فتاة الهكرز

الجزء 17 والأخير

أصبحنا وأصبح الملك لله
في هاد الصباحية الجميلة كان الكل مجموع حول المائدة ديال الفطور اللي في الصالون ديال منزل مليكة.. والكل على فمو ابتسامة فرح بهادشي اللي واقع.. وكيتناولو الفطور اللي محضر على اليدين ديال مليكة.. حتى قاطعت مليكة الصمت وقالت موجهة كلامها لإيناس:
_ايوا نتي مغاديش ترجعي لقرايتك اشنيولة..
شافت فيها مخرجة عينيها أما الگوڤيرنور دور وجهو وبدا كيضحك في خاطرو حيث بصح ضحكو الموقف اللي ديما ملقبين عليها شنيولة..
قالت إيناس بخجل:
_بلاش غيكون كيحساب ليهم مت دابا..
على الهضرة اللي گالت كلهم تفرشخو بالضحك حتى قال عزيز كاتم الضحكة:
_تفرقو ليا على عوينتي.. دير اللي بغات..
على إثر كلامو تخشات في الحضن ديالو ورافعة راسها للسما زعما راه مدسرني وعبر عليكم.. قالت مليكة بقلة حيلة وقالت:
_ياله ابنتي كولي وسيري لفاك.. راك غبتي نص شهر وباركة عليك راه الإمتحانات قربو..
ابتسمت وقالت ليها:
_واخا اماما غير كوني هانية..
شاف الگوڤيرن في مليكة وقال:
_وأنا اللي غادي نوصلها..
ابتسمت مليكة وقالت:
_واخا اولدي..
وفعلا كملو فطورهم.. عاد ناضت إيناس لبست حوايجها من اللي خلات في الدار سروال تجينز وقبية كحلة عاد خلات شعرها مطلوق وهزت لمحفظة ديالها وخرجات.. في الباب لقات الگوڤيرنور كيتسناها بكل هيبة مني شافها رسم ابتسامة جانبية وقال بعد ماوصلت حداه:
_مرحبا بالبرهيشة..
شافت فيه بخجل وقالت:
_شكرا البريهيش..
ضحك على إثر كلامها وقال:
_واش كضحكي عليا.. ياله زيدي..
حركت راسها وركبات معاه في اللوطو.. ومن تما توجهو مباشرة لفاك اللي كان عامر وباقي لحال على الدخول.. تسنات حتى صونات عاد سلمت على الگوڤيرنور وخرجات بعد مقنعاتو بلا مينزل حيث خايفة عليه من العيون الحسادة.. بعد مانزلت دارت القب على راسها باش حتى واحد ميعرفها.. وتوجهت مباشرة للداخل وانتابهت باش حتى واحد ميشوفها حيث خايفة ليعنقوها كاملين وتصدق ميتة ديال بصح.. تسنات حتى خوات المدرسة عاد توجهت للقسم ديالها.. دقت جوج دقات على إثرها تلفت الأستاذ.. وبقا حال فمو من الصدمة وكيقول مع راسو واقلة ولا يشوف الأشباح.. كون ما الطلاب اللي في القسم غوتو وناضو كيتجاراو عند إيناس يعنقو ويبوسو لادراري لابنات..وحتى هي فرحانة كتبادلهم العناق
حتى سلاو وقال واحد من الكليكة:
_فين كنتي حشومة عليك خالعانا نسحبو غير بصح داكشي اللي سمعنا..
ابتسمت ليه في حين قالت بنت خرا:
_واخا مكنتيش عزيزة عليا ولكن أنا دابا أسعد إنسانة على وجه الأرض حيث رجعتي وغادي نلقى معامن نتناتف ونتعاير..
ضحكت إيناس على كلامها وعنقتها واخا مكيتحاملوش ولكن حتى وحدة متبغي للأدية لأخرى.. وفي الأخير تسالمت مع الأستاذ بحرارة وقال ليها وهو كيضحك وفرحان:
_الحمد الله رجعتي.. باش تبقاي تمسحي السبورة فين مابغيتي تخرجي..
أيضا ضحكت على كلامو وبعد مسلات التسلام على القسم شاركتهم الحصة عاد خرجات لقات الگوڤيرن واقف حدا اللوطو كيتسناها كيهضر في التليفون ومن وراه جوج لوطويات ديال ليگارد وهي في طريقها وقفت مني سمعت جوج بنات كيقولو:
_ناري ياختي شوفي شحال زوين ولعينين زرقين باينة غير شي گاوري..
_أنا بعدا سطاني ميمكنش ليا نبقا هكدا.. أنا غادي نمشي عندو وناخد النمرة معرفتي يكون شي زهواني ونصدق مطيحاه..
هوما كيهدرو ومعرفوش راه واحد القنبلة موقوتة حداهم قريبة تنفاجر.. وحدة من دوك البنات تمت غادة جيهت الگوڤيرن ومن سوء حظها دازت من حدا إيناس لي مترددش حتى شوية وهزت ايدها وجبدتها من شعرها.. لاخرى معرفت باش تبلات بدات غير تغوت وتقوليها طلقي.. ومال إيناس عينيها شاعلة فيهم العافية.. شدتها هبطتها لرض وگاعدت تنتف وتقول مانتفت وهي كاتقول بغضب:
_باغااا النمرة.. أنا هي النمرة اللي غادي تفتارسك..
الطلبة كلهم تجمعو وهاديك صاحبتها غير كتغوت وطلب النجدة.. أما الگوڤيرن دور وجهو وتصدم مني شافها في ديك الحالة.. خشا التيلي في جيبو ومشا بسرعة كيجري حتى وصل عندها وجرها من ايدها وهي غير كتغوت بغضب:
_طلق نوريها الكلبة..
خرج فيها فهد عينيه وقال:
_إيناااس تهدني..
وبلا ميعاود معاها الهدرة جرها بسرعة حتى وصل وخشاها في اللوطو وعاد ركب وكسيرا.. وهي غير ساكتة ومدورة وجهها جيهة الزاج  كتبرد بالعصاب.. مدة حتى وقف حدا البحر وقال:
_ممكن نعرف أش هادشي كنتي كديري..
دورت وجهها عندو وقالت بغضب:
_كنت كنضارب واش مشفتيش..؟
شاف فيها باستغراب كيفاش حتى تقلبت عليه بهاد السرعة بعد مخلاها هادئة قال كيحاول يهدئها:
_تهدني وقولي ليا مالك..؟!
شاف فيه شوفة طفولية وقالت:
_سمعتها كتهدر عليك وأنا نتفها..
بانت على ملامح فهد الدهشة والإستغراب وقال بمزاح:
_دابا عاد فهمت المغيارة ديالي..
ميقت فيه وقالت:
_وعلاش غادي نغير بالسلامة غير تهيأ ليك..
على إثر كلامها جابت ليه الضحكة وقال:
_واخا الالة مكتغريش تقبلنااها ولكن مالك على هاد العنف كامل بعد المرات كنشك واش عندك انفصام في الشخصية..
شافت فيه بغضب وقالت:
 _أنا شخصيتي معقدة حتى واحد مكيقدر يفهمها أنا براسي مكنفهمهاش مابقا غير نتا..

شاف فيها بإعجاب وقال بابتسامة جانبية:
_ولكن أنا قدرت نفهمها ويمكن كثر منك..
ثم سكت شوية وقال وهو موجه نظراتو السحرية ليها:
_الشخصية ديالك ماشي انفصام وإنما نتي أي واحد ممزيانش في حياتك كتبغي تخلصي منو وتخدمي معاه الجانب الشرير ديالك وأي واحد مزيان في حياتك كيشوف منك واحد الجانب طيب وحنون وخجول..
ابتسمت ابتسامة خفيفة وهي كتسمع لكلامو لأنه بصح عندو الصح گاع الهدرة اللي گال صحيحة معرفتش مالها وأشنو كيوقع ليها مكتقدرش تشوف الظلم وتبقا ساكتة ومكتقدر تآدي حتى واحد إذن هي إنسانة طيبة وحنونة ولكن... ولكن علاش دارت في داك الوزير ديك الحالة وعلاش قتلت داك العدد ديال رجال الألكسندر.. يمكن دابا عاد فهمت بصح شخصيتها المعقدة اه هي شريرة مع الأشرار وطيبة مع الطيبين...
خرجها من أفكارها اللوطو وهي كتحرك.. تحرك الگوڤيرنور مباشرة لمنزل مليكة وتما دوزو اليوم ديالهم عادي جدا..

                      بعد مرور شهر
                  الساعة 10:00 ليلا
 وبالضبط في روما في أحد أضخم المطاعم كانت موسيقة هادئة على إثرها متمسك إيدوارد بسارة وهما كيرقصو مع بعض بكل حب والفرحة مكتفارقش وجهها حتى قالت وهي كتشوف في عينيه:
_شكرا بزاف احبيبي على هاد النهار الزوين..
بادلها الإبتسامة وقال بفرح:
_مكيونش زوين بحالك..
ضحكت بفرح وعنقاتو وهي فرحانة وسعيدة أنها تجمعت برجل بحال إيدوارد في الأول مكانش بغات تعطيه فرصة لكن مني عرفت أنه رجل طيب وعندو أخلاق لقات راسها كتبادلو نفس الشعور.. وزاد كبر في عينها مني أكد ليها حبو وطلبها للزواج في بداية هاد العشاء الرومانسي..

             أصبحنا وأصبح الملك لله

في الحي الشعبي لمنزل مليكة وبالظبط من النافذة اللي كتطل على الشارع تسمعت تزغريتة بقا الصدى ديالها في المكان.. وبالضبط في الصالون كانت مجموعة العائلة ديالنا كاملة من إيناس ومليكة وعزيز إلى فهد وسوزن وفهاد النهار جا الگوڤيرنور مع الأم ديالو باش يطلب ايد إيناس وفعلا أكيد الكل وافق والعرس غادي يكون بعد شهر..
أما إيناس حاسة بسعادة كبيرة لاتوصف.. أما مليكة حاسة راها في الحلم حيث غادي تزوج بنتها قالت مليكة بفرحة موجها كلامها لبنتها:
_صافي اشنيولة تانتي كبرتي وبغيتي تزوجي وديري لولااد وتخوي عليا الدار..
شافت فيها بخجل وقالت بمزاح:
_متخافيش امليكة غنولي نهرب ونجي عندك..
على إثر كلامها تعالات ضحكاتهم اللي كيعبرو على السعادة ديالهم..

وهكدا كتنتاهي القصة ديالنا بنهاية سعيييدة وأكيد الأيام باقا كتخبي بزاف ديال الحوايج اللي هي خايبة وزوينة.. لكن مع الحب والنية الصافية أكيد كنتغلبو على كلشي ونواجهو گاع العوائق اللي كتجينا في طريقنا أما أبطالنا أكيد بعد شهر غادي يكون زواجهم وبعد أعوام غادي يكونو أسرة بحال گاع الناس وأكيد هادي غير نبدة صغيرة من حياة البطلة إيناس كيفاش واجهت عوائقها وبدات قصة حبها وكنتمنى ليها حياة سعييييدة....😗😗😗😗....
 

                    فتاة الهكرز: النهاية