Unicode
အလုပ်နားခံလိုက်ရပြီးတည်းက နေချင်သလိုနေပြီး
အတိုးချအိပ်နေတာကြောင့် အလွယ်တကူ အကျင့်ပျက်သွားပြီး သူများအိမ်ရောက်နေတာတောင် အလိုက်မသိစွာ သူနောက်ကျမှ နိုးလာခဲ့တယ်။
" ဪ နိုးပြီလား
အကိုတောင် ဆိုင်သွားတော့မလို့ လာနှိုးတော့မလို့ "
" အိပ်ယာအသစ်ဆိုတော့ ညက အိပ်မပျော်ဘူးဖြစ်သွားတယ် "
"သော့ကတ်ထားခဲ့ပေးမှာမလို့ အိပ်ရေးမဝသေးရင် ဆက်အိပ်နေလေ "
" တော်ပါပြီ အကိုက အခုသွားတော့မှာလား
ကျွန်တော်လည်း လိုက်ခဲ့မလို့ တစ်ခါတည်း "
" အိမ်မပြန်တော့ဘူးလား "
" ငြိုငြင်နေတာပဲ "
" မေးကြည့်တာပါ သက်ဦးရာ လိုက်လိုက် စောင့်ပေးမယ်
မနက်စာ ပြင်ပေးထားတယ် အရင်သွားစား "
" လန်းလှချည်လား အိမ်မှာလည်း နေခိုင်းတယ် မနက်စာပါ ပြင်ပေးသေးတယ် "
ချစ်သော ပန်းကန်ကို ဧည့်ခန်းထဲ ယူလာလိုက်ပြီး
ဆိုဖာမှာ ထိုင်လိုက်သည်။
" သက်ဦး ဘယ်လိုဖြစ်လို့ ဒီမှာ လာစားတာလဲ
ခုံမှာ တင်စားလေ ကလေးလည်း မဟုတ်ဘူး "
ဒိုး အဲ့လိုပြောတော့ ချစ်သော ပါးစပ်ပေါက်နား ရောက်နေသည့်ဇွန်းကို ချပြီး ပြောလိုက်သည်။
" အကိုကလည်း... အကိုနဲ့ စကားပြောမလို့ ယူလာဝာာဗျ "
" သွားသွား ခုံနဲ့ သွားစား တူတူထိုင်ပေးမယ် "
ချစ်သော သူ့ကိုယ်သူ အလိုလိုက်ခံရတဲ့ ကလေးတစ်ယောက်လို့ထင်မှတ်မိသွားသည်။
" ကြက်ဥက ပေါ့လိုက်တာ "
အကိုပြင်ပေးထားတဲ့ အမေရိကန်ပုံစံ မနက်စာကို
စားရင်း ပြောလိုက်သည်။
" အွန်း ဆားမထည့်ထားဘူးလေ "
" ဟာ ကြက်ဥက ဆားထည့်မှ အရသာရှိမှာပေါ့
အကို ဟင်းရော ချက်တတ်ရဲ့လား "
" သက်ဦး...အကို တစ်ယောက်တည်း နေရတာကို ဟင်းမချက်တတ်ဘဲနေမလား၊ ပြီးတော့ အစားအစာဆိုတာ အရသာရှိဖို့ထက် အာဟာရရှိဖို့က ပိုအရေးကြီးတာနော် ကြက်ဥမှာ သူ့ဟာနဲ့သူ ပရိုတင်းဓာတ်ပါပြီးသား၊ အမှန်ဆို မင်းကို ကြက်ဥဘဲ ပြုတ်ပေးထားသင့်တာ ဆီကြော်စားတာတောင် လွန်နေပြီ အငန်လည်း လျှော့စား ငယ်ငယ်ရွယ်ရွယ်နဲ့ သွေးတိုးဖြစ်မယ် "
