دكتور احمد مشاكل

يوم نفسي اعمله skip

الفصل ده او الحكايه دي كان المفروض ينزلوا امبارح لان ببساطه احداثهم حصلت امبارح و امبارح ده يوم مميز 😅😅
هتسألني مميز ليه، هقولك امبارح كان 14 فبراير ، بالظبط كده عيد الحب😒😒
و اليوم ده لواحد سينجل زيي ملوش غير معني واحد و هو ان الشوارع هتكون زحمه ( و حمراء) يعني هوصل شغلي متأخر يعني مش كفايه اني بصحي من نومي علي صوت سماعيل ( هعرفك عليه بعدين) بدل ما اصحي علي morning text لأ كمان اوصل شغلي متأخر
نزلت من البيت و كما توقعت المواصلات و الشارع زحمه مما اضطرني اني اروح المستشفى بتاكسي و لواحد مفلس زي حلاتي  ف التاكسي ده رفاهية مبتحصلش خالص never
يعني عيد الحب جاي عليا بخساره من كل ناحيه ( مش كنت ارتبطت احسن اهو بدل ما ادفع علي تاكسي كنت ادفع علي هديه و اهو كان هييجي لي هديه انا كمان)
وصلت شغلي و انا مش طايق اي حد و اللي كمل اني لقيت حاتم خارج بدري و معاه شنطه هدايا ( حتي حاتم حقنه مرتبط و انا قاعد كده) بس يمكن للسنجله ميزه اني عايش براحتي محدش بينكد عليا (غير امي) و لا حد بيسال انت فين و بتعمل ايه كأني مقفوش تحري، الحمد الله اني سنجل
كلمت ست الكل في التليفون اطمن عليها و    صدمتني انها رايحه تزور خالتى و مش عايزاني اروح معاها ( حتي انتي يا ست الكل بعتيني)
واضح يا جماعه ان انا فقري و لكن مش هيأس ، بعد الشغل قلت اروح اي كافيه اتفرج علي الشباب و انم عليهم شويه ( اه احنا الولاد بننم بس علي خفيف)
بصوا هو في حواليا 7 ترابيزات كلهم couples ف انا همشي معاكم واحده واحده ننم سوا و نشوف اذواقهم في اختيار المشروبات اللي بتعكس شخصياتهم ( ايه الكلام المجعلص ده)
1) ترابيزه المتزوجين 
بالظبط كده قاعد عليها 2 متجوزين هتسأل عرفت منين هقولك من بوز الراجل مفيش راجل يكشر كده الا بعد الجواز  (معروفه ) طالبين 2 قهوه مظبوط و عمالين يتخانقوا يروحوا عند ام مين الاول هو عايز امه و هي عايزه امها (و انا عايز البوكس ييجي ياخدهم و نخلص)
2) ترابيزه وكيل النيابة
عليها قاعد بنت قمر شبه إيل فانينغ قصادها حاجه شبه احمد السقا مش في شكله آبسلوتلي بل في الساسبنس اللي عايش فيه مختار اخر ترابيزه في الكافيه تقريبا بتطل علي الحمام 🤢🤢  ( قال يعني خايف عليها) و ماسك هو المنيو و مصمم يختار لها في الاخر جاب لها ميلك شيلك عافيه و جاب لنفسه قهوه ساده( قال يعني كده الواد جامد) و البنت قاعده ساكته تقريبا امها ربتها علي مبدأ ( قوه المرأة في ضعفها) بس في الحاله اللي قدامي ده مش ضعف دي خيبه 😜😜
3)ترابيزه ال social media
ابتدت القعده الاول ببنت قاعده لوحدها ماسكه كتاب عامله نفسها بتقرا فيه و عنيها علي الباب ، هي اكيد مستنيه حد  بس شكلها دي اول مقابله و اللي اكد لي كده ملامح الذعر اللي اترسمت علي وش الشاب اللي سلم عليها( هو تقريبا بيحاول يتعرف على شكلها من غير الفلتر) انا شايف الولد بيتلفت حواليه مستني يطلع له الكاميرا الخفيه او يطلع اللي  قدامه رامز جلال متنكر 🙈🙈 انا لو منه اسيب الهديه و عصير المانجا و اطلع جري
4)ترابيزه فقع المراره
قاعد عليها عصفورين الحب الجميل و دول مفيش مشاك ما بينهم قاعدين لازقين في بعض و ايديهم مشبوكه و طالبين كوبايه عصير فراوله واحده  و 2 شاليمو مش بخل منهم لا بس لانهم متشاركين في كل حاجه و صدقني المحن الكتير ده بيفقع لي مرارتي حرفيا
5)ترابيزه الدراما
قاعد عليها كائنين لونهم احمر مش هدوم لأ ده وشهم هو اللي احمر من كتر الخناق (هو المفروض ده عيد الحب) طالبين 2 كان بيبسي و كل واحد ماسكه و عايز يحدفه علي التاني بس اللي لفت نظري جمله قالتها البنت تريليون مره في الدقيقه
* يعني انت مرتاح كده 🙂* و هو يرد عليها * يعني انتي عايزه ايه دلوقتي 😡*
ايه المناقشه المعوقه دي جاتهم داهيه هما الاتنين صدعوني 😅😅
6)ترابيزه علي باب الله
قاعد عليها ولد و بنت بيتكلموا في كل المواضيع لابسين لبس عادي مافيهوش احمر خالص بيضحكوا و يهزروا تحسهم صحاب و دول ما بيشربوش دول بيدخلوا علي الاكل علي طول
7) ترابيزه المخطوبين
و الله الاحداث اللي بتحصل علي الترابيزه دي ممكن تتعمل في كتاب و يتسمي ( ليه العريس بيطفش)
حضرتك دول طول الوقت قاعدين بيتكلموا في السيراميك و دهان الحيطه و فلوس النقاش و عفش الشقه و المفرش الاورجانزا و اقصي حاجه رومانسية حصلت انه قالها استريحي انتي و انا هروح اشتري النجف مكانك
( يا رب يا شيخ اشوفك متعلق في النجفه زي حسن الرداد و متعرفش تنزل ابدا) 
طبعا بعد المناظر العجيبة دي كان لازم اتقفل من الحب و الارتباط و اكره عيد الحب ( الجحيم الاحمر) و احمد ربنا اني لسه بعقلي و محافظ علي سنجليتي
اما اروح اشتري 2 كيلو موز افاجأ بيهم امي بلا هدايا بلا بتاع😂😂😂