الراصد

الختام

توقفت معك سيدي القارئ الكريم عندما  ذهبت مع الشيخ محمد لسوهاج و جلوسنا مع محمد الجزار الذي يحكي قصته،ثم قرار الشيخ محمد الذهاب لبيت محمد الجزار.

مشينا، لكن لما قربنا من البيت سمعنا صراخ جاي من البيت ، فتح أبو محمد بسرعة و لقينا في الصالة حاجة محدش فاهمها أو متوقعها.

معلش في اللي هقوله..

لقيت العيال بيجروا في كل مكان و بيجري وراهم محمد، بس مش ده محمد، بيجري علي أيديه و رجليه زي الحيوانات و عمال يتكلم لغة مش مفهومة.

و لقينا أم حربي عريانة خالص إلا من لبس خافي عورتها، و عمالة تقرب من العيال و عينيها شاخصتان و حمراء أنا نفسي خوفت .

الشيخ محمد قال : أبو محمد خد المصلاية و فرش الكنبة و كتف بيها أم حربي، و أنا هاجيب محمد جنبها و اشتغل، باسم العهد موجود في الصالة افتكر كل اللي سمعته و شفته و ركز هتلاقيه بس خلي بالك حراس العهد هيمنعوك، هيؤذوك، هيشتتوك، هيرعبوك، اتمسك بايمانك و هتنجح.

راح منصور و معاه الفرش و قدر يحوطها و يغطيها، لكنها كانت بتقاوم، جه الشيخ و قعد يقرأ القرآن، لكن محمد لقيته وقف علي حيطة البراويز و عمال يتكلم و أنا مش فاهمه.

كانت عينيه حمرا و لقيته مسك البرواز الأول و يبص منه عليا و بعدين يرميه عليا، يمسك التاني و يرميه عليا و الجو يسخن، يسخن، يسخن.

فجأة لقيته نط عليا لولا اني بعدت كان ممكن يموتني.

قربت من البرواز الكبير و لقيت قرون الكبش، كل ما أقرب أيدي أحس البرواز يبعد و الجو يسخن.

مسكت القرون، كانت مربوطة بحبل، حاولت اقطعه،سمعت صوت الشيخ من ورايا بيقول : لا يا باسم، مش هو ده العهد، العهد في الحمام.

اصريت اقطع الحبل، و الحرارة تزيد لدرجة كبيرة،و سامع صراخ و حسيت بمحمد يشدنيي من بطني.

لكن قطعت الحبل، كان دايب محتاجش سكينة ولا حاجة.

لقيت محمد و أم حربي و العيال اغمي عليهم، و أنا و الشيخ و منصور كنا عرقانين بطريقة صعبة.

أبو محمد فوق اهل البيت و طلب الشيخ طشت  (وعاء كبير من النحاس أو الألمنيوم ) و حط فيه خشب وولع فيه ،و رشيت مسك و ميه كتير حوالينا و علي الحيطان و عتبات الاوض.

قلنا انا و الشيخ : الفاتحة و الرقية الشرعية و الجن و المزمل و غيره. و بعدين شاور لي الشيخ اسكت .

قال الشيخ بصوت جهور : كله اللي هقوله أهل البيت يرددوه ورايا:.

بفضل الله تعالى و كتبه و ملائكته و رسله كشف أمركم، بفضل الله و بركاته كشف أمركم، فلتنصرفوا يا خدام العهد، فلتنصرفوا يا منفذي العهد، فلتنصرفوا الآن، فلتنصرفوا و اتركوا عمار البيت في سلام، فلتنصرفوا و تتركوا آل البيت في أمن و سلام،فلتتركوهم، فلتتركوا آل البيت من جن و أنس في أمن و سلام، ألله إذن لكم أم علي الله تفترون؟ ألله إذن لكم أم علي الله تفترون؟ أعوذ بكلمات الله الكريم، و بعرشه العظيم، و سلطانه القديم، و بكلمات الله التامات التي لا يجاوزن بار ولا فاجر من شر، ومن شر ما يعرج فيها ،و من شر ما زرء في الأرض، و من شر ما يخرج فيها، و من فتن الليل والنهار و من طوارق الليل والنهار إلا طارق يطرق بخير و من جنود الرحمن، بسم الله أصبحنا، بسم الله أمسينا، انصرفوا الساعة الساعة، انصرفوا الوحي الوحي.

صوت صراخات و التعابين و الفران اللي بقرون  اللي بتدخل في فلق(شق) في الحيطة ،إعداد رهيبة، رمي الشيخ محمد القرون في النار، و كملت أنا : و اتبعوا ما تتلوا الشياطين علي ملك سليمان و ما كفر سليمان، لكن الشياطين كفروا يعلمون الناس السحر و ما أنزل علي الملكين ببابل هاروت و ماروت.

عيتها سبع مرات، الأصوات تعلي و الفلق في الحيطة يتقفل كأنه مش موجود، أنا وقعت في الأرض من التعب و سمعت الشيخ محمد بيقول : الاوضة بتاعت عطيات و بتاعت جميلة مع الفجر يتحفروا و تلموا عضم القطط والكلاب و البني آدمين و تحرقوها، باسم هيبقي لحد ما تخلصوا علشان يكب  (يسكب) الملح في الحفر،لو محصلش النهاردة كلنا هنموت و هيتعمل عهد العن من الأول.

بعد الفجر كانت كميات عضم كتيرة بتطلع و تتحرق و رشيت الملح،و جه راجل سد الحفر بالاسمنت.

مشينا أنا و الشيخ و كملنا حياتنا عادي جدا.

كده أنا خلصت لغاية ما بقي عندي 16 سنة أو بمعني أدق17 /6/2010.

أظن كفاية لحد كده. أنا مبحبش النهايات المفتوحة، بس القادم أسوأ و أفظع سنوات حياتي.

الشيخ محمد مات، امي ماتت ، مش هتكلم ماتوا ازاي و ايه اللي حصلي من ذلك ولا إيه سبب ذلك حتي. أو الناس اللي عرفتها من بعد موت الشيخ محمد من سحرة و شيوخ و قساوسة.

الحزن بقي ما يبعدش عني، اتأذيت كتير.. لكني ما زلت اعالج حالات فقط، بطلت السحر و الأعمال و غيره.

بس مهما حصل، إياك سيدي القارئ الكريم البعد عن الله، مسلم كنت أو مسيحي أو يهودي.

اتمسك و استعن بالعزيز الجبار البار التواب الرحيم.

الله جل جلاله

منتظر تعليقاتكم و نقدكم.