في سوق أسبوعي لأحد المدن.. وكأي سوق مغربي الإكتظاظ والضجيج والثلوث وإختلاط الروائح.. الناس الفقراء اللي كيترزقو الله كيعرضو المبيعات ديالهم بصوت مرتافع وهكدا كتختالط أصواتهم باش تعطي نغمة مزعجة والزبائن كتقلب في المنتوجات وكتهاتف بين بائع وبائع..
وبين هاد الناس كاينة هي والأم ديالها.. كانت لابسة سروال كحل واسع مع شوميز حمرة نص كم.. وسبادري بيضة وشعرها البني الحريري الطويل مسندل على راحتو على ضهرها وعلى الأكتاف ديالها.. دايرا سكادو كحل ولابسة قفازات جلدية مقطعين من جهة الصباع كحلين ونضاضر بيضين مدورين ماشي ديال الشوف غير تويشية..
كل خطوة كتعطيها حسابها في الأرض لأن الأرض كيف مقلنا ملوثة بزااف.. والأم ديالها غير غادية العفطة افين محطها الله..تأففت من الوضع وقالت للأم ديالها..
_ ومليكة.. شحال من مرة قلت متبقايش دوري بينا في هاد سوق دزبل..
دورت مليكة( الأم ديالها كبيرة شوية في السن وكدير الزيف) راسها جيهتها وقالت:
_زيدي يزيد عليك تران..شحال فيك ديال الفشوش.. زيدي الله يلكيها ليك..لامامشيتش لسوق نتقدا شكون غيمشي داك المزغوب تاع باك
مبقا عندها حيلة كملت معاها دوران في زحام وكل مرة يلوح ليها واحد كلمة البسالة تخنز فيه وتكمل.. ومها كل مرة هاهي عند واحد..مرة عند مول الخضرة مرة عند مول لحم.. المهم خاصها في العشية تعمر الثلاجة والسلام.. ودابا دخلو عند مالين البالي.. خرجت عينيها حيث ريحت البالي كتكرهها.. بدات مها تقلب وسط الحوايج وتحط.. ماشرات مخلات بنادم يشري..ملت من الوضع وقالت بغضب:
_واملييكة واشري ولحيدي
خنزت فيها وقالت:
_إيناااس متصدعيش ليا مخي.. خليني نركز
وكملت كاعما داتها فيها.. بقات إيناس دور وجهها هنا وهنا من شدة الملل.. حتا كيبان ليها مول الحوايج كيشوف فيها شوفة باسلة وكيغمز.. خنزرت فيه ونزلت راسها زعما كتقلب في الحوايج حتى هيا.. وحاطة ايدها على نيفها حيث الريحة كتجيب الغثيان.. هاتجبد وتحط زعما كتقلب.. للحظة جات في ايدها كمام ديال واحد القطعة كحلة.. كانت ريحتها مختلفة على الريحة اللي كتشم.. جاها الفضول تعرف آش هي وجبداتها من وسط الحوايج بعدما كانت مخشية لداخل بالسيف باش عزلتها.. بدات كتقلب فيها وهنا لقلوبة خرجو من عينيها كانت قبية كحلة عندها السنسلة لوسط.. وهي كتموت على شيحاجة سميتها قبية كحلة.. قربتها لنيفها باش تشمها وكانت فيها ريحة رجولية غالية وزوينة بامتياز..لدرجة تغلغت وسط نيفها وبقات واحلة واخا بعدتها.. وسعت ابتسامتها ودارت عند مها وقالت..
_ملييكة بغيت هادي..
شافت فيها مليكة وشافت أش هازة خنزرت فيها وقالت:
_أش ناهيا هادي دابا.. ديال الرجالة..
دلات إيناس شفايفها بقلق وقالت:
_بغيتها هي بغيتها.. صافي امليكة..
شافت فيها مليكة بقلة حيلة وقالت:
_ إيوا خلصيها من فلوسك..
قالت إيناس بفرح:
_واخا واخا..
دارت عند مول لحوايج وقالت:
_شحال هادي؟..
قرب حداها بلعاني وقال:
_20 درهم وعلى قبلك ازوينة نخليها ليك غير ب10 دراهم..
شافت فيه إيناس شوفة ناقصة وقالت:
_شكرا.. جبدت لفلوس من الساكادو وعطاتهم ليه هو خداهم وبقا حاديها حيث كتبان زويينة.. وحادي أي حاجة دارتها.. هي من كثرة الفرحة بدات تقلب فيها.. حلت ليها جيب لولاني مالقات فيه والو ودازت لجيب الثاني حتى هو بدات تقلب فيه.. ولكن هاد مرة كانت فيه شيحاحة قاصحة.. جبدتها باش تشوف أش ناهيا.. لقاتها بحال كارط ميموار وهي كبيرة تقريبا ديال البيسي.. كانت كحلة وفيها خطوطة خضرين بحال شكل خطوط البرق.. استغربت من شكلها وخشاتها في الصاك بلامبلاة هي والقبية.. وهادشي كامل داز تحت أعين مول البالي اللي محيدش عينيه عليها وحاضي أش كدير.. بعد مدة خلصت مليكة داكشي اللي تقدات وتحركو متوجهين للدار.. وصلو لدار بتقديتهم حلو لباب ودخلو يستاراحو.. مباشرة مني دخلت إيناس قالت:
_الله على راااحة.. تفكيت من داك السوق ديال الجهل..
خنزرت فيها مليكة ودازت باش تقاد التقدية في الثلاجة ودير دوك الحوايج اللي شرات في الماكينة يتصبنو.. وإيناس مشات لبيتها باش تستراح.. هو في الحقيقة ماشي بيت.. جطية ديال نهار الأحد.. كلو عامر سلوكة وشراوط مرميين.. مكتخملوش ومكتخليش مها تقرب ليه من بعد وتعرفو علاش.. حطت الصاك وتلاحت فوق الناموسية يلاه بدات تنعس وهي تسمع مها كتقول:
_إيناااااااس.. وااإينااااس..
جاوبتها وهي مقلوبة نعاس..
_واانعاام
_أري ديك الشرويطة اللي شريتي نصبنها
_وااخا
خدات السكادو وجبدت منو القبية يلاه غتنوض باش تعطيها ليها ولكن انفوا شمت ديك الريحة الرجولية الراقية.. ابتسمت لاإراديا وقالت بصوت مرتافع للأم ديالها:
_مليييكة غير بلاش راهاا نقية..
ردت عليها مها وقالت:
_اللي بغيتيي..
تكات على ضهرها وحطت القبية على نيوفها وبدات كتشم فيها كأن مشبعتش من ريحتها اللي حمقتها.. للحظة تفكرت الكارط..ناضت جبدتها من الصاك وبدات كتقلب فيها ومن شكلها الغريب للحظة نزلت على بالها تنوض ديرها في الحاسوب ديالها تشوف أش فيها..
CITEȘTI
فتاة الهكرز
Acţiuneسلام.. كنقدم ليكم هاد القصة الخفيفة اللي كاتوفر على أحداث بسيطة ومتسلسلة وفي فترة زمنية صغيرة وغالب أحداثها كاينين على أرض إيطاليا كنتمنى تعجبكم وإلى معجباتكمش غير سمحوليا حيث هادي أول مرة كنكتب فيها شيحاجة وكنتمنى أرائكم
