بعد مرور يومين بدون اي حدث يذكر دخل مطلق لبيتهم ونطق بـ انزعاج:وش ذا الاصوات؟؟
التفت شموخ بحده:وش تبي انت قعدة نسوان
مطلق:اسالتس بالله لا احسبكم رجاجيل ؟
شموخ رفعت حاجبها بتعب:مطلق ماني رايقه لك تكفى!!
مطلق:شبلاكم !!
طلعت فرح مستعجله:ناد لي محمد بسرعه
رفع حاجبه:لا والله شرايك اجيب لكم قهوه وشاهي واسوي لكم مزاج
فرح:بسرعه نبي تاكد موعد الزواج
ناظرها بصدمه:وش خير زواج مين والناس نايمين توكم مملكين ابي اسافر !!
فرح:جدي يقول نستعجل بالعرس
مطلق مسح على وجهه:يـ ذا الجد مرات اشك ان هو الي بيتزوج
طلعت الجادل وهي تضحك من تعابير وجهه :اليوم النفسيه ماش؟؟
فرح ميلت شفتها:جدي يقول عجلو بالعرس
الجادل:مرات اشك هو العروسه
تعالت ضحكات شموخ:من الحُب كلامكم صار يتشابه!
تأفف مطلق بقرف:سوي لي شاهي بدخل المجلس ازرق ابلشني فيه وبـ عذبه هي عذاب وهو عقاب
مشت شموخ تسوي شاهي وتخصرت فرح تنتظر محمد اما الجادل ميلت شفتها من نطق مطلق اسم عذبه ودخل للمجلس :ويقولها بكل برود!!
,
عند شموخ الي دخلت المطبخ ولقت الجُود تسوي شاهي:تعالي احب راستس؟؟
ضحكت الجُود:ما راح تحبينه لكن قولي وش السبب
شموخ:كنت داخله اسوي شاهي لمطلق ولقيتس مسويه لبى كبدتس يـ شيخه
الجُود كانت بتكمل كلامنا لكن ضحكت من شافت الجادل داخله وواضح عليها الزعل:شبلاتس انتِ؟؟
ميلت شفتها ونطقت:عذبه حلوه؟؟
رفعت شموخ حاجبها:عجوز من عمر جدي
الجادل:هي حلوه طيب؟؟
شموخ:الصراحه تجنن
صرخت الجادل بقهر وانفجرت الجُود تضحك:يعمري هرمونات الحمل اغار من عجيز!
وقفت شموخ بصعوبه تسند نفسها:ياربي جوجو مو منجدتس تغارين من عذبه !
الجادل صرخت بقهر:عطيني الشاهي بوديه
طلعت الجادل وطاحت الجُود تضحك:من كان يظن ان الجادل تغار من عذبه!!
مسحت شموخ دموعها:مقدر ياخي هرموناتها تضحكني تسفل في مطلق لين تقول امين واول ماتشوفه تذوب!!
,
مجلس الرجال كان ساند راسه بتعب اثر تعبه من شغله تحت الشمس ومب طايق يشوف اي احد ونطق من اتفتح الباب:تكفين نزلي الشاهي وقفلي الباب
