الموت ما هو أنك تكتفن بترابك ! الموت أنك تحب حي ويفارقك

21

ريم رغم توترها: يا كثر ما يتكلم.. بس في الحقيقه هو مخلص .. صح فواز
فواز كانت عيون ملصته على صوره وحده في المجله ولا انتبه على ريم اللي تبدلت ملامحها الواثقه الى الخوف: فووواز؟؟
فواز صحى من سرحانه: هاا؟
جسار بخبث و حتى يستغل الظرف سال: اي وحده اخوي من الجميلات في نظرك احلى من ام محمد يا اخوي ..
فواز خاف من سؤال جسار الغريب بابتسامه سخيفه جاوب: مع انهم كلهم احلى من ام محمد هذي احلاهم كلهم..
جسار حرك عيونه للصوره اللي اشر عليها واللي كانت لفكتوريا .. اللي كانت فيها المديرات الخمس و جنب فكتوريا بالضبط اسماء
جسار في نفسه: حركه ممتازه يا فواز .. لكن توترك و طريقه نظرك للصوره تاكد لي شكوكي في نواف...
محمد بتافف: فواز عيب عليك هذا الكلام.. ام محمد اغلى و احلى من هالعارضات الاجنبيات ..
فواز جلس على الكنبه و ضم ريم بطريقه محرجه: انا عارف يا ابوي.. وما يحتاج انك تقولي لي.. ام محمد غاليه و حبيبه و امووت فيها لكن هذا ما يعني اني اوقف اكحل عيوني بالزين...
ريم باحراج دفعته عنها: خلك مع زينك..
ريم جت بتقوم بس فواز رجع و سحبها و طاحت في حضنه: فوووووازز!!
فواز بجرأه و ضحك: عيونه و روحه...
ريم قامت باحراج وعلى طول ركضت لغرفتها .. جسار انفجر ضحك و ابوه عصب: فواز مليون مره قلت لك.. لا تسوي هذي الحركات قدامنا.. البنت بغت تموت من الاحراج.
فواز وقف و اخذ شنطته: ما اقدر يا ابوي و انت تعرف ان هذا طبعي من كنا صغار و المفروض ريم تتعود عليه..
جسار بتاييد لكلام ابوه: بس ريم غير عن باقي البنات انت تعرف هي شكثر رقيقه و ناعمه..
فواز : انا عارف هذا الشيء اكثر منك يا جسار و هذا اللي حببني فيها..
جسار استغل اللحظه حتى يضرب الوتر الحساس عند فواز: غريبه !! مع انك كنت تقول قبل ان البنات الرقيقات ماهم نوعك.. .. وانك كنت تبي وحده مثل ايمان..
فواز تاكدت شكوكه اخيرا من جسار ابتسم وقال بهدوء: و من ظل منا على حاله يا جسار... خل ناخذ صفه الخبث كيف صارت معززه عندك بعد ما كانت معدومه قبل كمثال..
جسار توسعت عيونه على قوه كلمه فواز اللي مشى وباس راس ابوه و طلع على طول..رعص جسار على اسنانه و كان بيمشي لما وقفه محمد..
محمد ببرود: لحظه يا جسار..
جسار رجع وجلس : هلا يا ابوي..
محمد: جسار انت ولدي الكبير و اعرفك زين و مستحيل تقدر تخفي او تكذب علي فاتمنى انك تجاوبني على سؤالي من غير لف و دوران... انت سامع شيء عن ايمان؟
جسار زفر .. كان يبي يستغل الوضع لمصلحته لكن الشيء اخذ نتيجه عكسيه سحب المجله و وراها لابوه: هذول يا ابوي.. مديرات في شركه l&m و اللي يخطط نواف انه يكسر تطورها السريع حتى ما يتعارض مع مصالحه... اليوم واحنا نعرض الصور ركز نواف نظره على هذي ..( وهو ياشر على اسماء) وهي بنت متبانه للعائله و ظهرت فيها من ثلاث سنوات... انا ماني عارف ليش احس نواف شاك فيها.. مع ان البنت ما عطتني اي انتباه.. لكن من خلال تعاملي مع نواف خلال الثلاث سنوات اللي فاتوا فهمت انه انسان لا يستهان بذكاءه و لايمكن ينسى شيء حتى وان كان صغير.. فلهذا السبب كنت ابي فواز يشوف الصوره باي شكل حتى اتاكد و اظن ان شكوكي في محله..
محمد: ان كانت ايمان مثل ما تقول .. تظن ان فواز ما راح يقول..
جسار من غير نفس: انت تعرف فواز اكثر مني يا ابوي.. وتعرف بعد انه خايف عليها منا كلنا ولهذا السبب في نظره انه تكون بعيده و في الغربه احسن من انها تكون عندتا.. اللي ماني عارفه او فاهمه هو شلون وصلت للشكل هذا و للمكان هذا شلووون؟؟؟
محمد ابتسم: ايمان تسوي اللي تبيه يا جسار و مافي شيء يقدر يوقف بوجهها وهي الحين تلعب اخطر لعبه في حياتها وما اعتقد بتسمح لنفسها تخسر بعد ما راهنت بكل ما تملك فيها..
جسار رفع حاجبه بغضب: كانك فرحان؟؟
محمد ضحك : هههه وليش ما اضحك على نجاحها...
جسار: ماني قادر افهمكم.... وتتصور انها وصلت للي هي عليه بطريقه شريفه!!
محمد: بنتي وانا اعرفها...وانا واقف من انها مهما صار و مهما اشتدت الظروف لايمكن تطلع عن شيء انا ربيتها عليه...
جسار رمى المجله على الارض: نشوف يا ابوي.. نشووف..
جسار كان بيروح بس محمد رجع وقفه : جسار.. ما خلصت كلامي..
جسار كان معصب بس حاول يبتسم و يقعد: هلا..
محمد: ابي افهم انتي الى متى ناوي تاجل في زواجك من فاطمه..
جسار من غير نفس: هذا اللي ناقصني ..بعد..
محمد: خير وش قلت؟؟
جسار: ابوي الغالي.. نواف توه مكلمني بالموضوه و بصراحه قلت له كل اللي عندي.. انا متسحيل اتزوج طول ما ايمان هربانه...
محمد: بس انت تعرف الحين هي وين؟
جسار: انا صحيح اعرف هي وين لكن ما رجعته لبيتنا وهو الشيء اللي اشترطته..
محمد: ايمان ما هربت حتى ترجع وانت تعرف هذا الشيء..
جسار: هي ما راح ترجع بس ما تقدر تمنعي ارجعها بالقوه... كل اللي احتاجه هو دليل ضدها و هذا الشيء مستحيل يصير طول ماهي بعيده..
محمد: ماني فاهم؟
جسار : انا بروح مع بحجه مراجعه بعض القضايا العالقه للشركه في لندن و راح احصل الدليل ..
محمد: لندن؟
جسار: بنتك العزيزه تدرس اداره اعمال في اكسفورد..
محمد ابتسم : ما شاء الله عليها سوت اللي كنت دايما اقوله ... رغم كل حججها وانها ما تحب الدراسه..
جسار انفجر عصبيه من برود ابوه: انا اخلص من جسار و ثقته فيها تطلع لي انت يا يابوي..
جسار عطى ابوه ظهره و طلع من البيت رغم انه كان ناوي يصعد لغرفته.. محمد بهدوء اخذ المجله و تامل صوره اسماء من جديد: حتى بعد كل هالسنين الوحيد اللي يقدر يطلعك من بين آلاف يشابهونج هو فواز... اما انا اللي ربيتج ما فهمت انها انتي الا بعد ما قال لي جسار..
-
-
-
ريم جلست قدام المرايا تتامل شكلها ترفع شعرها و ترجع تنزله من جديد و تغير في لوك شكلها بس ما كانت حاسه بتغير رجعته مثل ما كان وبعدها تاففت
حركت عيونها لصوره فواز المبتسه معها جنب المرايا و بوزت وجهها: حسبي الله و نعم الوكيـل: شككتني في شكلي يا فواز...مافي داعي ابدا تتكلم عن غيري في وجودي.. بس تدري.. تكلم في غيري مو مشكله.. بس لا تسوي حركاتك الجرئيه قدام اهلك... الحين شلون بقابلهم اسبوع كامل وانت مسافر بعد اللي اللي سويته...
ريم قامت من قدام المرايا ومشت للسرير اللي رمت نفسها عليها: ما انكر ان البنات اللي في الصوره كانوا ملكات جمال.. بس انت اخترتني رغم انك كنت تختار احلى مني بكثير.. والمفروض تحترم قرارك..
تقلبت ريم و تحركت عيونها لاتلقائيا لصوره كانت جنب السيرير وهي صوره غاليه على فواز بلبس رعاه البقر المفضل له مع ايمان اللي كانت مسويه معه نفس اللبس و الحركه: على من تضحكين يا ريم.. وحده من البنات اللي كانت في المجله هي البنت نفسها اللي شفناها في النمسا البنت اللي نادها ايمان... معقوله تكون هي؟؟ رغم انها ما تشبها نهائيا.. بس جسار يقول ان فواز يقدر يطلع ايمان حتى لو كان لها توام متطابق..في الشكل والاسلوب.... بس هي فعلا ما تشبهها..اووووووف......... معقوله..
ريم قامت من الفراش على طول:معقوله يكون يخدعنا كلنا لما قال لها ايمان وهذي البنت وحده يحبها....
موبايل ريم رن الشيء اللي صحاها من ازمه الاحباط و الجنون اللي كانت فيها: الو..
ندى بصوت رقيق: مرحباا ..
ريم ابتسمت لما سمعت صوت ندى اللي ترتاح له كثير: هلا ندوووي..
ندى: ريم اسفه ان كنت ازعجتك باتصالي هذا الوقت..
ريم : لا ما في ازعاج اصلا انا كنت جالسه لحالي.. فواز طلع عنده رحله..
ندى: الحمد لله... ريم.. حياتي.. اذا ما كنتي مشغوله تقدرين تروحين معي المول؟
ريم بثقه مختلفه عن طريقتها المتردده في الماضي..: هذا كلام يا ندوي اكيد بروح معك..
ندى: ريم ممكن الحين؟
ريم تاملت الساعه وبعدها سالت: ما كأن الوقت بدري؟
ندى: لانه ضروري ارجع قبل الليل... اليوم..... شوفتي؟
ريم توسعت عيونها صدمه : ايش!!!!!
-
-
-
فاطمه كانت جالسه مع عواطف يتابعون مسلسل شافوه الف مره بتملل... لكن ماكان عندهم شيء احسن منه يسوونه.. كانوا لحالهم في البيت بما ان ديما طول الوقت عند اهلها او في غرفتها ما تطلع عندهم.. و امهم طالعه مع ابهم بما ان جلوسها معهم صاير يضايقها..
وسط جلست الملل رنين موبايل فاطمه لفت انتباه الكل : فطوم فوونك!!
فاطمه كانت متدده على الكنبه بملل و الموبايل بعيد شوي عننها:مالي نفس ارد...
عواطف تثاوبت: ما عندك حتى فضول تعرفين من المتصل...يمكن حبيب القلب؟
فاطمه تاففت وسحبت الفون من غير لا تتامل الرقم: الو؟
جسار بصوت رجولي ثقيل: مرحبا فاطمه..
فاطمه شقهت و نقزت من مكانها بقوه: جججججججسساااار...!!!!!
عواطف انفجرت ضحك على شكلها الشيء نفسه سواها جسار من ورا السماعه: هلا حبيبتي شلونج شخبارج؟
فاطمه على طول ركضت بره الغرفه اللي كانت فيه وعلى طول دخلت اقرب غرفه و سكرت الباب: بخير حبيبي انت شلونك؟
جسار بابتسامه: بخيـر دامني اسمع صوتج يالغاليه!
فاطمه: عساه دووم..
جسار بصوت كله حب: فطوم حياتي ابي اشوفج صار لنا مده بعاد عن بعض... ايشرايج نتغدى بره
فاطمه بفرح:صدقققققققققققققق
جسار: هه اكيـد.. وين تبين..
فاطمه كانت مثل عادتها بتقترح لها مكان بس قالت تهدا و تترك له القرار: اللي بتختاره انت اكيد بعجبني حبيبي..
جسـار ابتسم: اتفقنا.. عشر دقايق و اكون عندكم..اوكي.. لا تتاخرين؟
فاطمه: اوكي..
جسار: مع السلامه..
فاطمه: في حفظ الرحمان يا حبيبي.
جسار سكر الخط بسرعه و حرك بسيارته لبيتهم ، فاطمه نقزت من الفرح وعلى طول ركضت لغرفتها تطلع لها لبس بس عواطف طلعت بوجهها: خير على فين رايحه..
فاطمه: جسار عازمني على الغدا..
عواطف رفعت حاجبها: غريبه.. كذا ومن غير سبب؟
فاطمه: ما ادري عموما عن اذنك انا طالعه باااااااي..
فاطمه على طول ركضت لغرفتها و طلعت اشيك وارقى بلوزه عندها ولبستها على جنيز كحلي غامق ولبست الحزام الشوارفسيكي الكحلي و رفعت كل شعرها لورا و نزلت بس المقدمه بطريقه مايله على جنب وحطت ميك اب خفيف كحل كحلي و مسكرا كحليه و قلوس فوشي.. و لبست عباتها و المزينه بالنقوش و الكريستال و حطت عطرها المفضل مس ديور و ظلت تنتظر جسار يجي .. انتظرت و انتظرت و ما جاء لحد الحين
بعد ساعه..
ساره و جاسم دخلوا البيت يدهم بيد بعض: السلام عليكم
عواطف ابتسمت وهي ما زالت على التلفيزيون: وعليكم السلام.. ايش هالرومانسيه..
بونواف بابتسامه معتاده منه: هههه انا طول عمري رومانسي مع حبيبتي..
ساره انتبهت ان بنتها لابسه وجالسه: فاطمه؟ بتروحين مكان..
فاطمه ابتسمت لامها رغم القلق و الانزعاج اللي فيها على تاخر جسار: جسار عازمني على الغدا بره..
ساره استغربت بس بعدها ابتسمت لها: ماشاء الله وين؟
فاطمه: ما ادري والله بس كل شيء من جسار حلو..
بونواف: الله يخليكم لبعض.. فاطمه ما اوصيك ما ابي تاخير..
فاطمه هزت راسها له: ان شاء الله..
ثواني الا جسار متصل و قبل لا ترد فاطمه ببرود قال: انا بره..
وسكر الخط على طول قبل حتى لا تقول باي..فاطمه ابتسمت بتصنع و مشت: مع السلامه..
رغم ان فاطمه طلعت الا ان الجو المنزعج ما ترك البيت ساره على طول التفتت لعواطف: من متى وهي تنتظر؟
عواطف: من عشر دقايق
ساره بنظره عدم تصديقيه: متاكده انها عشر دقايق..
عواطف حركت وجهها لبعيد وساره على طول فهمت ان فاطمه تنتظر من مده استغفرت ربها و دعت ان الطلعه هذي تكون بدايه خير على الاثنين..
من جهه ثانيه فاطمه ركبت سياره جسار البي ام دبليو وجلست جنبه : السلام عليكم..
جسار التفت لها و نزل النظاره حتى يعطيها نظره ساحره: وعليكم السلام ... هلا وغلا بحبيبتي ...تاخرت عليج؟
فاطمه ابتسمت بتصنع لان اخر كلمه قهرتها وقالت حتى ترضي غرورها: لا ابدا اصلا انا توني خالصه..
جسار ضحك: ههههه اجل صدق اللي قال لي فاطمه عطتها موعد قبله بساعه..ههه
فاطمه ابتسمت رغم انها كانت مقهوره منه ..محامي و مستحيل تقدر تغلبه في الكلام.. جسار فهم انها قررت تختصر الموضوع فاخذ السيدي ودخله حتى يبدأ جوله ثانيه من ضغطها ... و اشتغلت اغنيه لعبدالحليم..