دكتور احمد مشاكل

حفله بقلظ

انك تكون سينجل دي حاجه وحشه جدا بتحس كأنك ملكش لازمه او مش فارق عند حد و بتبان الازمه دي وقت الحفلات خاصه لو كل المعازيم couples اصلك هتتحسد و هيتنق عليك من صحابك المتجوزين و هيتحفل عليك من صحابك المخطوبين اللي هو بتتمني انك تكون ساحب في ايدك اي (ة مربوطه) ان شاء الله تكون شبه خالتك
و ده حالي يا ساده بحكي لكم و انا واقف في حفله بقلظ، بتسألوا مين بقلظ انا لحد امبارح مكنتش اعرفه بس هو في الاخر طلع واحد صاحبي معرفوش و اسمه عبد الله
الحكايه تبتدي امبارح
قاعد في حالي في شغلي بلعب في العيانين و بطفش في نصهم لحد ما تليفوني رن، ايوه صح طلع لي ع الشاشه  ( بقلظ ) طبعا انا في موقف وحش لا فاكر مين ده و لا عارف اسمه الحقيقي
و انا مفقوس مبعرفش اكدب فهحط نفسي في موقف وحش ليه
قلت الاحسن مردش بس بعد 12 مكالمه منه
اضطريت ارد عشان اسكته مش اكتر و اهو لو قعد يرغي و حرق دمي كفايه اني اقوله  بس يا بقلظ عشان يسكت  ما هو اكيد هيتحرج
و قد كان رديت و يا ريتني ما رديت
_ الو
_ ايوه يا ابو حميد، اخبارك ايه واخبار الحجه بلا بلا بلا بلا بلا بلا ( هو اللي بيرغي والله) قولي صحيح وراك ايه بكره
_ مشاغل كتير الحقيقه ( امي عايزاني اغسل لها السجاجيد )
_ لا مينفعش لازم تفضي نفسك ده حفله عيد جوازي بكره و لازم تحضر
_  هو مش المفروض تحتفل بيه انت و مراتك بس
عايزني معاك ليه، محرم 😅
_ يا ابني اصلك مش فاهم اصل انا جبت لمراتي غويشتين دهب و هي عايزه تعزم صحابها  و صحابي المتجوزين و اهلي عشان تغيظهم بالهديه
غلبت افهمها انهم دهب صيني و بلاش الحفله دي حلفت عليا لو معملتش الحفله لا تسيب لي العيال و تمشي و انا بأمانه احتاس لو عملتها
_ طب انت قلت بنفسك عايزه تغيظ صحابها و اهلك، عازمني انا ليه
_ اصلك انت مش فاهم هي لسه متعرفكش يعني هتعرف تحوش لما الخناقه تقوم
_ يعني لو كانت عارفاني مكنتش هعرف احوش، و ايه اللي مأكد لك انها هتتخانق
_ لو عارفاك هتتخانق معاك و هتطلع لك كل عيوبك و بعدين مراتي و انا عارفها هتتخانق هتتخانق
_ كل الكلام ده ميشدنيش في اكل في الحفله
_ اه في تعالي انت بس و متقلقش
و ده اللي حصل و اديني اهوه واقف في نص الحفله زي المعزه رشيده بالظبط
و البوفيه اللي بقلظ قال عليه طلع سندويتشات جبنه رومي و كفته، كل هو نصهم و ده يعرفك شكله عامل ازاي بالظبط زي برميل الطرشي و ده سبب تحويل اسمه من عبد الله الي بقلظ
اما بقي عن حرمه المصون فلا تعليق عشان دي ست برده بس يكفي اني اقول انها النسخه المصغره من تيته رهيبه
و الكلبين موجودين برده بس في صوره اطفال، ولاد عبد الله و صدقني انا مش بغلط فيهم بالعكس ده انا بوصفهم
العيال لما خلصوا ع الاكل ابتدوا يتسلوا ع المعازيم ده انا شخصيا اتعضيت منهم 3 مرات.
نركز بقي في الفرح، اي شاب هيسأل هي الحفله دي ما فيهاش بنات هقوله لأ في بس جنب كل واحده باب عريض له راس و اسمه ( خطشيبي) ايوه صح بال ش.
و لو في واحده سنجل هتلاقي نص الشباب راحوا لها يعني هي خلاص بقت صحراء و مفيش غير العبد لله اللي فيها
انا خلاص رضيت بقدري و بأحلام اللي جايه في يوم من الايام 😊😊
قاعد انا برغي و نسيت اوصف لكم الحفله
بصوا هي عباره  عن ستات كتير ولا عواجيز الفرح عمالين يقطعوا في فروه اي حد و في شويه هناك عمالين ياكلوا معرفش عرفوا يهربوا الاكل منين اما بقي الرجاله بيتكلمو في الكوره و السجاير اللي غليت و البنزين اللي ولع
(صح علي سيره الكره انا اهلاوي يا جماعه)
و البنات يا بتتشقط يا بتشقط و كل واحده و مجهودها
تحس ان سيناريو الحفلات ثابت في اي مكان و في اي طبقه مجتمع
ايه ده لأ  ده في جديد هنا
مرات عبد الله بتتخانق مع حماتها( اللي هي ام  عبد الله مش محتاجه ذكاء)
هنا بقي ييجي دوري
داخل زي الاسد عشان احوش مش لازم احلل سندويتش الجبنه الرومي اللي كلته
و يا دوبك لسه هقول في ايه لقيت سمكه بيرانا قفشت في دراعي ببص لاقيت مرات عبد الله حاطه دراعي بين سنانها و مكمله خناق تسألني ازاي اقولك معرفش ( جباره الست دي، انا عرفت دلوقتى العيال طلعوا عضاضين لمين) المهم بعد ما قعدت احوش و اخدت كم لكميه علي كم شلوط (طبعا خلاص كله عرف من مين ) قدرت اخرج من الحفله علي رجلي و في ايدي 3 كانز اروح اشربهم مع امي و احلام 😂😂😂
و من يومها قررت ما اروحش حفلات تاني الا و انا في ايدي ست الحبايب
اهو الاقي حد يقولي معلش بعد ما اتضرب