حتى كايسمعو صوت الأقدام جايين.. التفتو بجوجات حتى كيبان ليهم الگوڤيرنور صاحب المنزل ومعاه الظل ديالو الأشقر إدوارد.. هاد الأخير اللي كانت ملامح وجهو كتوحي للغضب بمجرد مشاف المشاغبة جاتو الضحكة وحبسها غير بزز.. بينما الگوڤيرنور بمجرد مشاف إيناس بهاديك الكسوة باللون الأزرق حس بقلبو هرب منو وطاح عند رجليه.. بقا حال فمو فيها وفي درعانها اللي بيضين وسيقانها اللي كيشعلو بالبياض وفخاضها اللي بانو بعد ماطلعت ليها الكسوة مع شعرها البني اللي طايح على كتافها الناعمين.. بمجرد ماوصل سلم على الأم ديالو بحنان وحتى إدوارد سلم عليها بشوق.. وحتى المشاغبة الجميلة ألقو عليها السلام.. عاد گلسو شاركوهم الجلسة.. والگوڤيرن كل مرة يهز عينو فيها يسقي شوقو ليها اللي عاد مرافقو في أوقاتو وگاع أماكنو.. بينما هي حادرة راسها باقا حشمانة من داك التعناق اللي دارت ليه البارح.. في حين سوزن عيطت للخدامة وقالت ليها بالإيطالية تجيب جوج كيسان أخرين ديال القهوة..
امثثلت الخدامة لأمرها وانصرفت.. بينما هي كملت الهدرة مع إدوارد اللي كان كيعاود وكيحاول ميشوفش في إيناس حيث كتجيب ليه الضحكة.. مدة وتمت جايا الخدامة بربعة ديال ديال الفناجين القهوة فرقتهم كل واحد عطاتو كاسو وانصرفت.. إدوارد بمجرد مرشف الرشفة اللولة قال بازعاج:
_هاد القهوة مسوسة.. مفيهاش حتى حبة ديال السكر..
جاوباتو سوزن وقالت:
_يمكن غير غلطو الخدامات.. حيث أنا كنشربها مسوسة.. أنا غنعيط ليهم يبدلوها..
وهنا الجميلة ديالنا بداو يطيحو عليها الأعمال الشيطانية ديالها 😈.. ابتسمت بشر وقالت:
_لااا أخالتي بلا ماتعيطي ليهم أنا غادي نبدلها ليه نيت بغيت نجيب واحد الحاجة نسيتها قبيلة في الكوزينة..
حركت ليها سوزن راسها باه.. بينما هي ناضت هزت الفنجان وتوجهت الكوزينة.. خلات إدوارد كابح الضحكة والگوڤيرن غادي ياكولها بعينيه.. أما الجنية وصلت لكوزينة وحطت الكاس فوق البوطاجي وقالت لأحد الخادمات بالإيطالية:
_عفاك الملحة..
امثثلت الخادمة لأمرها وهي مستغربة علاش باغا الملحة وهي هازة القهوة.. لكن معندها مادير هي ماشي سوقها.. خدات من عندها الملح حلاتو وبدات تكب في الفنجان حتى سلات وخلطاتو بالمعلقة باش يدوب ومع القهوة كحلة سهلت عليها المأمورية.. هزاتو وتمات خارجة بيه.. بينما إدوارد جالس يهدر مع سوزن ويضحكو حتى حطت ليه القهوة وقالت:
_تفضل ا مستر إدواارد..
إدوارد مع الكلمة اللخرة عرف مغايخرش حتى دير ليه شي موصيبة.. سرط ريقو وخدا من عندها القهوة ونسى تماما أنها تقدر دير شي حاجة فيها.. أما هي گلست حدا الخالة سوزن وهي حاضية إدوارد وحابسة الضحكة. هاد الأخير اللي بمجرد مرشف الرشفة اللولة.. وجهو ولا حمر من المذاق العفن اللي في فمو دبا وهي الملح بنكهة القهوة.. مبقاش قادر يحبس وحط ايدو على فمو وكحب حتى خرجت ليه القهوة فوق ايدو.. حط الفنجان فوق الطابلة وناض كيجري الحمام باش يغسل فمو حيث بدا كايحس بالتقيء.. بينما سوزن و الگوڤيرنور شافو فيه باستغراب.. أما صاحبة الحسنات دورت وجهها لجهة الأخرى باش تخفي الضحكة لكن كتافها اللي كانو كيتهزو كانو فاضحينها.. رمقها الگوڤيرنور بعيونو كضحك وعرفها هي اللي دارت ليه شيحاجة في الكأس ديالو.. ابتاسم بهدوء ودغيا قلبها لغضب كيحاول يلعب عليها شوية.. بينما هي دورت وجهها على إثر سماع سوزن كتقول ليها بقلق:
_حبيبة.. إيناس واش معرفتيهش مالو..؟
جاوباتها إيناس وهي كابحة الضحكة غير بزز:
_لااا.. اخالتي معرفتش.. حتى يجي وسوليه..
قالتها ثم حولت نضرها لجهة الگوڤيرن اللي لقاتو كيشوف فيها بنظرات ديال القتيلة.. حلت عينيها من الصدمة وحدرت راسها نادمة علاش دارت هادشي أكيد عاق بيها دابا.. مدة تم راجع إدوارد وقال:
_بسلامة أخالتي سوزن.. خاصني نمشي دابا تعطلت على روبي..
شافت فيه سوزن وقالت:
_واخا اولدي والمرة الجاية جيبها معاك.. ولكن واش نتا بيخير مالك قبيلة..
على إثر سؤالها شاف في إيناس اللي لقاها حاضياه غير بنص عين.. ابتسم وقال:
_لا والو أخالتي أنا بيخير.. وروبي غادي نجيبها عندك إنشاء الله..
ابتسمت ليه بينما هو مشا خارج القصر.. أما إيناس دورت وجهها عند سوزن وقالت بتساؤل:
_شكون هادي روبي..؟
ضحكت سوزن وقالت:
_روبي ختو الصغيرة..
_علاه هو عندو ختو..؟
_اه احبيبة هي اللي عندو وكيقدم ليها كثر ماعندو باش يحسسهأ بأنها ماشي وحيدة..
أما واحد الزغبي أش خلاتها مو.. مبقاش قادر يحيد عينيه على إيناس.. صافي حس بيها دات ليه القلب.. حاضي أي حاجة كتحرك من جسمها النحيف والأبيض والناعم.. حاضي ايديها البويض وشفايفها اللي كايتحركو مع الهضرة وحتى شعرها اللي مرة مرة كتردو ورا ضهرها وكيبانو دراعها اللي حمقوه.. مبقاش قادر يصبر.. فقرر أنه غادي يستفرد بيها ويدير السبة بالفعلة اللي دارت لإدوارد.. جمع الوقفة وقال موجه هضرتو لإيناس:
_إينااس.. تبعيني للمكتب ديالي الفوق بغيت نهضر معاك..
قالها ثم طلع للمكتب ديالو.. بينما إينااس سرطت ريقها من الخلعة.. عرفت راسها دارت فعلة خايبة وغادي يلومها عليها وهي وسط دارو.. ناضت تبعاتو بخطى بطيئة.. حتى وصلت للمكتب ودقت جوج دقات ودخلت.. لقاتو واقف حدا النافدة وفي ايدو گأس ديال النبيد والإيد الأخرى في الجيب.. حط الكاس ودار على إثر دخولها.. بينما هي كيف فاتت الباب وقفت وقالت:
_هاني امسيو الگوڤيرنور..
ابتسم ابتسامة جانبية وقال بهدوء:
_تعالي قربي..
على إثر كلامو حست بدغدغات في بطنها.. كثمث توترها وقربت حداه بخطى بطيئة حتى وقفت قدامو عاد حبست.. بينما هو وسع ابتسامتو وقرب حداها بخطوة حتى مابقا كيفصل بيناتهم سوى سنتمترات قلال.. شافت في عينيه الزرق اللي شبيهة ببحر كانت ضحية من اللي غرقو فيه واستنشقت رائحتو الرجولية اللي كاتسطيها.. وقالت بثوثر:
_مسيو الگوڤيرن.. سمحلي على قبيلة..
ابتسم بهدوء وهز ايديه حطهم في خصرها حاكمو وقربها منو حتى التصق صدرها مع صدرو وقال بهدوء وهو خاشي انفو وسط شعرها كيستشق العبير ديالو اللي كان بنكهة الفراولة وهو دايب فيها:
_المشاغبة أش هادشي كتحاولي ديري..؟
فتحت عينيها قليلا على إثر كلامو وقالت بثوثر:
_أشنو درت..؟
_نتي معايقاش براسك أشنو كاديري.. أنا اللي عارف.. بالمناسبة جيتي زوينة بهاد الكسوة..
حطت ايدها على صدرو كتحاول تبعدو لكن قبل ماتكمل بحركة سريعة منو دورها ولصقها مع الحيط.. بينما هي بهاد الحركة حست بالفرشات كينقزو في البطن ديالها.. وايديها كيترعدو بالثوثر من قرب هاد الرجل الوسيم الحسن المظهر.. ناهيك على قلبها قريب يخرج من بلاصتو.. في حين هو مبقاش قادر يصبر مزال.. هز ايد من الخصر ديالها وبعد بيها خصلة من وجهها ثم خشا اناملو وسط شعرها.. الثوثر اللي حست بيه كان غيفجر ليها الدم في العروق.. كانت بغات تحرك لكن كان حاكمها.. بينما هو بعد الحركة اللي دار زاد قربها أكثر وقبل ماتحرك كان حط شفايفو على شفايفها كيقبلهم بهدوء.. حلت عينيها من الصدمة أخر حاجة توقعتها هي هادي.. ومكانتش دايرا ليها حساب.. لكن مع ذلك حست بنشوة غريبة وإحساس رائع أول مرة يداعبها.. بينما هو حول ديك القبلة الهادئة لقبلة عنيفة بعد ماتذوق هاد الشفتين الناعمتين ومكانش متوقع غيكونو لذاد حتى لهاد الحد.. بدا كيمتص الكرزتين ديالها بعنف مسمتع بمذاقهم الرائع اللي حمقو.. أما هي هادي اللخرة ليها حست براسها قريبة تسخف بين يديه من كثرة الخجل والثوثر.. وكانت مستمتعة في نفس الوقت أيضا من طعم شفايفو الحارة.. حطت ايدها على صدرو وكرزت بايدها على الكول ديالو مقرباه ليها أكثر وكتحاول تجاوب واخا مكتعرفش وهادي أول مرة تجرب بحال هاد القبلة.. في حين هو بهاد الحركة اللي دارت جنناتو وزادت حمقاتو وغير مزاد كيمتص أكثر كأنه مشبعش منهم.. حتى حس بيها بدات كتخنق عاد طلق منها وهو كاينهج ببطئء.. وحتى هي كاتنهج وكاتحس بأنفاسو كدرب في وجهها.. ياله غادي يعاود يحطهم مرة أخرى وهي تسلت بالزربة مشات هاربة من كثرة الخجل..بينما هو ابتسم برضا وهز ايدو كيتحسس بيها شفايفو اللي باقين حاملين داك المذاق الرائع واللذيد.. في حين إيناس كانت دخلت للغرفة ديالها وبدات تويل في راسها وتسب وتقول بخجل وهي حاطة ايدها على شفايفها اللي باقين كيوزوزو كتحسسهم:
_ويييلييي.. باااسني.. ويليي ويللييي..
بقات هكداك حتى حست براسها عيات عاد مشات تنعس باش متقابلاش معاه مرة أخرى.. وحتى بالنسبة للگوڤيرن كان جالس في البالكون.. كان ديك الساعة ظلام الحال وهاز في ايدو النبيد ديالو المسكر.. كايحاول ينسي بيه التفكير في الجميلة ديالو اللي تذوق من نبيد الشفتين ديالها اللذيد والجد المسكر..
أصبحنا وأصبح الملك لله
كانت إيناس واقفة قدام المراية في الغرفة ولابسة أحسن كسوة لقاتها.. كانت كسوة طويلة كحلة وعندها لكمام.. ومزيرة من جيهة الخسر.. ومطلوقة حتى لتحت.. واخا باقا مأثرة بالقبلة ديال البارح وفين مكتفكرها كتحس بدغدغات في البطن ديالها.. وحتى ايدها كيوليو يترعدو وهي دابا معولة عليه يكون مشا لخدمة ديالو.. خلات شعرها الطويل مطلوق.. ونزلت متوجهها لتحت.. مع أخر خطوة بان ليها گالس في الطابلة ديال الفطور.. وقفت وبقات غير كتبقلل في عينيها.. معارفات أشنو تدير.. بينما سوزن دورت راسها بانت ليها ابتسمت وقالت بحنان:
_حبيبة إيناس.. أجي علاش واقفة..
على إثر كلامها رفع الگوڤيرنور راسو بعد مكان مهبطو.. وهنا كانت صدمتو حل عينيه وحل فمو حس بقلبو غادي يخرج من رؤية هاد الجمال الرائع والكسوة اللي زادتها جمال أكثر وبينت تضاريس جسمها النحيف.. معرفاش راسها غير مكتزيد تحك على الضبرة.. أكيد دابا مكرهش ينوض يهرب بيها لشي بلاصة بعيدة ويخبيها باش حتى واحد ميشوفها.. ابتسم ابتسامة جانبية وعاود حضر راسو.. بينما هي مني دوات معاها سوزن تحركت ببطء حتى وصلت حداهم وقالت بثوثر وكتحاول متشوفش في الگوڤيرن:
_ص صباح الخير..
ردت عليها سوزن بابتسامة وقالت:
YOU ARE READING
فتاة الهكرز
Actionسلام.. كنقدم ليكم هاد القصة الخفيفة اللي كاتوفر على أحداث بسيطة ومتسلسلة وفي فترة زمنية صغيرة وغالب أحداثها كاينين على أرض إيطاليا كنتمنى تعجبكم وإلى معجباتكمش غير سمحوليا حيث هادي أول مرة كنكتب فيها شيحاجة وكنتمنى أرائكم
