Fast Break

EPILOGUE

"Mr. Jerome Hernandez anong masasabi mo ngayon sa hindi mapigil na pagsikat ni Sandra? Hindi ka ba naapektuhan sa mga nadadaanang kaliwa't kanan niyang mga billboards? Mukhang hindi na rin siya magpapahuli sa iyo sa dami ng mga endorsements."

"Ang masasabi ko lang ay inihahanda ko na ang aking sarili. Nararamdaman kong darating ang isang araw ay tatawagin na lang akong Mr. Sandra Mariano."

Nagtawanan ang lahat ng tao sa studio.

"Napakahirap paniwalaan ng love story niyo ni Sandra. Sa kasagsagan ng kasikatan ng librong 'Fast Break' ay biglang nagpakilala ang misteryosa nitong may akda. Lumabas ang isang Sandra Mariano. At kasabay nito ay ginulat nyo lalo ang buong mundo nang ipakilala mo siya bilang iyong kasintahan....Para bang nakakagulat na biglang sumulpot ang isang babae na nagmamay-ari ng librong pinagkakaguluhan ng lahat at kasabay nito ay siya rin palang nagmamay-ari ng puso ng lalaking pinapangarap ng lahat ng mga kababaihan. Papaano ba nagsimula ang love story niyong dalawa?"

"Unang-una hindi po siya biglang sumulpot na lamang sa buhay ko. Kung alam niyo lang ang mga pinagdaanan ko para mapaibig ang isang Sandra Mariano ay baka maawa kayo sa akin..."

Muling nagtawanan ang mga tao.

"...katulad din po kami ng mga normal na relasyon na humarap din sa maraming problema at pagsubok bago naging maayos ang lahat. Tungkol naman sa pagpapakilala niya bilang writer ay pinagplanuhan talaga namin nang maiigi ito dahil dati ay masyado syang pribadong tao. Hindi nga ako makapaniwala ngayon kung parehong babae pa ba ang kasama ko."

"Jerome pagkatapos ng 'Fast Break' ay muling naglabas ng dalawang libro si Sandra at alam naman natin na ito ang dahilan kung bakit mas lalo pa siyang sumikat. Sa kasagsagan ng kanyang kasikatan, sa mga panahong maaaring sinisimulan pa lamang niya i-enjoy ang rurok ng katanyagan.... Bakit doon niyo naisipang magpakasal?"

Muling nagbiro ang basketbolista. "Mahirap na baka maagaw pa ng iba!"

Nagtawanan ulit ang audience.

"....Hindi naman namin ginagawa ang lahat ng ito para sa kasikatan. Kaya namin ginagawa ito dahil ito ang bagay na gusto na naming gawin. Ki sikat o hindi, ang mahalaga ay makasal kami."

"Mga kaibigan ngayon naman ay tawagin natin ang napakagandang misis ni Jerome Hernandez para samahan ang kanyang mister. Walang iba kundi si Sandra Mariano-Hernandez!"

Nagpalakpakan at tumayo ang lahat ng tao sa studio. Nakangiting pumasok sa set si Sandra. Tumayo si Jerome at humalik sa mga labi ng asawa.

"Magandang araw sayo Ms. Sandra!"

"Magandang araw din sayo!"

"Jerome napakaganda ng asawa mo. Ikaw naman sana binigyan mo man lang ng pagkakataon ang mga kalalakihan na pangarapin muna si Sandra bago mo ito pakasalan."

"Doon din yun pupunta kaya ginawa ko na ito bago pa man sila masaktan."

Umugong ulit ang malakas na tawanan sa paligid.

"Sandra sa tingin ko ay parang hindi ka lamang sa pagsusulat magaling. Pati sa maraming bagay ay nakukuha mo ang atensyon ng mga tao. Sumisikat ka rin bilang endorser at model. Totoo ba ang balita na gagawa ka na rin ng musical play?"

Tumingin si Sandra sa asawa at ngumiti. "Dapat sana ay susubukan kong gumawa ng musical. Subok lang naman siyempre ang pagsusulat pa rin ang priority ko. Pero napag-usapan namin ni Jerome na huwag na muna itong gawin kung kaya't hindi po muna ito matutuloy."

"Mahigit isang taon na kayong kasal. Meron ba kayong mga bagong plano?"

Nagkatinginan ang mag-asawa. Si Jerome ang sumagot sa tanong. "Sa ngayon ay magpapahinga muna si Sandra. Hindi muna siya tatanggap ng anumang mga projects. Pansamantala rin siyang hindi magsusulat..." Hinawakan niya ang palad ng kanyang misis. "Hon, sabihin mo nga sa kanila kung gaano ka katagal magpapahinga."

Ngumiti si Sandra at masayang hinanap ng mga mata ang kamera.

"Nine months."

Nagkaroon ng kaunting katahimikan hanggang sa unti-unting nagpalakpakan at nagtayuan ang lahat ng mga manonood.

Matapos ibahagi sa publiko at mga tagahanga ang isang magandang balita, binigyan ni Jerome ng damping halik sa mga labi ang asawa at niyakap ito. Hinaplos niya sa tiyan  at sabay silang humarap sa mga manonood nang may mga ngiti sa labi. Ilang sandaling kumaway sa lahat saka tuluyang tumalikod sa mga pumapalakpak at nakatayong tagahanga.

(END)

-------------------------------------------------------------------------------

MARAMING MARAMING SALAMAT PO SA PAGBABASA! :)