👠 الحلقة 33 👠
شفت معاه بخزرة وطلعت وهذاك رجع قفل الباب مشينا وانا محبيتش حتى تشوف معاه وهو محكا حتى كلمة حتى وصلنا نزلو رجالو حلو الباب نزلت وهو مشا شوية و وقف يستنا فيا كنا قدام المشفى الخاص تاعو ضيقت عينيا وشفت معاه
حسام: هيا
-علاه جينا هنا وش كاين
حسام: علاه خايفة يكونش قصيتي شعر وحدة أخرى و ضربتيها وانا مش عارف
قلبت عينيا من كلامو ومشيت دخلنا للداخل و مشينا كلهم يحيوه براسهم كي يمر قدامهم وكاين لي يبقا يتبع فيا بعينيه وصلنا لغرفة وقف
حسام: ادخلي
-علاه شكون هنا
حسام: واحد مش حاب يشوف وجهك مكشر هكذا ادخلي
مشيت حليت الباب الفضول رح يقتلني علاه جينا هنا دخلت كان بابا راقد على السرير رحت نجري ليه
-بابا وش صار وش كاين
دخل حسام و معاه طبيب
حسام: ريان
تلفت ليهم
حسام: هذا هو الطبيب لي رح يشرف على الحالة تاع باباك
عينيا قعدو مركزين مع وجهو كأني مش مصدقة
-كيفاه يعني
-مدام حنا نقدرو نعاونو الوالد تاعك بش عالاقل يرجع يقدر يحكي و مع الوقت و تمارين يقدر يحرك يديه على الاقل
-تحكي صح ؟ صح تقدرو ديرو هكذا ؟ مش كذب ؟
-صح
كنت نخض في الطبيب مش مصدقة لي نسمع فيه عينيا لمعو بدمعة تاع فرحة ورجعت حضنت بابا وحكمت يدو
-بابا رح نسمع صوتك مرة أخرى
هزيت يدو نبوس فيها و هو حرك صبعو زدت بستو على راسو حسام و الطبيب خرجو وخلاوني معاه بعد ما قعدت شبعت منو خرجت وخليتو يرتاح الغرفة مجهزة من كلش حتى انو فيها تلفاز و قنوات و جهاز تحكم غير يحط صبعو يبدل كنت فرحانة خرجت لقيت حسام قاعد على الكرسي يلعب بخاتمو مشيت لعندو
-علاه رح تعالجو وش راك تستنا في المقابل
حسام: نظن هذي طريقتي في الاعتذار على الصباح لاني شكيت فيك
طلعت حواجبي مش مصدقة
حسام: منحبش نظلم و منحبش لي يلعب من ورايا اكتر رغم كلشي انا انسان حقاني ولكان كملتي هيا نوصلك لاني غلبت حاب نرجع للدار
طلعت في الطوموبيل بش يوصلني مزلت مش مصدقة لي دارو مع اني ممتنة لهاذ الشي بصح احساس من داخل مش مرتاحلو كيما قلت هو البحر الهايج محال يقدر الواحد يأمن ليه مشينا في طريق أخرى و وقفنا جنب بناية كبيرة درت شفت معاه
-علاه جينا هنا؟
حسام: قلت يمكن تحبي تباتي الليلة هذي ....
كان يحكي في الجملة هذي وانا أفكاري داتني لبعيد قصيت عليه
-وين نبات ؟
حسام: مع عايلتك نسمة مثلا تكون حابة تشوفك
-وعلاه جبتهم هنا؟
حسام: نظن هنا احسن من وين كانو
-وانت واش دخلك في وين كانو مش قلت انسايهم احسنلك واحسن ليهم
هزيت صبعي في وجهو نهدد فيه وهو راسم تبسيمة خفيفة
-اسمعني مليح مدخل حتى حد منهم في اي حكاية من لي في بالك راني نسمح في حقي نسكت نعمل كلشي اما كي توصل ل بابا و نسمة راني منعجبكش
قرب مني وجهو رمشت بخوف وبعدت حتى ظهري لمس الباب
حسام: تعجبيني
بلعت ريقي وانا نشوف معاه من الشر عينو لمعت من الطرف رجع بعد و شوفور باهت فيا في المرايا كيفاه حكيت
حسام: مراد اذا عجبك الحديث اتلفت هنا وشاركنا احسن
-سامحني بوس
رجع نزل راسو و هو حك خشمو ونزل الكارو تاع الشباك
حسام: مديريش لروحك قصة كبيرة من والو بعت رجالي بش يهزو باباك لقاو رجال حبو يمنعوهم يعني كاين لي حاط بالبال عليك الرجال كانو من الشرطة وعموما راني وراها هاذ الحكاية ورح نعرف شكون وشفت انو احسنلهم يكونو هنا بعيد على المشاكل
شفت معاه بصح عقلي كان مع سراج حسام كل يوم يقرب خطوة بش يكشفو وحنا مزلنا مدرنا والو
حسام: تسمعي فيا؟
-ايه سمعتك بصح لي نخمم فيه هو علاه واش تستنا في المقابل
حسام: شي علاه لازم كلشي نديرو معناه نستنا في مقابل ليه منيش انسان شرير
-اووووه صح مكش شرير علخر تاني خليني نتفكر قتلت قريب 20 واحد من يوم عرفتك ضربتني بهدلتني خنقتني درتني لوح للأسهم تاعك امرتهم يقتلوني اكثر من مرة قمرت عليا لكان صبية اه وبلا ماننسا خليتني نتعرى قدامك
تبسم وشاف مع شوفور لي رجع يكح من لي سمعو وانا كملت
-كاين شر اكتر من هكذا؟
تبسيمة وصلت لحد عينيه تقفلو معاها تبسيمتو حركت حاجة من داخل خلاتني دورت عينيا منو وهو نفخ
حسام: بفففف ظهرتي تعرفيني احسن من نفسي هههههه صح شرير مكنتش نعرف حتى قلتي انتي
خزرت فيه بطرف عين محال يكون عقلو جامل هذا بسيكوبات
حسام: بما انو حبيتي تعرفي علاه نقلك
-علاه
حسام: يمكن حبيت ندير حاجة تخليك في اخر الطريق تجي لعندي
-محال انسى الحكاية هذي
حسام: منيش مليح بزاف في حكاية نسيان هذي بصح نخمم فيها نوعدك
خلا دمي يفور من دمو البارد
-نقظر ننزل؟
حسام: تفضلي
نزل الشوفور حلي الباب وانا نزلت مشيت داخلة
حسام: الطابق الرابع سلميلي على نسمة
