لا تحكم بالغيب

حماتي أخذت لي حقي

💕أنا تزوجت زمان وأنا عمري ١٤ سنة وبعد زواجي بسنة جبت بنتي الأولى وبعدها باقي أطفالي ، لما كبرت بنتي تزوجت في عمر ١٨ سنة وما شاء الله بعد زواجها بسنة جابت ولد وصرت جدة وأنا عمري ٣٤سنه .. لكن مهتمة في شكلي ومظهري وكل اللي يشوفوني ما يصدقو اني جدة ، وكثير لما يشوفوني مع بنتي يحسبوني أختها ... وكل اللي حولي دايم يحسسوني اني ووش زيني ، الا شخص واحد اللي هو زوجي دايم يحطمني ، ومن بعد ما صرت جدة وهو ما على لسانه الا كلمة وحدة .. راحت عليكي وراحت عليكي ، كنت دايم أقوله وانت كمان جد لا يكثر بس .. لكنه مصمم وشايف ان هو رجال عادي ما يعيبه شي ..
ودايم يهدد انه يفكر يتزوج ، وأهدده ان لو تزوج يطلقني وياخذ عياله يربيهم مع اللي بياخذها ....
الزبدة في مره كنا عند بيت أهله جالسين وبدا يمزح قدام أمه وقال لها يمه خلاص فلانه كبرت وصارت جده وش رايك تخطبين لي وحده صغيره ؟ .. ردت عليه أمه أبشر يا وليدي باخطب لك ، صدمني ردها في البداية بس بردت حرتي لما كملت كلامها وقالت له ، بس عاد لازم تطلق فلانه لان يوم رحنا زواج بنت عمك شافوها ناس وانهبلو عليها يقولون جمال ورزة وأناقة وأخلاق .. ويوم قلت لهم انها متزوجة زعلو ، يقولون ان هم كلمو ولدهم عنها ووصفوها له والولد تعلق فيها ما يبي غيرها ... وخلاص يا وليدي روح انت تزوج وخليها هي تشوف نصيبها مع واحد مزيون يقدرها ويقدر جمالها مو يضيع عمرها مع واحد فوق صبرها على خياسه يحك كرشته ويقول كبرتي أبي أعرس عليك ... يوووه لو تشوفو شكل زوجي بعد كلام أمه صار يبيها بس تسكت وجن جنونه يبي يعرف من الرجال اللي يبي يخطبني وهي تقوله بتعرفه يا وليدي يوم عرس فلانه ( انا ) عليه .... وهو يعصب أكثر ما يبيها تقول اني باعرس ، وأحر ما عنده أبرد ما عندها .... الله لا يحرمني منها عمتي اول ما طلع زوجي لا شعورياً قمت أبوس راسها ، بعد ما عجزت أقنعه ردت لي حقي في دقايق ... وأبشركم من يومها ما عاد جاب طاري العرس ولا سمعت منه كلمة كبرتي ، بالعكس صار خايف اسحب عليه واروح أعرس على المزيون .... أم زوجي لا عدمتها من أعظم النعم في حياتي الله لا يخليني منها ....... #انتهى

رووووعه الله يجزاها خير صلحت مابينهم

كن واثقا بالله وثق بنفسك ولا يعنيك اراء اقرب الناس لك ابقى متألقا بجمالك وجمال روحك واناقتك واسلوبك واخلاقك كل هذا يعكس شخصيتك 👍🏻👍🏻