دكتور احمد مشاكل

افتح الباب يا احمد !!

عزيزي القارئ ( يااااه كبرت يا اما و بقيت بقول عزيزي القارئ...هيييه دنياا! )
حلوه عزيزي القارئ دي، محسساني اني مهم و لابس بدله و اسمي محسن ( ايه الرغي ده كله، يلا ندخل في الموضوع)
عزيزي القارئ من مزايا يوم الاجازه عند اي مواطن انه بيصحي متأخر و بيفطر فطار حلو و له الرفاهية انه ميعملش اي حاجه ان شاءالله يقعد طول اليوم في السرير ( عادي😂)
بس الامهات مش مقتنعين بكده و مسمعش حد يعترض لأن فعلا كل الامهات بيستغلوا يوم اجازه اولادهم اسوأ استغلال 😢😢
و لأني بحب اثبت كلامي بالمواقف تعالوا معايا نشوف.......
_ حاسب توقع البلتكانه 😡😡
_ بلتكانه ايه يا امي ، ده انا واقف علي اخر درجه علي السلم ، انتي المفروض تخافي عليا مش علي البلتكانه
و بعدين كان لازم تغسلي الستاير يوم اجازتي، ما تعمليها و انا في الشغل
_ لا يا راجل، انت عايزني كنت اطلع علي السلم ده لوحدي و اتعب في شغل البيت ده كله لوحدي
اومال انا كنت بأكلك و بشربك ليه
( انا حاسس انها هتدبحني علي العيد الكبير بعد الجمله دي )
ترررن ترررن ترررن 🚪
_ انزل يلا افتح الباب
_ ما تفتحي انتي يا امي، ما انتي تحت
_ هو مش انت الراجل هنا، لازم تفتح انت
( مقنعه اوي الست دي)
افتح الاقي محصل الكهرباء
_ 300 جنيه حضرتك
_ امي، فين فلوس الكهرباء
_😑😑😑 (ايه الصمت الرهيب ده)
_ يا حجه
_ 😑😑😑
( شكلي هدفع انا)
_ اتفضل حضرتك، و يا ريت متجيش تاني يوم الاجازه
_ !!!!؟؟ ( الراجل مصدوم 😅)
يلا يا احمد عشان نلم الهدوم ( اللي عاجبني في امي ثقتها الزايده اللي هي ميكس ساويرس علي ابو هشيمه)
دخلت لميت الهدوم معاها و كالعاده دبستني في هدومي انظمها و ارصها في الدولاب
ترررن ترررن ترررن 🚪
( طب اروح افتح و لا مفتحش، اعمل ايه اعمل ايه...حد يقولي اعمل ايه 🎧🎼)
_ انت يا ابني، سايب الباب يخبط و عمال ترقص ، ابني اتجنن يا جدعان بيرقص من غير اغانى
انت لسه واقف هنا و الباب هيتخلع
رحت افتح الباب و انا حاطط ايدي علي قلبي قصدي علي جيبي و خايف لا ادفع تاني
_ ايوه
_ مع حضرتك محصل الغاز يا افندم
( هما ليه كلهم جايين في يوم واحد و اشمعنا يوم اجازتي )
_ يا مامااااااااا(صدقني بعلي صوتي علي الاخر لدرجه ان الراجل قعد يضحك عليا، له حق ما شكلي عامل زي العيل اللي بيدور علي مامته في المولد)
_ يا امي، يا ست الكل
_ 😑😑😑( نفس الصمت اللي فات)
يا عيني علي مرتبي اللي ملحقتش افرح بيه
و روحت دافع
_ و انت كمان متبقاش تيجي يوم اجازتي
_ !!!؟ 🙄🙄
و قفلت الباب و لسه هتلفت لقيتها في قفايا واقفه وقفه مخبرين ( بتظهر و تختفي بمزاجها 😕😕)
_ يلا يا احمد عشان هنع..
_ باااااس ✋✋
انا مش هعمل حاجه
انا هروح عند امي قصدي عند اختي لا تقولي اعمل و لا ما تعملش ( بصوت ماجد الكدواني)
_ خلاص روح يا حبيبي  ، المركب اللي تودي ، بس اعمل حسابك مش هفتح لك لما ترجع بليل 😈
_ لأ انا هبات هناك ( انا ايه اللي عملته في نفسي ده، انا كنت بهزر بس )
وصلت عند اختي بس لفت نظري ان قدام العماره في انوار و كراسي و حد مشغل اغانى الظاهر في خطوبه او فرح ( اعوذ بالله بعد الشر عليا)
فضلت اتسرسب وسط الزحمه لحد ما وصلت بالسلامة لشقه اختي و خبطت و ظهرت لي ياسمين ، لمحت ابنها بندق وراها ف قلت اعمل فيها انه واحشني و اني جاي ازورهم ( مش جاي مطرود😢)
فتحت سبرينت من بتوع احمد فهمي بتاع الاهلي لما مش بيهمه هو معاه الكره و لا لأ بس بينطلق
لكن الواد بندق بص لي بصه" ايه خالو العبيط ده " و كسفني ( تحس انه واخد الرزاله حقن 💉💊)
داريت علي كسفتي و رحت ارغي مع اختي لحد ما جه بندق
_ ماما، ماما
_ انا جعان يا ماما
_ لسه مجهزتش الاكل يا بندق ، روح هات لك سندوتشات من بره (عشان مصدعكش كل شويه بنفس الكلام، احب اعرفك ان مشهد الاكل من بره ده اتكرر انهارده ييجي عشرين مره، انا عرفت دلوقتي امي  ليه بتاخد اكل كتير في المصايف و احنا مع اختي 😳😳)
و يا دوبك هو فتح الباب عشان ينزل و انا رحت سامع
" يا دبله الخطوبه عقبالنا كلنا "
(هو اصلا لسه في حد في زماننا بيشغلها )
_ خطوبه مين دي يا ياسمين
_ دي خطشوبه البت مديحه الحايح اللي في التاني علي الواد اسلام اللي في الرابع
شايف الناس ازاي بتسمع كلام اهاليها و بتفرحهم مش انت اللي.......( بعد ساعتين اكتشفت ان كل الكلام ده عشان عايزاني اخطب ، ما كانت تسألني علي طول و انا اقولها لأ برضه 😂😂)

ترررن ترررن ترررن 🚪
_ افتح يا احمد
_ 😑😑😑 ( بحاول اقلد امي)
عملت عبيط لحد ما بندق هو اللي جه فتح بس علي حظه ابن المحظوظه حد سلمه طبق و مشي
_ بندق، يا حبيب خالو
ايه الطبق اللي معاك ده ( تمثيلي فاشل انا عارف)
_ ده كاتوه ( جاتوه) بعتاه مامت مديحه
_طب هات حته
_ لأ ، و جري خد الطبق و دخل اوضته
( يا ابن الطفسه 😟)
بعد ساعتين
ترررن ترررن ترررن 🚪
_ افتح الباب يا احمد
_😑😑😑😑
انا مش صامت تناكه بس البت ياسمين بقالها 4 ساعات بتحضر الغدا ( اللي هو مكرونه بصلصه اصلا) ف أنا قاعد بيغمي عليا في الصاله 🤕🤕
جه البتاع اللي عامل نفسه طفل و فتح الباب
نفس المشهد اللي حصل من شويه بالظبط و برده خد الطبق و جري ( كان كبسه من عند ام اسلام )
ف أنا قررت المره الجايه انا اللي هفتح و قلت الكلام ده لياسمين و بندق  ، بس معرفش ليه يا أخي الساعه بقت 1 بليل و الباب مش راضي يخبط ابدا 😂😂
( انا عندي احساس اني انا فقري😌😌)
ترررن ترررن ترررن 🚪
يا فرج الله، اخيرا خبط
فتحت الباب لقيت بتاع الدليفري و معاه بيتزا 🍕🍕  و بيقول لي...
_ الاوردر ده لحضرتك
_ واضح انك غلطت في الشقه، محدش طلب حاجه ( مين ده هياكل بيتزا الساعه 1 بليل  )
_ لا يا فندم مش دي عماره**شارع** شقه**
_ ايوه هي ، طب الاوردر بإسم مين
_  استاذ مروان حمدى
_ !!!؟ ( تعرفوا حد بالاسم ده 🤔🤔 ، صدقني قعدت دقيقتين علي ما جمعت ان مروان ده يبقي اسم النبي حارصه بندق)
و لسه هحط ايدي في جيبي عشان احاسب نطت في دماغي فكره شريرة
آن آن آن آه 🥁🥁
_ طب خلاص هات الاوردر و انا هبعت لك استاذ مروان يحاسب 😈
و فعلا اخدت العلبه و حطيتها في البلكونه و قفلت عليها و رحت خبطت علي مروان قصدي بندق و عرفته ان في حد بيسأل عليه بره 😂😂
و جريت علي البلكونه و قفلت عليا و انا بقول
         " اللي يحصلني يكسرني "
و سامع صوت بندق بره و انا عماله اكل و اضحك ضحكه ابو لهب
      هاهاهاهاهانياهاهاها 😈😈