للحظة سمعت سوزن كتقول بفرح:
_ولدي فهد.. جيتي..
رفعت راسها جيهتو مني سمعت صوت خطواتو الثابثة.. كان داخل بكل هيبة ورجولة بمشيتو الرائعة.. ابتسمت بخفوت لاإراديا وحست بقلبها غايخرج من بلاصتو بالثوثر.. بمجرد ماوصل تكا عند الأم ديالو قبل ليها راسها بشوق وابتسامتو الرائعة اللي كتزيدو وسامة وقال:
_ياكما تعطلت عليك اماما..؟
حركت راسها بلا وقالت:
_لا اولدي جيتي في الوقت.. جلس..
_واخا..
الگوڤيرنور مسكين معارفش بلي واحد جوج عينين غادين يكلوه بالشوفان.. والتأمل.. مسكينة معقلتش حتى بقات ساهية فيه خصوصا مني بدا كيسلم على مو بهاديك الطريقة اللطيفة.. بعد ماسلم على مو حول نظرو لجيهتها.. هو اللي بقا ساهي فيها هاد المرة.. بقا ساهي في شعرها الحريري البني المسندل على كتافها وخدودها الحمرين بالخجل وعينيها لكبار البنيين وشفايفها الغوز.. وبشرتها البيضة الناعمة.. بصعوبة خرج من أفكارو وقال بابتسامة خفيفة:
_مسا الخير آنسة سنايبر..
ابتسمت ليه على إثر الكلمة الأخيرة.. بينما هو بقا ذايب في ضحكتها الزوينة اللي أول مرة يشوفها.. توجه للكرسي ديالو وگلس.. مباشرة بعد ماگلس خصوصا گالس بالجنب ديالها يعني قريب ليها.. تغلغت ريحتو في نيفها.. نفس الريحة اللي شمت المرة اللولة وحمقتها.. الريحة اللي شمتها مني شرات القبية وسطاتها هاهي كتشمها مرة أخرى ولكن هاد المرة من مولاها نفسو.. غمضت عينيها واستقبلت ديك الرائحة الحلوة الرائعة.. تزيد تغلغل أكثر في نيفها.. هادي أول مرة في حياتها تشم فشي رجل ريحة بحال هادي.. كأنها مصنوعة خصيصا للگوڤيرن وماشي لشي واحد آخر.. واخا شمت حتى الرائحة ديال إدوارد ولكن مكانتش بحال هادي مميزة ورائعة.. خرجها من أفكارها سوزن كاتقول:
_كولي احبيبة علاش ساهية..
ابتسمت ليها وخدات الفورشيط وبدات كتاكل.. وحاضية حولها غير بنص عاين.. في حين سوزن شافت في فهد وقالت بابتسامة:
_ولدي فهد مغاتقولش ليا فين تعرفتي على الضيفة الزوينة اللي ونستني ليوم وعمرت عليا الدار...
ابتسم ليها وقال:
_ماما حبيبة هادي قصة طويلة.. من بعد ونعاودها ليك..
ضحكت ليه وقالت:
_وااخا اولدي..
بينما إيناس هزت راسها على إثر كلامهم عليها.. ابتسمت بلا ماتقول والو ونزلت كملت ماكلتها في جو من الثوثر والخجل.. للحظة قال فهد وهو كايمسح فمو:
_كنستأذن منكم.. تصبحو على خير..
جاوبوه بتصبح على خير.. ثم طلع متوجه للغرفة ديالو.. ومخلي أعين الجميلة متبعاه غير بنص عين..
بعد ماكملت ماكلتها.. استأذنت من سوزن وطلعت لبيتها.. ذخلت وسدت لباب وبدات كتضحك غير بوحدها حاسة براسها واقعة في إعجاب رجل.. لكن بمجرد ماتفكرت ماماها وباباها اللي غايكونو دابا كيتعذبو على فراقها.. وباللي كيحساب ليهم باللي ميتة.. طلقت العنان لدموعها وگلست كتبكي بحرقة وكاتنخسس.. حتى حست براسها تفشت ومشات تنعس..
أصبحنا وأصبح الملك لله
نازلة من الدرج بخطوات بطيئة ولابسة سروال وقاميجة وسباط قصير وشعرها الحريري مسندل على كثافها.. كانو عينيها منفوخين بالبكا ونيفها حمر.. بدات كتسمع صوت الهدرة والضحك حتى نزلت أخر الدرجة وبان ليها الگوڤيرن وسوزن ومعاهم حتى إدوارد.. شافها هاد الأخير جاية جيهتهم وقال بمزاح:
_صباح الخير المشااغبة..
جاوباتو ببحة في صوتها وقالت:
_صباح الخير..
قبل ماتمشي تكلس مشات جيهة سوزن وباستها في حنكها واستنشقت من الرائحة ديالها لأنها كانت بحال الرائحة ديال ماماها وقالت:
_صباح الخير اخالتي..
خلات دوك جوج مصدومين خصوصا إدوارد أما الگوڤيرن عجباتو العلاقة القوية اللي ولات بيناتهم بين نهار وليلة.. ابتسمت ليها سوزن بفرح وقالت باهتمام:
_حبيبة ديالي.. واش نتي بيخير.. علاش صوتك مبدل ياكما مريضة..
حركت إيناس راسها بلا وقالت:
_لا أنا بيخير.. غير معا ياله فايقة من النعاس..
قالتها ثم حولت نظرها لجهة الگوڤيرن اللي لقاتو حاضيها بابتسامة جانبية معرفتش أشنو المغزى ديالها.. ابتسمت ليه وقالت:
_صباح الخير مسيو الگوڤيرنور..
حرك راسو كدليل على الرد.. ثم مشات گلست وشاركتهم الأجواء...
بعد مرو ساعة من الزمن
في هاد اللحظة بعد مامشا الگوڤيرن وإدوارد من القصر بعد مافطرو.. جالسة المدام سوزن وحداها إيناس كايضحكو على بعض الأمور لكل وحدة كاتجبد الأمور ديالها.. حتى قالت إيناس بتساؤل:
_خالتي واش راجلك مات..
على إثر سؤالها غرغرو عينين سوزن وقالت بحزن:
_مات قبل عشرين سنة مني كنا في المغرب.. وقعو بزاف ديال الحوايج خايبة.. مقدرتش ننساها حياتي كاملة.. كل ليلة كانشوف كوابيس خبيثة.. حتى عاودت تجمعت بولدي فهد عاد بديت كنرتاح نفسيا..
_شافت فيها إيناس باستغراب وقالت:
_علاش مالكي مكنتيش مع ولدك فهد.. عاودي ليا أنا كنسمعك..
_في الحقيقة ابنتي نخليوها من بعد.. دابا محاملاش ندوي في هاد الموضوع بالضبط بالنسبة ليا حساس..
حركت ليها راسها باه وخلاتها على خطرها وقالت:
_اللي بغيتي اخالتي.. وسمحليا لاجبدت معاك هاد الموضوع..
YOU ARE READING
فتاة الهكرز
Actionسلام.. كنقدم ليكم هاد القصة الخفيفة اللي كاتوفر على أحداث بسيطة ومتسلسلة وفي فترة زمنية صغيرة وغالب أحداثها كاينين على أرض إيطاليا كنتمنى تعجبكم وإلى معجباتكمش غير سمحوليا حيث هادي أول مرة كنكتب فيها شيحاجة وكنتمنى أرائكم
