( UNICODE Version )
( Houd Van Je -ချစ်တယ် )
နယ်သာလန်က ကျူလစ်ပန်းခင်းကြီးတွေဆီတစ်နေ့တော့ မောင်နဲ့ရောက်အောင်သွားကြမယ်လို့ ကတိတွေထားခဲ့ဖူးတယ်။
•••••• Houd Van Je ••••••
* Prettige Dag...!
(ကောင်းသောနေ့လေးဖြစ်ပါစေ ..! ) *
မနက်ခင်းတိုင်း ကြားနေကြ စကားသံလေး..။
ဒတ်ချ်လူမျိုးတစ်ယောက်ရဲ့ စကားပြောသံဟာ ဒီလောက်နားထောင်လို့ကောင်းလိမ့်မယ်လို့မထင်ထားခဲ့ဖူးဘူး။အမှန်ကိုပြောပြတာ။
နယ်သာလန်ကိုရောက်လာပြီးနောက်ပိုင်း
စိမ်းသက်ခြင်းများစွာထဲမှာ ဒီလူမျိုးတွေရဲ့ဘာသာသာစကားလည်းပါဝင်ခဲ့တယ်။
ကိုယ့်လိုအာရှသားတစ်ယောက်အတွက်တော့ ဒီလိုတိုင်းတစ်ပါးရဲ့မိခင်ဘာသာစကားသည် တစ်မျိုးတော့တစ်မျိုးပါပဲ။ပြောရခက်ခက်..
နားလည်ရခက်ခက်လေ။
ဒီအသံပိုင်ရှင်လေးရဲ့ မျက်နှာကိုမြင်ဖူးချင်တာမို့ဘေးခြံရှိရာကိုလှမ်းကြည့်ခဲ့ပေမယ့်လည်းသေးနုပ်သောဆန္ဒတွေဟာမပြည့်ဝခဲ့ပြန်ပါဘူး။
ရှင်းရှင်းလင်းလင်းမြင်ရမယ့်မျက်နှာတစ်ခုအစား ကိုယ့်ဘက်ကိုကျောပေးထားတဲ့ခပ်ကျယ်ကျယ်ကျောပြင်တစ်ခုကိုသာ မြင်ခွင့်ရခဲ့တယ်။
ဒါ့အပြင် ဘေးတိုက်သေချာကြည့်ရင်မြင်ရလိမ့်မယ့်သူ့မျက်နှာကို စပရိန်လိုတွန့်ကောက်ထားပုံရတဲ့ ဆံနွယ်ရှည်ရှည်ခွေခွေလေးတွေက ကွယ်ဝှက်ပေးထားကြ၏။
* အဲ့ဒါ ကိုယ်တို့မြို့ရဲ့ အဖော်ရွေဆုံး
" ပန်းဆိုင် "လေ *
ဘယ်အချိန်ကတည်းက အနားရောက်နေမှန်းမသိတဲ့အိမ်ပိုင်ရှင်လူသည် သူသိပ်နားမလည်သေးတဲ့ ဒတ်ချ်ဘာသာစကားအစား အင်္ဂလိပ်လိုပဲပြောပေးတတ်ပါသည်။
* ပန်းဆိုင်..? *
ဘာရယ်မဟုတ်ဘူး ပြန်မေးလိုက်မိတာက ပထမဆုံးကြားဖူးတဲ့ အခေါ်အဝေါ်ခပ်ဆန်းဆန်းလေးကြောင့်ဆိုပေမယ့် အိမ်ပိုင်ရှင်အမျိုးသားကတော့ ရှင်းပြဖို့ရန်တက်ကြွနေလေတော့သည်။
