في الدرب ديال منزل مليكة.. كيف العادة خاص تكون الأجواء نايضة كيف كنعرفو.. دراري كيلعبو الكرة وعيالات مجمعين ورجالا كيهدرو.. وبنات كيتسيلفاو.. حتى كيبان ليهم تسلسل ديال أشياء غريبة عليهم واللي هي السيارة ديال الگوڤيرنور ومن وراها جوج أخرين ديال الكارد أما الأخرين بقاو برا الدرب وهدا طلب من إيناس أكيد باش مايعيقوش وهي عارفة أن هذا غير حي شعبي..
توقفت السيارة قدام دار ديال مليكة وكلشي حال فمو في هاد المنظر.. وكيقولو أگيد هدا غير شي واحد من العائلة جا من الخارج باش يعزيها في بنتها.. نزل الگوڤيرنور بالهيبة ديالو لدرجة گاع الدرب حل فمو وريوگهم سالو.. وبقاو مركزين عيونهم غير عليه وفي وسامتو.. تنفست إيناس الصعداء ونزلت من السيارة بشكلها الرائع وحتى شي واحد مارد ليها البال حيث كانت مبدلة في حوايجها وكلشي وأصلا هي مكانتش كتلاقا بزاف مع عيالات الدرب حيث معندهاش معاهم عكس ماماها.. تمشات بخطى ثابثة حتى وقفت قدام الباب ومن وراها الگوڤيرنور وسوزن باقا في اللوطو.. هزت ايدها اللي كلها كترعد ودقت جوج دقات.. وفي هاد الأثناء كانت مليكة في الصالة وساهية ومرة مرة تمسح دميعاتها اللي باقين كيهبطو كل ماتفكرت بنتها.. حتى سمعت الدقان في الباب وبسرعة مسحت وجهها وناضت لباب.. حتى وصلت وحلات وهنا كانت صدمتها.. ممتيقاش هادشي اللي كتشوف واش هادي بنتها وكبيدتها ولا غير جاب ليها الله.. عينيها توسعو بالصدمة وايدها كيترعدو وقلبها حاسة بيه غيخرج من بلاصتو.. ودموعها واخدين مجرى واحد.. في حين إيناس بحالها قالت بصوت مخنوق وفي ضحكة مع بكية:
_م مااامااا..
ابتسمت مليكة وسط بكيتها وقالت:
_إينااااس.. ب بنتيي..
وبلا مقدمات تلاحو على بعضياتهم عنق ياماتعنق وبوس بوس😙.. وهما كيبكيو.. في حين الگوڤيرن غير كيشوف وعلى فمو ابتسامة طفيفة ديال الفرح.. أما العيالات غير حاضين وبداو يقولو الله يصبرهم كيحساب ليهم غير بداو يبكيو على الميتة.. بالكشيفة باش طلقو من بعضياتهم.. هزت مليكة ايدها وبدات تقيس فيها وتقول بتهاتف:
_ب بنتي نتي بيخير ياك.. حييااا.. مميتاش.. هئ..
سمحلي ابنتي..
حركت إيناس راسها وقالت:
_ااه اماما اه.. أنا ممتش.. هئ هئ..
وعاودت تعانقو وهوما كيبوسو في بعض باشتياق حتى بعدو وقالت مليكة:
_أجيي.. ابنتي دخللييي..
حركت راسها باه ودارت عند الگوڤيرنور وقالت:
_فااهد.. أجي دخل..
ثم دارت عند مها وقالت:
_ماااما هذا فاهد..
ابتسمت ليه بفرح وقالت:
_دخل اولدي.. دخلوو..
حرك ليها راسو ثم تقدم عندها وسلم عليها وباس ايدها.. ومنها فهمت مليكة أكيد عندو علاقة مع بنتها.. وإيناس غير حاضياهم باعجاب.. حتى قالت:
_فهد.. فين خالتي..
ابتسم ليها وقال:
_باقا في اللوطو.. غير سيري نتي دخلي هاحنا جايين..
ابتسمت ليه ومشات مع مها للداخل وهوما كيبوسو بعض باشتياق والفرح في عينيهم.. بينما الگوڤيرن مشا اللوطو حل الباب ولقا مو گالسة وقال:
_ماما علاش مانزلتيش..
ابتسمت ليه وحركت رجليها باش تخرج وقالت:
_هاني اولدي نازلة..
نزلت من اللوطو وتوجهت معاه للداخل.. في هاد الأثناء كانت جاية إيناس عندهم حتى وصلت وقالت بفرح:
_أجيو دخلو مرحبا بيكم..
دخلو وسدت الباب.. في حين سوزن ابتسمت ليها وحولت عينيها جيهة مليكة اللي حتى هي كانت جاية عندهم.. وهنا كانت صدمتهااا.. رجليها توقفو في بلاصتهم وعينيها تشرعو.. وحتى مليكة هاد الأخرى اللي حتى هي هزت راسها وحلت عينيها بالصدمة.. في حين ابتسمت إيناس وقالت لمها:
_ماما.. نعرفك على خالتي..
لكن قاطعتها وقالت بصدمة:
_سوزن..
كلشي تصدم وحل فمو وشي استغرب.. سوزن دموعها سالو وقالت بصوت مقطع:
_م ملييكة هئ هئ..
وحتى مليكة بحالها دموعها سالو قالت وهي حاطة ايدها على فمها:
_س سوزن نتي باقا عايشة..
حركت سوزن راسها وقالت:
_اه.. اه باقا عايشة..
وبلا مقدمات تلاحو على بعضياتهم وهوما كيغوتو ويشهقو حيث وأخيرا شافو بعض.. بزز باش بعدو وقالت مليكة بدموع:
_توحشتك.. شحال تمنيت هاد النهار..
_سمحليا قلبت عليك ولكن ملقيتكش.. وهاحنا جمعتنا الصدفة..
وعاودو تعانقو مرة أخرى وهوما كيبكيو ويبوسو بعض بشوق كبير.. أما إيناس والگوڤيرن غير حالين فامهم ومافاهمين والو.. حتى قالت إيناس بتساؤل لمها:
_ماااما.. أش واقع..؟
بعدت مليكة على سوزن وقالت بفرح وهي كتمسح دموعها:
_هادي ختي اللي فقدتها 20 سنة هادي..
حلو فامهم من الصدمة.. عمرهم توقعو غادي تجرا شي حاجة بحال هادي.. قالت إيناس:
_إذن نتوما خواتات..؟
_اه احبيبتي..
ابتسمت إيناس بفرح وتلاحت عليهم بجوجات تعنق وتبوس بالفرحة.. حتى الگوڤيرن شاف حتى عيا وترسمت على فمو ابتسامة طفيفة.. بعدت مليكة وشافت في الگوڤيرن وقالت:
_هذا هو فهد ياك اسوزن..؟
حركت راسها وقالت:
_ااه..
تمشات مليكة عندو وعنقاتو وقالت:
_سمحليا اولدي.. قلبت عليك بزاف كنت بغيت نربيك ولكن ملقيتكش..
بدلها التعنيقة وقالت:
_مكاين لاش تعتاذري.. هداك ماضي وخاصنا ننساوه..
أنت تقرأ
فتاة الهكرز
Actionسلام.. كنقدم ليكم هاد القصة الخفيفة اللي كاتوفر على أحداث بسيطة ومتسلسلة وفي فترة زمنية صغيرة وغالب أحداثها كاينين على أرض إيطاليا كنتمنى تعجبكم وإلى معجباتكمش غير سمحوليا حيث هادي أول مرة كنكتب فيها شيحاجة وكنتمنى أرائكم
