زمن القلوب الحقيرة

البارت السابع

زمن القلوب الحقيرة
علي البدر
البارت السابع
....
....
مرت ايام واحنه ندور عله ابوية ومالاكينه ماخلينه مجان مادورناه بيه ....وجنه خايفين خاف ابويه مات او صارله شي ...
جانت امي اكثر وحده بينه قلقانه عله ابوية وكلساع دازة صفاوي يدور عليه ....
...
...
اختي نغم جانت اكثر وحده بينه حاقدة عله ابوية وجانت تدعي عليه ليل ونهار ...
وحته امي تتعارك وياها وتكلها مهما صار هذا ابوج...
...
...
هذا لا ابوي ولا اعرفه ولاريد اعرفه وان شاء الله يموت وحته جثة ماتلكولة وتاكلها الجلاب...ومن تسووله فاتحه والله البس ابيض ولا احزن عليه لحظه....
ردت عليها امي

وج انتي شنو من بشر من ياملة وج هذا ابوج...

يمه الله يخليج يا ابوي اذا نسيتي شسوه بيه انزعلج الحجاب حته تتذكرين شسوه ....لو اطلعلج اثار الصوندات بضهري ....
اكرها وماريده وشوفته كلها ماريدها.....
ردت عليها امي ..
عوفي هذا الحجي عنج وروحي جيبي مسواك وسوولكم غده احسن من الخرط هذا
....
...
اخذت الجنطه وطلعت وانه متضايقه من الحجاب ومو متعوده عليه بس من ورة عملة ابوي السواها بيه صرت مجبورة البسه....
وانه امشي بالشارع جنت احس الناس كلها تريد تصيحلي ام كرعه ..
نفسيتي كلها تعبت وصرت ماطيق اي احد ...كلبي مقبوض وعيوني حمر من كثر البجي....
مريت عله جامع شوية قريب من الاسواق اللي متعودين ناخذ من عدها .....يعني تصير الاسواق مقابيل الجامع واني اجيت من يم الجامع لان ماكو ازدحام.....
توني اريد اعبر للاسواق من جهة الجامع ......
سمعت صوت وراي ينادي ....
ام كرعه ذبي حجابج خل العالم تشوف عقوبة التعصي ابوها وتفتن بين اخوتها.....
التفتت ولكيت ابوي بركن الجامع حاط فراشة وبطانيته ونايم ...
من شافني كعد عله حيله وكالي.....
وين تروحين مني الا اخلي موتج عله ايدي وشنو حسبالج اعوفكم لا والله الا احرككم حرك وهذا اخوج صافي الا اراويه المررر....
...
...
رجعت اركض للبيت وحته ماتسوكت ودفرت الباب وطبيت اصرخ....
ورحت اركض لامي....
يمه يمه ابوي كاعد يم الجامع وشافني وكال وين تروحين مني الا اكتلج....
...
...
صاحت امي عليه ....
حنين ...حنين جيبي عبايتي خل اروح لابوج اشوفه....
صار ضنوات اني ماشفت امي متلهفه عله ابوية لهالدرجه ....
بسرعه امي نست كل الضيم والسب والضرب والبسط والشتم....
بسرعه رادت تحل كل الازمه وتقنع ابوي وتجيبه للبيت....
عرفت وكتها كلب امي الحنين المايشيل حقد .....بالوقت اللي جنت حاقده عله ابوية جنت بس امي كل يوم احبها واحترمها اكثر ...لان مقابل كل هالقساوة من ابوية جانت الرحمة والحنية من امي....
....
....
اخذت امي عبايتها وراحت تقنع ابوي يرجع للبيت.....
.....
....
لبست عبايتي وطلعت وانه ادعي ربي كون يرجع لبيته وعياله ....شتكول عني الناس شامرة رجلها يم الجامع يتصدق عليه الرايح والراد ..
ياهو التحجيله ويصدكك ياهو التكله ترى شالع كلوبنه ويعاقب اولاده وصاير عليهم نايب عريف.بالجيش....
شما احجي للناس مايصدكوني....واذا مارجع لبيته راح العالم تشرنه عالحبل.....
وصلت يم الجامع وتنوعت لركن الجامع الكالت عليه بتي نغم ...
وصدك شفته ..
وحالته تحزي حاله حال المجادية النايمين بالتقاطعات ويم اشارات المرور ....
تدنيت منه وشافني ....وكبل لا احاجيه ....
زمخ وصرخ بوجهي...
وين اولي منكم ماتكلولي شنو انتم ماتحسون ...ماتخلون واحد يرتاح بحاله الله اكبر منكم ....الله اكبر منكم...
وطلما اريد احاجيه يزيد بالصراخ وخفت العالم تتجمع وماعنده مانع يفضحني كدام خلك الله....
....
....
حاجيته بصوت ناصي وكتله...
افاا عليك ابو زينه ...
نايم هنا وانت بيتك موجود وعامر تعال يم بيتك واولادك وكل مشكلة والها حل...
رجع لاسلوبه وظل يصرخ...
البيت ماريده خليته الج انتي واولادج ....
مو اشتكيتوا عليه بالسجن ....مو نمت لليله بالتوقيف ...مو ذلوني بالتحقيق بالفرقه الحزبيه بسبب اولادج ...
شوفي اكلج كلمه وروحي منا عني ....لو اخر يوم بعمري هم صفاء ونغم اذيحهم واشرب من دمهم ....
وهسه جايتني تريد ترجعيني حته تسمميني انتي وياهم وتتخلصون مني مو ....
امشي منا لا الم عليج امة الثقلين....
....
...
رجعت للبيت وجنت مصرة ان يرجع ابو زينه لان اذا بقه بالشارع راح الناس تاكل كلبي وراشي وميدرون بسوالفه وعمايله السودة وي اولاده ...
بس شحجي وشكول الناس ماتصدك ولا راح تصدك...
رجعت وبوجهي رحت لصفاء وكتله ....
يمه صفاء تروح لبوك وتقنعه يرجع وباسرع وقت وماتجي الا انته وياه....
...
...
يمه ابوي مايريد شوفتي ولايريد يسمع صوتي شلون اروحله .....صدكيني ماراح يجي....
يمه صفاوي روحله بلكت يقنع ويجي وياك....
....
...لبست بنطرون وتشيرت ومشطت وطلعت للجامع وبالمجان الكالتلي عليه امي لكيت ابوي...
السلام عليكم بو.....
كاطعني وكالي ....
لبوية حتينه لبوية التنام ببطنك انه لابوك ولاعرفك ولاريد تمرني ولاريد اشوفك وطيح الله حظك وحظ تربيتك شامرني بالسجن وهسه شامرني بالشارع وتريد تاخذني لاهلك حته تموتني انته وامك واخواتك.....
تروح منا لا الم الدنيه كلها عليك واكلهم جايني يهددني يالله ماريد اشوف خلقتك الزفرة ...وكل لامك اذا ودت واحد بعد عليه املص اذاناتها ...
عوفوني ولحد يكرب مني لان ااذيكم وانعل والدي والديكم....
ويالله امشي منا واطيني عرض اجتافك وتشوف ذولك الحزبيين اليفترون اذا اشوف جهرتك بعد ...اكلهم هذا حرامي وجاي يبوكني ...

....
...
رجعت وانه محتار بوضعية ابوي ....شفته مايكدر يعيش بهالمجان ووضعيته الصحية ماتسمحله ....هو متعود نغسل ملابسه واكله يجي جاهز .....شنو هالذله الاختارها لروحه ....
رجعت للبيت وشفت حجي مكي جيرانه احترمه كلش واقدرة ويقدرني وكل يوم من يطلع يرش البرة اكعد يمه....
سلمت عليه بكل حرارة وحب ...
السلام عليكم حجي مكي شلونك شلون صحتك....
مارد السلام حجي مكي واكتفه بجلمة هله واصلا حته مارفع راسه وباوعلي واستمر يرش ماي واتعمد يتلف ملابسي ....
استغربت كلش من تصرف حجي مكي وياي بحيث انكلب ١٨٠ درجه عليه ....
ماحاجيته كلت يمكن ضايج من فد شي ....ودخلت للبيت....
طبيت للبيت ولكيتها هدوء وامي ساكته ولاتتنفس ...
ها يمه شكو ....
لايمه ماكو شي ...مارضه ابوك يرجع
لايمه مايرضه ولارح يرضه عالشفته ....
بس انتي شبيج
.....
...
يمه ابوك ياهو اليمر عليه من الجيران اشتكاله وكاله اولادي التعبت عليهم وربيتهم ذبوني بالسجن وبهذلوني ومن طلعت من السجن بكفالة طردوني من البيت....وهسه ماعندي مجان انام بيه غير هالجامع الوذ بسده
....
...
يمه صفاوي كل الجوارين يدعون عليه واليوم جم واحد بواحد اجاني يفرغ ضيمه براسي ويكلي وصلنه اخر الزمن .....هيج تعاملون الاب اللي تعب وربه واشتغل ....الله لاينطيكم
  ومو مصدكين  كلشي احجي الهم واقسملهم بحبيب الله هوه بكيفه طلع ومحد مصدكني .... ياربي شسوي انه بجاه حبيبك محمد اخذ عمري وخلضني من هالعذاب العايشته بجاه حبييك محمد....
...
...
يمه كولي يالله وكل مشكلة الها حل وهسه كم يوم اتوقع يمل ابوي ويجي بوحده...
يمه هسه عرفت حجي مكي جيرانه ليش ماسلم عليه يجوز هم شاكيله ابوي....
...
...
يمه صافي ....
حجي مكي اول واحد اجاني وحجه حجي وعصب وذب عكاله وجماغه وكال ...
ادري مافكرتوا بهالرجال الجبير شلون يعيش يم الجامع منين ياكل منين يشرب محد فكر بيه ...
بس ماكول غير الله ينتقم منكم كلكم....
...
...
يمه صافي ابوك كدر يقنع الناس انو هو مو مذنب وذب الصوج كله بيكم ...
ا...
....
...
زين يمه شنو الحل.....
ماكو حل صافي الا نخابر خالك كنعان من البصرة ويجينه.....
يمه وخالي كنعان شيجيبه من البصرة لكركوك خطية والله
.....
....
لا يمه صافي لازم يجي خالك مادامها بعدها باولها...
يتبع