بين الخطيئة والغفران 💜
💜سلمى سلومة وسميرة غد🍂
🍂الفصل 1💜
♡♡🍁 كنتي سبب رجوعي الى خالقي فصرتي جائزتي وشفيعتي يوم الحساب🍁 ♡♡
الجزء : 151
من بعد ما كالت خلاتها خالتها وخرجت تقدا شي حوايج ناقصينها.. بدلت مرام حوايجها بيجامة بسروالها طويلة وعريضة مامبيناش فورمتها ضورت فولار على شعرها مغطياه ليدخل راجل خالتها جات لعشية وجاو بنات خالاتها لقاوها ناعسة ومابغاوش يفيقوها ناعسة فبيت مضلم مغطية وعيونها دبلو بالبكا حاطة يدها على فمها كاتمة صوت شهقاتها يطلع وفودنيها غير لاوديو كيتعاود فيه ديك لهضرة كفاش قدر يديرها ويقول داك لكلام.. فين هو داك لحب لي كان كيبين ليها فين لاهتمام .. ياك كان كل صباح كيفيقها بكلمة كنبغيك.. كفاش قدر يخرج داك لكلام من بعد داك لحب كامل .. مااتنكرش بلي حتى هي كتبغيه اهتمامو وكلماتو وحنانو لمزيف خلاها تبغيه عينيها تنفخو وقلبها كيضرب.. زايدة عليها كرشها لي كتغرغر تشعل ضو لي عماها خلاها تحط يدها على عينيها مضرگاه دخلو بنات خالاتها جوج وخالتها جلسو جنبها وفوزية كدوز يدها على شعرها بعطف
فوزية : نوضي ابنت لغالية تاكلي لك شي حاجة
اومات راسها بإيجاب وتقادات فجلستها جاو عنقوها بنات خالتها وهي كتبتاسم فوق لخاطر
مروى [ بابتسامة] حبيبتي مرام توحشتك
مرام [ بابتسامة متعبة] حتى انا توحشتكم ولله
يسرى [ جلست قفازية امامها كدوز على عينيها] مال عينيك حمرين.. كنتي كتبكي ؟
غير سولتها خشات راسها بين يديها كتبكي بحرقة وتشهق حتى تخلعو عليها وكيسولو وهي كتقول والو بقات حتى تهدنت مسحت دموعها
فوزية [ كتنفي فراسها عاقدة حواجبها] لا لا بان ليا غادي نعيط على ماماك.. هي تعرف شنو بيك
مرام [ نفات براسها بسرعة وخوف ] لا لا عفاك اخالتي
فوزية [ طبطبت على يدها بحنان ] هي الى عاودتي لينا راني بحال ماماك اكبيدتي
مرام [ اومات براسها بإيجاب وسرطت ريقها] واخا غير نتعشاو ونعاود ليكم
داكشي لي كان مشات غسلت وجهها لي ولا حمر .. دخلت لصالون سلمت على راجل خالتها لي رحب بيها وكان فرحان حيت جات عندو تعشاو فجو مليء بضحك من طرف راجل فوزية والبنات كيضحكو معاها كيحاولو يخرجوها من لمود لحزن تعشاو وسالاو هزو لبنات لمانط والفراش وطلعو لسطح مفرشين لفوق والبرد كيضرب فيهم تجمعوا كاملين على مرام وبينهم فوزية.. تنهدت مرام وبدات تعاود ليهم شنو سمعت حتى كملت
مرام [ بحزن ] انا بغيت نطلق
فوزية [ كدوز على شعرها بحنان ] ولكن ابنيتي علاش ما هضرتيش معاه..؟
مرام [ هزت كتافها وبدات تبكي تاني ] شنو غادي نقول ليه وانا سمعت صوتو فالاوديو
مروى [ ميقت فيها ] ونتي باش عرفتي بلي راه هداك صوتو حقيقي
مرام [ عقدت حواجبها باستغراب] كفاش؟
مروى [ قربت عندها مقابلة معاها ] سمعي المكلخة دبا كاين دكاء لاصطناعي لي يقدر يدير اي حاجة بغيتيها [ سكتت لحضة كتشوف في مرام كيف كتشوف فيها مافاهماش] الله ياخالتي شنو ولدتي.. سمعي هاد دكاء لاصطناعي يقدر يدير تصاور ويعريهم واخا ماتكونيش نتي.. ولا يقدر يدير صوتك كتقولي شي حاجة واخا ماتكونيش نتي لي هضرتي
يسرى [ جرت مروى من گرفادتها مرجعاها لور وتوجهت هي قدام ] سمعي اصاحبتي راه دكاء لاصطناعي هو..
فوزية [ خنزرت فيهم حتى رجعو بجوج لور] سكتو عليا بجوج.. [ التافتت ناحية مرام وابتاسمت بتعاطف ] سمعي ابنتي مابين راجل والمراة خاصو يكون لحوار.. ماشي اول مشكل تفرقو حنا ماعارفينش علاش قال ديك لهضرة.. واش قالها بصح ولا غير طانز.. مرام بنتي قبل ما ديري خطوة وتهربي ليه خاصك تفهمي وتعرفي لموضوع وعلاش قال ديك لهضرة.. نتوما ما تزوجتو الا والمشاكل اتحلوهم بجوجكم ماشي صافي وقع شي غلط خاصكم تفرقو.. الى كان هكا وفأي غلط يطلقو لعالم كامل ماايبقاش مزوج.. ديري عقلك ابنتي.. وهضري مع راجلك وتحاوري معاه.. علم الله دبا كيف دايرة حالتو من ماغاديش يلقاك
سكتت مرام كضور كلامها فعقلها.. هي بصح غلطت وماكانش عليها تهرب وعلى الاقل الى خرجت تمشي عند واليديها .. خافت يكون مشا عند واليديها ويتخلعو عليها
مرام [ اومات براسها بإيجاب وتنهدت ] واخا اخالتي نقدر نبقا عندك شي تلتيام حتى نرتاح
فوزية [ ضربتها بخفة لراسها عاقدة حواجبها] كفاش كتقولي هاد لهضرة دار راه دارك حتى نتي وبقاي فيها قد ما بغيتي
*عند ناصر
فبلاصة مضلمة من غير بولة لوسط لي مضوية جالس فوق لكرسي حاط رجل على رجل.. فوق رجلو حاط يدو لي فيها لفردي.. عيونو حمرين .. حال تلاتة صدفات فالقميجة مخلي صدرو لعاري كيبان فيه دم .. امامو صاحبو لي كان مربوط فيديه والمعلق فحديدة مقلوب راسو لتحت ورجليه لفوق مشروط وملامحو ماكتبناش بدم
ناصر [ رافع حاجبو وعيونو تحولو لجغمة دم نطق بتعود تحت سنانو ] طراكس وماغتلقا ماتجمع فك... يتبع
