နတ်ဆိုးတစ်ကောင်နှင့်အတူမွေးဖွားခြင်း/နတ္ဆုိးတစ္ေကာင္ႏွင့္အတူေမြးဖြားျခင္း

Part 7

Unicode

အချိန်က နေ့လယ်သုံးနာရီသာ ရှိသေးသော်ငြားလည်း မင်းခွန်မှိုင်းအိမ်ရှေ့၌ ငစိုင်းတို့ရောက်နှင့်နေချေပြီ။​ကျော်ကြီးသည် စတူဒီယိုပိတ်ပြီးမှ မင်းခွန်မှိုင်းအိမ်သို့ လိုက်လာမည်ဖြစ်သည်။ ယနေ့ ကိုသာ့အလုပ်နားရက်မှန်းလည်း သူသိသည်ကတစ်ကြောင်း၊ တွေ့ချင်သည်က တစ်ကြောင်းကြောင့် စောစောလာခဲ့ခြင်းဖြစ်သည်။ တစ်မိနစ်လောက်ပိုတွေ့လိုက်ရလည်း သူ့အတွက်မနည်းလှ။ ကိုယ့်အတွေးနှင့်ကိုယ်မြူးပြီး ခြံတံခါးမှ လူခေါ်ခေါင်းလောင်းကို ခပ်မြန်မြန်ပင်တီးလိုက်မိသည်။

လူခေါ်ခေါင်းလောင်းအသံ အဆုံးသတ်သွားချိန်မှာပင် ခြံထဲသို့ဆင်းလာသည့် ကိုသာ့အား လှမ်းမြင်မိတော့ နှလုံးသားသည် ရေနွေးထဲအစိမ်းလိုက်ထည့်ပြုတ်ခံရသော ဖားတစ်ကောင်လို ဖျပ်ဖျပ်လူးခုန်ပေါက်၏။ အိမ်နေရင်းမို့ တီရှပ်အဖြူနှင့် ဒူးဆစ်လောက်သာဖုံးသည့် ခပ်ပွပွဘောင်းဘီအသားရောင်ကို ဝတ်ဆင်ထားသည်။ ဆံပင်များကို အနောက်သို့ဖြီးသိမ်းထားပြီး မျက်နှာလေးကလည်း အပြုံးနုနုလေးကြောင့် ကြည်လင်နေပြန်သည်။

ဘယ်လိုများ ဆုတောင်းကောင်းခဲ့လေသလဲ ကိုသာရယ်။ ရိုးရိုးရှင်းရှင်းပုံစံလေးနှင့်ပင် ပြည့်စုံလွန်းအားကြီးလှပါရဲ့။

"ငါ့ညီ ရောက်လာတာ​စောသလားလို့"

ကိုသာသည် ပြောပြောဆိုဆိုဖြင့်ခြံတံခါးကို ဖွင့်ပေးလေသည်။

"ဧည့်သည်လည်းမဟုတ်ဘဲနဲ့၊ တန်းဝင်လာတာမဟုတ်ဘူး။"

တံခါးဖွင့်ပေးပြီး အိမ်ထဲပြန်လှည့်ဝင်သွားသည့် ကိုသာ့နောက်သို့ ငစိုင်းအယောင်ယောင်အမှားမှားဖြင့် လိုက်သွားပြီးကာမှ ခြံရှေ့၌ သည်တိုင်းရပ်ထားမိခဲ့သည့်ကားကို သတိရကာ ရှက်ကိုးရှက်ကန်းဖြင့် ခြံအပြင်ပြန်ထွက်ပြီး ကားကိုအိမ်ဝ၌ ထိုးလိုက်ရသည်။ မင်းခွန်မှိုင်းပစ္စည်းများ ကားထဲထည့်ရဦးမည်မဟုတ်လား။ ကားကို အိမ်ဝအထိထိုးမပေးလျှင် ခြံရှေ့ထိပစ္စည်းသယ်ရပါသည်ဆိုပြီး လူကိုဟောက်ဦးမည်အား ကြိုသိနေသည်။