دكتور احمد مشاكل

اول يوم في المصيف

قاعد في البلكونه و منظر البحر يهدي الاعصاب و في ايدي كوبايه نسكافيه و بسمع لفيروز و بتأمل في ابداع الخالق في خلقه .
ثانيه واحده ✋ انت تصدق عني كده او تصدق عن امي انها تسيبني اعمل كده 😂😂
في الحقيقه كل دي احلام يقظه بفكر اعملها
لما اخلص بأذن الله
في بنت قمر هتسألني انت فين هقولها بكل تناكه بشتري المشابك 😊😊
اصل ست الكل و ياسمين مكتفوش انهم فضوا شنطهم ( سابوا شنطتي😒)
لأ كمان قرروا يغسلوا هدومهم و هدوم الجيران، انا مش معترض والله انا بس اللي تاعبني ان شقتنا في الدور التاسع و مفيش اسانسير
و دي تالت مره اطلع و انزل ( صح بكلمكوا من علي السلم) يرضي مين ده يا بشر
انا من اللي بشوفه ده واخد قرار اني ابقي سينجل طول عمري ( محدش يعيط لو سمحتوا)
بعيدا عن الرغي الكتير خلاص اشتريت كل الحاجات اللي عايزينها و مش عايزينها و فضيت شنطتي خلاص و دخلنا ننام علي وعد اننا نصحي 6 نشوف الشروق
و ده اللي حصل يا جماعه ظبطت موبايلي و صحيت 6 و قلت اروح اصحي القوم اللي معايا ، صدقوني مش ببالغ لو قلت انهم في غيبوبة ( اللي هيقولي تعبانين من السفر هقوله ما انا كمان تعبان هيقولي بدري 6 هقوله هما اللي طلبوا )
خلاص اللي حصل بس خليكوا شاهدين اني مش هصحي  حد 6 تاني،شفت الشروق من البلكونه طبعا ( وقفه البحر دي للبنات) و دخلت نمت الساعه 8
*الساعه 9:00
_ احمد (امي)
_احمااااااااااد (ياسمين)
_ خالو خالو خالو خالو( ده بندق و مع كل خالو بيقولها في نطه علي ضهري )
_ نعم، في ايه
_ اصحي بقي كل ده نوم
_ no comment عشان لو انا comment هقول كلام مش لطيف
و فطرنا و نزلنا نروح اول شاطي و تقريبا كان اسمه العوام
_ يا بشوات الشمسيه ب 100 جنيه و الكراسي ب 40
_ ادفع يلا يا احمد (امي)
_انا:😑😑😑
_ يلا يا احمد (ياسمين)
_ انا:😑😑😑
_ هتدفع ولا ايه يا باشا
(شكلها رحله بدأت من اولها)
دفعت ولسه هقعد علي اول كرسي
_ لأ يا احمد اقعد علي الرمل يا ابني
_ ليه يا امي
_ الكراسي علي قدنا انا و اختك و بندق و الشنطه( امي جايبه للشنطه كرسي )
بعدين الرمل يا حبيبي مفيد ليك مش انت دكتور و عارف ( والله انا قربت انسي اني دكتور)
يلا خلاص هنقعد على الرمل
_ خالو خالو خالو خالو خالو خالو
_ ما ترد على بندق يا احمد
_ مش سامع
_ عجبك كده يا ماما
_ عايز ايه يا حبيب خالو 😤😤
_ نزلني البحر
_ ما تنزل مع ماما
_ لأ، ماما قالت لي انزل معاك
جيت ابص ع ياسمين لقيتها هي وامي بيعيدوا نفس مشهد امبارح : ماسكين كيس اللب و السوداني و كوبايات شاي معرفش جت منين و قاعدين بيتفرجوا على البحر
( طب انت كقارئ لو مكاني هتعمل ايه)
نزلت  البحر مع بندق
_ اشيلك و ارميك في البحر زي العيال دي يا بندق ( اهو تغرق و اخلص)
_ لا
_ طب ما تيجي نعوم جوه شويه
_ لا
_ طب تيجي اعرفك علي العيال اللي هناك تلعب معاهم
_ لا ، انا طالع بره
_ يا ابني احنا لسه نازلين
_ لا انا طالع
بصراحه سبته و قلت فرصه مشي افضل اعوم شويه و صدقنى لو قلت لك كانوا احلي 5 دقايق في الرحله كلها
هتقولي اشمعنا 5 دقايق، هقولك لاني لقيت ياسمين و امي بيلقوا عليا نظرات داعش ( حلوه يلقوا دي) فقلت اطلع بكرامتي بدل ما اغرق مكاني و لسه هطلب الفوطه
_ بقي انت عايز تغرق ابني يا احمد
_ و انتي عرفتي منين قصدي ايه الكلام اللي بتقوليه ده
_ اومال ليه بندق بيقول كده
_ 😡😡😡😡 ( الواد بياكل بعد ما لبسني في حيط)
_ حماده ( ده صوت امي و بتقول حماده ربنا يستر)
_ ايوه يا ست الكل( رحمتيني من ايد امنا الغوله)
_ تعالي اقعد خلي بالك من بندق و الشنطه عشان انا و اختك نازلين البحر شويه
_ طب ما تاخدي بندق معاكي
_ لا هو تعب و هينام
_ ماشي
عارف الشويه اللي قالت عليهم بقالهم 3 ساعات و لسه مخلصوش
و بندق اللي قالت هينام قاعد صاحي عمال ينشر سخافته في المكان
(موبايلي بيرن برقم غريب)
_ ايوه يا استاذ احمد اخبارك ايه ( ايه الصوت الجميل ده)
_ تمام الحمد الله 😊😊
_ و اخبار رجل 👞 حضرتك ايه ( ابص علي رجلي الاقيها زي الفل)
_ رجلي كويسه و بتسلم عليكي
_ هي مين دي
_ امي
_ استاذ احمد
_ مين معايا
_ حضرتك انا المسئوله عن الاجازه اللي حضرتك قدمتها عشان رجلك  اللي اتجزعت 😈😈
_ اه اه 🙊 هي فعلا  تعباني اوي
_ خلاص تمام يا ريت حضرتك لما تقوم بالسلامه تيجي علي مكتبي عشان تخلص الاوراق و تقطع الاجازه
_ طب ممكن اعرف مكتب استاذه مين
_ انسه احلام
_ 😂😂😂😂