နတ်ဆိုးတစ်ကောင်နှင့်အတူမွေးဖွားခြင်း/နတ္ဆုိးတစ္ေကာင္ႏွင့္အတူေမြးဖြားျခင္း

Part 5

Unicode

ဆေးရုံဆင်းပြီး နောက်တစ်ရက်ရောက်သည့်နှင့် မင်းခွန်မှိုင်းတို့ စတူဒီယိုသွားရန် တက်ကြွနေချေပြီ။ အလုပ်ရှိရှိ ၊ မရှိရှိ သဘောကျသည့်အရာများ၏အနားတွင် နေရခြင်းကိုပျော်သည်။ ထို့အပြင် နတ်ဆိုးကောင်သည် မနေ့ကရော၊ ယနေ့မနက်ထိ ပေါ်မလာသေးချေ။ သည်အတိုင်းအမြဲပေါ်မလာတော့လျှင် သိပ်ကောင်းမည်ဟု တွေးမိသည်။ မဟုတ်လျှင် ရုတ်တရက်ပေါ်ပေါ်လာတတ်၍ လန့်ရသည်။ အနားသို့ ကပ်ကပ်လာတတ်ပြန်သောကြောင့် ရှောင်လင်သိုင်းတွေ ကျင့်ရနှင့် ကြာလျှင်လူပင် ကွန်ဖူးတတ်သည့်နင်ဂျာဖြစ်တော့မည်။ ကွန်ဖူးတတ်သည့်နင်ဂျာဟူသော အတွေးကို သူ့ဘာသာသဘောကျမိသွားသည်။ တရုတ်နဲ့ဂျပန်ဖက်စပ်ပေပဲ။

"ငမှိုင်းရေ"

မနက်ခင်းစောစောစီးစီး သူများမိသားစုထမင်းစားချိန်၌ ရောက်လာသူမှာ ငစိုင်းဖြစ်သည်။

"မနက်စာစားတုန်းလား ငမှိုင်း။ ငါကမင်းကိုလာခေါ်တာ။ နေကောင်းတာမကြာသေးတာတောင် မင်းကအလုပ်ကိုလာချင်နေတော့ ငါကစိတ်မချလို့ လာခေါ်ပေးတာ"

သူ့ဘာသာ ကိုသာ့ကိုငမ်းချင်သဖြင့်လာသည်ကို မိမိအားစိတ်မချဟုဆိုကာ ခေါင်းစဉ်တပ်သေး၏။ တော်ပါပေသည်။

"ငါ့ညီ...မနက်စာမစားရသေးရင် တစ်ခါတည်းစားသွားလေ။ မေမေရဲ့ တရုတ်ထမင်းကြော်လက်ရာကရှယ်ပဲ​နော်"

ကိုသာသည် ဘုမသိဘမသိဖြင့် မြွေပွေးကိုခါးပိုက်ပိုက်ချင်နေပြီထင်သည်။ ငစိုင်းဆိုသည်မှာလည်း မျက်နှာကြီးဖြီးပြီး မျက်လုံးများက အရောင်တွေပင် တောက်နေတော့သည်။

"ကိုသာက တရုတ်ထမင်းကြော်ကြိုက်တာလား..."

ကိုသာက ခပ်ပြုံးပြုံးလေးခေါင်းညိတ်ပြသည်။ ထိုကဲ့သို့ ပြုံးပြနေသဖြင့်လည်း ဟိုကောင်ကြီး ကြွေပြီးရင်းကြွေနေခြင်းဖြစ်မည်။ များများသာဆက်ပြုံးပါလေ။ ထိုသတ္တဝါ ကိုသာ့အား အကြိုက်လွန်၍ ရူးသွားလည်းအေးတာပင်။

"ကိုသာစားစေချင်ရင် ကျွန်တော်စားမယ်လေ..."

မင်းခွန်မှိုင်းစားထားသည်များပင် ပြန်အန်ထွက်ချင်လာသည်။ ဘယ်လို ပတ်ချွဲနှပ်ချွဲနိုင်ခြင်းမျိုးပါလိမ့်။ မိခင်သည် ပန်းကန်အသစ်တစ်ချပ်ယူလျက် ငစိုင်းအတွက် ထမင်းကြော်ထည့်ပေးနေသည်။ ကိုသာသည် သူနှင့်မျက်စောင်းထိုးမှခုံအား ငစိုင်းထိုင်ရန် ပြင်ပေးနေစဉ် မင်းခွန်မှိုင်း မတ်တပ်ကောက်ရပ်လိုက်သည်။