تَلَقّيْتُ من العذاب ما يكفي

part 30

*عند معاذ* بقيت كنتسنا انا و ريان شي 20 دقيقة شوية وهي تخرج خليتها مع ريان و دخلت للطبيب معاذ: واش هدرات معاك الطبيب: للاسف لا عييت منهدر مي والو هي بقات جالسة كتشوف فيديها كنظن خاص اول حاجة ميبقاوش فيها دوك الاثار ديال الضرب حيت محدها كتشوفهم كتحس براسها مزال عايشة داك الوضع واخة تشوفها كضحك معاك هادا مكيعنيش انها نسات حيت محد ديك الزروقية لي فيها و الشعر لي معندهاش راه كيأثر عليها كنفضل تعالجولها داكشي و حاول تخرجها تبدل الجو و اهم حاجة انها تحس بالامان معاذ: اوكي دكتور ميرسي الطبيب: هدا واجب خرجنا و ديناها عند طبيب ديال الجلد شافليها ديك زروقية و عطانا واحد البومادة و شافليها حتى راسها حيت كان فيها شي جروح عطانا الدوا و قاليا بلي غير غادي يبراو دوك الجروح شعر غادي يبدا ينوض دبا دازت 2 سيمانات كل نهار كنخرجها و بعد المرات ريان معانا ديك زروقية مشات و حتى دوك الجروح براوليها الحمد لله مي الحد الان مانطقات بحتى كلمة و بعد المرات كتنوض تبكي فالليل اليوم فالصباح عندها موعد مع الطبيب النفسي كنتمنا تهضر حيت خاصني نفهم بزااف دالحوايج *عند ليلى* الطبيب: صباح الخير ليلى انا: الصمت الطبيب: فخبارك أ ليلى بلي نتي محظوظة عندك اخ كيخاف عليك و مستاعد اضحي بكلشي باش يشوف ابتسامة منك و يسمع كلمة خويا ولا حبيبي لي مولف يسمعها منك فخبارك مستاعد يتحدى باباه على قبلك (معاذ هو و ريان عاودولو gاع داكشي لي عارفين) و هادشي كامل حيت كيبغيك مي نتي بانلي بلي gاع مكاتبغيهش حيت هو مستاعد ادير بزاف دالحوايج على قبلك مي نتي ممستاعداش حتى تنطقي كلمة وحدة لهاد الدرجة مكايعنيلك والو انا: هئ هئ لا انا كنبغيه