زمن القلوب الحقيرة

البارت الثالث

زمن القلوب الحقيرة
علي البدر
البارت الثالث
.....
.....
هكذا هي الحياة قاسية لايمكن تجرع مرارتها ....حتى ونحن في احضان اهلنا نشعر بالرعب ليل نهار ..

...لايمكن لك ان تتنفس ثلاث مرات متتاليه في الثانية ....
اصبح كل شي مرعب في وجود ابي كنت انتظر اللحظات التي اسمع فيها خبر موته .....
.....
....
....
بقه اخويه صافي مربوط عالشجرة للصبح وكلنه كاعدين مانمنه وكلما نحاول نحاجي ابوي نخاف ونرتعب.....
لان ابوي قرر ينام كباله خاف واحد يحن كلبه عليه ويدزله خبزة او ماي ....وكالنه اي واحد يتجرا ويحن كلبه عله هالجلب هذا ينربط وياه
.....
.....
بقينه مانعرف شنسوي واني اشوف صفاوي من بعيد يتلوع عمت عيني من الوجع ....
كلت بكلبي ريتك انته بمجان صافي ولا هوه ...وجنت اقصد ابويه...

قررت اختي زينه تحاجي ابويه ....وكالت شيصير خل يصير خل اقلها احاول وياه
وبالفعل راحتله ........

بويه فدوة لطولك خطيه صافي راح يموت .والله خطيه كلبي نمرد عل......

...وبعدها ماكملت حجيها....
خبزها ابوي براشدي فرها بمجانها ورجعت تبجي وتركض...وتصرخ اخ يايمه ابوي شرم اذني .....
....
....

لحينه كلنه ععله امي وضلينه نبجي ونترجاها  وحرمصنالهه وتوسلنه بيها بس تحاجي ابويه....

بالفعل راحت امي وحجت ويه ابوي....
ابو زينه والله انمرد كلبي والليل مانمته كله
واكفه بباب المطبخ واتنوع لصفاء شلون رابطه ....

تدري انت رابط كلبي عالشجره شوف شلون عيوني ورمت من البجي فدوة لطولك ارحم حالي وارحم اولادي.....

وبالفعل امي قنعت ابويه وفكه من الشجره وطببته جوه  بعد ما خلص ليله كامله مربوط بدون ذنب .....

اخذته امي بحضنها وضلت تبجي وتكله يمه سوده عليه شسوه بيك ابوك كله من وره هاي الوكحه حنين .

ردعليها صفاء
لج يمه شجاي تحجين شنو من وراها بالله فشخت الها واحد هيج تكتلوها وتضربوها يمه هاي طفله حرام هيج ......

انتي واكفه بصف ابوي لا تحركتي لاصحتي لا حجيتي

شنو تخافين ماتحاجينه مااجرينها من جواه ماتخافين تموت وهوه يضرب بيها .

جنت نايمه بفراشي مركوع الف ركعه وبطانيتي مال جيش ومغطيه راسي وسمعته شلون رد ع امي .....
وكتها بجيت وكلت
الله حرمني من حنية ابوي وعطفه وعوضني بصافي وخوفه علينه وحبه النه...

  فدوة الك انه يبعد اختك وطلعت من جوه فراشي وحضنته وبجيت .وشميته وبست ركبته وانه طفله بحضنه ....
حسيت انو صافي هوه ابوي ...شسوي اصلا بابو شابعني دك وكتل ....
ماريد ابوي يكفيتي صفاوي .....

ضليت ابجي وحاضنته وشابكته وهو عمت عيني هم بجه وكالي ....

ولج حنونه اسكتي ولاتبجين اني اخوج وبعد ما اخلي ابويه يكتلج .وكل مايريد يكتلج انه اصير كدامه وخل يكطعني تكطع ميخالف المهم ما شوف دمعاتج يبعد كلبي....

جانت سوالف صافي كلش حلوه ماسامعته من احد حته امي الاحبها وتحبني وتموت علينه جانت تبخل علينه بكلمه الحنية..

مسح دموعي بيده وباوع لعيوني وابتسم رغم كل الشافه وصارله بسببي
كتله والله صفاء مادري وضربته . ولو ادري هيج يصير ماطلعت للشارع ولالعبت ولا شي
ضحك وكال يالله نتريك لان جوعان...
عمت عيني عليه ليله كامله مجتوف وبسط اكيد ميت من الجوع.. .
شويه التمينه كلنه عالريوك اني وصفاوي واخواتي وامي ...بس ابويه ماتريك ويانه وبقه زعلان عالكل
مر اسبوع كامل وجو البيت متوتر والكل داخل انذار  وابويه مايحجي ويه اي شخص و مجرد يجي من الشغل الكل يقطع النفس ومحد يتجرأ حته يسلم عليه جان ابوي اقسى شخص شفته بحياتي وجنت احسد امي شلون متحملته .....
.....
.....
جان يمارس ويانه اقسى انواع التعذيب كل فنون الجيش طبقها بلبيت وجان صارم وحاد لابعد الحدود...

.ومشت الايام وبقت وياها قسوة ابوي الماتغير طبعه ابدا  وبديت اني  اكبر شويه شويه بس ماعرف شي من الدنيا لان ابويه زرع بيه الخوف والرعب ...

ومن ذاك اليوم اللي انربط بيه صافي بالشجره ولحد هاليوم ابوي جان يكرهه كره شديد ويتعامل وياه تعامل قاسي ومايعتبره ابنه نهائيا

وجان يحب يشوف صافي متلوع ومتعذب صار تفكير ابوي شلون يكسر خشم صافي وشلون يذله بينه اولا وبين جماعته ....

مره من المرات جنت كاعده بالغرفه وسمعت الباب اندك...
طلعت اشوفه منو ...وشفت ابويه راح فتح الباب وسمعت الحجي الصار....
السلام عليكم شلونك عمي....
هله هله رد عليه ابوي.....تفضل شتريد
عمو اني صديق صفاء وجاي اشوف علمود نطلع سوية ...
انصدمت من رد ابوي كلش وكرهته...
وكاله.......
....
.....
ابني انت ابن اوادم ومحترم وصفاء ابني مخربط وطايش والله اذا تمشي وياه يخرب سمعتك وانه مانع عليه الطلعه ....
واذا تطلع وياه تتحمل شيصير لك وماتجيني انت واهلك تعاتبون ...
.هاي انه كتلك ابني سرسري واعرفه....
رد عليه صديق صافي....
لا لا عمو هاي هيه براحتك انه اترخص وبعد ما اجي ولا تكرب يم صفاء
في امان الله....
.....
.....
جنت واكفه وشفت بعيني شلون رجع ابويه من الشارع واحسه مبتسم كأنما منتصر عله عدوه ...
هسه معقوله اكو اب هيج يعامل ولده...
زين وين حنان الاب النسمع بيه بالمدرسة....
اني من الاول ابتدائي وهسه بالثالث كل درس بهاي السنين يكلونه احترموا والديكم ولاتقصرون برعايتهم ... اذا كبروا ....
جنت طفله وحاقده عله ابوي ومامسامحته وحته بالدراسه كلشي يتحدث عن الاب اكرها ...
لان ماشفت شي من ابوي يخليني احترمه او احبه او حته اعطف عليه ....
جانت هاي كلها بداخلي السوالف بس ما اكدر افجرها واحجيها لان اذا حجيت راسي يصير مدكه مال ملح.....وابوي يجرم بيه ....واكتفيت بالحقد بداخلي واقسمت واني طفله ماراح اسامح ابوي عالسواه بيه....
يتبع