مافياا ❤️‍🔥🌼

الموسم الاول الحلقة 1

👠 الحلقة 1 👠
واقفة في المحل ونشوف معاه صباط ابيض يلمع كلو كريستال يسلب مش عارفة علاه دخلت هنا وعلاه جذبني ليه انا اصلا مش هذا النوع لي نلبسو ومنتخيلش يجي نهار نلبسو هزيتو في يدي نشوف فيه قلبتو حواجبي تعقدو عوجت شفتي لونو اسود من تحت قلبي تقبض وكشيت نسمع في صوت من ورايا
-مش للبيع
تلفت عينين يذبحو طول ووجه ملامحو مش واضحة
....ضربة قوية للباب تحل على طولو
-ريااااان
فطنت من المنام لي كنت نام فيه على صوت مرت بابا راقدة على كرشي يدي على الأرض وجهي مقابلها عضيت شفتي بغزول مرجعتش عليها
-ريان نوضي
حسيت بيها سحبت الغطاء من فوقي تلفت ليها حاطة يديها على وسطها وتغزل
-لوقتاه راح ترقدي ناس كل فاقت على صباح ومشات تسترزق وانتي مزلتي راقدة نوضي تمشي تقضي وبعدها تمشي لخدمتك راني نستنا
مرجعتش عليها تفرجت فيها كملت كلامها وخرجت قعدت في السرير حطيت يدي على راسي دخلت صوابعي في شعري تغلغلو جبدت نفس طويل وراه تنهيدة تختصر كلشي شفت من و من وقفت مشيت هزيت روب تاعي على الكرسي ايه على الكرسي لانو معنديش خزانة واصلا اذا كانت عندي معنديش واش نحط فيها نسمع في صوت الخضار تحت يزمر
-بطاطا بعشرلاف طماطم بصلة جديدة
زربت لبست الروب فوق ثياب النوم هزيت الفولار تاعي لميت شعري بيها دراهم وخرجت نجري هزيت القفة ونزلت لعندو
واقفين يقضيو النسا دايرين بيه يتغالاو لي تحكي لي تسلم لي تمضغ في العلك دخلت في نصهم ونصيح
-اعطيني كيلو من كلش
تلفتت ليا جارتنا صباح هذي معروفة عندنا هنا شوافة كبيرة ويجوها ناس كبار من كل بلاصة
صباح: للا ريان مش تستناي دورك راه كاين نظام هنا
عملتلي بيدها دزتني ورا بعدتني وانا يا ويلو لي يمد يدو عليا رميت القفة لعند الخضار و دزيتها بزوز يدين قريب طاحت
-واش من نظام تحكي انتي عليه انا اول وحدة نقضي عندي شغل يستنا فيا وانتي بعد ما نروح اقعدي للصباح كي يرجع
صباح: والله ما نتفك اليوم
وقفت ليا حكمتني بزوز يدين من كتافي جبدتني و انا حكمتها من الفولار تعها خضيتها واش نحكي طار في السما حكمتها من شعرها ونجبدها للأرض و نزل الخضار يفرق والنسا تفرق بسيف فكولها شعرها من بين يديا