صفقة عمل 🤭غيرت حياتي ♥ *کاملة*

💕الحلقة ثلاثة و خمسين💕

بعد ليلة بارح لي كانت كابوس بالنسبة لسيف ..
ناد صباح بعد على الين و هبط تحت لصالون دار قهوة ليه و لالين و بقا يشرب فيها و هو يطل من تاقة نتاع صالون و تخماموا لبعيد ..
نوروحوا عند الين لي نادت شوية مور سيف و ملقاتوش حداها ..
هبطت في دروج غير شمت ريحة قهوة رتاحة نفسيا ... رجعت طلعت فوق دوشة و لفت شعرها بفوطة و هبطت تحت حضناتوا من لور هو دار عندها و حضنها ..
سيف : صباح خير
الين : صباح نور كي صبحت
سيف : لاباس و انتي ..
الين : كي راك مليح راني مليحة ..
سيف : هيا روحي تشربي قهوة دك تبرد
الين : اوك

راحت الين دجيب قهوة .. غير ولات لقات احلام في حضن سيف و تبكي و حداها كابة
حطيت كاس و رحت نجري ليها
الين : واش بيك احلام
احلام :ماما متحبكش يا سيف بصح انا تعلقت فيك منقدرش منديركش خويا .. يا سيف انت هو خويا .. خلوني معاكم منروحش منا . ماما مهيش حابتكم في دارها و انا قتلها اذا مكانش سيف انا منكوش ..
سيف : شوووو خلاص خلاص روحي للبيت ريحي و كي تنوضي نهدروا ... الين ديها لكاش بيت ..
الين : اوك .. احلام رواحي معايا ...
راحت احلام و هي تبكي و تحكي مع الين
احلام : بارح تناشعت معاها قاتلي شحال من عام و حنا مخبيبن و كان تهدر عادي كي قتلها علاه قاتلي كنت حاملاتوا فوق طاقتي غير في وجه باباك ..
الين:  خلاص حبيبة ..
احلام : بارح كي هدرنا دخلت للبيت قلبتها من بعد تغاشيت و لحقت للسبيطار غير فطنت هربت منوا ديراكت للدار جبت قشي و جيت عندكم
الين : درتي خير .. انا اليوم يجيبولي صوالحي من داركم
احلام : سمحيلنا الين .. معشتيش حياتك نيشان بسبابنا .. ملي دخلي حياتي كأنك فتي على مشاكل سمحيلي و الله مش بارادتي
الين : لالا واش هذي هدرة ياك انا كي ختك منقبلكش تهدري هكذا هيا رقدي نتي و انا دك نطلع فاليزتك ...
احلام : اوك
راجت احلام رتاحة و الين طلعتلها فاليزتها و فرزتهالها   خرجت راحت للكوزينة بدات دير فطور باش يفطروا ..
سيف : واش راهي
الين : راعي مدمرة .. محباش تستوعب لي صرى
سيف : معليش مع وقت كلشي يفوت
الين : وي قطعتلي قلبي مسكينة
سيف : الين
الين : واه سيف واش كاين
سيف : الين حاب نبدا من صفر البارح خممت و قلت خلاص لازمني نجدد حياتي و نخطلها ..
الين : ايه عفسة مليحة هذي خممت مليح
سيف : راهي عندي ارض خاوية قلت نبني شركة بسيطة فيها   انتي تخدمي معايا و نتعاونوا نطوروها
الين : اوك اذا معندكش مشكل انا قابلة
سيف : اوك كي نفطروا نهدر مع معارفي يوجدولي شركة ..
الين : شحال تبقى
سيف : شهر هكذا .. منيش حابة تكون كبيرة بزززاف غير ضريفة باش نسترزقوا
الين : اوك انا في اي وقت ني واجدة ..
سيف : درك ني رايح نشري حوايج للدار 
الين : اوك
خرج سيف من دار و الين بدات تكمل فطورها ..

نروحوا عند صوفيا 🤬😡 ..
بارح خلعت حكمتني كي لقيت احلام مغاشية عيطت على عساس يديها للسبيطار ..
رفدناها طيارة .. من بعد جا عدنا طبيب و قاللنا تعرضت لصدمة و انهيار عصبي .. و قاللنا وحد نصف ساعة ادخلوا عندها .كي فاتت نصف ساعة ملقيتهاش في بيت خرجة نجي نحوس عليها لقيتها تركب طاكسي قتلها وين بيها رجعتهالي ما انا بنتك ما نتي ماما انا خلاص دحت على ركابيا من البكا ..
كي رجعت للدار دهلت للبيت ملقيتش قشها كامل .. في بيت ..

من بعد جمون حكموني رحت لبيتي لبست قشي و هبطت رحت ديراكت للكوميساريا ...
صوفيا : سلام حتبة نشوف عثمان ***
الضابط : اوك مدام دقيقة ..
صوفيا :اوك اني نستنا هناك *و تشرتلوا*
راحت صوفيا تستنا و ذاك الضابط خدم خدمتوا من بعد عيطلها
ضابط : مدام صوفيا *** تفضلي منا
تبعاتوا صوفيا للحبس وين كاين راجلها
صوفيا : تقدر تخلينا نهدروا على انفراد
ضابط :  معاك خمس دقايق
صوفيا : اوك اوك
خرج ضابط و هي دارت شافت فيه
صوفيا :هكذا مش كنت تقولي 100% مننفضحوش واش درت نتا درك .. و كذبت عليا و قتلي هذا رزقي عيشتني في كذوب يا خداع .. صح خدعتني بالدراهم باش دزوجتك .. و هددتني منحكش حتى حيا صبر كامل هذوا سنين و انا عايشة في كذبة ... قول  علاش هكذا واش درتلك .. كيفاش قدرت تواجهم يا مرخس نتا جايح كبير و كذاب على حالك خسرت بنتي لي من لحمي و دمي
عثمان : خلاص اسكتي تعرفي ملي جامي حبيتك في حياتي دزوجتك و قلبي مع اسماء قتلك ربي ولدي و مقبلتيش علابيها هددتك واش رايك .. جامي لاحبيتك ولا حبيت بنتك كنت نمثل دور الاب الحنين ... صوفيا كلشي كان بسبابك نتي كنتي تحبيني من ضغرك و انا كي كنت راح ندزوجها هددتيها و معبليش واش قالت تخلات عليا في عرسنا انا مصبرتش كي قاتلي راه يزوجوني علابيها درتلها هكذا ...
نتي سباب مصايب وكان شفتي حياتك مش خير و كان خليتيني نتعاقب مش احسن نتي و الاب نتاعك رشيتيهم مش انا و ديري في بالك دك نحكيلهم كلشي و نجبدكم واحد واحد و درك خرجي عليا برى ...
صوفيا  كل كلام قالوا خلاها تتحطم اكثر خاصتنا كي قاللها محبيتكش لا نتي لا بنتك كنت نمثل دور الاب حنون ..
خرجت من تما و دمعة هبطتلها .. بقات تبكي خسرت حب حياتها لي جامي لابغاها و بنتها و عائلتها راحت للدار و يا دوب مراحتش كي لقات البوليس ...
.... يتبع
********************************
نيو بارت قصير و زدت وضحتلكم ...
واش رايكم في بارت ....واش راهم يديروا بوليس عندهم ..
كل جواب تلقوه في بارت جاي
عطولي راسكم في هذا البارت
فوت باش نكمل

         😎😎حبككككوووووم😎😎