EHS 3: His Sweetest Karma

CHAPTER 16

CHAPTER SIXTEEN

"KANINA ka pa tulala, Hillary. Ano ba ang nangyayari sa iyong bata ka?" nag-aalalang tanong ni Manang Rosa.

Umiling lang si Hillary at hindi nagsalita. Nanatiling nasa malawak na karagatan ang paningin niya mula sa bintana kung saan siya nakaupo. Inihilig niya ang ulo sa gilid at napakagat sa ibabang labi para pigilin na naman ang pag-agos ng luha sa mga mata niya.

Ilang buwan na ba siyang ganito? Ilan buwan na ba niyang hindi nakikita si Axer? Hindi na niya alam dahil ayaw niyang bilangin ang mga araw na nangungulila siya sa presensiya ng lalaking walang ginawa kundi pasayahin siya pero nagawa pa rin niyang saktan dahil selfish siya, dahil akala niya si Paul pa rin ang mahal niya pero hindi na pala. Wala na siyang nararamdaman para sa dating kasintahan dahil iba na ang pangalan na isinisigaw ng puso niya.

"Hillary, may invitation card na ipinabibigay si Elisse para sa iyo dahil binyag ni Baby Stella sa Linggo. Sana raw ay makapunta ka dahil isa ka sa mga ninang."

"Pakilapag na lang po diyan sa mesa. Salamat po," wika niya.

Tumango lang ang matanda bago umalis ng bahay. Kung hindi lang nito nililinisan ang bahay niya ay magmumukha na iyong haunted house katulad ng mga bahay na naisulat niya sa mga horror story na ginagawa niya. Pakiramdam niya, mukha na nga rin siyang zombie kaya kahit ang humarap sa salamin ay hindi na niya magawa hindi dahil natatakot siya sa hitsura niya kundi natatakot siya na baka bumalik na naman iyong dating Hillary. Noong nasaktan siya sa unang lalaking minahal.

Ngayon ay doble ang sakit na nararamdaman niya, para siyang walang buhay.

She was incomplete.

"Kung naging matapang lang sana ako at sinabi sa kanya ang totoo, siguro ay magkasama pa rin kami, siguro hindi namin nasasaktan ang isa't isa at siguro masaya kami pareho ngayon. Pero, Hillary, duwag ka kasi. Duwag ka kasi hindi mo sinabi sa kanya iyong nararamdaman mo, duwag ka kasi hinayaan mo siyang umalis nang hindi mo man lang nilinaw sa kanya ang lahat. Kung may dapat mang sisihin ay ikaw iyon kasi hindi ka naging matapang, mas pinili mong magpakaduwag at hayaang iwan ka niya." Naihilamos niya ang dalawang kamay sa mukha at pinipilit huwag gumawa ng ingay na akala mo may makakarinig sa kanya. "You thought he won't leave you, akala mo nandiyan lang siya palagi para sa iyo. Akala mo kasi hindi ka niya iiwan kasi mahal ka niya, but you're wrong, Hillary. Marunong din siyang mapagod at katulad mo, nasasaktan din siya sa ginawa mo," sermon niya sa sarili habang panay ang punas ng mga luha sa kanyang mukha.

Natapos na naman ang isang araw nang ganoon-ganoon lang. Kinuha niya ang invitation card sa mesa at binasa. Kailangan pa niyang pumunta sa bayan para makabili ng panregalo kay Baby Stella. Isa ang baby na 'yon sa mahirap bigyan ng regalo kasi wala ka nang maiisip na puwedeng ibigay. Nasa bata na ang lahat kahit baby pa ito. Mukhang papasakitin ni Baby Stella ang ulo niya sa pag-iisip ng puwedeng iregalo.

Parang ang tito lang nito na laging pinapasakit ang ulo niya noon. Pero pati puso niya pinasakit na rin ni Axer. Actually, buong pagkatao niya ay pinasakit nito.

Biglang namilog ang mga mata niya nang may biglang maalala at dali-daling naligo para pumunta sa bayan.

Checkup pala niya ngayon!

Because she was... pregnant.

Marahan niyang hinaplos ang tiyan at napangiti. Nagbunga ang ginawa nila ni Axer at hindi niya 'yon pinagsisisihan.

"YES, NATALIE, papunta ako sa bayan. Bakit?" tanong ni Hillary sa kaibigan habang nagmamaneho. Hindi niya alam kung bakit bigla itong tumawag.

"See you tomorrow sa christening ni Baby Stella."