر وولده عبد المطلب ودخلوه للمربوعه الخارجيه ومعتز خش للحوش...فردوس وهي حاضنه اريج بقوة ودموعها ينزلوا../خليك قويه ماما زي مانعرفط ردي بالك ع روحك وعاوني خالتك طوبى ردي بالك تخليها بروحها..اريج ودموعها في عيونها../حاضر ياقلبي حاضر..وانتي ردي بالك ع روحك وفكري في نفسك معاش تفكري فيا..باست فردوس بنتها ع رقبتها وهي تشم في ريحتها بعدين باست راسها..واريج باست راسها وايديها..مطيره ودموعها ينزلوا:اللطف ياربي خيركم بتقعد السنين هي!؟جت فردوس لعمتها وضمتها بقوة وهي تقول../ربي يسعدك ويهنيك.مطيره بنبرة باكيه:ويريح بالك يابنتي..سلمت بعدها ع غرفه اللي كانت تبكي هلبه وخلت اختها تبكي معاها وهاديه تهدي فيهم وهي متأثرة ع الأخر.اما اريج كانت تبي تقعد قدام امها متماسكه بش تسافر وهي مطمنه عليها وماتشغلش بالها..وفي الجنان متاع الكوجينه..طوبى:خليك راجل وقدر تضحيات امك واختك يامعتز..معتز:صدقيني حندير اللي يرفع روسكم ماتخافوش مني..ابتسمت بعدين مسحت ع راسه وقالت../ربي يحفظك..وفي نفسها كملت تدعي"ويسخرك لأمك وخواتك"وجي وقت وداعها هي لفردوس..طوبى:ماتخممي في حد امورنا هانيه..فكري توا في حالك كيف بتولي جده..ضحكوا..فردوس وهي تضحك من بين دموعها../كيف ماولت فايزة قبلي..تو هدا منظر جده ياناس!؟وفايزة تسمع فيها وهي تضحك من بين دموعها..باست طوبى ع راس فردوس وقالت في وذنها../اريج في عيوني..باست فردوس خد اختها بعمق بعدين تباعدت عنها وقالت بنبرة باكيه../خل نمشي نسلم ع جدي...وسلمت فردوس ع جدها وعمها وطلعت مع نسيبها وولدها بعد ماوصاهم علي الواعر عليها...ويتسكر الباب من هني..وتنهار اريج من هني..جتها طوبى طول ضمتها بقوة وهي تمسح ع ظهرها بدون ماتتكلم..ومطيرة وغرفه وهاديه واميمه وفايزة وبناتها بكوا معاها..وبعد ساعتين من مغادرة فردوس..بدوا بحملة تنظيف للحوش بش يفرشوه كله للشتي..في الجنان..كانوا اريج ومروة بنت فايزة يغسلوا في البساطات وحداهم جنه مقعمزه في درجيحه خاصه بيها وهي تتفرج عليهم..وامها فوق السطح في دار الخزن تقلب فيها...وهي ضم..جت قدامها شنطة جلد قديمه كانت لسدرة ايام الجامعه..ابتسمت وين شافتها..خدتها وقعمزت ع كرسي وقعدت تمسح فيها..بعدين فتحتها..مالقتش فيها الا كراسه بس..كراسة "انجليزي" قديمه من هديكا الايام..بفضول طلعت تبي تشوف اللي فيها..فتحتها وقعدت تقلب فيها بإستغراب كانت تبان فاضيه لعند ماجت لأخر تلاته صفحات شافت فيهم شي غريب..التلاته كانت عليهم علامة خطأ 
مرسومه ع كبر الصفحه..مطت شفايفها للأسفل بعدم فهم..بعدين سكرت ودستها في الشنطه..وحطت ع الشنطه ع تركينه وكملت شغلها..كملوا حوستهم وتمددوا كلهم في الصاله..حتى غدي ماداروش طلبوا من برا...بعد ساعة خشت عليهم صفاء بش تتغدا عندهم وتهدرز...في الصاله..مقعمزات يهدرزوا وطوبى في وسطهم تصبلهم في القهوة..صفاء:تغيرت معاها عمتي 180درجة لكن ماتغيرتش علينا حني..مطيره؛هالابتسام مايطلع منها تشوفيها تقولي هويديه وعويقله وياناري مسكينه بختها بالهون وهي سكوتي تحته كوتي..طوبى وهي تفرق عليهم في الفناجين قالت../وخديج وين من هدا كله!؟صفاء بعد ماخدت فنجان القهوة قالت../هديكا شاده رجلها ماتنزلش الا لما يجي حد..المده الاخيره صارت مشاكل هلبه بينها وبين راجلها صواتهم نسمعوا فيها..مطيره:علاش؟!صفاء:ع خاطر ولدها بعد ماسقط في الشهاده ياما صار...فايزة:صغارها ماينفعوش بكل..غرفه:يزيدها منه هالإبليسه..وطوبى تسمع بصمت وهي ترشف في القهوة..مطيره:المهم انتي عليك في نفسك ومادخلكش بيهم..فايزة:هدا مادايره وفخار يكسر بعضه..اميمه؛هي هادي ردي بالك تخشي في شي مايعنيكش ..غيرت طوبى نظرها لأميمه ورشفت من القهوة بعدين رفعت حواجبها ونزلتهم وقالت../عندك حق..اميمه استاقظت لروحها شن قالت وخافت طوبى تفهم غلط..حطت طوبى فنجانها وقالت../خل نوض نشوف مروه شن دايره مع الصغار.وناضت ومشت طلعت من حداهم وخلتهم يكملوا هدرزة..ولحظات واميمه طلعت وراها...لقتها واقفه ومربعه ايديها وهي تتفرج ع مروة وتاله كيف يلعبوا مع الصغار..جت جنبها وقالت../فهمتيني غلط..طوبى شافتلها وقالت../كيف!؟اميمه؛ع تعليقي اللي قلته لصفاء.ابتسمت وقالت../اها..لاعندك حق في حالة صفاء راجلها كويس وعيلته ناس طيبه لازم دير هكي بش تحافظ عليهم..اميمه بضحكه:نصي اللي ديما يفهم فيا..ابتسمت طوبى بعدين قالت../حاسه عندك شي تبي تحكيه..اميمه بإبتسامه:مش قتلك ديما فاهمتيني...في مطحن الزعيم..المهدي:وضع البلاد مدايرله زي الاحباط..عمر:كان صار شي طلعه يقرا برا خير عندك امكانيه..المهدي:غير هو يقول باهي..عمر؛تو نحاول معاه..ومحمود يخدم وهو يسمع فيهم..لحظات وغير نظره للشارع شاف سيارة عاليه "VIP"جايه لحوش طوبى..محمود؛عرفي شوف..واشرله بعيونه برا..هو وعمر شافوا وين مااشرلهم..طلع وقف برا وعمر لحقه..وبدون مقدمات بدي قلبه التعبان ينبض بقوة..درست السيارة قدام حوش طوبى بالزبط...اللي كان يسوق فيها الاقجم وهو يقول../حمدلله ع سلامه ياصغار سيدي..ابتسموا وردوا عليه../الله يسلمك..وينفتح الباب السحاب..وينزل يوسف..بعدين تنزل سدرة اللي كانت القيلا متاعها سابقتها..بطلتها المهيبه لابسه بدله سروال محتشمه لونها اخضر زيتي وايشارب لونه ازرق في الاحمر..ابتسمت من قلبها وهي تشم في ريحة الشارع..عقدت حواجبها وقالت../غيروا الباب!ضحك يوسف..وقعد الاقجم يشوفلهم بإبتسامه لين وصلوا في الباب بعدين تحرك طول..وتبان ع المهدي سلطانة قلبه اللي وين شافها وهي عاطيه بالظهر بس حس روحه كان ميت وردت فيه الروح..وخوه ومحمود يراقبوا في ردة فعله..سدرة بضحكه؛صوت دوشة صغار..ابتسم يوسف وطلع المفتاح اللي كان واخده من حسين..بعدين حطه في مكانه وبدي يفتح في الباب..طوبى بضحكه:الله ياربي!.. تعرفي نحس فيها مش صدفه تعرفي علاش!.اميمه بإستغراب؛علاش!؟وينفتح الباب..وجهوا انظارهم ليه..شافوا يوسف خاش جمدوا تماما...وتخش بعده سدره...وعيونها يجوا في عيون بنت قلبها وروحها...طوبى للحظه حست الدنيا لفت ليها..اما اميمه مشتلها تجري وهي تقول.."سدره"لين وصلت فيها حضنتها بقوة وسدره تحضن فيها بيده وحده وهي تقول بنبرة مرتعشه../قطوسه..اميمه خطر عليها يوم الطيحة ومنظر سدرة كيف كان وقتها انهارت بالبكي..في نفس اللحظة خشت تاله تجري خبرت اللي في الحوش طلعوا يجروا وقلوبهم سابقتهم..مطيره وغرفه وفايزة واريج تلاقوا عليها وضموها مع اميمه وهما يبكوا وهي تبكي بصمت..ويوسف وهاديه متأثرين ع الأخر..وصفاء اللي كانت واقفه ع الباب الدخلاني كانت تبكي..زي ماتبكي اختها مروة وحداها الصغار يتفرجوا مش فاهمين شي..فجأه..سمعت سدرة صوت طفولي حلو يقول.."ماما"..شافت قدامها..وهما تباعدوا عنها وشافوا لجنه وهي تبكي وتشد في سروال امها..خدتها طوبى ورفعتها في حضنها وقعدت تسكت فيها ودموعها تنزل..هالمشهد هدا خلا سدره وبدون سابق اندار تنهار بالبكي وهي شاده في ذراع مطيره..طوبى لما شافتها قالت../اريج..اريج فهمت عليها وجتها طول خدت منها جنه..وطوبى مشت بسرعه لسدره ضمتها بقوة..سدرة ببكي:حبيبتي ياعيوني انتي..قعدت طوبى تبوس فيها ع راسها وعيونها وخدودها وطبست باست ايديها بعدين ضمتها مرة تانيه وهي تبكي بصمت بدون صوت ترشف وبس وماقالتش كلمه...ماتحملش يوسف طلع وخلاهم مع دموع لحظات لقاء استنوه من سنه وتسعة شهور........يتبع....
